“Ti fawtisawün tamün montulnieetew” (1 PEDRO 3:21, Traducción del Nuevo Mundo [TNM]).

ÜLKANTUN: 52 KA 41

1, 2. 1) ¿Chum duamkülekey kiñeke chaw ka ñuke küpa fawtisawlu tañi yall? 2) Pu küpa fawtisawlu, ¿chumngelu (chemu) ramtulelngekey ñi wülün tañi mongen Jewba mew? (Inaduamnge ti adentun ellaka mu mülelu).

MARIA epeke fawtisawküley, feymu witraley kakelu pu küpa fawtisawlu engün. Ñi chaw ka ñuke adkintunieeyew. Fey ti wewpife epu dungu ramtuwyey, ka Maria newentu wiñoldunguy. Müchay müten ti malen fawtisawi.

2 Maria ñi chaw ka ñuke müna ayüwülkeeyew tañi püñeñ ñi wülün tañi mongen Jewba mew ka tañi fawtisawün. Welu petu ñi rupanon tüfa, Maria ñi ñuke fill rakiduamkülekefuy, fey ramtuwkefuy: “¿Pepikawkülepey may ñi püñeñ tañi fawtisawal? ¿Küme kimniepey may fente ñi falin-ngen tüfa? ¿Kümepelayafuy ñi üngümal tañi fawtisawal?”. Fentren kümeke chaw ka ñuke ka femngechi rakiduamkey küpa fawtisawlu tañi yall (Eclesiastés  5:5). Ti doy falin dungu ñi femafel kiñe che fey tüfa: wülal tañi mongen Jewba mew ka fawtisawal, feymu ¿fill rakiduamnoafulu am pu chaw küpa fawtisawlu ñi yall? (Inaduamnge ti wichulechi dungu “ ¿Wülimi tami mongen Jewba mew?”).

3. Pedro, ¿chem mu trürümfi ti fawtisawün?

3 Apostol Pedro trürümfi ti fawtisawün ka Noe ñi dewman ti fütra wampo ruka (papeltunge 1 Pedro 3:20). Biblia feypi: “Fey tüfa adentuley ti fawtisawün tamün montulnieetew Jesukristo tañi wiñomongetun mew (fawtisawün mu liftuñmangelay tamün kuerpu ñi podüñmaetew, welu may ngillatulelfimün küme rakiduam ta Chaw Ngünechen)” (1 Pedro 3:21, TNM). Ñi dewman ti fütra wampo ruka, Noe küme pengeli tañi küpa femken Jewba ñi ayükeel. Feymu kom piwke mu femi Jewba tañi elfalkünuetew. Itrokom che ngüneduamafuy tüfa. Fey Noe tañi feyentufiel ta Jewba, kidu ka tañi pu che montuyngün ti Fütra Mangin Ko mew. Pedro ñi feypin, ¿chem küpa kimeltuy?

4. ¿Chumngelu trürümfalngey ti fawtisawün ka Noe ñi dewman ti wampo ruka?

4 Pu che ngüneduamlu ti fütra wampo ruka, kimtukuy Noe tañi feyentufiel ta Chaw Dios. Ka femngechi kakelu ngüneduamlu kiñe che tañi fawtisawün, kimtukukey feychi che ñi wülün tañi mongen Jewba mew fente ñi feyentufiel Jesus tañi lan ka wiñomongetun. Pu fawtisawlu allkütukefingün ta Chaw Dios ka femkeyngün kidu tañi elfalkünuetew, Noe reke.  Feymu, chumngechi tañi montulfiel ta Noe ti Fütra Mangin Ko mew, Jewba montulafi tañi pu nor piwkeyeetew fawtisawlu, femay tüfa apümfile kom pu wedake che Mapu mew (Marku 13:10; Apokalipsi 7:9, 10). Feymu kiñe che feypikonkülele ‘ka antü wüla fawtisawan’, fey llowlayafuy chi afnoachi mongen. Rüfkünu llemay, müna falin-ngey wülal taiñ mongen Jewba mew ka fawtisawal.

5. ¿Chem ngüneduamaiñ tüfachi chillkatun mew?

5 Dew kimürpuiñ ñi fente falin-ngen ti fawtisawün, welu ka duamfali taiñ wiñoldungual tüfachi küla ramtun: ¿chem kimeltukey Biblia ti fawtisawün mu? ¿Chem duamfalngey ñi femal taiñ fawtisawal? Kimeltulelfiliyiñ Biblia taiñ pu yall kam kakelu che, ¿chumngelu rakiduamtukuaiñ ñi fente falin-ngen tañi fawtisawal engün?

