Pu che ñi nütramkakeel ka ti rüf dungu

Pu che ñi nütramkakeel: Tati pu Dungukelu Iney Ngen Jewba kawiñmakelayngün ti Navidad feyentukenolu am Jesus mu.

Ti rüf dungu: Iñchiñ ta kristianongeiñ, fey kimnieiñ ta Jesus ñi duam mew müten montulngeafuiñ (Hecho 4:12).

Pu che ñi nütramkakeel: Kimeltulelkefi tañi pu inaniekeetew ñi kawiñmanoal ti Navidad, feymu wüdamentukefingün tati pu reñmawen.

Ti rüf dungu: Iñchiñ rumeñma falintukefiyiñ ti reñmawen, feymu kimeltukeiñ Biblia ñi feypin tañi doy fülmawküleal engün.

Pu che ñi nütramkakeel: Ayüwmakelayngün ti Navidad antü mu ñi küme rupan, ñi eluwal yewün engün ka küme feleal feychi antü mew.

Ti rüf dungu: Newentukeiñ taiñ tutewküleal kakelu che iñchiñ ka wülchefengeal fill antü (Proverbios 11:25; Romanu 12:18). Kiñe dungu pengelkelu tüfa, kullingekelaiñ plata taiñ amuldungual ka kofrakelaiñ trawün mu, fey feyentukeiñ Jesus ñi werkün dungu: “Eymün ta re elungeymün [...] Ka femngechi re wülafimün ta eymün” (Matew 10:8). Kafey kimeltuchekeiñ ñi mülen kiñe rüf maneluwün müten ñi müleal tüngün kom Mapu mu, fey tüfa Ngünechen ñi Ngünenien (Matew 10:7).

Pu Dungukelu Iney Ngen Jewba, ¿chumngelu kawiñmakelayngün ti Navidad?

  • Jesus feypilay ñi rakiduamniengeal feychi antü ñi choyüngen, welu may tañi lan ñi antü llemay (Luka 22:19, 20).

  • Jesus ñi pu apostol ka tati wünenke kristiano kawiñmakelafuyngün ti Navidad. Tati Diccionario del cristianismo feypiley tüfachi kawiñ mu “elkünungey 330 tripantu püle” taiñ mülen antü mew, dew rupalu doy 200 tripantu ñi lan tati kiñelewechi apostol.

  • Rüf kimngelay Jesus ñi choyüngen 25 konchi diciembre küyen mu, ka tati Biblia kimfalkünulay rume chumül ñi choyüngen.

  • Kimnieiñ ta Chaw Ngünechen ñi ayükenofiel ti Navidad, koylake tuwün-ngechi wimtun nielu kay tüfa (2 Korintio 6:17).

¿Chumngelu femkelayngün kakelu che reke?

Fentren pu che kawiñmakeyngün ti Navidad kimlu rume tañi chaftukefiel Biblia ñi feypin ka tañi kristiano tuwün-ngenon. Kiñeke ta ramtuafuy: ¿chumngelu pu kristiano müley ñi femnoal kakelu che reke? ¿Chemu fente longkontukufali tüfa?

Tati Biblia yafültukueiñmu taiñ adümelafiel taiñ chumngechi rakiduamken ñi küme dullial taiñ chumal (Romanu 12:1, 2). Kafey kimeltukeeiñmu taiñ falintuafiel ti rüf dungu (Juan 4:23, 24). Ka falintukefiyiñ ñi chem rakiduamkeel pu che iñchiñ mu, welu doy piwkentukukeiñ Biblia ñi feypin, ayünole rume kakelu che.

Feyngey, iñchiñ dullikeiñ taiñ kawiñmanoal ti Navidad, welu yamniefiyiñ kakelu che kidu ñi dullial ta chumal. Feymu katrütukelaiñ pu che ñi kawiñmayal tüfa.