Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 5 CHILLKATUN

Jesus ñi wülün tañi mongen, ti doy falin yewün Chaw Dios mu küpalu

Jesus ñi wülün tañi mongen, ti doy falin yewün Chaw Dios mu küpalu

1, 2. 1) ¿Chem yewün doy falintukeymi? 2) Jewba ñi werküfiel ta Jesus, ¿chumngelu tati doy falin yewün pingeafuy?

¿CHEM yewün (regalo) tami llowel doy falintukefimi? Tati yewün ayüwelelmu kam eluelmu tami duamnieel, fey doy mañumafimi llemay.

2 Taiñ Wenu Chaw elueiñmu fillke kümeke yewün, welu kiñe doy duamfali ta kakelu mu. Tüfa tati doy falin yewün taiñ eluetew Chaw Dios. Kidu werküfi tañi Fotüm Jesus ta Mapu mew, femngechi ñi montulpayafiel ta che, fey ñi afnoal taiñ mongen (papeltunge Matew 20:⁠28). * Ñi femün mu tüfa, Jewba pengeli fente taiñ piwkeyeetew. Tüfachi chillkatun mu doy inaduamaiñ tüfa.

¿CHEM DUAMFALI TAIÑ LIFREKÜNUNGEAL?

3. ¿Chumngelu lakeiñ?

3 Jewba werküfi ta Jesus ñi wülal tañi mongen, femngechi lifrekünueiñmu kulpan ka lan dungu mew (Efesio 1:⁠7). ¿Chumngelu duamfali taiñ montulngeal? Rakiduamnge chem ñi rupan fütra kuyfi Eden lof mu. Taiñ wünenke chaw, Adan Eva engu, kulpayngu, feymu larpuyngu. Adan ka Eva rulpaleleiñmu ñi kulpan, feymu iñchiñ ka lakeiñ (inaduamnge ti kimelün dungu 7).

4. ¿Iney ngefuy Adan? ¿Chumngechi felekefuy tañi mongen?

4 Adan fey tati wünen wentru Chaw Jewba ñi dewmael,  fey elungey kiñe falin yewün: tutengechi mongen. Kidu nielafuy kulpan, lifngefuy ñi piwke ka ñi rakiduam. Feyentufule engu, turpu kutranlayafuy, füchalayafuy ka lalayafuy no rume. Jewba dewmafi ta Adan, feymu fotümyefi (Luka 3:⁠38). Chaw Jewba nütramkakefuy Adan engu, feypikefuy chem femal ka elufi ayüfal küdaw (Génesis 1:⁠28-30; 2:⁠16, 17).

5. ¿Chumngelu Biblia feypi Ngünechen ñi dewmafiel Adan “kisu ñi adentun mew”?

5 Chaw Jewba elufi Adan ñi inayentuaetew tañi chumngen. Feymu piwkeyekefuy, femkefuy nor dungu, ka niekefuy kimün ka newen. Kafey elufi kidu dullial tañi chumal. Kom tüfachi dungu mu, Biblia feypi Ngünechen ñi dewmafiel ta Adan “kisu ñi adentun mew” (Santiaw 3:⁠9). Adan dewmangelafuy kiñe makina reke. Feymu kidu dulliafuy femal kümeke kam wedake dungu. Kidu dullifule ñi allkütuafiel ta Jewba, aflayafuy ñi mongen Mapu mew.

6. 1) Adan allkütunofilu Jewba, ¿chem ñamümi? 2) Adan ñi femün mu, ¿chumngechi felerpuiñ?

6 Adan allkütunofilu Jewba, kastigangey ñi layal ka müna falinke dungu ñamümi: weniyewelafi ta Chaw Jewba, niewelafuy tutengechi mongen ka elungewelay ñi müleal ti Küme Mülewe mu (Génesis 3:⁠17-19). Kidu ñi femün mu, Adan “püresukona reke” feletuy kulpan ka lan dungu mu. Iñchiñ ka femngechi felerpuiñ (Romanu 7:⁠14). Adan ñi femün mu müley ta kulpan ka lan dungu Mapu mew, ‘fey tati lan dungu müley itrokom che mew, itrokom che kulpafengelu am’ (Romanu 5:⁠12). Adan ka Eva eluwingu ñi allkütunoafiel ta Jewba, feymu ngewelafuy maneluwün kidu engu mew. Welu iñchiñ mu kay, ¿mülepey may maneluwün? Müley llemay.

