1. ¿Kunatsa Pablojj jakäwipat amuytʼasajj kusisïna?

 APÓSTOL PABLOJJ jiwañap jakʼankjjatap yatkchïnsa, kunanaksa jakäwipan lurawayäna uk amtasajj wal kusisïna. Ukatwa akham säna: “Tʼijuñansa tukuyañkamaw tʼijuwayta, kuna yatichäwinakarutejj nayajj creykta ukarjamaw sarnaqawayarakta” sasa (2 Tim. 4:6-8). Pablojj Jehová Diosar sirvkasajj suma amtanakaruw purïna, ukatwa Diosajj nayatak wali kusisitäpachawa sasin confiyäna. Jiwasajj ukhamarakiw suma amtanakar purisajj Jehová Diosar kusisiyañ muntanjja. ¿Kunjamsa uk lursna?

2. ¿Diosar confiyir jaqejj kunjamasa?

² Pablojj jupampita mayni cristianonakampit akham sänwa: “Janiw uñjatas laykojj sarnaqktanti, jan ukasti Diosar confiyatas laykuw sarnaqtanjja” sasa (2 Cor. 5:7). ¿Kamsañs munäna? Bibliajj “sarnaqañat” parlki ukhajja, awisajj janiw kunjamsa mä jaqejj sarnaqe uka toqet parlkiti, jan ukasti kunjamsa jakañ vidapan sarnaqe uka toqetwa parli. Diosar jan confiyir jaqejj kuntï uñjki, istʼki, kunjamsa chuymapan jikjjatasi ukarjamakiw mä amtar puri. Ukampis Diosar confiyir jaqejja, kuntï Jehová Diosajj lurañap munki uk amuytʼasaw kuns amti. Biblian ewjjtʼanakaparjam sarnaqañaw sum jakasiñatak yanaptʼitani sasaw taqe chuym confiyi, jutïrin Jehová Diosajj jukʼampiw bendisitani sasaw confiyaraki (Sal. 119:66; Heb. 11:6).

3. ¿Kunjamsa Diosar confiyas sarnaqañajj yanaptʼistu? (2 Corintios 4:18).

³ Kuntï uñjtan, istʼtan, kunjamsa chuymasan jikjjatastan ukarjamaw awisajj mä amtar purtanjja. Ukampis ukarjamak  wali wakiskir amtanakar pursna ukhajja, jan walinakanwa uñjassna. Kuna laykutejj kuntï istʼtan uñjaraktan ukanakajj janiw confiykañäkaspati, ni cheqäkaspasa. Uñjatas laykuk saranaqañäni ukhajja, janiw Jehová Diosan ewjjtʼaparjamasa ni munañaparjamas amtksnati (Ecl. 11:9; Mat. 24:37-39). Ukampis Diosar confiyas sarnaqañäni ukhajja, kunatï Tatitutak walïki ukarjamaw suma amtanakar pursna (Efes. 5:10). Diosan ewjjtʼanakaparjam sarnaqasajj wali kusisita sumakiw jikjjatasiñäni (Sal. 16:8, 9; Is. 48:17, 18). Diosar confiyasajj wiñayatakiw jakasirakiñäni (2 Corintios 4:18 liytʼäta).

4. Uñjatas laykuti jan ukajj Diosar confiyatas laykuch sarnaqasktan uk ¿kunjamatsa yatsna?

⁴ Uñjatas laykuti jan ukajj Diosar confiyatas laykuch sarnaqasktan uk yatiñatakejja, akham sasaw jisktʼasiñasa: “¿Kunarjamas nayajj mä amtar purtjja? ¿Kuntï uñjkta ukarjamati, jan ukajj Jehová Diosan ewjjtʼaparjamach mä amtar purtjja?” sasa. Aka yatichäwinjja, mä trabajo ajllkasasa, khitimpis casarasiñäni uk amtkasasa, Diosan markapat instruccionanak katoqasas kunjamsa Diosar confiyas sarnaqaskatas uñachtʼaysna ukwa yatjjataskañäni. Ukanakat yatjjatkasajja, suma amtanakar puriñatakejj kuna toqenakats amuytʼasiñasa uks uñjarakiñäniwa.

