CHUMNGELU FALIN-NGEY

Müley kakelu dungu doy falin-ngelu tami ad mu.

EYMI, ¿CHUMAFUYMI?

Rakiduamnge tüfachi rupan dungu: Julia komütuwlu ti espejo mew, rume motrilelu trokiwi. Ka rakiduami: “Müley tañi doy tronglial”. Welu tañi pu chaw ka tañi pu weni feypieyew ñi tronglilen kiñe rüngi reke.

Julia rakiduamküley ñi femal kiñe dungu kuñiwün-ngelu ñi doy tronglial kiñeke “kilo müten”. Müley ñi inoal kiñe mufü antü...

Eymi Julia reke trokiwülmi, ¿chumafuymi?

¡FELENGE KA RAKIDUAMNGE!

Welulkaleafuy tami rakiduamnieel tami ad mu.

Wedalkalayafuy tami ayünieel küme adngeal. Biblia mew pengeli kiñeke che ñi küme adngen, kiñeke tüfa ta Sara, Rakel, Jose, David ka Abigail. Biblia ta feypi kiñe domo Abisag pingelu “afmatufalngefuy ñi fente küme ad ñi nieel” (1 Reyes 1:4).

Welu fentren pu wechekeche re rakiduamküleyngün müten ñi küme adngeal. Feymu wedake dungu kontupayafeyew. Inaduamnge tüfa:

  • Ngüneduamngelu tüfachi dungu, 58% tati üllchake domo feypingün ñi motrilen, welu 17% rüf motrileyngün.

  • Kangelu rupa mu inaduamngey kiñeke domo tronglilelu, welu 45% tüfachi pu domo motrilelu trokiwingün.

  • Kiñeke wechekeche re rakiduamküleyngün müten ñi tronglial, kontueyew anorexia. Tüfachi kutran rume kuñiwün-ngey, ka tati nielu anorexia iwekelayngün.

 Kiñeke dungu mew kimfalngele tami nieel anorexia kam kangelu femngechi kutran, eluwnge tami kellungeal. Feypiafimi tami pu chaw, kam kangelu tremche tami manelnieel. Biblia ta feypiley: “Kiñe rüfngechi weni rumel piwkeyechekey, ka kiñe peñi reke feley ñi mülen mu weñangkün” (Proverbios 17:17).

TATI DOY KÜME DUNGU TAMI FEMAFEL

Kiñe che ayüfali ñi chumngen tañi piwke mu. Ngüneduamnge tati longko ülmen David ñi fotüm, Absalon pingelu. Biblia ta feypi:

“Kom Israel mew chem wentru no rume doy fütra sakingelafuy Absalon mu fente ñi küme adngen. Nielafuy chem welulkan no rume” (2 Samuel 14:25).

Welu kidu rume mallmachengefuy, diñmatuchefengefuy, ka ngünenkachefengefuy. Feymu tati Biblia küme dunguyelafi, pengeli ñi manelfalngenon ka ñi langümchefengen rume üdechekefulu am.

Feymew llemay, tati Biblia ngülamtukeeiñmu:

“Fey tüfa nietuymün tati we mongen, tati wengetuchi che” (Kolosense 3:10).

“Ngelay [...] ñi rume adkakaleael tañi lapümlongkon [...]. Feymew ñi piwke mew may ñi müleael tati afkenochi adelkalen” (1 Pedro 3:3, 4).

Tami ayünieel ñi küme adküleal, weda dungu no tati, welu ñi chumngen tami piwke doy fali tami ad mu. Rupale ti antü, tati pu che doy ngüneduamay tami chumngen tami ad mu. Kiñe üllcha domo, Felicia pingelu, feypi: “Küme adngelmi, kakelu pu che pürüm afmatuaeymu, welu küme piwkengelmi ka kümeke chumngen pengelnielmi, feyke tati pu che rakiduamtunieaeymu piwkeyen mu”.

NGÜNEDUAMNGE TAMI AD

¿Ayünielafimi tami ad?

¿Rakiduamkeymi tami inayal kiñe dieta kuñiwün-ngelu, kam tami operangeal tami doy küme adngeal?

¿Chem am küme elkünutuafuymi tami kuerpu mu? (Dullinge kom tami ayüel.)

  • TUNTE PÜRAN

  • TUNTE FANEN

  • KAL LONGKO

  • CHUCHI RUMEY ÑI KUERPU

  • ANGE

  • TRAWA

Tati epu wüne ramtun mew, wirikünufilmi chew ñi feypilen “may” ka tati küla ramtun mu doy epu dungu dullifilmi, rakiduamnge tüfachi dungu mew: kakelu che weda ad trokikelaeymu chi chumngechi tami trokiwken. Tukulpange, welurakiduamafuymi ka re rakiduamkülerpuafuymi tami küme adngeal (1 Samuel 16:7).