Josué 5:1-15
5 Jordán jawirat inti jalanta toqenkiri* amorreonakan taqpach reyinakapasa,+ lamar qota jakʼankiri cananeonakan taqpach reyinakapasa,+ kunjamsa Jehová Diosajj israelitanakan pasapjjañapkamajj Jordán jawiran umanakap jupanakan uñjkata wañtʼayäna ukanak istʼapjjäna ukhajja, walpun ajjsarayasipjjäna,*+ israelitanak kawsajj jan chʼamaniw uñjasipjjäna.+
2 Uka tiemponjja, Jehová Diosajj akham sasaw Josué chachar säna: “Cuchillonak qalat lurasim, israelit chachanakaruw circuncidäta”*+ sasa.
3 Ukatwa Josué chachajj cuchillonak qalat luräna, israelit chachanakaruw Guibeat-Haaralot* cheqan circuncidarakïna.+
4 Aka razón utjipanwa Josué chachajj jupanakar circuncidäna: Egipto markat mistunipkäna taqe uka chachanakajja, mä arunjja guerran nuwasiri* markankir taqe chachanakajja, Egiptot mistunisajj wasara oraqena ukhamarak thakinwa jiwarapjjäna.+
5 Egipto markat mistunipkäna ukanakat taqeniw circuncidatäpjjäna, ukampirus Egipto markat mistunjjasina, wasara oraqena ukhamarak viajen nasirinakajj janiw circuncidatäpkänti.
6 Israelitanakajj 40 maranakaw wasaran sarnaqapjjäna,+ guerran nuwasiri chachanakajj taqeni jiwapjjañapkama, jupanakajj Egipto markat mistunisajj Jehová Diosar janiw istʼapkänti.+ Jehová Diosasti kawkjantï leches miskʼis wal utjki uka oraq+ janipuniw uñjayapkämati sasaw jupanakar mä juramento lurasin säna,+ uka oraqsti jiwasar churañatakiw Jehová Diosajj mä juramento lurasin nayra awkinakasar arsüna.+
7 Ukatwa yoqanakaparojj jupanak lanti uka oraqer irpantäna.+ Jupanakaruw Josué chachajj circuncidäna. Jupanakajj janiw viajen circuncidatäpkänti.
8 Markpachar circuncidañ tukuyapjjäna ukhajja, waliptapjjañapkamaw pachpa campamentopan quedasipjjäna.
9 Jehová Diosajj akham sasaw Josué chachar säna: “Egipto markajj phenqʼachapkayätam uk jichhüruw apaqapjjsma” sasa. Ukatwa jichhürkamajj uka cheqajj Guilgal*+ sutimpi uñtʼasi.
10 Israelitanakajj Guilgal cheqanwa campamentopankasipkäna, ukhaw nayrïr phajjsit 14 urunak saraqatarojj jaypʼu toqer Pascua amtapjjäna,+ Jericó markan wasar pampa oraqenakapana.
11 Pascua pasatatjja, oraqen achunakapwa manqʼañ qalltapjjäna, uka pachpa urunwa Pascua pasatat jan levaduran tʼantʼampi+ grano jampʼimpi manqʼapjjäna.
12 Ukatsti oraqen achunakap manqʼapjjäna uka uru qhepatjja, maná manqʼajj janiw utj-jjänti. Israelitanakatakejj janis maná manqʼajj jukʼamp utj-jjchïnjja,+ uka marajj Canaán oraqen achunakapwa manqʼapjjäna.+
13 Mä urojja, Josué chachajj Jericó marka jakʼankaskäna ukhaw espadas aytʼasita+ mä chacharu+ jupan nayraqatapan uñjäna. Uka chachar jakʼachasisasti akham sasaw jisktʼäna: “¿Nanakampïtati, jan ukajj nanak conträtacha?” sasa.
14 Ukjjarusti uka chachajj sänwa: “Janiwa, antisas Jehová Diosan ejercitopankir mä principjamaw* jutta”+ sasa. Uk istʼasasti Josué chachajj oraqer puriñkam altʼasisaw jupa nayraqatan qonqortʼasïna, ukatsti akham sänwa: “Tata, ¿naya servirimarojj kuns yatiyitäta?” sasa.
15 Jehová Diosan ejercitopankir principejj sänwa: “Kayunakamat wiskhum* apsusim, taktʼaskta uka cheqajj sagradowa” sasa. Josué chachajj jankʼakiw uka arunak phoqäna.+
Notanaka
^ Hebreo arunjja, “Jordán jawirat lamar qota toqenkiri”.
^ Hebreo arunjja, “chuymanakapajj umatatänwa”.
^ Hebreo arunjja, “israelit chachanakaruw mä kutimpi circuncidäta, ukampejj pä kutïniwa”. “Circuncisión” siski uk glosarion liytʼäta.
^ Ukajja, “chachanakan chhojjorasiñanakapan jañchi lipʼichipan jiskʼa qollupa” sañ muni.
^ Jan ukajja, “guerran nuwasiñatak mara phoqata”.
^ Ukajja, “apaqaña; jayar apanukuña” sañ muni.
^ Jan ukajja, “pʼeqtʼirjamaw”.
^ Variante: “jiskhum”.
