1. Israelitanakar Egiptot irpsunkäna ukhajj ¿kunjamsa Moisesajj Jehová Diosar confiyatap uñachtʼayäna?

 HEBREOS libron Diosar confiyir walja jaqenakatwa parli. Jupanakat maynïrejj Moisesawa, jupajj taqe chuymaw Jehová Diosar confiyäna, ukajj jiwasatak wali yateqaskañawa (Heb. 3:2-5; 11:23-25). Israelitanakar Egiptot irpsunkäna ukhaw Diosar confiyatap uñachtʼayäna. Faraonarus ejercitoparus janiw ajjsarkänti, Jehová Diosaruw taqe chuym confiyäna, ukatwa israelitanakarojj Mar Rojo qotnamsa wasarnams irpäna (Heb. 11:27-29). Israelitanakat jilapartejja, janiw Jehová Diosan yanaptʼapar confiyjjapjjänti, ukampis Moisesajj confiyaskakïnwa. Ukham lurasajj janiw pantjaskänti, kuna laykutejj Jehová Diosaw israelitanakar manqʼsa umsa churäna, ukhamat wasaran jan jiwapjjañapataki (Éx. 15:22-25; Sal. 78:23-25). a

2. “¿Janit naya Jehová Diosajj uk lurkiristjja?” sasajj kunatsa Jehová Diosajj Moisesar jisktʼäna uk qhanañchtʼam.

² Israelitanakan Egipto markat mistunipjjatapat niya mä maräjjäna ukhajja, Jehová Diosajj aycha churañwa jupanakar arsüna. Moisesajj taqe chuymas Jehová Diosar confiykchïnjja, uka arunakat payachasïnwa, kunjamsa Jehová Diosajj wasarankir walja millón jaqenakar aycha churaspa uk janiw amuykänti. Ukatwa Jehová Diosajj jupar akham sasin jisktʼäna:  “¿Janit naya Jehová Diosajj uk lurkiristjja?” sasa (Números 11:21-23 liytʼäta). Uka textojj hebreo arut qellqatanjja, “Jehová Diosan amparapa” siwa. Ukham sasinjja, Jehová Diosan espíritu santopata jan ukajj chʼamapatwa parlaski. Mä arunjja, Jehová Diosajj akham sasaw Moisesar saskäna: “Kuntï lurañ munkta uk lurañatakejj chʼamanïtwa” sasa.

3. Moisesasa israelitanakas janiw Jehová Diosar confiyjjapjjänti, ¿kunatsa uk yatjjatañasajj wakisi?

³ “Nayatakis familiajatakis ¿kunatï jakañatak wakiski uk Jehová Diosajj churpachïtaniti?” sasin ¿jisktʼasirïtati? Ukhamächi janisa, kunatsa Moisesasa israelitanakas Jehová Diosan yanaptʼapar jan confiyjjapjjäna ukwa yatjjatañäni. Jehová Diosajj yanaptʼapunistaniwa sasin jukʼamp confiyañatakejj mä qhawqha textonakatwa yatjjataskarakiñäni.

¿KUNSA MOISESANA ISRAELITANAKAN SARNAQÄWINAKAPAJJ YATICHISTU?

4. ¿Kunatsa walja israelitanakajj Jehová Diosan yanaptʼapat payachasipjjäna?

⁴ ¿Kunatsa walja israelitanakajj Jehová Diosan yanaptʼapat payachasipjjäna? Israelitanakasa yaqha markankir jaqenakas Egipto markatwa mistupjjäna, Suma Oraqer puriñkamajj mä qhawqha tiempow wasarnam sarapjjarakïna (Éx. 12:38; Deut. 8:15). Yaqha markat jutir jaqenakajja, maná manqʼa manqʼañatwa quejasiñ qalltapjjäna, israelitanakats waljaniw ukham quejasiñ qalltapjjarakïna (Núm. 11:4-6). Egipto markan utjkäna uka manqʼañanaks wal munapjjäna. Waljanin ukham quejasipjjatapatjja, Moisesajj jupa pachpas uka aycha churañapäkaspa ukhamwa amuyäna (Núm. 11:13, 14).

5, 6. Israelitanakan yaqha markankir jaqenakjam tukjjapjjatapajj ¿kunsa yatichistu?

