2 Crónicas 7:1-22
7 Kunapachatï Salomonajj oración lurañ tukuyjjäna ukhajja,+ alajjpachat ninaw saraqanïna,+ ukatjja nakhantayat ofrendsa sacrificionaksa qʼal nakhantäna, Jehová Diosan kʼajkir qhanapaw utar phoqtʼarakïna.+
2 Sacerdotenakajj janiw serviñatakejj Jehová Diosan utapar mantirjamäpkänti, kuna laykutejj Jehová Diosan kʼajkir qhanapaw Jehová Diosan utaparojj phoqtʼäna.+
3 Alajjpachat ninajj saraqanïna ukhasa, Jehová Diosan kʼajkir qhanapas uta patjjankkäna ukhasa, Israel markpachaw uñchʼukiskäna, ukatjja qalanakamp lurat pisoruw qonqortʼasisajj oraqer puriñkam altʼasipjjäna, Jehová Diosaruw yuspärapjjarakïna, “kuna laykutejj jupajj suma Diosawa, munasirïtapas jan jaytjasirïtapas wiñayatakiwa”.
4 Ukatjja reyisa taqpach Israel markasa Jehová Dios nayraqatanwa sacrificionak loqtapjjäna.+
5 Salomón reyejj 22.000 vacanakampi 120.000 ovejanakampi sacrificiot loqtäna. Ukhamaw reyisa taqpach markasa cheqpach Diosan utap inaugurapjjäna.+
6 Sacerdotenakajj puestonakapan saytʼatäsipkänwa, Jehová Diosatak music tukañ instrumentonak aptʼasit levitanakas puestonakapan saytʼatäsipkarakïnwa.+ (David reyiw uka instrumentonak Jehová Diosar yuspärañatak luräna, ukhamat ukanakamp* Diosar alabañataki, “kuna laykutejj munasirïtapas jan jaytjasirïtapas wiñayatakiwa”). Sacerdotenakajj levitanak nayraqatanwa trompetanakap wali jachʼat suynayasipkäna,+ ukañkamasti taqe israelitanakajj saytʼatäsipkarakïnwa.
7 Nakhantayat sacrificionakasa, grano ofrendanakasa,+ likʼinakas+ waljapunïnwa, Salomonajj lurkäna uka cobret lurat altarajj+ jiskʼakëjjänwa, ukatwa Salomonajj uka urun Jehová Diosan utap nayräjjankkäna uka pation chika taypip sagrado lugarar tukuyäna, ukhamatwa uka cheqan nakhantayat ofrendanaksa,+ grano ofrendanaksa, sumankañ sacrificionakan likʼinakapsa loqtäna.
8 Uka urunsti Salomonajj taqe Israel markampiw paqallqo urunak mä fiesta* luräna,+ walja jaqenakaw Lebó-Hamat cheqat* qalltasajj Egipton+ jawirapatpach jutapjjäna.
9 Paqallqo urunakaw altar inaugurapjjäna, paqallqo urunakarakiw fiesta lurapjjäna, ukampis kimsaqallqöri* urunjja, mä sagrado tantachäwi amtapjjäna.+
10 Paqallqöri phajjsina, pä tunka kimsanïri urunsti, reyejj markankirinakarojj khitanukjjänwa, jupanakasti kunjamsa Jehová Diosajj Davidarusa, Salomonarusa, Israel markaparus suma chuymampi uñjäna+ uk amuyasajja, wali kusisitaw utanakaparojj chuymas chuyma sarjjapjjäna.+
11 Ukhamaw Salomonajj Jehová Diosan utapsa reyin utapsa* lurañ tukuyjjäna.+ Kunanaktï Salomonajj Jehová Diosan utap lurañatakisa jupan utap lurañatakisa amtkäna ukanakjja, sum tuktʼayjjäna.+
12 Ukatsti Jehová Diosajj arum toqeruw Salomonarojj mä samkan uñstäna,+ akham sasa: “Juman oracionam nayajj istʼsmawa. Nayaw aka lugar ajllista, ukhamat aka utan sacrificionak loqtasiñapataki.+
13 Kunapachatï nayajj jallu jan puriñapataki alajjpach jistʼantkä ukhasa, tʼiju tʼijunakarus aka oraqen chʼojjña alinakap manqʼsupjjañapatak mayï ukhasa, ukatsti nayatï markajar mä jan wali usu* apayanï,
14 ukampis sutij apir markajatï+ humillasini,+ oracions lurani, nayarus thaqarakitani, jan wali thakinakapatsa kuttʼanjjarakini ukhajja,+ nayajj alajjpachatpach istʼanisaw jupanakan juchanakap perdonäjja, oraqenakapan jan walinakapsa askicharakïwa.+
15 Jichhat uksarusti, khitinakatï aka lugaran oración lurapkani ukanakarojj istʼapunïwa, nayranakajas jupanakarojj uñtanirakiniwa.+
16 Jichhasti nayajj aka uta ajllista, sagradoruw tukuyarakta, ukhamat sutijajj jaya tiempotak uka utankañapataki,+ nayaw uka ut uñjäjja, taqe horasanwa jarkʼaqarakëjja.+
17 ”Jumatejj taqe kuntï mayksma ukanak phoqasin David tatamjam naya nayraqatan leyinakajs phoqäta, kunanaktï nayajj Juezjamajj amtkta ukanaks phoqarakïta ukhajja,+
18 nayaw reinoman* tronop uttʼayäjja,+ kunjamtï David tatamarojj mä pacto lurasin arskayäta ukhama,+ juparojj akham sayätwa: ‘Jumat jutir mä chachajj Israelan reyit apnaqapuniniwa’+ sasa.
19 Ukampis jumanakatï nayar arkañat jitheqtapjjetäta, churapksma uka mandamientonakajsa leyinakajsa jan phoqapkäta, yaqha diosanakar servir sarapjjäta, nayraqatanakapans altʼasipjjarakïta ukhajja,+
20 kawkïr oraqtï jupanakar churkta uka oraqetwa nayajj Israel markar chhaqtayäjja,+ sutijatak sagrador tukuykta aka utsa naya nayraqatat apanuküwa, taqe markanak taypinwa aka utajj jiskʼachatäni,* phenqʼachatarakïni.+
21 Aka utajj laqayar tukuyatäniwa. Taqe khititejj uka uta jakʼa paskani ukajj wali musparataw uñchʼukini,+ akham sarakiniwa: ‘¿Kunatarak Jehová Diosajj aka oraqerusa aka utarus ukham lurpachasti?’+ sasa.
22 Ukatsti jupanakajj akham sapjjaniwa: ‘Jupanakajj nayra awkinakapar Egipto oraqet irpsunkäna+ uka Jehová Diosaparuw apanukupjje,+ yaqha diosanakaruw arkapjje, uka diosanakatakiw altʼasipjje, ukanakaruw servipjjaraki.+ Ukatwa jupajj taqe uka jan waltʼañanak jupanakjjar apayani’+ sasa”.
Notanaka
^ Jan ukajja, “jupanakamp”. Ukham sasinjja, inas levitanakat parlaskchi.
^ Jan ukajja, “Hamat cheqar mantañawjat”.
^ Ukajja, Ramanakamp Carpachasiñ Fiestawa.
^ Ukajj fiesta pasat urünwa, tunka phesqanïri ururakïnwa.
^ Jan ukajja, “palaciopsa”.
^ Hebreo arunjja, “mä epidemia”.
^ Jan ukajja, “gobiernoman”.
^ Hebreo arunjja, “säwi arunakar tukuni”.
