Abraam feyentufi ta Ngünechen. Tañi mupiltun mu, Jewba feypikünufi ñi kümelkayaetew ka ñi eluafiel kiñe fütra yomelche

KIÑE küla pataka kechu mari tripantu dew rupalu ti Fütra Mangiñ Ko. Abraam mülekefuy ülmen-ngechi waria mew, Ur pingekefuy. Tüfachi kuyfi waria mülekefuy ti mapu koneltulelu famülke mew Irak pingechi mapu. Abraam nierkey kiñe fütra mupiltun Ngünechen mu, welu müley ñi pengelal ñi chumngen tañi mupiltun. Peafiyiñ chem ñi rupan.

Jewba feypifi ñi elkünual ñi mapu chew ñi tuwün, ka ñi wiñamtuwal ka mapu: Kanaan pingey. Müchay müten feyentuy (müngeltuy) Abraam. Kidu yefi ñi kure Sara, ka ñi malle Lot, ka kom tañi pu che mülelu ñi ruka mu amuyngün kamapu. Akulu Kanaan mapu mu, re tolto ruka mew miawkefuy fill püle. Jewba femi kiñe eldungu Abraam engu: Feypikünufi kom tati pu che mülelu Mapu mu kümelkangeay Abraam ñi duam mu, ka tañi pu yomelche (küpalelu) alün-ngeay, ka Kanaan mapu ngen-ngeay.

Abraam ka Lot engu fentren ufisa ka kulliñ nierpuyngu. Abraam rume (mütre) fürenechefe ngey ka eluñmay tañi malle ñi dullial ti mapu doy ayükeel ñi pu kulliñ ñi müleal. Lot dullifi (ngümintubi) ti küme trokiñ mapu mülelu Jordan lewfü mu, ka mülenagi inafül Sodoma waria püle. Welu tati pu che mülelu feychi waria mu rume wedake che ngekefuyngün, ka tañi podümngechi yafkan ñi femmeken engün illamkakefi ta Jewba.

Wüdatripalu wüla Abraam Lot engu, Jewba feypikünufi ñi nieal fentren yomelche wangülen reke mülelu kallfü wenu mew. Abraam niekefuy mupiltun Jewba mu, welu ñi kure pepi niepüñeñkelay. Feymew, kidu nielu aylla mari aylla tripantu ka tañi domo Sara epe aylla mari tripantu nielu, Ngünechen feypifi ñi nieal engu kiñe yall (püñeñ). Ka femngechi rupay: Sara niepüñeñi kiñe wentru püñeñ üytungey Isaak. Abraam nierpuy ñi pu yall, welu ti Montulchefe feypikünungelu Eden mu triparpuay Isaak ñi pu che mu.

Petu rupalelu tüfachi dungu, Lot petu müley ñi pu reñma engün Sodoma waria mu. Welu küme wentrungelu am, inayentukelafi tati podkülechi dungu ñi femmeken tüfachi pu che. Feymu, elduamlu Jewba ñi apümafiel Sodoma, wüne werküy kiñeke werken kümeke püllü ñi kimelelafiel Lot tüfachi dungu. Tati pu werken püllü feypifi Lot ka tañi pu che ñi lefmawal engün, ka ñi wiñokintunoal engün. Feymu Ngünechen femi ñi nagpayal kütral ka asufre kallfü wenu mu, ñi apümngeal tati wedake che Sodoma waria mu ka tati pu che mülelu ti püllelechi waria, Gomora pingelu. Lot ka tañi epu ñawe montuyngün. Welu tañi kure wiñokintuy, fütra ayüfilu peno kom ñi chemkün elkünulu. Ñi feyentunon mu lay.

(Tuwlu Génesis 11:10 ka puwlu 19:38.)