Amual ti dungu

Pu Dungukelu Iney Ngen Jewba

Dullial kewün dungu mapudungun

Pu Dungukelu Iney Ngen Jewba, ¿dikümtukukefingün pu che ka religion mu konal?

Pu Dungukelu Iney Ngen Jewba, ¿dikümtukukefingün pu che ka religion mu konal?

Femkelaiñ, iney no rume ta dikümtukukelafiyiñ ka religion mu konal. Feymu, La Atalaya, taiñ doy falin-ngechi chillka, feypi: “Kümelay ñi dikümtukufiel kakelu che ka religion mu konal”. * Tüfa ta kiñeke dungu:

  • Jesus turpu dikümtukukelafuy tati pu che ñi llowal tañi kimeltun. Kidu kimkefuy ta pichin che müten allkütuafuy tañi werkün (Matew 7:⁠13, 14). Kiñe rupa mu, kiñeke tañi pu inanieetew elkünueyew, llownolu am kiñe tañi kimeltun, kidu eluñmafi ñi amutual, dikümtukulafi ñi miyawal kidu engu (Juan 6:⁠60-62, 66-68).

  • Jesus kimeltufi tañi pu inanieetew ñi dikümtukunoafiel tati pu che ñi kakünual tañi feyentun. Welu may, mülefuy ñi kintual feychi che küpa allkütukelu ti werkün (Matew 10:⁠7, 11-14).

  • Ngünamfali dikümtukun mu ñi konal kangelu religion. Chaw Ngünechen ayükey feychi che piwke mu ñi poyekeetew (Deuteronomio 6:⁠4, 5; Matew 22:⁠37, 38).

Tati pu che ñi konal taiñ religion mu, ¿chem dungu rume femkepeiñ may?

Rüfkünu may, amuldungukeiñ Biblia ñi werkün “fütra kamapu” mu, chew ñi mülen fentren che ka ruka püle, chumngechi werküeiñmew ti Biblia (Hecho 1:⁠8; 10:⁠42; 20:⁠20). Pu wünenke kristiano reke, kiñeke mu feypintukungekeiñ ñi dikümtukufiel tati pu che ñi konal taiñ religion mu (Hecho 18:⁠12, 13). Welu may, tüfa ta koylake dungu tati. Iñchiñ yamniekefiyiñ ta che kidu ñi dullial tañi feyentun. Iñchiñ ayükeiñ ta kimeltulelafiel ta Biblia tati pu che, femngechi kidu dulliafuyngün tañi religion.

Dikümtukukelafiyiñ iney no rume ñi feyentual iñchiñ reke. Kafey, amultukukelaiñ politiko dungu no rume taiñ religion mu, ka elukelafiyiñ plata ta che ñi Dungukelu Iney Ngen Jewba ngerpual, kam kakelu kellu. Iñchiñ femkelaiñ feychi che reke wün mu müten feypikelu ‘kristiano ngen’, welu inakenolu Kristo ñi kimeltun tañi mongen mu. *

Tati pu che, ¿kidu dullipeafuy may ka religion mu konal?

Ti pelon wentru Abraam elkünuy tañi pu chaw ñi religion

‘Femafuy’ pi ta Biblia, tüfa mu müley fentren inayentufalchi che, kidu dullingün ñi poyeafiel ti rüfngechi Ngünechen, fey inawelafingün tañi pu chaw ñi religion. Femngechi femi Abraam, Rut, kiñeke che Atena tuwlu ka ti apostol Pablo (Josué 24:⁠2; Rut 1:⁠14-16; Hecho 17:⁠22, 30-34; Galata 1:⁠14, 23). Kafey, Biblia feypi tati che kidu dulliafuy ñi elkünual tati religion tutekefilu Ngünechen, wedalkafule rume ti che ñi femün (1 Juan 2:⁠19).

Tati ONU feypi ti Declaración Universal de Derechos Humanos mu “nüwküley wall Mapu mülechi dungu koneltulelu kom pu che ñi dulliel tañi mongen mu”, ka feypiley kom pu che “kidu duam küpa konle kake feyentun mew femay müten” ka “pepi kintuay, ramtuay ka lloway dungu tañi küdawkülen mu. Ka femngechi tüfachi dungu pepi kimelafi chew rume”, religioso kimeltun kütu. * Feymu llemay, kom iñchiñ eluñmangelu am ñi dullial müley ñi yamnieafiel kakelu che ñi dullial ta ingkayafiel kidu tañi feyentun ka famentual taiñ feyentukeel.

Kiñe che ka religion mu konle, ¿illamkapeafuy tañi pu che?

Femlayay. Tati Biblia yafültukukeeiñmew taiñ yamnieafiel kom pu che, chem religion niefule rume (1 Pedro 2:⁠17). Kafey, tati pu Dungukelu Iney Ngen Jewba inaniekeyngün Biblia ñi werkün dungu ñi yamnieafiel tañi chaw ka ñuke, kake feyentun niefule rume (Efesio 6:⁠2, 3).

Welu, kom pu che ayükelafi Biblia ñi dungu. Kiñe domo tremlu Zambia mapu mew, feypi: “Taiñ trokiñche mew, kiñe che koneltule kangelu religion, illamkayafuy tañi pu che ka tañi trokiñche”. Feychi dungu rupay tüfachi domo, petu üllchangelu konlu ñi chillkatual Biblia pu Dungukelu Iney Ngen Jewba engu fey elkünuy ñi religion. Kidu feypi: “Tañi chaw ka ñuke fentren rupa feypienew ñi lladkütufiel engu. Küdawngefuy tüfa, iñche müna falintuniefiñ ñi tutewküleal tañi chaw ka ñuke engu. [...] Püntütripanoal Jewba mu duamfalngelay ñi püntütripayal tañi reñmawen mu”. *

^ parr. 2 Papeltuafuymi La Atalaya, 1 enero 2002, pagina 12, parrafo 15.

^ parr. 8 Kiñe dungu, 785 tripantu püle ti longko ülmen Carlomagno elkünuy kiñe ley ñi langümngeal kom pu che koneltulelu tati Sajonia religion mu küpa fawtisanole tati katoliko religion mu ñi koneltual. Ka kiñe dungu, tati Paz de Augsburgo pingelu tüfa kiñe eldungu chew wirikonkülelu epu trokiñ weychafe tañi üy, tüfa engün weychayngün tati Sacro Imperio Romano mülechi weychan 1555 tripantu mu. Feychi eldungu mu feypikünungey tati ñidolkülelu kake lof mapu mu mülefuy ñi dullial kiñe religion: katoliko kam luterano. Ka tati ngünenieelchi che dikümtukungey ñi koneltual feychi religion ñi dulliel tati ñidolkülelu. Fey pinole engün ñi femal tüfa, wemünentungeafuy tañi lof mu.

^ parr. 11 Tüfachi dungu ka tripay tati Carta Africana de Derechos Humanos y de los Pueblos, tati Declaración Americana de los Derechos y Deberes del Hombre, ti Carta Árabe de Derechos Humanos de 2004, tati Declaración de Derechos Humanos de la Asociación de Naciones del Sudeste Asiático, ti Convenio Europeo de Derechos Humanos ka ti Pacto Internacional de Derechos Civiles y Políticos. Welu may, kom trokiñke mapu inakelafi kakelu trokiñ mapu reke tati eldungu ñi yamniengeal tati pu che ñi dungu.

^ parr. 14 Biblia feypi Jewba tati rüfngechi Ngünechen ñi üy.