Lelifinge feychi pichi wentru (kintulnge ti püchü kampu) adentun mu mülelu. ¿Llükalepelay ka kidulepelay? Eymi kay ¿llükakeymi chi?... Kom iñchiñ ka llükalekefuiñ tati. Biblia ta nütrameleiñmew Jewba ñi kiñeke weni mu, fey engün ka llükakefuyngün ka kidulelu trokiwingün. Feymu fewla peaiñ chem ñi rupan Elia.

Jesafel küpa langümfi Elia

Fütra kuyfi Israel mapu mu mülekefuy Elia pingechi wentru, petu choyüngenolu (llegnolu) ta Jesu. Feychi antü mu, Israel ñi longko ülmen ka tañi domo poyelafingu tati rüfngechi Ngünechen Jewba. Akab ka Jesafel pingekefuyngu, ka poyekefuyngu kiñe koyla dio, Baal pingelu. Feymu epe kom israel­che engün ka poyekefi Baal. Jesafel rume (mütre) weda domongefuy, ka küpa langümfi kom pu che poyemekefilu Jewba, Elia kafey. Fey ¿chumafuy Elia? ¿Chumafuymi eymi?...

¡Fütra kamapu lefmawi! Amuy uwe mapu mew, ka ellkawi kiñe fütra lolo mu. ¿Chumngelu (chemu)  Elia ellkawi?... Llükalu am. Welu müley ñi llükanoal. Kimnielu am ñi kelluaetew Jewba. Kidu dew (chay no) pengeleleyew tañi newen. Kiñe rupa Elia ngillatufi ta Jewba, ka kidu llowdungueyew, ka wenu mapu mu nagpaleleyew kütral. ¡Feymu llemay, Jewba ka kelluafeyew fewla!

¿Chumngechi kellufi Jewba ta Elia?

Petu mülelu Elia chi fütra lolo mu, Jewba ramtueyew: ‘¿Chumngelu (chemu) mülepaymi faw?’. Ka Elia feypifi: ‘Kuyfi mülekefuy ka che tami poyekeetew, welu fewla iñche ta kidulewen. Kafey llükalen tañi langümngeal’. Kidu rakiduami kom pu poyekefilu Jewba ñi langümngen. Welu Jewba feypieyew: ‘Rüf femlay tati, kidulelaymi. Petu mülekay regle warangka che iñche tañi poyekeetew. Llükakilnge, nieleyu kiñe küdaw’. Feypingelu Elia tüfachi dungu, ¿ayüwi kam weñangkülewey?... ¡Ayüwi llemay!

¿Chem kimeltueiñmew Elia ñi rupan mu?... Kiñeke rupa kidulelu trokiwafuymi ka llükaleafuymi. Welu tukulpange: kidulelaymi tati, nieymi fillke weni piwkeyefilu Jewba, ka fey engün piwkeyenieeymu. Kafey longkontukuaymi tüfa: Jewba rume (mütre) newen-ngey ka rumel (molkechi) kelluaeymu. Afmatufali kimal tüfachi dungu ¿mupiñpe may?...