1. ¿Bautisasiñamatakejj kuna razonanakas utji?

 JEHOVÁ DIOSAJJ walja suma regalonakwa churtamjja, jakañ vidsa churaraktamwa. ¿Jupar munasitam uñachtʼayañ munasmati? Jupar jakäwim katuyasisa ukat bautisasisaw uk uñachtʼayasma. Uk lurasaw Jehová Diosan familiap taypinkarakisma. Niyakejjay jupar katuyaschïtajja, jupajj Awkimäniwa amigomarakïniwa, jupaw irpaskätam cuidarakïtam (Sal. 73:24; Is. 43:1, 2). Diosar jakäwim katuyasis bautisasïta ukhajja, wiñay jakañatak mä suytʼäwinïyätawa (1 Ped. 3:21).

2. ¿Kunsa aka yatichäwin yatjjataskañäni?

² ¿Jumatakejj bautisasiñajj chʼamakiti? Ukhamächi ukhajj janiw jumak ukhaman uñjasktati. Walja millón jaqenakaw bautisasiñatakejj amuyupansa jakäwipansa cambionak lurawayapjje, jichhajj wali kusisitaw Jehová Diosar taqe chuym servisipkaraki. ¿Nayrïr patak maranakan bautisasipkäna ukanakat kunsa yateqsna? Jupanakajj kuna jan walinakarus saykatapjjäna, ukat kunas jupanakar yanaptʼäna ukwa yatjjatañäni. Jilïrïsasa wayn tawaqösasa kunsa jumajj jupanakat yateqasma ukwa amuyäta.

SAMARITANONAKAW BAUTISASIPJJÄNA

3. ¿Kunsa yaqhep samaritanonakajj bautisasiñatak lurapjjañapäna?

³ Jesusajj aka oraqenkkäna ukhajja, samaritanonakajj mä sectäpjjänwa, Judeat alay toqenkir Siquem ukat Samaria markanak jakʼanwa jakapjjäna. Jupanakajj janïr bautisaskasajj Diosan Arupat phoqatpach yatjjatapjjañapänwa, kuna laykutejj Biblian phesqa libronakapakwa Diosan Aruparjam uñjapjjäna, mä arunjja Génesis librot Deuteronomio librokamakiw Diosan Aruparjam uñjapjjäna, inas Josué libro ukham uñjapjjarakchïna.  Ukampis kuntï Diosajj Deuteronomio 18:18, 19 texton arskäna uka promesa jupanakajj yatipjjänwa, ukatwa Mesiasan jutañap suyapjjäna (Juan 4:25). Bautisasiñatakejj jutañapäkäna uka Mesiasajj Jesusätapwa creyipjjañapäna. ‘Samaritänonakat waljaniw’ uk creyipjjäna (Juan 4:39). Ukat niyakejjay nayrïr cristianonakajj judionakäpjjchïnjja, yaqhep samaritanonakajj inas kuntï judionakat amuyapkäna uk cambiapjjañap wakischïna (Luc. 9:52-54).

4. Hechos 8:5, 6, 14 textorjamajj ¿kunjamsa yaqhep samaritanonakajj Felipen yatiyäwip katoqapjjäna?

⁴ ¿Kunas samaritanonakarojj bautisasipjjañapatak yanaptʼäna? Diosan arunakap yatiyir Felipejj ‘Cristot yatiyäna’ ukhajja, yaqhep samaritanonakajj ‘Diosan arunakap katoqapjjänwa’ (Hechos 8:5, 6, 14 liytʼäta). Felipejj judiökchïnsa samaritanonakajj jupar istʼapjjänwa. Inas jupanakajj Diosajj janiw khitirus yaqhachkiti siski uka textonak amtapjjchïna (Deut. 10:17-19). Jupanakajj “wali amuyumpiw kunanaktï Felipejj [Cristot] siskäna uk istʼapjjäna”. Diosan khitanitätaps qhanwa amuyapjjarakïna, kuna laykutejj walja milagronakwa Felipejj luräna, jupajj usutanak qolläna, demonionaks alissurakïnwa (Hech. 8:7).

5. ¿Kunanaksa samaritanonakat yateqasma?

