ADKINTUFINGE tüfachi epu wentru meñkunieyngu fillke fün. Lelifinge müna fütra kütrüng ufad mülelu tüfa. Epu wentru meñkuniey kiñe mamüll mew. Ka lelifinge pu igo, ka kakelu fün. ¿Chew tuwi tüfachi kümeke fün? Kanaan mapu mew. Kimniekaymi Kanaan fey ta chew mülekefuyngün Abraam, Isaak, ka Jakob. Welu tati ngüñün mew mülefuy üye mew, Jakob ka ñi pu reñma (che) wiñamtuwi engün Egipto mu. Fewla dew rupay 216 tripantu mu, Moyse wiño yetufi tati pu Israel che Kanaan mew. Fewla müleyngün ti wellin mapu mu, Kade pingechi mapu.

Kanaan mapu mu müley wedake che. Feymu lle Moyse werküy mari epu ellka-ngüneduammapufe, ka feypifi: ‘Inaduamaymün tunten che müley üye mew, ka chumten newen nieyngün. Ka inaduamaymün küme mapu ngele ñi nganal (tukual). Ka müley tamün küpalal kiñeke fün.’

Tati pu ellka-ngüneduammapufe wiñotulu Kade pingechi mapu mew, feypifi ta Moyse: ‘Rüftu küme mapu ngey.’ Ka ñi feyentual engün, pengelfi kiñeke fün. Welu mari ellka-ngüneduammapufe feypi engün: ‘Tati pu che mülelu üye mew, fütrakey ka newen-ngey engün. Montuñmafiliyiñ ñi mapu, langümngeayiñ.’

Tati pu Israel che llükay engün allkütulu tüfa. ‘Doy kümefuy laliñ Egipto mu, kam tüfa chi wellin mapu mew rume,’ pingün. ‘Layaiñ awkan (weychan) mew, ka taiñ pu domo ka taiñ pu yall ñi nüngeal engün. ¡Dulliayiñ (ngümintuayiñ) kiñe we longkolealu, welukünuafiyiñ Moyse, ka wiñotuayiñ Egipto mu!’, pingün.

Welu epu pu ellka-ngüneduammapufe maneluwkeyngu Jewba mu, ‘kümelkaleaymün, llükakilmün’ pifi ti waria che. Josue ka Kaleb pingeyngu. Feypingu: ‘Llükakilmün. Jewba müley iñchiñ mew. Küdawngelayay ñi nüafiel feychi mapu.’ Welu tati pu che allkütulay. Fey engün ayüfuy ñi langümafiel Josue ka Kaleb.

Tüfachi dungu rume illkulkafi (lladkülkafi) Jewba, ka feypifi Moyse: ‘Iney che no rume nielu epu mari tripantu ka doy tripantu, konlayay Kanaan mapu mew. Pey engün iñche ñi femün afmatun dungu Egipto mu ka ti wellin mapu mu, welu petu maneluwlay engün iñche mew. Feymu lle nampiyawaymün (ñafkiawaymün) ti wellin mapu mew meli mari tripantu mu, kom lalmün wüla. Jose ka Kaleb müten konayngu Kanaan mapu mew.’