⁵ Yaqha markankir jaqenakajj janiw yuspärasir chuymanïpkänti. Israelitanakajj uka jaqenakjamaw tukjjapjjarakïna. Niyakejjay jan yuspärasir jaqenak taypinkstanjja, jiwasajj jupanakjamaw tukjjaraksna, kunanaktï Jehová Diosajj churkistu ukanakampis janiw kusisitäjjsnati. Jehová Diosar janïr uñtʼkasajj kunanakatï utjkistäna ukanakwa munjjaraksna jan ukajj kunanakatï mayninakan utjki ukanakats envidiasjjaraksnawa. Ukampis kunanakatï utjkistu ukanakamp kusisitak jakasiñ yateqañäni ukhajja, jukʼamp kusisitäñäniwa.

⁶ Israelitanakajj kuntï Jehová Diosajj jupanakar arsuwaykäna uk janiw armapjjañapäkänti. Suma Oraqer puripjjäta ukhaw jilarkir sumanak churapjjäma sasaw Diosajj israelitanakar säna. Janiw wasaran ukanak churañapäkänti. Jiwasampejj ukhamarakiwa, kunanakatï akapachan jan utjkistu ukanakat llakisiñat sipansa, kunanaktï Jehová Diosajj machaq mundon jiwasar churañ arsuwayki ukanakatwa lupʼiñasa. Kawkïr textonakatï Jehová Diosar jukʼamp confiyañatak yanaptʼkistu ukanakats lupʼiñasarakiwa.

7. ¿Kunatsa Jehová Diosan yanaptʼapat jan payachasksna?

⁷ Inas akham sasin jisktʼassna: “‘¿Janit naya Jehová Diosajj uk lurkiristjja?’ sasajj ¿kunatsa Jehová Diosajj Moisesar jisktʼpachäna?” sasa. Inas Diosajj ak amuytʼayañ munchïna: chʼamapajj jan tukuskiriwa, kawkjankkasas chʼamapampejj yanaptʼakispänwa. Ukhamajj israelitanakajj wasarankasipkchïnsa, walja aychwa jupanakar churaspäna. Markapajj kawki cheqankaskpänsa, Jehová Diosajj jupanakar yanaptʼañatak ‘chʼamanïtapwa’ uñachtʼayäna (Sal. 136:11, 12). Ukhamajj mä jan walin uñjasiñäni ukhajja, Jehová Diosajj kawkjankaskañänis yanaptʼapunistaniwa sasaw taqe chuym confiysna (Sal. 138:6, 7).

8. Walja israelitanakjam jan pantjasiñatakejj ¿kunas yanaptʼistaspa? (Dibujo uñjjattʼarakïta).

 ⁸ Jehová Diosajj kuntï arskäna uk phoqänwa, walja khullu jamachʼinakwa markapar apayanïna. Ukampis uka milagropat janiw Jehová Diosar yuspärapkänti. Antisas jupanakatak llakisisajja, mä uru chikataniw khullunak jan saytʼas apthapisipkakïna. Jehová Diosajj “manqʼañanak wal munir” uka jaqenakatakejj colerasïnwa, ukatwa jupanakar castigäna (Núm. 11:31-34). ¿Kunsa ukajj jiwasar yatichistu? Jiwasatakik taqe kuns munañat amuyasiñasawa, qollqenïskstansa jan ukajj pisinsa jakaskstanjja, “kunatï valoranïki ukanak alajjpachar imkata[ñaw]” jiwasatakejj jukʼamp importantëñapa. Ukatakejja Jehová Diosampisa Jesusampis jukʼamp sum apasiñatakiw chʼamachasiñasa (Mat. 6:19, 20; Luc. 16:9). Ukhamtï lurañänejja, Jehová Diosaw kunanaktï necesitktan ukanak churistani, janiw ukat payachaskañäniti

9. ¿Kuna toqets janipun payachasksna?

⁹ Jichhürunakan Jehová Diosajj servirinakapar yanaptʼaskakiwa. Ukhamajj ¿janiw qollqesa manqʼañas faltkistaniti sañti ukajj muni? Janiw uk sañ munkiti. b Qollqes manqʼas faltkchistanejja, Jehová Diosajj janipuniw jaytjkistaniti. Kuna jan walinakans uñjaskchiñänejja, jupaw aguantañatak chʼam churistani. Jichhajj kunjamsa Diosan yanaptʼapar confiyatas uñachtʼaysna ukwa aka pä toqet uñjaskañäni: 1) qollqe toqet pistʼat uñjaskasa, 2) jilïrëjjasin kuna qollqempis jakasiñäni uk amtkasa.

 QOLLQE TOQET PISTʼAT UÑJASKASA

10. ¿Kuna jan walins qollqe toqet uñjassna?

