CHOYÜNGEN 29 konchi julio 1929 tripantu mu, ka tremün kiñe pichi waria mu Bulacan mapu Filipinas mew. Niefuiñ pichin plata ka chem taiñ duamnieel taiñ mongeleam. Pichi wentrungelu iñche, pu weychafe Japon tuwün-ngelu konpayngün Filipinas mew, fey koni ti weychan. Welu alü tripalelu am taiñ pichi waria, puwlayngün pu weychafe taiñ wedalkayaetew. Feychi mu nielafuiñ radio, television ka diario, feymu re allkütukefuiñ pu che ñi feypin ti weychan mu.

Niefun küla peñi ka meli deya. Nielu iñche pura tripantu, tañi chuchu ka chedki yeenew kidu engu ñi ruka mew tañi müleal. Katolikongefuiñ, welu tañi chedki ayükefuy ñi nütramkayal religion dungu mu, ka llowkefuy fillke papil ñi eluetew tañi pu weni kakerume religion nielu. Longkontukun tañi chedki ñi pengeletew kiñe Biblia ka kiñeke papil tagalo kewün mu pengelkelu ñi koylangen pu religion ñi kimeltun * (inaduamnge ti kimal dungu). Iñche ayüwmakefenew papeltufiel Biblia, doyelchi may ti lifru Matew, Marku, Luka ka Juan. Tüfa kelluenew ñi doy küpa inayafiel ta Jesus (Juan 10:27).

KIMÜRPUN ÑI INAYAFIEL TAÑI ÑIDOL

Pu weychafe Japon tuwün-ngelu amutuyngün 1945 mew. Feychi mu tañi pu chaw feypienew ñi wiñotual kidu engu ñi ruka mu. Tañi chedki ngülamtuenew ñi wiñotual, feymu femün.

Diciembre küyen 1945 tripantu mu, pu Dungukelu Iney Ngen Jewba küpalu Angat waria mu, amuldungupayngün iñchiñ taiñ pichi waria mew. Kiñe fücha peñi küpay taiñ ruka mew, fey kimeltupaeiñmu Biblia ñi feypin tañi rupayal “epe puwkülele ñi afael ta antü” (2 Timotew 3:1-5). Mangeleiñmew kiñe püllelechi pichi waria mu, chew trawükefuyngün ñi chillkatual Biblia. Tañi pu chaw amulayngu, welu iñche amukan müten. Trawüy 20 che peno, ka kiñeke ramtuyngün ñi doy kimal Biblia mu.

Iñche küme adümlafiñ ñi feypingeel, feymu ‘amutuchi’ pin. Welu eluwlu ñi ülkantual engün, müna ayüfiñ, feymu amutulan. Dew ülkantulu ngillatuyngün, fey wüla mangeleiñmu taiñ trawüluwal Angat waria mu ti küpalechi domingo antü mew.

Trawüyngün familia Cruz ñi ruka mew. Kiñeke iñchiñ trekaiñ pura kilometro taiñ puwal. Trawün mu mülefuy 50 che, fey ramtungey kiñeke küdawün-ngechi dungu Biblia mew, ka tati pu pichikeche kütu wiñoldunguyngün, tüfa afmatulenew. Dew amulu kiñeke trawün mu, kiñe fücha peñi wünelekelu amuldungun mew, Damian Santos pingelu, mangelenew ñi umañpual tañi  ruka mu. Feychi pun epe wünmayu ñi nütramkafiel Biblia mew.

Feychi mu pu che fawtisangekefuy ella kimlu müten Biblia ñi kimeltukeel. Feymu kiñeke trawün mu amulu müten, pu peñi ramtueiñmu: “¿Küpa fawtisawmün?”. “May” pin iñche, müna ayülu am ñi küdawülafiel tañi Ñidol Jesus (Kolosense 3:24). Fey 15 konchi febrero 1946 mew amuiñ kiñe püllelechi lewfü mu, fey iñche ka kangelu peñi fawtisangeyu.

