“Eymün tamün pelon feley ñi alofael ta kom che mew, feymew [...] püramyeafi engün ta wenu mapu mülechi Ngünechen” (MATEW 5:16).

ÜLKANTUN: 77 KA 59

1. ¿Chem ayüwülkeeiñmew?

IÑCHIÑ, Jewba ñi pu chengen, müna ayüwülkeeiñmew ngüneduamkefiel chumngechi ñi alofken taiñ pelon. Ti rupachi tripantu, kimeltulelfiyiñ Biblia ta doy 10.000.000 che. Kafey, fentren millon che amuyngün ti Trawün Jesus tañi lan ñi akordangeal, fey kimürpuyngün fente taiñ piwkeyeetew Chaw Dios wül-lu tañi Fotüm taiñ montulaetew (1 Juan 4:9).

2, 3. 1) ¿Chem dungu katrütukelaeiñmew taiñ alofal “wangülen reke”? 2) ¿Chem inaduamaiñ tüfachi chillkatun mu?

2 Jewba ñi pu chengen fentren kewün dungu nieiñ, welu tüfa katrütukelaeiñmu taiñ püramyeafiel ta Jewba kiñewkülen mu (Apokalipsi 7:9). Kakerumele taiñ kewün ka chem tuwün nieliyiñ rume, kom iñchiñ alofküleafuiñ “wangülen reke tati dumiñkülechi mapu mew” (Filipense 2:15).

 3 Taiñ amuldungun, taiñ kiñewkülen ka taiñ trepeluwkülen mu, püramyengey ta Jewba. Fey, ¿chumafuiñ ñi alofal reke taiñ pelon tüfachi dungu mew? (Papeltunge Matew 5:14-16).

KELLUAFIYIÑ TA KAKELU ÑI POYEAFIEL TA JEWBA

4, 5. 1) Taiñ amuldungun mu püramyekefiyiñ ta Jewba, welu ¿ka chem dungu mew? 2) Piwkeyechefengeliyiñ, ¿chum tripayafuy tüfa? (Inaduamnge ti adentun ellaka mu mülelu).

4 Ñi alofal reke taiñ pelon, müna falin-ngey taiñ amuldungual ka taiñ kelluafiel pu che ñi disipulungerpual (Matew 28:19, 20). Tüfachi chillka gringudungun mew 1925 tripantu mu, entuy kiñe trokiñ “Pelon alofkülelu dumiñ mew” feypilelu, tüfa pengeli iney no rume ñi nor piwkeyenoafiel ta Chaw Dios, “eluwnole ñi alofal reke tañi pelon” tati afaelchi antü mew. Fey feypi: “Ñi femal tüfa, müley ñi amuldungulelafiel tati kümeke dungu kom pu che, ka inayal tañi mongen mu Jewba ñi werkün dungu” (The Watch Tower, 1 junio, 1925). Feley, taiñ amuldungun mu püramyekefiyiñ ta Jewba, welu ka femngechi taiñ femken mu. Fentren che ngüneduamkey taiñ chumken amuldunguyawlu iñchiñ. Fey, ayeleliyiñ ka piwkeyen mu chalifiliyiñ pu che, tüfa engün küme rakiduamay iñchiñ mew ka taiñ poyekefielchi Chaw Ngünechen.

5 Jesus feypifi tañi pu inanieetew: “Konpulmün tati ruka mew, chalipuafimün kom che mülelu feychi ruka mew” (Matew 10:12). Chew ñi amuldunguyawkefel Jesus, pu che wimtulefuy ñi llowafiel kimnoelchi che. Welu femngechi felelay chi chew taiñ amuken. Fentren che ayükelay ñi küpayal tañi ruka mew kimnoelchi che. Welu, piwkeyechefengeliyiñ ka weniyefalngeliyiñ, pu che küme duamküleafuy. Ka femngechi, amuldunguliyiñ chew ñi rupaken alünke che, ka müleliyiñ chew ñi pengelngekem lifru, ayeleafuiñ ñi chaliafiel pu che, fey küme peaeiñmew engün, ¿feley no am? Ka entuafuyngün chi kiñe papil, kam eluwafuy taiñ nütramkayafiel.

