Amual ti dungu

Pu Dungukelu Iney Ngen Jewba

Dullial kewün dungu mapudungun

TI BIBLIA KÜME ELKÜNUTUEYEW ÑI MONGEN

“Mülerpun kalle mu”

“Mülerpun kalle mu”
  • Tripantu ñi choyüngeel: 1955

  • Chew ñi tuwün: España

  • Ñi rupan: Drogatukefuy, ngollikawkefuy ka pofolkawkefuy

TAÑI KUYFI MONGEN

Kiñeke che rume wedalkalu tañi mongen alüñmakey ñi kiñepülekünuwal tañi weda femken. Iñche femngechi femürpun. Choyüngen ka tremün Barcelona mew, kiñe fütra waria España mew. Ñi pu che engün mülefuiñ Somorrostro, kiñe fütra lof itrotripa ti lafken mew. Tüfachi waria kimngekefuy ñi müleken weñen dungu ka ñi fendengeken droga.

Tañi chaw ñuke engu kayu fotüm ka küla ñawe niey, iñche tati wünen. Fütra fillalefulu kay iñchiñ pichi wentrungen müten, fey tañi chaw werküenew küdawal ñi wiñoleltuafiel ti pelota pu awkantukefulu tenis. 10 tripantu müten niefulu küdawürpun mari ora fill antü. Feymu pepi amulan kolegio mew chumngechi ñi femkefel tañi pu chaf kompañ. 14 tripantu nielu iñche, konün ñi küdawal kiñe taller mu chew ñi dewmangekeel fillke chemkün pañillwe mu.

1975 Tripantu mu, eluwün ñi konal tati Legion española pikun Africa mew mülelu ka tukutuwün ti uniforme pengelkelu ñi koneltulen fey mu.

España mew werküngeiñ kom pu weche konal servicio militar mu, feymu 1975 tripantu mütrümngen ñi amual. Duamniefun doy dungu femürpual tañi afmatuatew mongen mew, fey eluwün ka ñi konal tati Legion española pingechi trokiñ weychafe mew mülelu Melilla waria, tüfa pikun Africa mew müley ngen-ngelu España. Feychi mu doy eluwün ñi drogatual ka putual.

Tripalu iñche tati Legion española mew, wiñotun Barcelona mu fey trawiyiñ kakelu weche engün taiñ weñeal. Chem rume weñekefuiñ, femngechi ngillayal droga. Ka eluwün ñi drogatual LSD ka anfetamina, fey re mongelerpun ñi putukawal, femal kudumuwün dungu ka awkantual plata mu. Kom ñi femürpuel yeenew ñi pofolkawal. Rumel miyawülkefun kiñe pichi toki, kiñe kuchillu, ka kiñe machete, fey eluwkülefun ñi püneafiel duamniefuli.

Kiñe rupa tañi pu kompañ engün eluwiyiñ taiñ weñeal kiñe auto fey pu soltaw inakütueiñmu. Kiñe pelikula reke. 30 kilometro peno inayawüleiñmu pu soltaw, fey eluwingün taiñ tralkatuaetew. Af mew, tronkürpuiñ, fey lefmawiyiñ. Kimtukulu müten tañi chaw eluwi tañi wemünentuaetew ñi ruka mu.

Feymu kechu tripantu mülerpun kalle mu. Umawtukefun lepün fillke edificio mu, fillke camion, wanku parke mew ka fillke eltun mew. Kiñeke mufü antü kütu mülerpufun kiñe lolo mew. Re nampiyawkefun, “mongeleli kam layefuli rume, iney no rume ngüneduamlayafenew” pikefun. Droga ñi duam mu katrüñmakefun tañi küwu ka lipang kütu. Fantepu mu kimfali tañi allfen em.

TI BIBLIA KÜME ELKÜNUTUENEW ÑI MONGEN

28 tripantu nielu iñche, tañi ñuke yepatuenew, “füreneen, wiñotunge taiñ ruka mew” pienew. “feley” pifiñ “küme elkünutuan ñi mongen” feypikünufiñ, welu alüñman ñi femürpual tañi feypin.

Kiñe nagantü pu Dungukelu Iney Ngen Jewba rupayngün tañi ruka mew. Petu ñi allkütufiel engu, tañi chaw wirarenew “rakümtukulelfinge ti puerta” pi, welu nüngayelenew ñi feypingeal chem tañi femal kam femnoal feymu eluwlan ñi femal tañi feypietew. Tüfa engu pengelelenew küla pichike lifru, ayüwün mew llowüñmafiñ ka ramtufiñ “¿chew trawükeymün?”. Rupan mu kiñeke antü, amun ti trawünwe ruka mu.