Kimürpun kom pu fawtisawkülelu müley ñi amuldungual Jesus reke. Tañi chaw feypienew: “Rume wechengeymi tami amuldungual. Fawtisangelu rume, koneltulaymi tami amuldungucheal”. Iñche pengelelfiñ Chaw Dios ñi ayükeel taiñ kimeltucheal kidu tañi Ngünenien mu (Matew 24:14). Ka feypifiñ: “Eldungukünufiñ ta Chaw Dios, feymu mupian ñi feypin”. Fey tañi chaw aneltuenew: “Amuldungumelmi, wiñotukilnge. Welu küpatulmi, trafoñmayaeyu tami chang”. Kidu rüf küpa katrütuenew tañi amuldungual. Feychi mu niefun 16 tripantu müten, fey kom elkünun tañi niekefel, femngechi ñi poyeafiel ta Jewba. Tüfa tati wünen rupa ñi femngechi femün.

Familia Cruz mangelenew ñi müleal kidu ñi ruka mu, Angat waria mew. Kidu engu yafültukufi tañi inan ñawe Nora ñi wüneleal amuldungun mu, ka femngechi yafültukuenew ta iñche. Fey mür koniyu tüfachi küdaw mew 1 konchi noviembre 1947 mu. Nora wiñamtuwi kangelu waria tañi amuldungual, welu iñche mülenagün Angat mu.

KA KIÑE RUPA KOM ELKÜNUN

Dew yenielu iñche epu tripantu tañi wünelen amuldungun mu, kiñe peñi Fetel mew küpalu, Earl Stewart pingelu, wewpitupay ti pülasa Angat waria mu. Doy 500 che allkütueyew. Kidu gringu dunguy, fey dewlu, iñche pichiñma mu rulpadungun ti wewpin tagalo kewün mu. Iñche regle tripantu müten kolegiotun, ka tati pu kimeltuchefe gringu dungukefuyngün. Ka kuyfi mu, Jewba ñi trokiñche pichin entukefuy papil tagalo kewün mew, feymu chillkatukefun fillke papil gringudungun mu. Kom tüfa ñi kimürpuel kelluenew ñi rulpadungual tüfachi wewpin ka kakelu wülngelu gringudungun mu.

Fey peñi Stewart feypifi ti trawünche pu werküngelu ñi amuldungupayal amuayngün ti fütra trawün femngealu 1950 mu, Nueva York mew (Estados Unidos). Feymu Fetel duamniefuy kiñe kam epu wünelekelu amuldungun mew ñi kelluntukual ti küdaw mu. Fey iñche mangelngen ñi amual, feymu ka kiñe rupa elkünun ñi mapu ka tañi kimnieelchi che ñi küdawal Fetel mew.

 Akun Fetel mew 19 konchi junio küyen 1950 mu. Tüfa mülefuy kiñe fütra ruka kuyfi dewmangelu ñi walloñmanieetew fentren anümka, ka ñi mapu kiñe hectarea puwi. Doy mari wechekeche küdawkefuyngün üye mu. Puliwentu iñche kellukefun chew ñi pepikangeken iyael. Fey puwlu aylla ora wipümkefun weshakelu. Kom tüfa ka femkefun dew rupalu rangi antü. Pu werküngelu ñi amuldungupayal wiñotulu rume Fetel mu, iñche mülenagün. Femkefun chem küdaw rume ñi feypingeel: pepikakünufiñ ti chillka ñi werküngeal, elfalkünungen ñi ngüneduamal pu che wirintukulu ñi llowal ti chillka fill küyen mu, ka llowkefun pu ngepalu Fetel mew.

ELKÜNUN FILIPINAS ÑI AMUAL KALAD CHILLKATUWE MU

Iñche ka kayu peñi Filipinas mu, mangelngeiñ ta amual ti chillkatun 20 Kalad Chillkatuwe, 1952 tripantu mew. ¡Müna afmatulewen! Welu Estados Unidos mew mülefuy fill weke dungu iñchiñ taiñ pekenoel. Ti mongen felelafuy chumngechi ñi femngen tañi pichi waria Filipinas mew.