7, 8. ¿Chumngechi trürümngeafuy Jesus ñi wülün tañi mongen?

7 ¿Chumngechi trürümngeafuy Jesus ñi wülün tañi  mongen? Epu dungu mu. 1) Trürümngeafuy tunte ñi kullingeken tañi lifrekünutuafiel kiñe che, kam wiñolelngetual kiñe chemkün ñi müntuñmangeel. Ka 2) trürümngeafuy ñi kullilelngeken kiñe che tunte ñi falin tañi wedalkangeel.

8 Ka femngechi, kulpalu Adan wedalkaeiñmu, feymu larpukeiñ. Welu kiñe che no rume kullilayafuy Adan ñi femün. Feymu Jewba adkünuy chumngechi taiñ lifrekünuaetew kulpan ka lan dungu mu. Fewla doy inaduamaiñ tüfachi dungu ka chumngechi taiñ kümelkakeetew.

CHAW JEWBA, ¿CHUMI TAIÑ MONTULAETEW?

9. Taiñ wiñolelngetual Adan ñi ñamümel, ¿chem mülefuy ñi kullingeal?

9 Taiñ wiñolelngetual Adan ñi ñamümel, duamfali ñi kullial. Kiñe che kulpafengenolu mülefuy ñi kullial kidu tañi mongen mu. Femngechi kidu ñi wülün trürngeafuy Adan ñi ñamümelchi mongen mew. Welu kom iñchiñ kulpafe chengeiñ, feymu iney no rume kullilayafuy (Salmo 49:⁠7, 8).

10. Chaw Jewba, ¿chumi taiñ montulaetew?

10 Fey, ¿chumi Jewba taiñ montulaetew? Werküfi Mapu mew ta Jesus, tañi wünen Fotüm (1 Juan 4:⁠9, 10). Jesus eluwkülefuy ñi elkünual tañi Chaw ka kom tañi nieel wenu mapu mu (Juan 16:⁠28). Feymu Jewba rulpafi tañi sakin Fotüm ñi mongen ta Maria ñi pütra mew, fey Jesus choyüngey Mapu mu kiñe che reke, welu kulpafengelafuy (Luka 1:⁠35).

Jewba wüli tañi sakin Fotüm taiñ montulaetew.

11. ¿Kiñe wentru müten montulpeafuy may kom tati pu che? ¿Chumngechi am?

11 Ti wünen wentru Adan allkütulafi ta Jewba, feymu kom iñchiñ kulpafengetuiñ. Welu, ¿ka kiñe wentru  montulpeafuy may Adan tañi küpanche ñi lanoal? Femafuy llemay (papeltunge Romanu 5:⁠19). Jesus kulpafe chengelafuy, feymu wüli tañi falin mongen taiñ montulaetew (1 Korintio 15:⁠45). Femngechi kulli ñi lifrekünuafiel Adan ñi küpanche lan dungu mew (1 Korintio 15:⁠21, 22).

12. ¿Chumngelu duamfali ñi fente kutrankangeal Jesus?

12 Biblia pengeli fente ñi kutrankangen ta Jesus petu ñi lanon. Kidu wimakangey ka ñochikechi lay rume kutrankawün mu (Juan 19:⁠1, 30). ¿Chumngelu duamfali ñi fente kutrankawal Jesus? Weküfü witrameldungufi kom pu che. Feypi kom che ñi püntütripayal Chaw Dios mu kutrankangele, kayñetungele kam kake wedake dungu mu rupale. Welu Jesus pengeli kiñe kulpangenochi che ñi püntütripanoal Chaw Dios mu, müna kutrankawle rume. ¡Müna ayüwkülepelafuy Chaw Jewba tañi Fotüm ñi femün mu! (Proverbios 27:⁠11; inaduamnge ti kimelün dungu 13).