6. Kiñe kurewen, ¿chem femkey ñi amuldungual?

6 Inglaterra mu, kiñe kurewen füchalelu pepi amuldungukelay fill ruka püle, fente ñi kutrankülen engu. Welu pülleleyngu kiñe kolegio mu, feymu ñi ruka mew, itrotripa elkünukeyngu kiñe mesa nielu fillke papil ñi ngüneduamal pu chaw ka ñuke yemekefilu tañi pu pichikeche. Kiñeke entuyngün tati epu lifru Los jóvenes preguntan ka kiñeke papil. Kiñe lamngen wünelekelu amuldungun mew kiñewkey tüfachi kurewen engu. Pu chaw ka ñuke ngüneduamkey ñi piwkeyechefengen feychi lamngen, ka ñi küpa kellucheken ti kurewen. Feymu kiñe chaw eluwi ñi kimeltungeal Biblia.

7. ¿Chumngechi kelluafuiñ pu che akulu taiñ trokiñ mapu mew?

7 Famülke mu, fentren che lefmawi ñi ruka mew mülen mu weychan kam kayñetuwün, fey akukeyngün taiñ trokiñ mapu mew. ¿Chumngechi kelluafuiñ engün ñi kimafiel ta Jewba? Wüne, kimürpuafuiñ chumngechi pentukuafiel kidu ñi kewün mew. Kafey, ngüneduamafuiñ  JW Language taiñ kimürpual kiñeke küdawngenochi nütram, fey pu che küpa nütramkayaeiñmew. Fey wüla, pengelelafuiñ kiñeke video kam papil mülelu jw.org mu kidu engün ñi kewün mew (Deuteronomio 10:19).

8. Ti trawün Taiñ Mongen ka Taiñ Amuldungukeel, ¿chumngechi kellukeeiñmu?

8 Taiñ kelluaetew ñi küme tripayal amuldungun mew, Jewba elueiñmew ti trawün Taiñ Mongen ka Taiñ Amuldungukeel. Tüfa küme pepikakeeiñmu taiñ wiñopetuafiel pu che ka kimeltulelafiel Biblia.

9. Pu chaw ka ñuke, ¿chumngechi kelluafuyngün tañi pu yall ñi entual tañi feypin trawün mu?

9 Pu we akuchi che taiñ trawün mew, afmatulewey ñi allkütufiel pu pichikeche wiñoldungulu. Feymu, pu chaw ka ñuke kimeltulelafuyngün tañi pu yall piwke mu ñi entual tañi feypin kidu ñi dungun mew. Allkütufiel mu ñi femngechi wiñoldunguken pu pichikeche, kiñeke che “tüfa ti rüf religion” pikey (1 Korintio 14:25).

YAFÜLUWAIÑ TAIÑ KIÑEWKÜLEAL

10. Fill semana elantükünuliyiñ taiñ Poyeafiel ta Ngünechen Reñmawen mu, ¿chumngechi kelluaeiñmu taiñ kiñewküleal?

10 Yafüluwliyiñ ñi kiñewküleal taiñ reñmawen, fey püramyeafiyiñ ta Jewba. Kiñe dungu, müna falin-ngey pu ngen reñma ñi elantükünual fill semana tañi Poyeafiel ta Ngünechen  Reñmawen mu. Fentren reñma trür pekey JW Broadcasting, fey ngüneduamkeyngün falinke kimeltun ñi entungeel. Kafey, müna fali taiñ longkontukual ñi kakerumen tañi duamnieel pu pichikeche ka pu wechekeche. Feymu, duamfali taiñ kelluafiel kiduke taiñ pu che chumngechi ñi duamnieel engün (Salmo 148:12, 13).

Kümey taiñ doy küme kimafiel taiñ pu peñi ka lamngen füchalelu. (Inaduamnge parrafo 11).

11. ¿Chem femafuiñ ñi kiñewküleal ti trawünche?

11 Kom kelluafuiñ ñi kiñewküleal ti trawünche. Eymi weche weniyeafuymi pu peñi ka lamngen füchalelu. Ramtuafuymi chem tañi kellueyew engün ñi poyeafiel ta Jewba alün tripantu mew. Kidu engün kimeltuafeymu falinke dungu. Femngechi, ¡welukonke yafültukuwaymün! Kafey, kom iñchiñ küme llowafuiñ pu we akulu taiñ trawün mew, fey ayelen feypiafuiñ “mari mari”, kelluafuiñ ñi kintual chew anüleal kam kimelafiyiñ kakelu che. Femngechi küme duamküleayngün llemay.