¹⁰ Akapachan tukusiñap jukʼamp jakʼachasisinkipanjja, jukʼamp qollqet pistʼañaw utjaspa. Politican jan waltʼäwinak utjatapatsa, guerranaka, desastres naturales ukanak utjatapatsa jan ukajj machaq pandemianak uñstatapats inas trabajossa, kunanakatï utjkistu ukanaksa, jan ukajj utass aptʼassna. Ukhaman uñjasisajj inas jakasktan uka lugaran yaqha trabajo thaqañasächispa, jan ukajj kunatï jakañatak wakiski ukanak jikjjatañatakejj yaqha lugarar familiasamp sarjjañajj wakischispa. Amtanakasamp Jehová Diosar confiyatas uñachtʼayañatakejj ¿kunas yanaptʼistaspa?

11. Qollqet pistʼat uñjasktan ukhajj ¿kunas yanaptʼistaspa? (Lucas 12:29-31).

¹¹ Llakinakas Jehová Diosaruw yatiyañasa, uk lurañajj wali importantewa, wal yanaptʼarakistu (Prov. 16:3). Suma amtanakar puriñatakejj Jehová Diosar yatiñap mayipjjañäni, ‘jan jukʼamp llakisjjañatakisa’ sumak jikjjatasiñatakis yanaptʼap mayipjjarakiñäni (Lucas 12:29-31 liytʼäta). Kunanakatï utjkistu ukanakamp kusisit jakasiñatakis yanaptʼap mayipjjarakiñäni (1 Tim. 6:7, 8). Qollqet pistʼat uñjasisajj kunas yanaptʼistaspa ukwa Bibliat apstʼat qellqatanakasan yatjjatapjjañasa. Ukhamarus videonakasa jw.org cheqan utjki uka yatichäwinakas waljaniruw yanaptʼawayi.

12. Familiapatak mä suma amtar puriñatakejj ¿kunanaksa mä jilatajj jisktʼasiñapa?

¹² Yaqhepanakajj jayankki uka trabajonakwa katoqasipjjäna, ukatwa familianakapat jayar sarjjapjjañaparakïna, ukampis uka amtar puripjjatapajj jan walïtapwa amuyapjjarakïna. Janïr mä trabajo katoqkasajja, janiw qhawqha qollqsa ukan ganañäni ukak lupʼiñasäkiti, jan ukasti ukajj Diosar serviñan yanaptʼistaniti janicha uks lupʼiñasarakiwa (Luc. 14:28). Akham sasin jisktʼasim: “Nayatï esposojatsa jan ukajj esposajats jayankirista ukhajj ¿kunas pasaspa? Tantachäwinakar sarañatakisa, predikir sarañatakisa, jilat kullakanakampïñatakis ¿tiempojajj utjitaniti?” sasa. Wawanakanïsta ukhajj akham sasin jisktʼasiñamajj wakisipuniwa: “Jayankasajj ¿kunjamsa wawanakajarojj ‘kunjamtï Jehová Diosajj munki ukarjam cheqañchasa ewjjtʼasa uywiristjja’?” sasa (Efes. 6:4). Mä amtar purkäta ukhajja, Jehová Diosan amuyuparjamaw kuns amtañama, janiw kuntï Bibliar jan creyir familiaranakamasa amigonakamas sapki ukarjam amtañamäkiti. c Asia occidental toqen jakir Tony jilatarojja, yaqha markan trabajiñapatakiw kunayman trabajonak churañ munapjjäna, walja qollqe pagañwa munapjjarakïna. Ukampis uka toqet orasisasa esposapamp parlasasa, uka trabajonak janiw katoqkänti, gastonakap jukʼaptayañwa amtarakïna. ¿Uka amtar puritapat Tony jilatajj kamsisa? Jupajj akham siwa: “Waljaniruw Jehová Diosar uñtʼapjjañapatak yanaptʼawayta, wawanakajas Diosar wal munasipjjaraki. Jiwasatï Mateo 6:33 textorjam sarnaqañäni ukhajja, Jehová Diosaw cuidaskistani, ukwa yateqawayapjjta” sasa.

JILÏRËJJASIN KUNA QOLLQEMPIS JAKASIÑÄNI UK AMTKASA

13. Jilïrëjjañäni ukhatak qollqe imasiñatakejj ¿kunsa jichhatpach lursna?

¹³ Jilïrëjjasin kuna qollqempis jakasiñäni uk amtkasajja, Jehová Diosan chʼamapar confiyatasajj yantʼataw uñjasispa. Jutïrin gastonakasatak qollqenïñatakejj trabajiñasatakiw Bibliajj chʼamañchistu (Prov. 6:6-11). Jutïritakitï mä jukʼa qollqejj imasiñjamächi ukhajj imasiñasawa. Cheqas qollqejj  yanaptʼistaspawa, ukampis janiw qollqejj jakäwisan nayrankañapäkiti (Ecl. 7:12).