⁵ Felipen judiötapatsa jan ukajj machaq yatichäwinak istʼapjjatapatsa, janiw samaritanonakajj Felipemp yatichayasiñ munapkaspänti. Ukampis janiw ukhamäkänti. Felipen cheqa yatichäwinak yatichatap amuyasajja, jankʼakiw samaritanonakajj bautisasipjjäna. Hechos 8:12 textojj akham siwa: “Feliper creyipjjäna ukhajja, chachanakamp warminakampiw bautisasipjjäna. Felipejj Diosan Reinopata Jesucriston sutipat suma yatiyäwinak jupanakar yatiyatap layku” sasa. ¿Diosan Arupajj cheqäskapuniwa sasin jumajj sasmati? ¿Testigonakajj Jesusan arsutaparjamaw taqenir munasisajj cheqpach cristianöpjjatap uñachtʼayapjje sasin sarakismati? (Juan 13:35). Ukhamächi ukhajj bautisasiñ jan ajjsaramti. Jehová Diosajj bendisipunïtamwa.

6. ¿Kunsa Ruben jilatan experienciapat yateqasma?

⁶ Alemania markankir Ruben jilatajja, Testigo familianïnwa, ukampis waynitükäna ukhajja, Jehová Diosan utjatapat payachasïnwa. ¿Kunas jupar yanaptʼäna? Diosat jan sum yatitap amuyasisajja, jukʼamp yatjjatañwa amtäna. Jilatajj akham siwa: “Bibliat sapak yatjjatkasajja, kunatï cheqäki kunatï kʼarïki uk yatjjatañajänwa. Walja kutirakiw evolución toqet yatjjatayäta” sasa. Jupajj ¿Existe un Creador que se interese por nosotros? sat libro liytʼarakïna, uka librow Ruben jilatarojj Diosar jukʼamp confiyañatak yanaptʼäna. “Jehová Diosajj cheqapuniw utjaski” sasaw amuyarakïna. Mä kutejja, central mundialaruw Ruben jilatajj visitir saräna, ukanwa oraqpachankir Diosan servirinakapar mayachtʼat uñjañajj chuymapar purtʼäna. Alemania markar kuttʼanïna ukhajja, Ruben jilatajj 17 maraniruw bautisasjjäna. Jumatï Diosatsa Bibliatsa payachassta ukhajja, qellqatanakasan jukʼamp yatjjatam, ‘sum yatiñaw’ jan payachasiñatak yanaptʼirïstam (Efes. 4:13, 14). Kunjamsa Jehová Diosan markapajj yaqha markanakansa pachpa congregacionamans munasisa mayachtʼat sarnaqapjje uk uñjasajja, jukʼampiw jilat kullakanakar munasïta.

TARSO MARKANKIR SAULO CHACHAW BAUTISASÏNA

7. ¿Kunsa Saulojj amuyupan cambiañapäna?

⁷ Tarso markankir Saulo chachat parltʼapjjañäni, judionakan leyipat wali yatjjatatänwa judionak taypins wali yäqatarakïnwa (Gál. 1:13, 14; Filip. 3:5). Mä tiempojja, judionakajj  cristianonakarojj apostatäpkaspas ukhamwa uñjapjjäna. Ukatwa Saulo chachajj jupanakar jan sinttʼasis arknaqäna. Ukham lurasajja, Diosan munañaps lurkaspa ukhamwa amuyäna (Hech. 8:3; 9:1, 2; 26:9-11). Jesusar creyitapatsa cristianöñatak bautisasitapatsa, Saulo chachajj arknaqataw uñjasiñapäna, jupajj uk sum yatïna.

8. 1) ¿Kunas Saulorojj bautisasiñatak yanaptʼäna? 2) Hechos 22:12-16 textorjamajj ¿kunjamsa Ananiasajj Saulor yanaptʼäna? (Dibujo uñjjattʼarakïta).

⁸ ¿Kunas Saulorojj bautisasiñatak yanaptʼäna? Jesusajj mä qhanar uñtat Saulo chachar uñstäna ukhajja, uka qhanajj Saulor juykhuptayänwa (Hech. 9:3-9). Kimsa urunakaw jan kuns manqʼkänti, kunatï jupar paskäna uka toqets wal lupʼirakpachäna. Ukhamatwa Jesusan Mesiasäskapunitapa cristianonakan cheqpach religionäpjjatap Saulojj amuyäna. Esteban chachar jiwayañatak yanaptʼatapats walpun arrepentispachäna (Hech. 22:20). Kimsa uru pasatatjja, Ananías sat Jesusan mä discipulopaw Saulon ukar saräna, juparojj munasiñampiw parltʼäna, wasitat uñjañapatak qolltʼasajja, jankʼak bautisasiñapatakiw chʼamañchtʼarakïna (Hechos 22:12-16 liytʼäta). Saulojj humildënwa, ukatwa Ananiasamp yanaptʼayasisajj bautisasïna (Hech. 9:17, 18).