Iñche ka kiñeke kompañ Kalad Chillkatuwe mu

Mülefuy ñi kimürpual chumngechi ñi adümnieafiel weke makina ruka mew. Ka mülefuy ñi wimturpual tati wütre. Kiñe rupa puliwentu nepelu iñche, kom ligkülefuy wekuntu. Fey kimfiñ ti pire. Müna küme adngefuy, ¡welu rume wütrengefuy!

Welu iñche duamkülekelafun, müna ayüwmaenew am ñi pepikangeel Kalad mew. Pu peñi müna küme kimeltukefuyngün, ka pengeleiñmu chumngechi taiñ doy küme chillkatual. Ñi pepikangeel Kalad mew, müna kelluenew ñi doy küme weniyeafiel ta Jewba.

Dew tripalu ti Chillkatuwe mew, kiñeke küyen elfalkünungen ñi wüneleal amuldungun mu fentren ora Bronx lof mew, Nueva York waria. Feymu julio küyen 1953, amun ti fütra trawün feypilelu “Pu pepikawkülelu ñi müleal ti we Mapu mu”, femngelu Bronx mu. Dew rupalu ti fütra trawün, werküngen Filipinas mew.

ELKÜNUN ÑI KÜME FELEN WARIA MU

Pu peñi Fetel mew elfalkünuenew ñi witranmayafiel fillke trawünche. Tüfa kelluenew ñi doy inayentuafiel ta Jesus, kidu am amulu fillke waria alü kamapulelu ñi kelluafiel pu poyekefilu ta Jewba (1 Pedro 2:21). Tati doy fütra wapi ñi mülen Filipinas mew Luzon pingey. Iñche witranmakefiñ tati trawünche mülelu rangi tüfachi wapi mu, tati fillke trokiñ mapu Bulacan, Nueva Ecija, Tarlac ka Zambales pingelu. Ñi puwal kiñeke waria mu, rumekefun tati fütrake lilkülechi wingkul Sierra Madre pingelu. Ngelafuy micro ka tren no rume ñi puwal üye püle, welu rupakefuy camion yenielu fütrake mamüll, feymu  feypikefun tati pu amulniefilu ti camion tañi yeaetew wente mamüll mew. Fentren rupa eluenew ñi femal, welu newe kümelay femngechi miyawal.

Epe kom ti trawünche ñi witranmakefiel we elkünungefuy ka pichin che konkefuy. Feymu kellufiñ pu peñi ñi küme adkünuafiel ti trawün ka ti amuldungun, fey müna mañumkefenew engün.

Fey wüla elfalkünungen ñi witranmayafiel fillke trawünche mülelu Bicol mapu Filipinas mew. Üye mu mülefuy fillke trokiñche alü tripalelu, ka pu wünelekelu amuldungun mu fentren ora kimeltuchekefuyngün chew ñi amuldungungekenofel kuyfi mu. Kiñe ruka mu ñi umañpuel iñche, ngelafuy baño, welu may mülefuy kiñe lolo ka epu trafla ñi pünoal. Witralu iñche, tati trafla trananagi ponwi ti lolo mu, ka iñche ina trananagün. Alüñman ñi liftuwal, fey ñi pepikawküleal tañi küdawal.

Mülelu feychi mapu mew, rakiduamtukufiñ ta Nora. Kidu koni ñi wüneleal amuldungun mu Bulacan mew, welu fey wüla wiñamtuwi Dumaguete mew. Üye mu wünelekefuy amuldungun mu fentren ora. Iñche pemefiñ, ka fey wüla eluwiyu tayu wirintukuleluwal karta, fey niewiyu 1956 mew. Ti wünen semana rupalu tayu mafün mu, witranmafiyu kiñe trawünche Rapu Rapu wapi mu. Üye mew pürayu fütrake wingkul ka fentren trekayu. Welu mür miyawlu am, ayüwkülefuyu tayu kelluafiel pu peñi ka lamngen alü kamapulelu.