13. ¿Chumngechi kullingey taiñ lifrekünungeal?

13 ¿Chumngechi kullingey taiñ lifrekünungeal? Jesus wiñotulu wenu mapu mu tañi Chaw ñi adkiñ mew. Jewba eli Jesus ñi langümngeal tañi pu kayñe mu, 14 antü konchi Nisan küyen 33 tripantu mu (Ebrew 10:⁠10). * Küla antülu, Jewba wiñomongeltufi kiñe püllüngeal, elulafi kiñe kuerpu iñchiñ reke. Fey Jesus dew wülkünulu kay tañi mongen, wenu mapu mu chalintukulelfi ta Ngünechen ñi tunte falin-ngen tañi kulpangenochi mongen, femngechi ñi montulngeal Adan ñi küpanche (Ebrew 9:⁠24). Femngechi kullingey taiñ lifrekünungeal, feymu montuluwafuiñ kulpan ka lan dungu mu (papeltunge Romanu 3:⁠23, 24).

 JESUS ÑI WÜLÜN TAÑI MONGEN, ¿CHUMNGECHI KÜMELKAYAFEIÑMU?

14, 15. ¿Chumafuiñ taiñ wiñoduamtungeal?

14 Wülün mu Jesus tañi mongen, nieafuiñ fentren kümelkan. Fewla inaduamaiñ chumngechi tüfa kümelkakeeiñmu famülke mu ka küpalechi antü mew.

15 Wiñoduamtungeafuiñ taiñ kulpan mu. Kiñeke mu küdawngey femal kümeke dungu. Kom welulkawkeiñ. Kafey femkeiñ kam feypikeiñ wedake dungu. Feymu, ¿chumngechi wiñoduamtungeafuiñ taiñ weda femün mu? Kom piwke mu wiñorakiduamtuaiñ taiñ kulpan mu, ka ñom piwke mu ngillatuafiyiñ ta Jewba taiñ wiñoduamtuaetew. Femngechi femliyiñ, maneluwafuiñ taiñ perdonayaetew Jewba (Kolosense 1:⁠13, 14; 1 Juan 1:⁠8, 9).

16. ¿Chumafuiñ taiñ tutewküleal Jewba iñchiñ?

16 Küme duamküleafuiñ taiñ tutewkülen mu Jewba iñchiñ. Weda femliyiñ, taiñ rakiduam dalluntukuafeiñmew, fey weda duamnagafuiñ ka rakiduamafuiñ taiñ faliwenon kam taiñ nienon maneluwün. Welu ngañwadlayaiñ. Llellipufiliyiñ ta Jewba, kidu allkütuaeiñmew ka wiñoduamtuaeiñmew (Ebrew 9:⁠13, 14). Jewba eluwküley taiñ allkütuaetew, feymu nütramkayafiyiñ chem dungu rume taiñ ruparupangen (Ebrew 4:⁠14-16). Femngechi tutewküleafuiñ Jewba iñchiñ.

17. Jesus ñi lan mu, ¿chem nieafuiñ?

17 Nieafuiñ rumel mongen. ‘Tati kulpan ñi wülkeel re lan dungu müten, welu Ngünechen wülkey tati rumel mongen, Kristo Jesus mew, iñchiñ taiñ Ñidol’ (Romanu 6:⁠23). Jesus ñi lan mu, iñchiñ nieafuiñ rumel mongen, turpu afnoalu, fey kutranwelayaiñ (Apokalipsi 21:⁠3, 4). Welu, ¿chumafuiñ taiñ llowal kom tüfa?

 MAÑUMKÜLENGE CHAW DIOS ÑI YEWÜN MU

18. ¿Chumngelu kimnieiñ taiñ piwkeyeetew Jewba ka Jesus?

