2 Crónicas 3:1-17
3 Ukatjja Salomón reyejj Jerusalén markankir Moria+ qollunwa Jehová Diosan utap lurañ qalltäna,+ uka cheqanwa Jehová Diosajj David tataparojj uñstäna,+ uka cheqanarakwa Davidajj Ornán sat jebuseo chachan grano takiyañ cheqapan templo lurañatak wakichäna.+
2 Salomonajj pusi maranakaw reyit apnaqaskäna, ukhaw jupajj payïri phajjsit pä uru saraqatar templo lurañ qalltäna.
3 Salomonajj cheqpach Diosatak lurkäna uka utan cimientopajj largorojj niya 27 metronakanïnwa,* anchorusti niya 9 metronakanïnwa,*+ kunjamtï nayra tiempon medisirïkäna* ukarjama.
4 Templo nayräjjar saytʼayatäkäna uka pórtico sat mantañ cheqajja, largorojj niya 9 metronakanïnwa, qhawqchʼäkäntï anchorojj uka utajj ukarjam luratänwa, altorusti 9 metronirakïnwa;* manqhatsti suma qorimpiw forrarakïna.+
5 Jachʼa cuartorusti* enebro maderanakampiw uchäna, uka tablanakarojj suma qorimpiw uchäna.+ Ukatjja palmera qoqanakar* uñtasit adornonakampi+ ukhamarak cadenanakampiw kʼachachtʼarakïna.+
6 Taqpach templorojj suma qalanakampiw+ forräna; Parvaim markat apanit qorimpiw+ ucharakïna.
7 Jupajj taqpach templorusa, viganakarusa, punku marconakarusa, perqanakaparusa, punkunakaparusa qorimpiw ucharakïna;+ perqanakarusti querubín angelanakar uñtasit adornonak luräna.+
8 Ukatjja Santísimo+ lugar lurarakïna, largorojj niya llätunka metronakanïnwa,* qhawqchʼäkäntï anchorojj uka utajj ukarjam luratänwa, anchorojj niya llätunka metronakanïnwa.* Uka Santísimo lugararojj 600 suma qori talentonakampiw* ucharakïna.+
9 Clavonakatak aptaskäna uka qorin pesopajj medio kilo jilaw pesäna;* patjja cuartonakarusti qorimpiw ucharakïna.
10 Ukatjja Santísimo lugaratakejj pä querubín angelanak luräna, ukanakarojj qorimpiw forrarakïna.+
11 Querubín angelanakan chheqanakapajja,+ ukchʼpachajj niya llätunka metronak* ukchʼänwa. Nayrïr querubín angelan mä chheqapajj 2 metro 20 centimetronïnwa,* utan perqapkamaw purirakïna, mayni chheqapajj 2 metro 20 centimetronïnwa,* payïr querubín angelan mä chheqa puntapkamaw purirakïna.
12 Payïr querubín angelan mä chheqapajj 2 metro 20 centimetronïnwa,* utan maysa perqapkamaw purirakïna, mayni chheqapajj 2 metro 20 centimetronïnwa,* nayrïr querubín angelan mä chheqa puntapkamaw purirakïna.
13 Uka querubín angelanakan chheqanakapajj niya llätunka metronak* ukchʼar ayatatatäpjjänwa; uka angelanakasti saytʼatäpjjarakïnwa, ajanunakapajj Santo lugarar uñtatäpjjänwa.
14 Salomonajj azul hilompi, morado chʼankhampi, llijkir wila color hilompi, suma telampiw cortina lurarakïna,+ ukatjja querubín angelanakar uñtasit adornonak lurarakïna.+
15 Ukatjja utan nayraqataparojj pä columnanak lurarakïna,+ largorojj niya 16 metronakanïnwa.* Sapa columnanak patjjaru uchatäkäna uka capitel* adornonakajj 2 metro 20 centimetronïnwa.*+
16 Jupasti collaranakar uñtasit cadenanak lurasajja, columnanak patjjar uchatäkäna uka capitel adornonakaruw uchäna, cadenanakar uchañatakisti granada frutar uñtasit 100 adornonak lurarakïna.
17 Jupasti templo nayräjjarojj columnanak saytʼayäna. Kupi toqerusti* mä columna luräna, chʼeqa toqerusti* yaqha columna lurarakïna, kupi toqenkir columnarojj Jakín* suti uchäna, chʼeqa toqenkir columnarusti Boaz* suti ucharakïna.
Notanaka
^ Hebreo arunjja, “60 codonakanïnwa”. Apéndice B14 uñjjattʼäta.
^ Hebreo arunjja, “20 codonakanïnwa”.
^ Yaqhepanakajja, “nayra tiempon medisirïkäna” sasinjja, jachʼa codot parlaskpacha sasaw amuyapjjaraki. Apéndice B14 uñjjattʼäta.
^ Yaqhep nayra qellqatanakanjja, “120 ukchʼarakïnwa” sasaw qhanañchi, ukampis yaqha qellqatanakansa yaqhep traducit qellqatanakansa, “20 codonakanïnwa (9 metronakanïnwa)” sasaw qhanañchi.
^ Jan ukajja, “arbolanakar”.
^ Hebreo arunjja, “Jachʼa utarusti”. Ukham sasinjja, inas Santo lugarat parlaskchi.
^ Apéndice B14 uñjjattʼäta.
^ Hebreo arunjja, “20 codonakanïnwa”.
^ Hebreo arunjja, “20 codonakanïnwa”.
^ Hebreo arunjja, “50 siclonakaw pesäna”. Apéndice B14 uñjjattʼäta.
^ Hebreo arunjja, “20 codonak”.
^ Hebreo arunjja, “phesqa codonakanïnwa”.
^ Hebreo arunjja, “phesqa codonakanïnwa”.
^ Hebreo arunjja, “phesqa codonakanïnwa”.
^ Hebreo arunjja, “phesqa codonakanïnwa”.
^ Hebreo arunjja, “20 codonak”.
^ Hebreo arunjja, “35 codonakanïnwa”.
^ Hebreo arunjja, “phesqa codonakanïnwa”.
^ Jan ukajja, “Aynach (Sur) toqerusti”.
^ Jan ukajja, “alay (norte) toqerusti”.
^ Ukajja, “jupaw sum saytʼayani” sañ muni. “Jupaw” sasinjja, Jehová Diosat parlaski.
^ Ukajja, inas “chʼamampi” sañ munchi.