MÄ TRABAJO AJLLKASA

5. ¿Qhawqsa ganañäni ukarjamakit mä trabajo ajlliñasa?

⁵ Familiasatakisa gastonakasatakis taqeniw mä trabajonïñ muntanjja (Ecl. 7:12; 1 Tim. 5:8). Yaqhep trabajonakan jilpach pagapjje, ukampiw familiapar gastonakamp yanaptʼapjje, mä qhawqha qollqs imasipjjaraki. Ukampis yaqhep trabajonakan menosak pagapjje, ukampiw kunanakatï familiapatak munaski uk alapjjaraki. Ukatwa mä trabajo ajllkasajj qhawqsa ganañäni uk yatiñ munsna. Ukampis ukarjamak mä trabajo ajllisajja, Diosar jan confiyas sarnaqaskataswa uñachtʼaysna.

6. Mä trabajo ajllkasajj ¿kunjamsa Diosar confiyas sarnaqatas uñachtʼaysna? (Hebreos 13:5).

⁶ Jiwasatï Diosar confiyas sarnaqañänejja, ajllkañäni uka trabajojj jupamp sum apasiñatakit yanaptʼistani janicha ukwa amuytʼasiñäni. Akham sasaw jisktʼassna: “¿Jehová Diosajj uñiski ukanakti uka trabajon luräjja? Tantachäwinakatakisa, predikañatakisa, Bibliat yatjjatañatakis ¿jukʼa tiempokit utj-jjetani? ¿Familiajar jaya tiempo jaytañat wakisini?” sasa (Prov. 6:16-19; Filip. 1:10). Ukhamächi ukhajja, trabaj jikjjatañajj chʼamächi ukhas janiw uka trabaj katoqañamäkaspati. Niyakejjay Diosar confiyas sarnaqstanjja, amtanakasajj kunatï jakañatak wakiski uk Diosaw churitani sasin taqe chuym confiyataswa uñachtʼayani (Mat. 6:33; Hebreos 13:5 liytʼäta).

7, 8. ¿Kunjamsa Javier jilatajj Diosar confiyas sarnaqatap uñachtʼayäna? (Foto uñjjattʼarakïta).

⁷ Sudamérica toqen jakasir Javier a jilatajja, Diosar taqe chuym confiyasaw sarnaqäna. Jupajj akham siwa: “Trabajkayäta uka empresan mä suma puesto churañ munapjjetäna, mä ukhampwa pagapjjetaspäna, ukatwa uk solicitayäta” sasa. Ukampis Javier jilatajj precursoräñ wal munäna. Jupajj akham sarakiwa: “Uka pueston katoqayasiñatakejj mä entrevistanïyätwa, janïr sarkasajj orasiyätwa. Kunas nayatak walïspa uk Diosakiw yati sasaw taqe chuym confiyayäta. Trabajojan suma puestonïsajj jukʼampiw ganañ munayäta, ukampis uka trabajotï Jehová Diosar jukʼamp serviñat jarkʼitanejja, janiw iyawskäti sasaw amtayäta” sasa.

⁸ Javier jilatajj akham saskakiwa: “Uka trabajon katoqayasiñatak parlir sarkayäta  ukhajja, niya sapa kutiw jukʼamp horanak trabajiñamajj wakisini sasaw gerentejj sitäna. Diosar servitajat janiw uk lurañ puedkäti sasaw suma arunakamp jupar sayäta” sasa. Javier jilatajj janiw uka trabajo katoqaskänti, ukat pä semana pasatat precursoräjjänwa. Mä qhawqha pajjsinakat yaqha trabajonëjjarakïnwa, mä qhawqha urunakakiw ukan trabajiñapäna. Jilatajj akham sarakiwa: “Jehová Diosajj oracionanakajj istʼitänwa, trabajojajj precursorat serviñatakiw jichhajj yanaptʼitu. Jehová Diosar jukʼamp serviñatakisa, jilat kullakanakampïñatakis jukʼamp tiemponëjjtwa. Ukatak mä trabajonïtajat walpun kusista” sasa.