18 Llowün mu iñchiñ kiñe yewün, müna ayüwkeiñ. Feymu müna mañumküleiñ Chaw Dios ñi werküfiel ta Jesus ñi montulcheal, ¿chumngelu? Tüfa tati doy falin yewün taiñ eluetew Chaw Jewba. Ñi femün mu tüfa, pengeli tunte taiñ piwkeyeetew. Feymu Juan 3:⁠16 feypi: “Ngünechen am rume piwkeyefilu ta kom mapu mew mülechi pu che, feymew wüli ñi kiñen Fotüm”. Kafey Jesus eluwkülefuy ñi lapayal, feymu kimnieiñ taiñ müna piwkeyeetew (Juan 15:⁠13). Jesus ñi wülün tañi mongen ñi montulcheal, pengeli fente taiñ piwkeyeetew ka taiñ Fütra Chaw (Efesio 5:⁠2).

Kimfilmi ta Jewba, weniyeafimi ka doy piwkeyeafimi.

19. ¿Chumngechi weniyeafimi ta Chaw Dios?

19 Kimürpuymi taiñ müna piwkeyeetew Chaw Dios. Fewla, ¿chumngechi weniyeafimi ta kidu? Juan 17:⁠3 feypi taiñ kimafiel ta Jewba. Kimnofiliyiñ ta kiñe che, rüf piwkeyerpukelafiyiñ. Feymu falin-ngey kimafiel ta Chaw Dios, fey doy piwkeyeafiyiñ, küpa femaiñ tañi ayükeel ka küme weniyerpuafiyiñ. Feymu fentekünukelayaymi tami chillkatukefiel Biblia, femngechi doy kimafimi tami Wenu Chaw (1 Juan 5:⁠3).

20. ¿Chumngechi pengelafuymi tami feyentulen Jesus ñi montulchen mu?

20 Feyentulenge Jesus ñi montulchen mu. Biblia feypiley: “Ti feyentulu ta Fotüm mew niey rumel mongen” (Juan 3:⁠36). ¿Chumngechi pengelafuymi tami feyentulen? Re wün mew müten femnoal, doy may inayafimi kidu ñi kimeltuel (Juan 13:⁠15). Tami femken mu pengelaymi tami rüf feyentulen Jesus ñi montulchen mu. Feymu Santiaw 2:⁠17 feypiley: Kiñe che ‘pengelnole chem küme femün no rume, laley reke tañi feyentun’.

21. ¿Chumngelu fill tripantu amukeiñ ti Trawün Jesus tañi lan ñi akordangeal?

 21 Amunge ti Trawün Jesus tañi lan ñi akordangeal. Ti pun petu ñi lanon, Jesus feypi taiñ akordayafiel kidu ñi lan. Feymu fill tripantu femkeiñ ti Trawün Jesus tañi lan ñi akordangeal (Matew 26:⁠26-28). Jesus ayüniey taiñ akordayafiel kidu ñi femün. Feymu feypi: “Femkeaymün ta tüfa iñche tamün tukulpamuafiel [akordamuafiel]” (papeltunge Luka 22:⁠19). Amun mu tüfachi trawün mew, pengelkeiñ taiñ longkontukuniefiel Jesus ñi wülün tañi mongen ka tunte taiñ piwkeyeetew kidu ka taiñ Chaw Jewba (inaduamnge ti kimelün dungu 14).

22. ¿Chem inaduamaiñ ti 6 ka 7 chillkatun mu?

22 Jesus ñi wülün tañi mongen iñchiñ mu, fey tati doy falin yewün taiñ llowafel (2 Korintio 9:⁠14, 15). Tüfa ka kümelkayafi ta fentren che layelu. Doy inaduamaiñ tüfa ti 6 ka 7 chillkatun mu.

^ parr. 2 Tati Biblia Ngünechen ñi Küme Dungu feypi “yafkan”, welu tüfachi chillkatun mew feypingeay “kulpan”.

^ parr. 13 Nisan pingekey tati wünen küyen ñi nien pu judiu tañi calendario mu.