12. ¿Ka chem femafuiñ ñi kiñewküleal taiñ trawünche?

12 Adkünulmi ti amuldungual chi trawün, kelluafuymi pu füchalelu ñi alofal reke tañi pelon engün. ¿Chumngechi? Werküfinge ñi amuldungual engün chew ñi pepilkeel. Kafey, adkünuafuymi ñi mür amual kiñe weche kam üllcha engu. Pu füchalelu ka pu kutrankülelu weda duamnagkeyngün ñi müte amuldungukenon, welu doy küme duamküleafuy ngüneduamle tami küpa kellukefiel engün. Feymu piwkeyechefengelmi, kelluafuymi kom pu peñi ka lamngen ñi amuldungual ayüwün mu, füchakeche ka wechekeche, tunten tripantu yeniele rume ti rüf dungu mew (Levítico 19:32).

13. ¿Chumngechi kom iñchiñ kelluafuiñ ñi kiñewküleal taiñ trawünche?

13 Biblia feypi: “¡Ngüneduamaymün! ¡Müna kümey ka ayüfalngey pu peñi ka lamngen ñi kiñentrür müleal! Tati küme aseyte reke feley wütrungelu longko mu, tüfa wütrunagkey payun mew, Aaron ñi payun, ka wütrunagkey pel takun mew” (Salmo 133:1, 2). Feychi sakin aseyte küme nümükefuy ka füshkümkefuy pu che. Feymu tati wirintukulu feychi salmo feypi sakin aseyte reke ñi felen tañi kiñewkülen pu israelche poyekefilu ta Jewba, feymu müna ayüwkülefuyngün. Ka femngechi, piwkeyechefengeliyiñ, füshküduamelafiyiñ taiñ pu peñi ka lamngen, fey ti trawünche doy kiñewküleay. Feymu, ¿chem femafuymi tami doy kimafiel tami pu peñi ka lamngen? (1 Pedro 2:17).

14. ¿Chumngechi eluwafuymi ñi alofal tami pelon chew tami mülen?

14 Chew rume mülelmi, eluwafuymi ñi alofal tami pelon. ¿Chumngechi? Piwkeyechefengeaymi, femngechi tami pu karukatu ayüafuy chi ñi doy kimafiel ta Jewba. Feymu ramtuwnge: “Tañi pu karukatu, ¿chumngentukeenew? Tañi ruka, ¿lifküley ka küme adkünuley? Tüfa, ¿kellukey ñi küme adküleal tañi lof? ¿Eluwken ñi kelluafiel tañi pu karukatu?”. Nütramkafilmi kiñe peñi kam lamngen eymu, ramtuafuymi: “Tami piwkeyechefengen ka küme femken mu, ¿doy küme llowkeeymu tami pu reñma, karukatu, pu kompañ küdaw mu kam kolegio mew?” (Efesio 5:9).

 TREPELUWKÜLEAIÑ

15. ¿Chumngelu duamfali taiñ trepeluwküleal?

15 Küpa fentekünunoliyiñ ñi alofal taiñ pelon, duamfali taiñ trepeluwküleal, epe puwkülelu am ñi afal ta antü. Fentren rupa, Jesus feypifi tañi pu inanieetew: “Trepeluwkülemün reke ta eymün” (Matew 24:42; 25:13; 26:41). Welu, “küpayaluley ti fütra kutrankawün” feypiliyiñ, trepeluwkülelayafuiñ taiñ amuldunguafiel kom pu che (Matew 24:21). Fey newe aloflayafuy taiñ pelon, ka chongnagafuy kütu.

16, 17. ¿Chem femafuiñ taiñ trepeluwküleal?