¿CHEM KIMELTUKEY BIBLIA TI FAWTISAWÜN MU?

6, 7. 1) Pu che, ¿chumngelu wütukefuy ta Juan ñi fawtisayaetew? 2) ¿Iney ñi fawtisawün trürlay kakelu mew? ¿Chumngelu kay?

6 Ti wünen fawtisachekelu nütramkalu Biblia, tüfa ta Juan ti Fawtisachefe (Matew 3:1-6). ¿Chumngelu pu che wütukefuy ta kidu ñi fawtisayaetew? Femün mu tüfa, pengelkefuy tañi wiñorakiduamtulen ñi inanofiel Moyse ñi Ley engün. Welu kiñe rupa Juan fawtisafi ta kiñe che kangelu falin dungu mew, tüfa tati doy falin-ngelu ñi femün. Kidu sakingefuy elungelu ñi fawtisayafiel ta Jesus, Chaw Dios tañi kulpan-ngenochi Fotüm (Matew 3:13-17). Jesus turpu kulpalay, feymu nielafuy chem mu tañi wiñorakiduamtual (1 Pedro 2:22). Fey, ¿chumngelu fawtisawi Jesus? Femngechi pengeli tañi pepikawkülen ñi femal Jewba tañi ayükeel (Ebrew 10:7).

7 Amuldungulu Jesus, tañi pu disipulu ka fawtisachekefuyngün (Juan 3:22; 4:1, 2). Feychi pu fawtisawlu ka küpa pengelingün tañi wiñorakiduamtun ñi inanofiel Moyse ñi Ley. Welu wiñomongetulu Jesus, kangelu dungu mu fawtisawi pu ayülu kidu tañi disipulungerpual.

8. 1) Wiñomongetulu wüla Jesus, ¿chem werküfi ñi femal tañi pu inanieetew? 2) Jesus ñi pu inanieetew, ¿chumngelu duamfalngey ñi fawtisawal?

8 Pichi rupalu wüla Jesus ñi wiñomongetun, feychi 33 tripantu mu, Jesus pewfaluwtufi doy 500 wentru, domo ka pichikeche peno. Feychi mu peno kidu feypi: “Amumün, kom chüf mapu müleyechi pu che mew. Ka kimeltuafimün femngechi tañi kimaetew engün ka iñche ñi disipulungeael engün. Fawtisayafimün [...] ka kimeltuafimün tañi feyentuael engün kom iñche tamün werküwkefiel ta eymün” (Matew 28:19, 20; 1 Korintio 15:6). Jesus werküfi tañi pu inanieetew ñi kimeltucheal. Ka müley ñi fawtisawal kom pu ayülu tañi disipulungeal (Matew 11:29, 30). Ñi ayüwülafiel ta Chaw Dios, tüfachi pu che müley ñi feyentual Jesus tañi kelluntukuken ñi küme tripayal Jewba tañi ayükeel, fey müten fawtisawafuy chumngechi ñi ayükeel Chaw Jewba. Fentren rupa Biblia pengeli pu  wünenke disipulu ñi rume falintukefiel ti fawtisawün, feymu ‘ka antü wüla fawtisawan’ feypikelafuyngün (Hecho 2:41; 9:18; 16:14, 15, 32, 33).

¿KÜMEPEAFUY MAY ÑI DOY ÜNGÜMAL?

9, 10. Ñi rupan tati etiopia wentru ka Sawlu, ¿chem kimeltukeeiñmu ti fawtisawün mu?

9 (Papeltunge Hecho 8:35, 36). Inaduamaiñ ñi rupan kiñe etiopia wentru llowlu pu judiu ñi feyentun ka wiñotulu ñi ruka dew tañi poyefiel ta Ngünechen Jerusalen mew. Fey kiñe küme püllü werküfi ta Felipe ñi amuldunguafiel ka kimeltulelafiel tüfachi trokiñ ‘tati troy dungu Jesus tañi nütramkaniefiel’. Fey, ¿chumi tati etiopia wentru? Kidu kimürpuy ñi fente falin-ngen tañi feyentual Ngünechen ñi Ñidolkünufiel ta Jesus. Ka küpa femlu Jewba ñi feypifiel pu kristiano, newe üngümlay ñi fawtisawal.