14. ¿Kunjamsa Hebreos 13:5 textojj jilïrëjjasin kuna qollqempis jakasiñäni ukat jan sint llakisiñatak yanaptʼistu?

¹⁴ ‘Maynejj janitï Dios nayraqatan qamirïkchejja’, walja utjirinïtapajj inamayakiwa sasaw Jesusajj mä uñachtʼäwimp qhanañchäna (Luc. 12:16-21). Kunas qharürojj jakäwisamp pasani uk janiw yatktanti (Prov. 23:4, 5; Sant. 4:13-15). Jesusajj jupan discipulopäñ munapki ukanakajja, taqpach utjirinakap apanukuñatakejj dispuestokïpjjañapawa sasaw säna (Luc. 14:33). Nayrïr patak maranakanjja, Judeankir cristianonakajj uk lurañatakejj chuymatpachwa amtapjjäna (Heb. 10:34). Jichhürunakanjja, walja jilat kullakanakaw politicar jan apoyapjjatapat trabajopsa jan ukajj utjirinakaps aptʼasiwayapjje (Apoc. 13:16, 17). Jupanakajj taqe chuymaw Jehová Diosan aka promesapar confiyapjje: “Nayajj janipuniw jaytanukkämati, janipuniw apanukkämasa” sasa (Hebreos 13:5 liytʼäta). Kunanakampis jilïrëjjasajj jakasiñäni ukanakañïñatakiw chʼamachastanjja, ukat kuntï jan suyktan ukatï pasanejja, Jehová Diosaruw confiyañasa.

15. ¿Cristiano awk taykanakajj kuna amtampis wawanakapar uywapjje? (Fotonak uñjjattʼarakïta).

¹⁵ Yaqhep markanakanjja, jilïrëjjapjjä ukhajj wawanakaw uñjapjjetani, qollqempis yanaptʼapjjetani sasin amuyasaw wawanakanïpjje.  Ukampis Bibliarjamajj awk taykaw wawanakapar uñjapjjañapa (2 Cor. 12:14). Cheqas awk taykanakajj jilïrëjjasajja, qollqe toqensa yaqha toqenakans wawanakapamp yanaptʼatäñwa munapjjaspa, wawanakapajj taqe chuymaw uk lurapjje (1 Tim. 5:4). Cristiano awk taykanakajja, janiw wawanakaparojj jupanakar uñjapjjañapatak amtampi uywapkiti, jan ukasti Jehová Diosar servipjjañapatakiw yanaptʼapjje, ukaw jupanakar wal kusisiyi (3 Juan 4).

16. ¿Kunjamsa awk taykanakajj wawanakapan jutïrin trabajipjjañapatakejj yatichapjjaspa? (Efesios 4:28).

¹⁶ Awk taykanaka, wawanakamar trabajiñ yatichkasajja, kunjamsa Jehová Diosar confiyapjjta uk uñachtʼayapjjam. Wal trabajiñajj kunja wakiskirisa uk jiskʼatpach yatichapjjam (Prov. 29:21; Efesios 4:28 liytʼäta). Wawanakamarojj jilsupkipanwa escuelan chʼamachasipjjañapatak yanaptʼapjjañama. Kunsa estudiapjjani uka toqet suma amtanakar puripjjañapatakejja, Bibliat apstʼat qellqatanakasanwa kawkïr wiñay yatichäwinakas jupanakar yanaptʼaspa uk thaqapjjañama. Predicañatakejj jukʼamp tiemponïpjjañapataki, jan ukajj precursoräpjjañapatakiw wawanakamarojj mä trabaj jikjjatañatak yanaptʼapjjañama.

17. ¿Kuna toqetsa jan payachasktanjja?

¹⁷ Jehová Diosan servirinakapajja, kunatï jakañatak wakiski ukanak Diosajj churistaniwa, uk lurañatakejj chʼamanirakiwa sasaw confiyapjje. Akapachan tukusiñapajj jukʼamp jakʼachasinkipanjja, Jehová Diosar confiyatasajj jukʼamp yantʼataw uñjasini. Ukampis kunas kunäskpan, Jehová Diosaw kuntï jakañatak necesitktan uk churistani sasin taqe chuym confiyapjjañäni. Kawkjankaskchiñänisa Jehová Diosajj chʼamapampejj yanaptʼapunistaniwa.