Amual ti dungu

Pu Dungukelu Iney Ngen Jewba

Dullial kewün dungu mapudungun

Pu Dungukelu Iney Ngen Jewba, ¿chumngelu reyükonkelay politiko dungu mu?

Pu Dungukelu Iney Ngen Jewba, ¿chumngelu reyükonkelay politiko dungu mu?

Iñchiñ pu Dungukelu Iney Ngen Jewba taiñ feyentukeel nüwküley Biblia ñi feypin mu, feymu reyükonkelaiñ politiko dungu mew. Kafey kiñe politiko no rume wülkelafiyiñ taiñ voto, eluwkelaiñ taiñ llowal kiñe küdaw nüwkülelu politiko dungu mew, dikümtukukelaiñ pu politiko, ka chem dungu mu no rume koneltukelaiñ taiñ kaletual pu wentru ñi ngünenieel. Tati Biblia pengeli falinke dungu taiñ reyükonkülenoal politiko dungu mew.

  • Müley taiñ inayentuafiel ta Jesus, kidu küpa llowlay kiñe ülmen küdaw nüwkülefulu politiko dungu mu (Juan 6:⁠15). Ka femngechi Jesus feypifi tañi inaniekeetew ñi ‘koneltulenoal tüfachi mapu mew’, feymu ngelafuy ñi kelluntukuafiel kiñe politiko no rume (Juan 17:⁠14, 16; 18:⁠36; Marku 12:⁠13-17).

  • Müley taiñ kellukonküleal Chaw Ngünechen ñi Ngünenien mu müten. Tüfachi Ngünenien mu Jesus feypi: “Tüfachi kümeke dungu ñi Ngünenien mu, kimelngeay ta kom Mapu mew” (Matew 24:⁠14, Traducción del Nuevo Mundo). Iñchiñ werken reke feleiñ Chaw Ngünechen ñi Ngünenien mu, feymu reyükonkelaiñ politiko dungu mu kidu taiñ trokiñ mapu, ka kakelu no rume. Welu may, elfalkünungeiñ taiñ amuldungual tüfachi Ngünenien ñi küpayal (2 Korintio 5:⁠20; Efesio 6:⁠20).

  • Chem rakiduam niele rume tati pu che, dungulelafuiñ llemay Ngünechen ñi Ngünenien mu, reyükonkülenolu am iñchiñ politiko dungu mew. Iñchiñ maneluwküleiñ Ngünechen ñi Ngünenien müten ñi küme elkünutuafiel tati wedake dungu tüfachi Mapu mew, ka pengelkeiñ tüfa taiñ feypikeel ka femkeel mu (Ebrew 13:⁠6).

  • Iñchiñ müleiñ kom wall Mapu püle, feymu kellukonliyiñ kiñe politiko trokiñche mu, kiñewkülewelayafuiñ (Kolosense 3:⁠14; 1 Pedro 2:⁠17). Tati pu religion reyükonkülelu tati politiko dungu mu kiñewkülelayngün (1 Korintio 1:⁠10).

Yamniefiyiñ pu wentru tañi ngünenien. Koneltukelaiñ politiko dungu mu, welu yamniefiyiñ tati pu awtoridad. Femngechi inaniekeiñ tüfachi werkün dungu Biblia mu mülelu: “Itrokom che feley ñi yamnieafiel tati mülechi pu awtoridad” (Romanu 13:⁠1). Feymu, inakefiyiñ tati ley dungu, kullikefiyiñ impuesto, ka inakefiyiñ ti dungu ñi femkeel tati awtoridad ñi küme feleal tati pu che. Iñchiñ koneltukelaiñ kiñe dungu no rume ñi fentekünuafiel kiñe ngünenien, welu may inaniekeiñ tüfachi ngülam mülelu Biblia mu: “Feley ñi ngillatuñmangeael tati longkolelu kiñe trokiñ mapu mew ka kom ti pu kellukonkülelu ti longkolelu mew”, doyelchi may dullimekelu engün kiñe dungu taiñ katrütuñmayafetew taiñ poyekefiel Ngünechen (1 Timotew 2:⁠1, 2).

Kafey yamkefiyiñ tati pu che ñi dulliel politiko dungu mu. Kiñe dungu, pofolkakelafiyiñ ta che amulu ñi dullial kiñe awtoridad ka katrütukelafiyiñ tati che ayülu ñi wülal tañi voto.

Taiñ reyükonkülenon politiko dungu mu, ¿kiñe we dungu am chi? Feyngelay tati. Tati pu apostol ka tati wünenke kristiano wünen siglo mu ka femngechi rakiduamkefuy. Kiñe lifru dungulu tüfa mu, feypi pu wünenke kristiano ñi yamniefiel tati pu awtoridad, welu ‘kümelay koneltual politiko dungu mu’, trokifingün (Beyond Good Intentions—A Biblical View of Politics). Ka femngechi Origenes, kiñe wentru mülefulu tati siglo II ka III, chillkatukefuy fillke feyentun, ka wirintukuy: “Tati pu kristiano eluwkülelafuyngün ñi küdawal politiko dungu mu”.

Taiñ reyükonkülenon politiko dungu mew, ¿chaftumekefiyiñ may taiñ trokiñ mapu? Feyngelay tati. Tati pu awtoridad ngelay ñi llükaleal, kewatuchefengenolu am iñchiñ. Peafiyiñ kiñe wirin chillka entufilu tati Academia Nacional de Ciencias de Ucrania 2001 tripantu mew, feychi dungu mu inaduamngey taiñ reyükonkülenon politiko dungu mew ka feypi fentren che ñi küme llownoel taiñ rakiduamken tüfa mu. Feymu lle tati pu nazi ka pu komunista ñi ngünenieel kayñetuyeniefi pu Dungukelu Iney Ngen Jewba tañi rakiduam mu. Ka femngechi ti wirin chillka feypi petu ñi ngünenieel tati pu sovietiko, kidu engün amuley tañi yamniefiel tati ley dungu, kafey nor piwke mu doyümfingün kakelu che ñi duam, küdawlu ngankülechi lelfün mew ka tati pu fabrika mu, ka turpu chaftulafingün tati pu komunista ñi ngünenieel. Inan mu tüfachi chillka feypi pu Dungukelu Iney Ngen Jewba tañi femkeel ka feyentukeel wedalkakelafi kiñe trokiñ mapu no rume ñi küme felen.