CHUMNGELU FALIN-NGEY

Küme yewkülelmi tami pu chaw engün, doy ayüwküleaymi tami mongen mew.

EYMI, ¿CHUMAFUYMI?

Rakiduamnge tüfachi rupan dungu: miercoles dew nagantüy, Jonathan, 17 tripantu nielu dewelkay kom tañi elungeel ñi femal, ka femngen akuy ti ora ñi ürkütuñmual. ¡Fente küdawlu am! Üyümfi ti tele ka tranakünuwi tañi doy ayükeelchi sillon mu.

Fey tati wülngiñ mew mulfarkülen konpay ñi chaw.

“¡Jonathan! ¿Chumngelu ngünamkamekeymi tami teletumeken? ¡Kellualu eymi tami pichi peñi ñi femal tañi tarea! ¡Turpu femkelaymi tami feypingeel!”.

Jonathan domdomi ñi illkun: “Fentekünulaymi tami feypimeken”.

Tañi chaw fülkonpay ka ramtufi: “¿Chem pimi am?”.

Jonathan afkuafkungey ñi feypin: “Chem pilan rume”, pi.

Fey tañi chaw illkupürami. “¡Femngechi dungukeeli!”, pifi.

Jonathan reke rupafulmi tüfachi dungu, ¿chumafuymi?

¡FELENGE KA RAKIDUAMNGE!

Amulniefilmi kiñe auto, welu katrütulele ti karretera, fey kintuafuymi kangelu rüpü. Ka femngechi kintuafuymi tami küme nütramkayafiel tami pu chaw.

 RAKIDUAMNGE:

Kiñe üllcha Lea pingelu feypi: “Küdawngey ñi nütramkayafiel tañi chaw. Kiñeke mu, petu ñi nütramkamekefiel, kidu feypikeenew: ‘¿Chem feypipeen ama?’”.

LEA KÜLA DUNGU FEMAFUY

  1. Wirarelafuy ñi dungufiel tañi chaw.

    Lea wirarkülen feypiafuy: “¡Allkütuen, falin-ngey tüfa!”.

  2. Nütramkawelayafuy.

    Tüfachi dungu mu, Lea eluwafuy ñi nütramkawenoafiel tañi chaw.

  3. Üngümafuy ñi nütramkayafiel ka antü.

    Fey wüla nütramkayafuy tañi chaw, kam wirintukulelafuy kiñe karta ñi feypiafiel tañi weda dungu ñi rupan.

¿Chem feypiafuymi Lea ñi femafel?

RAKIDUAMNGE TÜFA: Lea tañi chaw fill rakiduamküley ka ngüneduamlay chem ñi rupameken. Feymu Lea femfule tati wünen dungu ka wirarelfile ñi dungufiel tañi chaw, fey kimlayafuy chem weda dungu ñi nieel tañi ñawe. Lea femngechi femfule, tañi chaw allkütulayafeyew. Ka kidu pengelafuy ñi yamnienofiel tañi chaw (Efesio 6:2). Tüfachi dungu femfule, kellulayaeyew ka tañi chaw no rume.

Katrütulele rume ti rüpü kañpüle rupayafuymi, ka femngechi kintuafuymi tami küme nütramkayafiel tami pu chaw.

Tati epungechi dungu küdawngelayafuy ñi femngeal, welu kimchengele femlayafuy. ¿Chumngelu? Lea ayüfule ñi küme elkünutual ñi weda dungu, müley ñi nütramkayafiel tañi chaw. Ka tañi chaw müley ñi kimal chem ñi rupameken, femngechi ñi kelluafiel tañi ñawe. Feymu ñüküfkülele Lea chem kellulayaeyew rume.

Welu femfule tati külangechi dungu, Lea elulayafuy chem no rume ñi katrütuetew ñi nütramkayafiel tañi chaw. Feymu üngümküleay ñi nütramkayafiel ka antü mu. Ka wirilelfile kiñe karta tañi chaw doy küme duamay.

Tati karta mew Lea küme feypilelafuy tañi chaw chem ñi rakiduamken. Fey tañi chaw doy küme kimay chem ñi rupameken tañi ñawe. Femle ti külangechi dungu, tüfa kelluaeyew ta Lea ka tañi chaw. Fey nütramkawle engu, kam wirintukulelfile kiñe karta, femngechi küme inanieafi tüfachi ngülam mülelu Biblia mew: “Inafiyiñ itrokom kümeke dungu taiñ kümelkawküleael kakelu che iñchiñ” (Romanu 14:19).

¿Ka chem dungu femafuy Lea?

Rakiduamülmi kangelu dungu ñi femal Lea. Ka feypinge chum tripayafuy femle tüfa.

 KIMFALNGEPE TAMI NÜTRAMKAN

Longkontukunge: kiñeke mu tami pu chaw ñi rakiduamün trürlayafuy eymi tami küpa feypifiel.

RAKIDUAMNGE:

Tami pu chaw ramtuelmu chumngelu tami weda duamkülen. Ka eymi feypilmi: “Küpa nütramkalan tüfachi dungu mew”.

Welu tami pu chaw rakiduamafuyngu chi tami feypiel: “Manelnielafiñ tañi pu chaw. Tañi pu weni müten nütramkayeafiñ ñi rakiduamkülen”.

Rakiduamnge tami rupameken kiñe weda dungu mu, ka tami chaw kam ñuke küpa kelluelmu, welu eymi feypilmi: “Duamkülekilnge, iñche kintuan chumngechi ñi küme elkünutuafiel tañi dungu”.

  • ¿Chem rakiduamafuyngu tami pu chaw?

  • ¿Chem doy kümeafuy tami feypial?