9. ¿Kunsa Saulot yateqasisma?

⁹ Saulo chachat walja yatichäwinakwa yateqassna. Jupajj jachʼa jachʼa tukusasa jaqenakar ajjsarañatsa, janiw bautisaskaspänti. Ukampis janiw ukanakamp apayaskänti, Cristot yateqasajj jankʼakiw cambionak luräna, ukhamatwa humildëtap uñachtʼayäna (Hech. 26:14, 19). Arknaqat uñjasiñätap yatkchïnsa cristianöñwa amtäna (Hech. 9:15, 16; 20:22, 23). Bautisasjjäna uka qhepatjja, Jehová Diosaw kunayman yantʼanakar atipjañatak yanaptʼitani sasajj confiyaskakïnwa (2 Cor. 4:7-10). Jehová Diosan Testigopäñatak bautisasjjäta uka qhepatjja, kunayman yantʼanakana jan ukajj uñisitaw uñjasisma, ukampis janiw sapakïkätati. Jehová Diosampi Jesusampejj yanaptʼapjjapunïtamwa (Filip. 4:13).

10. ¿Kunsa Anna kullakan experienciapat yateqasma?

 ¹⁰ Anna kullakajj Europa del Este toqenwa kurda familia taypin jilsuwayäna. Mamapajj bautisasjjäna uka qhepatjja, tatapan permisopampiw llätunka maranïkäna ukhajj Bibliat yateqañ qalltäna. Jupamp chik jakiri familiaranakapajj Testigonakamp Bibliat yateqaskatap yatipjjäna ukhajja, jupa conträjjapjjänwa. Jupanakatakejj nayra awkinakapan religionap jaytatapajj mä phenqʼänwa. Annajj 12 maranëjjäna ukhajja, bautisasiñatakiw tatapar permiso mayïna. Tatapajj chuymapatti wawapajj bautisasiñ amtäna jan ukajj yaqhanakan satakich bautisasiñ amtäna ukwa yatiñ munäna. Anna wawapasti “nayajj Jehová Diosar munastwa” sasaw säna. Ukatwa tatapajj bautisasiñapatak permiso churäna. Annajj bautisasjjäna uka qhepatjja familiaranakapajj janiw sum uñjapkänti. Abuelitopajj akham sasaw jupar säna: “Testigöñat sipansa qʼañu juchan sarnaqaña jan ukajj cigarro fumañaw jumatakejj jukʼamp walïspa” sasa. ¿Annajj kunsa luräna? Jupajj akham siwa: “Ukar saykatañatakejj Jehová Diosaw chʼam churitäna. Papitujas mamitajas wal yanaptʼapjjarakitäna” sasa. Anna kullakajja, kunapachanakas Jehová Diosajj jupar yanaptʼäna ukajj mä listankiwa, ukat ukanak jan armasiñatakejj repastʼapuniwa. Uñisitäña jan ukajj arknaqatäñ ajjsarsta ukhajja, Jehová Diosajj yanaptʼarakïtamwa, janipun uk armamti (Heb. 13:6).

CORNELIOW BAUTISASÏNA

11. ¿Kunatsa Corneliotak bautisasiñajj chʼamäspäna?

¹¹ Corneliot yateqasiraksnawa, jupajj “mä centurionänwa”, mä arunjja romano ejercitonkir 100 soldadonakan comandantepänwa (Hech. 10:1, nota). Ukatwa jupajj markansa ejercitonsa wali yäqatäpachäna. “Pisinkir jaqenakarus wajjtʼapunirïnwa” sasaw Bibliajj qhanañchi (Hech. 10:2). Jehová Diosajja apóstol Pedroruw suma yatiyäwinak Cornelior yatiyañapatak khitäna. ¿Wali aytatäñajj bautisasiñapatak Cornelior jarkʼpachänti?

