Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

Chalintukun

Chalintukun

Kiñe wentru Dawda pingelu, Afrika fütra mapu tuwlu, feypi: “Pikum mapu mülechi pichi waria mu tremün iñche. Kiñe rupa petu pichikalu iñche, tañi pu che notukamapuwingün kake che engu. ‘Iñche ta ngenmapu’ pipiyewingün. Fey küme elkünual ta iney ngenmapu ngealu, küpalingün kiñe kalku wentru. Fey ti kalku elufi ta kangelu wentru kiñe komütuwe (pewe), ka takukünufi kiñe lig takun mu. Müchay müten ti wentru trüntrünrumey ka arofi. Lelifi (kintulbi) ti komütuwe, ka wirari: ‘¡Pen ñi küpalen kiñe fücha wentru! Lig tukutuwküley. Müna alüpüray chi wentru, fücha chengey, lingari ñi longko, ka külü trekay’, feypi chi wentru”.

Fey Dawda amulniey ñi nütram: “¡Feychi fücha wentru tañi laku yem ürke! Fey ti wentru nünielu ti komütuwe pellkey, ka wirari: ‘¡Feyentunolmün, lelipamün (kintulbimün) ti komütuwe mu, fey peafimün!’. Iney no rume fülkonpulaeyew ñi lelial (kintulal). Welu tati kalku wentru pepikaniey kiñe kalku lawen, yenielu kiñe kalabasa metawe mu, fey pachügtufi (püllawtubi) ti wentru ñi tüngduamtual.

Ti wentru nünielu chi komütuwe rangiñelweley tañi laku yem trokiwkülelu ka iñchiñ mu. Fey tañi laku yem pemay feypi tañi pu che ñi ngenmapu ngeal. Ka feypifi tañi kuku: ‘Küdawfinge tati mapu müten’ pi. Feymu tati kakelu pu che ‘felepe’ pingün. Femngechi küme elkünungetuy ti dungu.”

 Wall Mapu mu fentren che rupakeyngün tüfachi dungu mu reke. Fentren warangka che ka mapu amualu tati pu la trokiwkeyngün, ka üyew pukintunieyngün kom tati pu nag mapu mülelu, fey kümelkayafeiñmu kam wedalkayafeiñmu trokiwkeyngün. Welu, ¿rüfngepey may? Tati pu layelu, ¿kañpüle mongelepeyngün may? Rüf femnole tüfa, ¿iney engün am tati pu la ñi püllü femfaluwkelu? Küme kimnieal tüfachi dungu müna falin-ngey, femliyiñ montuafuy taiñ mongen.