10 Ka ngüneduamaiñ ñi rupan Sawlu, kiñe judiu wentru. Pu judiu Jewba ñi trokinchengefuy, welu kidu famentueyew engün ñi feyentunon mu. Sawlu rakiduamkefuy pu judiu ñi küme poyefiel ta Chaw Dios, feymu kayñetukefuy pu kristiano ka Jesus ñi lalen trokikefuy. Welu kidu rüf wiñomongetufuy, fey kiñe antü Jesus ñi dungun wenu mew nagpay ñi dunguafiel ta Sawlu. Fey, ¿chumi tüfachi wentru? Ayüwün mu eluwi tañi kelluaetew kiñe kristiano Anania pingelu, fey Sawlu “witratripay ka fawtisangey” (Hecho 9:17, 18; Galata 1:14). Rupalu chi antü, tüfachi wentru apostol Pablo kimngerpuy. Ngüneduamfali tüfa: Sawlu kimürpulu müten Jesus ñi kelluntukuken tañi küme tripayal Chaw Dios ñi ayükeel, fey newe üngümlay rume ñi fawtisawal (papeltunge Hecho 22:12-16).

Pu chillkatukelu fente tañi ayüwülkeetew ti rüf dungu tañi kimürpuel, kom piwke mu ayükey ñi fawtisawal

11. 1) ¿Chumngelu fawtisawkey pu chillkatukelu Biblia famülke mew? 2) Fawtisawün mu kiñe che, ¿chum duamkeiñ?

11 Famülke mew ka femngechi femkey fentren chillkatukelu Biblia, wechekeche ka füchakeche. Fente ñi piwkeyekefiel ka feyentukefiel Biblia tañi feypin, kom piwke mu ayükey wülal ñi mongen Jewba mew ka fawtisawal. Kiñe che llowlu ti rüf dungu ka eluwlu ñi fawtisawal, kom pu Dungukelu Iney Ngen Jewba müna ayüwkeiñ. Ka femngechi femkey pu chaw tañi yall ñi fawtisawün mu. Feymu fütrake trawün mu müna ayükeiñ allkütual ti wewpin ñi wülngeal pu fawtisawalu. Feychi 2017 tripantu mu, doy 284.000 che fawtisawi, femngechi pengeli ñi wülün tañi mongen Jewba mew (Hecho 13:48). Kom engün kimniey ñi duamfalngen tañi fawtisawal pu inaniefilu ta Jesus. Welu, ¿chumingün ñi femürpual tüfa?

12. Ñi fawtisawal kiñe chillkatukelu Biblia, ¿chem müley ñi femal?

 12 Ñi fawtisawal kiñe chillkatukelu Biblia, müley ñi kimürpual ti rüf dungu Jewba mew, ñi ayünieel chumngechi feleal ti Mapu ka ti pu che, ka ñi chumün tañi montulcheal (1 Timotew 2:3-6). Fey wüla müley ñi feyenturpual, tüfa kelluaeyew ta inayal Chaw Dios ñi pin ka femwenoal kidu tañi üdekeel (Hecho 3:19). Welu petu amulele ñi femken wedake dungu, ka wülkünufule ñi mongen Jewba mew, kidu llowmalayaeyew (1 Korintio 6:9, 10). Kafey pu küpa fawtisawlu müley ñi trawüluwal, amuldungual ka kimeltucheal. Müna duamfali ñi femal tüfa kom pu küpa inaniefilu Jesus (Hecho 1:8). Kiñe chillkatukelu Biblia wüne femle kom tüfa, fey wüla kiñe ngillatun mu wülafuy ñi mongen Jewba mu ka fawtisawafuy.

KELLUAFIYIÑ PU CHILLKATUKELU ÑI KÜPA FAWTISAWAL

Kimeltucheken mu, ¿eluwkeymi tami feypiafiel ti che fente ñi falin-ngen tañi fawtisawal? (Inaduamnge parrafo 13).

13. Longkontukuliyiñ fente ñi duamfalngen tañi fawtisawal pu chillkatukelu Biblia, ¿chem chumaiñ?

13 Kellufiliyiñ taiñ pu yall ka pu chillkatukelu Biblia ñi femal tüfachi dungu taiñ ngüneduampeel, falin-ngey rakiduamtukual tüfa: ñi küme inayafiel engün ta Jesus, duamfalngey tañi fawtisawal. Longkontukuliyiñ tüfa, eluwaiñ taiñ feypilelafiel fente ñi falin-ngen wülal tañi mongen Jewba mu ka fawtisawal. Chumül rume duamfalngele feypilelafuiñ. Feley llemay, ¡müna ayüleiñ kidu engün ñi küme amulerpual Jewba ñi rüpü mew ka tañi fawtisawal!