9. ¿Kunsa Trésor jilatan experienciapat yateqasma?

⁹ Trabajosatï Jehová Diosar serviñatak jan yanaptʼkchistu ukhajj ¿kunsa lursna? Congo markankir Trésor jilatan experienciapat parltʼañäni. Jupajj akham siwa: “Trabajojajj wali sumapunïnwa, ukham trabajonïñ walpun munayäta. Nayra trabajojat sipans pä ukhampwa pagapjjetäna, wal respetapjjarakitäna” sasa. Ukampis Trésor jilatajja, jukʼamp horanak trabajiñ waktʼatap laykojj janiw yaqhep tantachäwinakar sarañ puedjjänti. Trabajopankir masinakapajj empresan kuna jan walinakatï luraskäna ukanak imtʼañapatakejj kʼarisiñapwa mayipjjäna. Uka trabajop jaytjjañsa munkchïnjja, jan trabajonëjjañaw llakisiyäna. ¿Kunas jilatar yanaptʼäna? Jupajj akham siwa: “Uka trabajo jaytjjasajj jukʼa qollqenikiw uñjasiñajäna, ukampis Habacuc 3:17-19 textow Jehová Diosajj janiw jaytjkitaniti sasin amuyañatak yanaptʼitäna. Ukatwa uka trabajo jaytjjayäta” sasa. Jilatajj akham sarakiwa: “Walja jefenakajja, jaqenakajj walja qollqe pagaski ukhajj trabajop jan aptʼasiñatakejj kuns lurapjjakiwa sasaw amuyapjje. Familiapatakisa Diosar serviñapatakis janisay tiemponïpkchinejja, janiw trabajop aptʼasiñ munapkiti sasaw sapjjaraki. Nayajj Jehová  Diosaru familiajar jan jaytatajat wali kusisitätwa. Mä mara qhepatjja, yaqha trabajo jikjjatañatakiw Jehová Diosajj yanaptʼawayitu, ukhamatwa gastonakajatak utjitu, Diosar serviñatakis jukʼamp tiempow utjarakitu. Jehová Diosar serviñ nayrar uchatasat inas jukʼa qollqenik awisajj uñjaschiñäni, ukampis jupaw sum cuidaskistani” sasa. Cheqas jiwasatï Jehová Diosan ewjjtʼanakaparu promesanakapar confiyañäni ukhajja, jupar confiyas sarnaqataswa uñachtʼayañäni, jupajj bendisirakistaniwa.

KHITIMPIS CASARASIÑÄNI UK AMTKASA

10. Casarasiñ amtkasajj ¿kunjamsa maynejj kuntï uñjki ukarjam sarnaqaskatap uñachtʼayaspa?

¹⁰ Casarasiñajj Jehová Diosan mä regalopawa, ukhamajj casarasiñ munañajj walikïskiwa. Mä kullakatï maynir uñtʼañ munchi ukhajja, uka jilatajj kunjam chuymanisa, kunjam uñnaqtʼanisa, kunjamat uñtʼatasa, qollq sumti apnaqe janicha, familiapar uñjañat waktʼi janicha, jupampïsajj kusisitat janicha, taqe ukanakwa amuytʼaspa. b Ukajj walikïskchisa, ukanak amuytʼasajj kuntï uñjki ukarjamak sarnaqaskatapwa uñachtʼayaspa.

