Niekefulu rume kayñetukeetew engün, ti kristiano trawüluwkelu doy amuley ñi tremün

MARI antü wüla, Jesu dew amutulu wenu mapu mu, feymew kiñe pataka epu mari disipulu trawüley kiñe ruka Jerusalen waria mu ti Pentekoste 33 tripantu mu, judio ñi trawün. Feymew kiñe fütra kürüf reke wüwükürumey ñi rupan, ka tati pu disipulu eluwingün ñi dungual kake kewün mu, ñi kimnon engün. ¿Chem dungu rupamekey? Ngünechen elufi ñi lif küme püllü.

Feychi antü, Jerusalen waria mew mülekefuy fentren pu che kake mapu küpalu engün ñi tukulpayal ti Pentekoste ñi trawün. Kom afmatuleyngün pefilu Jesu ñi pu disipulu kidu ñi kewün mu dungumekelu engün. Fey Pedro feypifi tati pu che ñi rupan ka tukulpafi Joel ñi pelon dungu doy feypikünulu Ngünechen ñi wülal tañi lif küme püllü kom tañi pu kona ka eluafuy pepiluwün ñi kimngenon (Joel 2:28, 29). Tüfachi afmatun dungu küme pengeli ti we trawünche kristiano ka koneltulelay Israel mu, feymu lle Ngünechen kümelkakeeyew engün. Feymew feychi antü mu, kom che ayüle ñi poyeafiel Ngünechen müley ñi kristianongeal.

Welu Kristo ñi pu kayñe eluwingün ñi kutrankayafiel Jesu ñi pu disipulu. Kiñe antü nüngey ka karseltukungey kiñeke engün, welu pun (trafia) mu, küpay kiñe werken püllü neykümpafi ka feypi ñi amuldunguleal. Ka antü puliwen mew, koningün ti ngillatuwe ruka mu ka eluwingün ñi amuldunguael Jesu mu. Feymew tati pu longkolechi religioso rume illkuleyngün (lladküleyngün), feymu feypifi engün ñi amuldungunoael. Welu tati pu apostol newen mu wiñoldungueyew (llowdungueyew): “Iñchiñ feley taiñ doy müngeltuafiel [feyentuafiel, TNM] ta Ngünechen ta che mew” (Hecho 5:28, 29).

Welu tati pu kayñe afeluwlay doy wedalkamekeal. Kiñeke pu judio dallukafingün ta Esteban ñi femün, feymu langümfingün. Feymew langümngelu ta Esteban, mülefuy kiñe wentru tuwlu Tarso, Sawlu pingelu, tüfachi weche wentru rume üdekefi tati pu kristiano. Dew rupalu feychi dungu, amuy Damasko waria mu ayüy ñi püresukünungeal kom tati pu kristiano ñi pefiel. Welu petu amulelu ti rüpü mu, kiñe wilüfkülechi (lüboykülechi) pelon küpalu wenu mapu mu ka trawmaleyew. Feymew allküy kiñe dungun ñi feypietew : “Sawlu, Sawlu, ¿chem mew anta üyawtu inayawülen? Fey Sawlu ramtuy: —¿Iney am ta, eymi Ñidol? Fey ti dungun llowdungueyew: —Iñche ta Jesus” (Hecho 9:3-5).

Küla antü mu wüla, Jesu werkufi tañi disipulu Anania pingelu ñi wiñoleltuafiel ñi pelotual ta Sawlu. Feymew, Sawlu fawtisawi ka eluwi ñi amuldungual kom ñi newen mu, ka mülen antü mu apostol Pablo kimngerpuy, tüfachi wentru fentren küdawi ñi kimeltual ti kümeke dungu.

Ellaka mu, tati pu disipulu amuldungukefuyngün Ngünechen ñi Ngünenien tati pu judioche ka tati samariache müten. Welu kiñe antü kiñe werken püllü pewfaluwi ta Kornelio, kiñe longkolechi soltaw tuwlu Roma mu, fey mupikey Chaw Ngünechen, feymew werküy ñi küpayal ti apostol Pedro. Feymew Pedro aküy kakelu disipulu engün ka amuldungufi ta longkolechi soltaw ka tañi pu che. Ka ti apostol petu ñi wewpimeken, feymu kom tati feyentulelu llowi engün ti lif küme püllü, ka Pedro feypi ñi fawtisangeal Jesu ñi üy mew. Feychi antü mu, chuchi che rume, ka mapu tuwlu rume, afnoachi mongen nieafuy. Femngechi tati kümeke dungu amuldungungeay kom Mapu mu.

(Tuwlu chi lifru Hecho 1:1–11:21.)