14. ¿Chumngelu dikümtukulayafiyiñ ta iney no rume ñi fawtisawal?

14 Chaw Jewba dikümtukukelafi ta iney no rume tañi poyeaetew, feymu turpu dikümtukulayafiyiñ tañi fawtisawal kiñe pichikeche, weche kam chillkatukelu Biblia (1 Juan 4:8). Chillkatuliyiñ kiñe che iñchiñ, kimeltuafiyiñ ñi falin-ngen kidutu tañi weniyeafiel ta Jewba. Feychi chillkatukelu rüf mañumkülele ñi kimeltulelngeel ti rüf dungu Jewba mew ka rüf eluwkülele ñi inayafiel ta Jesus, fey kidu ñi pin mu küpa fawtisaway (2 Korintio 5:14, 15).

15. ¿Feypiafuiñ tunten tripantu ñi nieal kiñe che ñi fawtisawal? ¿Chumngelu am?

15 ¿Tunten tripantu duamfalngey ñi nieal kiñe che tañi fawtisawal? Fawtisawafuy tunten tripantu niefule rume, kakerumelu kay ñi tunteñman kiduke  pu che ñi küme weniyeafiel ta Jewba. Kiñeke weche fawtisawlu amuley tañi poyekefiel ta Jewba fentren tripantu rupale rume. Kakelu kimürpuy Biblia dew füchalu, fey fawtisawi. ¡Kiñeke doy pataka tripantu nierkey!

16. Kiñe che fawtisawyelu ka religion mew, ¿chumngelu duamfalngey tañi wiño fawtisawal ñi Dungukelu Iney Ngen Jewba ngerpual?

16 Kiñe papay fawtisawyelu kakelu religion mew eluwi ñi chillkatual Biblia kiñe lamngen engu. Feymu ramtufi: ‘¿Rüf duamfalngey tañi wiño fawtisawal?’. Taiñ lamngen pengeleyew kiñeke trokiñ Biblia mu tañi wiñoldunguafiel. Fey ti papay kimtukulu Biblia ñi chem pilen, eluwi tañi fawtisawal, epe 80 tripantu nierkelu rume. ¿Chem kimeltukeeiñmew tüfa? Jewba llowafi kiñe che ñi fawtisawün, tüfachi che rüf kimle Jewba ñi ayükeel. Fey dew fawtisawle rume ka religion mu, duamfalngey tañi fawtisawal ñi Dungukelu Iney Ngen Jewba ngerpual (papeltunge Hecho 19:3-5).

17. Feychi antü tañi fawtisawün, ¿chem mu kümeafuy ñi rakiduamal ti che?

17 Müna ayüwün-ngey feychi antü ñi fawtisawün kiñe che. Welu kafey ngüneduamfali, küdawngeafulu am inayafiel ta Jesus. Ti fawtisawalu ‘wülkünun ñi mongen eymi mu’ feypikünufi ta Jewba, feymu kümeafuy ñi rakiduamal tunte küdawtuay tañi mupial. Feley llemay, fewla eluwküleay “tañi kisu ngünewün mongelewetunoael, welu may mongeleay ñi tuteafiel ta Cristo, tati lalu ka wiñomongetulu itrokom che mew” (2 Korintio 5:15; Matew 16:24).

18. ¿Chem ramtun ngüneduamaiñ ti küpalechi chillkatun mew?

18 Chumngechi taiñ ngüneduampeel nga, müna falin-ngey kiñe che ñi wülün tañi mongen Jewba mew. Feymu fill rakiduamkülefuy Maria tañi ñuke, taiñ nütramkapeel ellaka mew. Fey chaw kam ñukengelmi, ramtuwpelaymi chi: “Tañi yall, ¿rüf pepikawküley ñi fawtisawal? ¿Rüf kimniey Jewba ñi ayükeel, femngechi tañi llowaetew ñi fawtisawün? ¿Kümepeafuy may ñi wüne konal universidad mu kam nieal küme küdaw petu tañi fawtisawnon? Fawtisawle wüla, ¿chem rupayafuy weda kulpafule?”. Ngüneduamaiñ tüfachi ramtun ti küpalechi chillkatun mew, ka kimürpuaiñ chumngechi küme rakiduamafuy pu chaw ka ñuke tañi yall ñi fawtisawün mew.