12. ¿Kunas Cornelior bautisasiñatak yanaptʼäna?

¹² ¿Kunas Cornelior bautisasiñatak yanaptʼäna? “Utapankirina[kajj] taqeniw jupamp chikajj Diosar ajjsartʼapjjäna”, Corneliojj “Diosar ruwtʼasipunirïnwa” (Hech. 10:2). Pedrojj suma yatiyäwinakat Cornelior parläna ukhajja, jupasa familiapasa Cristot yateqasajj jankʼakiw bautisasipjjäna (Hech. 10:47, 48). Familiapampi Jehová Diosar adorañatakejja, kuna cambionak lurañatï wakiskäna taqe ukanakwa Corneliojj lurpachäna (Jos. 24:15; Hech. 10:24, 33).

13. ¿Kunsa Corneliot yateqasisma?

¹³ Corneliojj Saulo chachjamarakiw wali yäqat jaqëna, ukajj cristianöñatakejj jarkʼarakispänwa. Ukampis janiw ukhamäkänti. ¿Bautisasiñamatakejj walja cambionak lurañajj wakisirakiti? Ukhamächi ukhajja, Jehová Diosaw yanaptʼaskätam. Jupar serviñatak Biblian wiñay yatichäwinakaparjam sarnaqatamat bendisïtamwa.

14. ¿Kunsa Tsuyoshi jilatat yateqasisma?

¹⁴ Japón markankir Tsuyoshi jilatajja, bautisasiñatakejj trabajopan cambionakwa lurañapäna. Jupajj wali yäqat escuelankir directoran mä yanapiripänwa. Uka escuelan panqaranakamp kʼachachtʼañatakiw yatichasïna. Ukanwa directorajj jiwatanakatak panqaranak wakichirïna, budistanakaruw costumbrenakap phoqañan yanaptʼarakirïna. Directorajj ukar jan sarañ puedkäna ukhajja, Tsuyoshi jilataw jupa lanti sarasajj lurañanakapamp phoqerïna. Ukampis jiwatanakat Biblian yateqjjäna ukhajja, budistanakan costumbrenakapan yanaptʼañajj bautisasiñapatakiw jarkʼäna, ukatwa ukanakan jan yanaptʼañ amtäna (2 Cor. 6:15, 16). Tsuyoshi  jilatajj directorampiw uka toqet parltʼarakïna. Ukhamätapatjja Tsuyoshi jilatajj janiw budistanakar costumbrenakapan yanaptʼjjänti, trabajopsa janirakiw aptʼaskänti. Bibliat yateqañ qalltkäna ukhat niya mä maratwa bautisasïna. a Jehová Diosar kusisiyañatak trabajoman mä kun mayjtʼayañajj wakischi ukhajja, jupaw kunatï jumatakisa familiamatakis wakiski ukanak churätam, janipun ukat payachasimti (Sal. 127:2; Mat. 6:33).

CORINTONKIRINAKAW BAUTISASIPJJÄNA

15. ¿Kunas Corintonkirinakarojj bautisasipjjañapatak jarkʼaspäna?

¹⁵ Nayra Corinto markankirinakajj qollqe chuyma, qʼañu juchan sarnaqeri ukhamat uñtʼatäpjjänwa. Jupanakat jilapartejj kunatï Diosatakejj jan walïkäna ukanakwa lurapjjerïna. Uka jaqenak taypin Jehová Diosar serviñ qalltañajj chʼamakïpachänwa. Ukampis kunapachatï apóstol Pablojj uka markar purïna, Cristjjat suma yatiyäwinak yatiyarakïna ukhajja, ‘Corintonkir jaqenakat waljaniw suma yatiyäwinak istʼasajj creyiñ qalltapjjäna, ukat bautisasipjjäna’ (Hech. 18:7-11). Jesucristojj mä visionanwa Pablor uñstäna, ukat akham sarakïnwa: “Walja jaqenakaw aka markan utjitu” sasa. Ukatwa Pablojj uka markan mä mara chikatani predicaskakïna.

16. ¿Kunas Corintonkirinakarojj bautisasiñatak yanaptʼäna? (2 Corintios 10:4, 5).