16 Doyelkülerpule ti dungu Mapu mu, doy duamfalngeay taiñ trepeluwküleal. Küme kimnieiñ Jewba ñi apümkayafiel ti wedake dungu puwchi antü mew (Matew 24:42-44). Welu, petu ñi akunon feychi antü, duamfali taiñ ñochi piwkengeal ka trepeluwküleal. Feymu fill antü papeltuafiyiñ Biblia, ka rumel ngillatulekeafiyiñ ta Jewba (1 Pedro 4:7). Ngüneduamaiñ ñi femken fillke peñi ka lamngen poyekefilu ta Jewba fentren tripantu mew. Papeltuafuymi  kiñe peñi ñi mongen nütramkangelu ti trokiñ “Kom elkünun ñi inayafiel tañi Ñidol Jesus”, mülelu Ti Werken diciembre küyen 2017 mu, pagina 27-30.

17 Rumel küdawülnieafiyiñ ta Jewba, kümelkayafiyiñ ta kakelu, ka küme rupaleaiñ taiñ pu peñi ka lamngen engün. Femngechi ayüwküleaiñ ka tuntelewenolu ñi küpayal Jewba ñi antü trokiafiyiñ (Efesio 5:16). Rupachi pataka tripantu, taiñ pu peñi ka lamngen femingün fentren dungu ñi poyeafiel ta Jewba. Ka famülke mu, doy küdawülmekefiyiñ ta Jewba. Chaw Dios ñi kellun mu, wechurpumekeiñ fillke dungu turpu taiñ rakiduamnoel ñi femafel fantepu mu. Feley llemay, ¡fente küme alofküley taiñ pelon!

Pepaeliyiñmew pu longkolelu, eluwaiñ taiñ llowal Jewba mu küpachi kimün. (Inaduamnge parrafo 18 ka 19).

18, 19. ¿Chumngechi kelluafeiñmu pu longkolelu ñi poyeafiel ta Jewba ayüwün mu? Feypinge kiñe kurewen ñi rupan.

18 Fillke rupa welulkawkefuliyiñ rume, Jewba llowkeeiñmew taiñ poyeafiel. Taiñ kelluaetew, elukeeiñmew pu longkolelu, tüfa engün yewün reke feley (papeltunge Efesio 4:11, 12). Feymu, pepaeliyiñmu pu longkolelu, eluwaiñ taiñ kimeltuaetew ka ngülamtuaetew.

19 Inglaterra mapu mu, kiñe afkadiwen rupakefuy küdawngechi dungu tañi kurewen-ngen mu, feymu “kellumuafuyu” feypifingu ta epu longkolelu. Tati domo rakiduamkefuy tañi füta ñi newe kellukenoetew tañi poyeafiel ta Jewba. Ti wentru feypi ‘küme kimeltuchekelan, ka fill semana elantükünukelan taiñ Poyeafiel ta Ngünechen Reñmawen mu’. Feymu pu longkolelu kellufingu tati kurewen ñi rakiduamal Jesus ñi femün mu. Yafültukufingu tati wentru ñi inayentuafiel ta Jesus, chumngechi ñi ngüneytukefiel tañi pu inanieetew. Ka yafültukufingu tati domo ñi ñochi piwkengeal, Jesus reke. Kafey ngülamtufingu chumngechi ñi poyeafiel ta Ngünechen reñmawen mu tañi epu pichikeche engün (Efesio 5:21-29). Fey ti wentru eluwi ñi doy küme adnieafiel tañi pu che. Feymu rupalu chi antü, pu longkolelu yafültukufi ñi amuleal tañi küme femün mew, ka maneluwal tañi kelluaetew Jewba ñi newen. Ñi piwkeyechefengen mu pu longkolelu, kellufingu tüfachi reñmawen.

20. Eluwliyiñ ñi alofal taiñ pelon, ¿chem rupayay?

20 Salmo 128:1 feypiley: “Ayüwküley kom tati yamniefilu ta Jewba, tati miyawkelu Kidu ñi rüpü mew”. Feley, eluwliyiñ ñi alofal taiñ pelon, ayüwküleaiñ llemay. Feymu, kimeltulelafiyiñ pu che Jewba ñi dungu, femaiñ kom taiñ pepilel ñi kiñewküleal taiñ reñma ka taiñ trawünche, ka trepeluwküleaiñ. Kakelu che ngüneduamay taiñ küme femken, fey küpa püramyeafingün taiñ Chaw Ngünechen (Matew 5:16).