11. Khitimpis casarasiñäni uk amtkasajj ¿kunjamsa Diosar confiyas sarnaqatas uñachtʼaysna? (1 Corintios 7:39).

¹¹ Jilat kullakanakajj khitimpis casarasipjjani uk Jehová Diosan ewjjtʼanakaparjampun amtapjje ukhajja, jupajj wal kusisi. Uka ewjjtʼanakat mayajja, maynitï noviañ munchi ukhajj “qʼajjo wayna tiempsa qʼajjo tawaq tiempsa” pasañapawa siwa (1 Cor. 7:36). Yaqha ewjjtʼapasti, mä suma esposöñataki jan ukajj mä suma esposäñatakejj kunjam chuymanïñapsa Jehová Diosajj muni uk sum amuytʼañaw wakisi sarakiwa (Prov. 31:10-13, 26-28; Efes. 5:33; 1 Tim. 5:8). Ukampis jan Testigöki ukatï mä jilataru jan ukajj mä kullakar uñtʼañatak parljjayani ukhajja, jupanakajj 1 Corintios 7:39 (liytʼäta) textonkki uka ewjjtʼaruw istʼapjje, ukanjja maynejj “Tatitun arkiripampikiw casarasiñapa” sasaw qhanañchi. Jupaw sumak jikjjatasiñatakejj yanaptʼistani sasaw confiyapjjaraki, ukhamatwa Diosar confiyas sarnaqasipkaki (Sal. 55:22).

12. ¿Kunsa Rosa kullakan experienciapat yateqasma?

¹² Colombia markankir Rosa kullakat parltʼañäni. Trabajopan jan Testigo mä jaqew jupar uñtʼañatak parljjayäna, kullakajj juparojj uñtʼañ munarakïnwa. Jupajj akham siwa: “Markapankirinakarojj yanaptʼapunirïnwa, janirakiw kuna jan wals lurirïkänti. Munasiñampiw uñjarakitäna, jupajj kunjam jaqempitï casarasiñ munkayäta ukhamapunïnwa, ukampis janiw Testigökänti” sasa. Kullakajj akham sarakiwa: “Niyakejjay jupar munaschiyätjja, janiw jumamp uñtʼasksnati sañajj wali chʼamänwa. Ukhanakajj sapakiw amuyasiyäta, casarasiñwa munarakiyäta, janirakiw Diosan markapan khitirus casarasiñatak uñtʼkayätti” sasa. Rosa kullakajj janiw kuntï uñjkäna ukampik apayaskänti, jan ukasti jan Testigöki ukamp casarasisajj kunjamsa Diosamp sum apasitapar jan waltʼayaspa ukwa amuyäna, ukatwa uka jaqemp janipun parlañ amtäna, antisas Diosar servis wali ocupatäñatakiw chʼamachasïna. Mä jukʼa tiempotjja, Escuela para Evangelizadores del Reino ukaruw invitapjjäna, jichhajj precursor especialatwa serviski. Jupajj akham saskakiwa: “Jehová Diosan bendicionanakap katoqañajj walpun kusisiyitu” sasa. Chuymasan mä kun munañajj utji ukhajja, kuntï Jehová Diosajj munki uk lurañajj chʼamakïspawa, ukampis Jehová Diosan ewjjtʼanakaparjam sarnaqañajj yanaptʼapunistuwa.

 INSTRUCCIONANAK KATOQASA

13. Diosan markapat instruccionanak katoqasajj ¿kunjamsa maynejj kuntï uñjki ukarjam sarnaqatap uñachtʼayaspa?

¹³ Diosar serviñatakejj ancianonak toqe, circuitonak toqe, sucursal toqe jan ukajj Cuerpo Gobernante toqew instruccionanak katoqtanjja. Ukampis kunatsa mä instrucción churapjjestu uk inas awisajj jan sum amuykstanti. ¿Kunsa lurañäni? ¿Uka instruccionajj janjakiw yanaptʼkistaniti sasati amuyañäni? ¿Instrucción churapkistu uka jilatanakan pantjasitanakapakti uñchʼukiñäni? Uk lurasajj kuntï uñjktan ukarjam sarnaqataswa uñachtʼaysna.

14. Instruccionanak katoqasajj ¿kunas Diosar confiyas sarnaqañatak yanaptʼistani? (Hebreos 13:17).

¹⁴ Diosar confiyas sarnaqtan ukhajja, Jehová Diosaw markapar pʼeqtʼaski, kunatï jiwasatak walïki uk jupakiw yati sasaw confiytanjja. Ukatwa instruccionanakaparojj taqe chuym jankʼak istʼtanjja (Hebreos 13:17 liytʼäta). Cheqas istʼasirïsajj congregacionan mayachtʼatäñapatakiw yanaptʼasktanjja (Efes. 4:2, 3). Instruccionanak churapkistu uka jilatanakajj pantjasirïpkchisa, Jehová Diosajj jupanakar istʼatasat bendisipunistaniwa, uk amtapuntanwa (1 Sam. 15:22). Jupatï mä kun askichañ wakisitap amuyani ukhajja, horasaparuw uk askichani (Miq. 7:7).