¹⁶ ¿Kunas Corintonkirinakarojj bautisasipjjañapatak yanaptʼäna? (2 Corintios 10:4, 5 liytʼäta). Diosajj Arupampi ukat espíritu santopampiw jupanakarojj cambionak lurapjjañapatak yanaptʼäna (Heb. 4:12). Criston suma yatiyäwinakaparjam sarnaqañ amtapkäna uka Corintonkirinakajja, machantasiñsa, lunthatasiñsa chachapura jan ukajj warmipura sarnaqañsa apanukupjjänwa (1 Cor. 6:9-11). b

17. ¿Kunsa Corintonkirinakat yateqasma?

¹⁷ Corinto markankirinakat yaqhepanakajja, bautisasiñatakejj walja cambionakwa lurapjjañapäna. Jupanakajj janis uka cambionak lurirjamäpkaspa ukham janiw amuyapkänti. Antisas wiñay jakañar apki uka kʼullkʼu thaknam sarañatakejj wal chʼamachasipjjäna (Mat. 7:13, 14). ¿Jumajj ukhamarakit mä jan wal lurañ apanukuñatak chʼamachasiskta? ¡Ukhamächi ukhajja jan qarjtamti! Uka jan wal lurañ apanukuñatakejj Jehová Diosar espíritu santop mayim.

18. ¿Kunsa Monika kullakan experienciapat yateqasma?

 ¹⁸ Georgia markan jakasiri Monika kullakajj tawaqetäkäna ukhajja, bautisasiñatakejj jan walinakamp kusistʼaña jan wali arunak parlañ jaytañatakiw chʼamachasiñapäna. Jupajj akham siwa: “Oración lurañaw chʼam churitäna. Jehová Diosajj kunatï walïki uk lurañ munataj yatïnwa, jupajj janipuniw jaytjkitänti yanaptʼapunitänwa” sasa. Monika kullakajj 16 maranïkäna ukhaw bautisasïna. Jehová Diosar kusisiyañatakisa serviñatakis ¿mä jan wal lurañ jaytañamajj wakisirakiti? Cambionak lurañatakejj Jehová Diosar espiritup mayiskakim, jupajj jilarkirwa churätam (Juan 3:34).

DIOSAR CONFIYATAMAJJ MÄ QOLLS JITTAYASPAWA

19. ¿Jachʼa qollunakar uñtat jan walinak atipjañatakejj kunas yanaptʼätam? (Foto uñjjattʼarakïta).

¹⁹ Inas bautisasiñatakejj mä kunas jarkʼaskstam, ukanak apanukuñatak chʼamachasiskta ukhajja, ak janipun armamti: Jehová Diosajj wal munastamjja, familiap taypinkañamwa munaraki. Jesusajj discipulonakapar akham sänwa: “Jumanakatejj mä mostaza jatha ukchʼaksa Diosar confiyapjjasmajja, aka qollurojj ‘akawjat khaya cheqar jittam’ sasaw sapjjasma, uka qollusti jittaspawa. Ukatjja janirakiw kunas jumanakatakejj chʼamäkaniti” sasa (Mat. 17:20). Jesusar istʼapkäna uka discipulonakapajj mä qhawqha maranakakiw jupampïsipkäna, ukhamajj Jehová Diosar jukʼamp confiyañatakejj chʼamachasisipkakiñapänwa. Ukhamäkchïnsa, Jesusan arsutaparjamajj jupanakatï Diosar jukʼamp confiyañatak chʼamachasipjjaspäna ukhajja, Diosaw jachʼa qollunakar uñtat jan walinak atipjañatakejj yanaptʼaspäna. ¡Jumarojj yanaptʼarakïtamwa!

20. ¿Kunjamsa aka yatichäwejj yanaptʼawaytam?

²⁰ Bautisasiñamatakejj mä jan wal jaytañamajj wakischi ukhajja, uk jaytañatak chʼamachasim, jan jukʼamp suyamti. Kunjamtï yatjjatawayktanjja, nayrïr cristianonakata ukhamarak jichha tiempon jakasir jilat kullakanakan experienciapat yatjjatañajj chuymachtʼistaspawa, chʼamañchtʼarakistaspawa. Uka toqet lupʼiñajj Jehová Diosar jakäwim katuyasiñataki ukat bautisasiñatakiw chʼamañchtʼätam. ¡Uk luratamat janipuniw arrepentiskätati!