Tati wünelu ñi ngüneduamfiel ñi küme tukutuwkülen kom pu che akulu tüfey mew. Welu iñche fütra alüfuy ñi longko, muñ-muñ payun niefun ka wedake takun tukutuwkülefun. Kimfali ñi trürkülenon feychi che mu, feymu wekuntu mülenagün. Welu perumefiñ ta Juan, kuyfi weniyewfuyu, kiñentrür weñekefuiñ tañi pu kompañ engün, ¡afmatulewen! ¡Rume küme tukutuwküley! Fey wüla kimün, Dungukelu Iney Ngen Jewba ngetuy, kiñe tripantu rupawyefuy. Tufa yafültukuenew ñi konpual ti Trawünwe Ruka mew. Feychi mu kakünutun ñi mongen.

Eluwün ñi chilkatulelngeal Biblia, fey pürüm müten ngüneduamün: duamfali ñi pofolkawnoal ka lif mongen yenietual femngechi ñi ayüwülafiel ta Ngünechen. Küdawngefuy ñi femal. Duamniefun “we rakiduam” nietual ka küme elkünutual tañi mongen, femngechi ñi tuteafiel ta Jewba (Romanu 12:⁠2). Chaw Dios kutranduamyechekey, tüfa yafülduamelenew. Rume wedalkakefun ñi mongen mew, welu feyngelu rume Ngünechen kom eluenew ñi küme elkünutual ñi mongen. Puwi tañi piwke mu kom ñi kimürpuel Jewba mew. Kimtukun ñi mülen Ngünechen, taiñ dewmaetew iñche duamnieenew (1 Pedro 5:⁠6, 7).

Kom tüfa kelluenew ñi küme elkünutual tañi mongen. Kiñe rupa petu ñi chillkatulelngen chem ñi feypilen Biblia pütremtun dungu mew, rakiduamün: “Jewba ayüniey iñche ñi liftuwküleal kom ñi mongen mew, fey kom tüfachi pütrem ngewekilpe tañi mongen mew” pin (2 Korintio 7:⁠1). Kom kiñepülekünufiñ.

Kafey duamniefun drogatuwenoal ka fendewenoal ti droga. Tüfa doy küdawngefuy iñche mu. Fey ñi femürpual tüfa duamniefun elkünual tañi pu weni, kidu engün kellurpulayafenew ñi weniyeafiel ta Jewba. Rupalu ta antü doy maneluwürpun Ngünechen mu ka tañi pu we weni trawünche mu. Fey tüfa rüf duamtuenew ka piwkeyerpuenew engün, turpu femngechi femngelafun kuyfi. Rupalu kiñeke küyen, elkünun kom tati droga ka “we mongen” reke nietun ñi ayüwülafiel ta Jewba (Efesio 4:⁠24). Agosto 1985 tripantu mu fawtisawün ñi dungual iney ngen Jewba.

CHEM KÜMELKAN LLOWÜN

Tati Biblia eluenew reke we mongen. Kelluenew ñi elkünual feychi weda mongen, ñi wedalkanoaetew tañi kuerpu ka rakiduam. Doy 30 tañi pu weni mew larkeyngün sida pingechi kutran mew kam kakelu kutran droga ñi duam mu. Rume mañumkülen inaniefiel Biblia ñi ngülam, fente weda mongen niewelan fantepu mu.

Tati pichi toki ka pu kuchillu ñi miyawülkefel pofolkawün-ngechi wentru ngefulu miyawülwetulafiñ. Rüfkünu llemay rakiduamkelafun rume ñi elkünuafiel kom feychi fillem, welu fewla ñi miyawülafiel kiñe Biblia ñi kellucheal. Famülke mu fentren antü tañi domo iñchiw amuldungukefiyu pu che.

Tañi chaw ka ñuke konkelay pu Dungukelu Iney Ngen Jewba, welu feypingu iñche tañi rume kelluetew Biblia. Tañi chaw ingkañkefuy kütu pu Dungukelu Iney Ngen Jewba tañi pu weni mew, ka küme kimniefuy fente ñi kelluetew tañi religion küme elkünutual ñi chumngen. Tañi ñuke feypikefuy: “Doy kuyfi eluwfulmi tami chillkatual Biblia, müna kümerkeafuy”. “¡Feley llemay!” piken iñche.

Kom ñi rupan iñche kimeltuenew, ngünamfali konal droga kam kakelu femngechi dungu ñi ayüwkülerpual. Kelluafiel pu che ñi kimürpuafiel Chaw Ngünechen ñi Dungu tüfake ta rüf ayüwülkeenew, tüfachi dungu montulenew ñi mongen.