15, 16. ¿Kunas Kevin jilatarojj Diosar confiyas sarnaqañatak yanaptʼäna? (Foto uñjjattʼarakïta).

¹⁵ Diosar confiyas sarnaqañajj kunjamsa yanaptʼistu uk amuytʼañäni. Perú markan español arsa parlapkchejja, waljaniw yaqha arunak parlapjjaraki. Ukanakat mayajj quechua aruwa. Jilat kullakanakajja, walja maranakaw uka aru parlirinakar predicañatak thaqapjjäna. Ukampis kunjamsa thaqasiñapa ukajj markan leyinakaparjamaw mayjtʼayasïna (Rom. 13:1).  Ukhamïpanjja, yaqhepanakajj “¿kunjamsa quechua aru parlirinakar jikjjatañäni?” sasaw llakisipjjäna. Ukampis jilat kullakanakajj uka instruccionar istʼapjjänwa, Jehová Diosasti walja quechua aru parlirinakar jikjjatañatak chʼamachasipjjataparojj bendisïnwa.

¹⁶ Kevin jilatajj quechua aru parlir mä congregacionanwa ancianot serviski. Jupajj machaq instruccionanakat payachasirakïnwa. Jupajj akham siwa: “Akham sasaw jisktʼasiyäta: ‘¿Jichhajj kunjamarak quechua aru parlirinak jikjjatapjjästi?’ sasa”. ¿Kunsa jilatajj luräna? Jupajj akham sarakiwa: “Proverbios 3:5 textotwa amtasiyäta, Moisesan sarnaqäwipatwa lupʼirakiyäta. Jehová Diosajj israelitanakar Egiptot irpsusin Mar Rojo qota jakʼar irpsuniñapatakiw mayïna, ukankasajj janjakiw egipcionakat salvasipkaniti sañjamänwa. Ukampis Moisesajj istʼänwa, Diosajj jupanakar mä milagro toqe salvasaw bendisirakïna” sasa (Éx. 14:1, 2, 9-11, 21, 22). Kevin jilatajj machaq instruccionarojj istʼänwa, ¿kunas ukat pasäna? Jupajj akham siwa: “Jehová Diosan bendicionap uñjañajj wali musparkañänwa. Nayrajj quechua aru parlirinakar jikjjatañatakejj wali jayanak sarapjjerïta, mayniru jan ukajj paninirukiw jikjjatapjjerïta. Ukampis jichhajj kawkjantï walja quechua aru parlirinakajj utjki uka lugaranakanwa predikjjapjjta, waljanimpiw parlapjjta, revisitanakasa estudionakas jiljjattarakiwa. Jukʼamp jaqenakaw tantachäwinakar sarjjapjje” sasa. Ukhamajj Jehová Diosar confiyas sarnaqtan ukhajja, jupajj bendisipunistuwa.

17. ¿Kunsa aka yatichäwin yatjjatawaytanjja?

¹⁷ Kunjamsa Diosar confiyas sarnaqsna ukwa kimsa toqet uñjawaytanjja. Ukampis kunanakampis kusistʼañäni, qhawqsa yatjjatañäni, kunjamsa wawanak uywañäni ukanakansa, yaqha toqenakansa, kunjamtï Jehová Diosajj munki ukarjamaw mä amtar puriñasa. Mä amtar janïr purkasajj Jehová Diosan ewjjtʼanakapatsa, jiwasat llakisitapatsa, jupamp sum apasitasats amtasiñasapuniwa. Janiw kuntï nayranakasajj uñjki ukampejj apayasiñasäkiti, ukhamatwa ‘wiñayans wiñayapatak Jehová Diosasan sutipjjar sarnaqañäni’ (Miq. 4:5).