WIÑO KÜDAWÜN FETEL MU

Epe meli tripantu witranmafiyu fillke trawünche, fey wüla mangelngeyu ñi küdawal Fetel mu. Akuyu enero küyen 1960 mew, ka fantepu mülepayu. Iñche küdawkefun fentren pu peñi iñchiñ nielu fütrake küdaw Jewba ñi trokiñche mu, tüfa fentren kümeke dungu kimeltuenew. Kafey Nora ayüwküley ñi femün fillke küdaw Fetel mu.

Wülün kiñe wewpin, fey rulpangey cebuano kewün mu

Ñi mülen faw, ngüneduamün chumngechi ñi konün fentren che Jewba ñi trokiñche mew Filipinas mu. Tati wünen rupa konlu iñche Fetel mu, mülefuy 10.000 amuldungukelu tüfachi trokiñ mapu mew. Welu fewla müley doy 200.000 amuldungukelu, ka doy 400 peñi ka lamngen küdawkeyngün Fetel mu ñi kelluntukual ti amuldungun küdaw mu.

Rupalu ta antü, duamürpuiñ kiñe doy fütra ruka ñi müleal Fetel. Feymu ti Kiñewkülechi Ngünenielu feypieiñmew taiñ kintual kiñe mapu taiñ dewmayal kiñe doy fütra ruka. Inafül Fetel fentren chino niekefuy ñi ruka. Feymu kompañfiñ ti peñi adkünukefilu chew ñi nentuwiringekem ñi pemeafiel kom pu karukatu, fey ‘¿küpa fendeymi tami ruka?’ ramtufiyu. Iney rume pilay. Kiñe wentru feypieyumew: “Pu chino fendekelaiñ, ngillakeiñ müten”.

Rulpadungun kiñe wewpin ñi wülün peñi Albert Schroeder

Welu kiñe antü afmatuleweiñ. Kiñe karukatu küpa wiñamtuwi Estados Unidos mu, feymu feypieiñmew taiñ ngillañmayafiel ñi mapu. Fey wüla kangelu karukatu ka küpa fendey, ka ngülamtufi ta kakelu ñi ka femngechi femal. Ngillañmafiyiñ kütu ñi mapu feychi chino wentru küpa fendenofulu. Fey pichin antü rupalu, taiñ mapu küla hectarea puwi. Rüf kimnien Jewba tañi adkünufiel ñi rupayal tüfa.

Konlu iñche Fetel mu 1950 mew, ngelafuy doy wechengelu ta iñche mu. Welu fewla ngelay doy füchalelu ta iñche ka tañi domo mew. Ñi inakefiel ta Jesus chew rume duamfalngelu ñi amual, ‘weda dungu’ pilayafun. Tañi pu chaw kechaenew ñi ruka mu, welu Jewba eluenew kiñe doy fütra familia ñi rüf piwkeyeetew. Rüfkünu llemay, kimnien Jewba taiñ elukeetew kom taiñ duamnieel, chew rume küdawülfiliyiñ. Nora ka iñche müna mañumniefiyu ta Jewba tayu kümelkakeetew, ka yafültukukefiyu ta kakelu ñi doy küdawülafiel ta Jewba, fey ngüneduamal chumngechi ñi kümelkayaetew Kidu (Malaquías 3:10).

Jesus mangelfi ta kiñe wentru tañi inayaetew, kidu Matew Levi pingefuy ka kofrakefuy impuesto. Fey, ¿chem chumi Matew? “Witrapüray, fey kom elkünuy ñi küdaw, fey inaeyew” (Luka 5:27, 28). Kafey iñche fillke rupa kom elkünun tañi inayafiel ta Jesus, ka yafültukukefiñ ta kakelu ñi ka femngechi femal, fey llowal fentren kümelkan.

Ayüwün mu petu kelluntukuken Filipinas mu

^ parr. 5 Tüfachi papil ñi entuel pu Dungukelu Iney Ngen Jewba, welu famülke mu tripawekelay.