Bibliajj mä espejor uñtasitäkaspasa, kunjam jaqëtansa uk uñjañatakis yanaptʼkistaspa ukhamwa Santiagojj qhanañchäna (Sant. 1:22-25). Ukhamajj ¿kunjamsa Bibliajj mä espejor uñtat yanaptʼistaspa?

Diosan Arup wali amuyump liytʼañasawa. Jiwasatï apur apurak espejot uñkatasiñäni ukhajja, kun askichtʼasiñasas wakisi uk janiw amuyasksnati. Biblia liyiñampejj ukhamarakiwa, jiwasatï apur apurak Biblia liytʼañäni ukhajja, janiw kunan mejorañasas wakisi uk amuyksnati. Ukatwa wali amuyump liytʼañasa.

Mayninakar uñchʼukiñat sipans kunan mejorañasas wakisi uk amuyapjjañäni. Espejot uñkataskasajj awisajj mayninakaruw espejot uñjsna, ukat kun askichtʼasipjjañapas walïspa ukwa uñjaraksna. Biblia liytʼkasajj ukhamarakiw kunansa mayninakajj mejorapjjañapa ukanak amuysna. Ukampis uk lurasajj kunansa jiwasajj mejorañasa uk janiw amuyañ puedkañäniti.

Amuytʼirïpjjañäni. Espejot uñkatasisatï kunanakas jiwasat jan gustkistu ukak uñjasksna ukhajja, desanimasjjsnawa. Biblia liytʼkasin jan uk pasañapatakejj amuytʼirïñasawa, kuntï Jehová Diosajj maykistu ukat sipans janiw jiwas pachpat jukʼamp suyañasäkiti (Sant. 3:17).