¿ALLKÜTUKEYMI ñi dunguken kiñe furiku (burro)? ‘Femkelay. Dungukelay pu kulliñ,’ piafuymi. Welu chi Biblia feypi kiñe furiku dunguy. Peafiyiñ chumngechi rupay tüfa.

Tati pu Israel che epe puwküley ñi konal Kanaan mapu mew. Balak, longkolelu Moab mapu mew, llükaniefi tati pu Israel che. Feymu lle, werküy ñi yemengeal kiñe ñiwa wentru, Balaam pingey, ñi küpayal tañi malisiapayafiel tati pu Israel che. ‘Kulliayu fentren plata’ pifi, feymew Balaam püray ñi furiku, amuy ñi pemeafiel Balak.

Jewba pilay Balaam ñi malisiayafiel Ñi pu che. Feymu lle, werküy kiñe werken küme püllü nielu kiñe fütra kuchillu ñi witraleal ti rüpü mew, ka katrütufi ñi amual Balaam. Welu Balaam pelafi ti werken püllü, welu ñi furiku peniefi. Ti furiku famentuwküley ñi kiñenpülekünuwal ti werken püllü mew, af mew trananakümüwi rüpü mew. Rume lladkürkey Balaam, ka kupaf-kupafyefi kiñe mamüll mu.

Feymew Jewba femi Balaam ñi allküal ñi dungual ti furiku. ‘¿Chumeyu am kupafkanieen?’ ramtueyew ti furiku.

Balaam feypi: ‘Eymi tami duam mu, rume wedwed wentru femngewen iñche. ¡Nieli kiñe kuchillu, langümafeyu!’ pi.

‘¿Femkefeyu kuyfi?’ ramtueyew ti furiku.

‘Femkelafen,’ llowdunguy Balaam.

Feymew Jewba eli Balaam ñi peal ti werken püllü nielu ti fütra kuchillu, witraley rüpü mew. Ti werken püllü feypifi: ‘¿Chumngelu (chemu) kupafkamekefimi tami furiku? Akun may katrürüpüeyu, mülelay tami amual tami malisiapuafiel tati pu Israel che. Tami furiku kiñenpülekünunowfule iñche mew, langümafeyu, welu allfül-layafun tami furiku.’

‘Yafkaluwün,’ pi Balaam. ‘Iñche kimlan tami mülerken ta rüpü mew.’ Ti werken püllü eluñmafi Balaam ñi amual, ka Balaam amuley ñi pemeafiel Balak. Petu küpa malisialefifel pu Israel che, welu Jewba femi ñi kümelkayafiel Israel küla rupa mew.