Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 11 CHILLKATUN

¿Chumngelu fente kutrankawkeiñ?

¿Chumngelu fente kutrankawkeiñ?

1, 2. ¿Chem ramtuwkey fentren che?

FILL antü allkütukeiñ ñi rupan wedake dungu. Rupan mu nüyün, lakey fentrenke che. Kiñeke mu pu weñefe langümchekeyngün, kutranpiwkeyechekelay rume. Ka kiñeke chaw malütukefi kam nüntukefi tañi pu pichikeche.

2 Feymu fentren wedake dungu rupalu, pu che ramtuwkey: “¿Chumngelu (chemu) fente müley üdewün ka kutrankawün?”. Eymi kay, ¿ka femngechi ramtuwkeymi?

3, 4. 1) Abakuk, ¿chem ramtufi ta Jewba? 2) ¿Chem feypikünueyew Chaw Jewba?

3 Kuyfi kiñeke wentru poyekefilu ta Ngünechen, ka femngechi ramtuwkefuyngün. Femngechi pengeli Biblia. Feymu Abakuk ramtufi ta Jewba: “¿Chumngelu am pengelelkeen tati wedake dungu? Ka ¿chumngelu katrütukelafimi ñi müleal ti illamkawün? ¿Chumngelu müley apümkawün ka kewan dungu iñche ñi adkiñ mew? Ka ¿chumngelu fentren yafkawün ka kayñetuwün dungu müley?” (Habacuc 1:⁠3).

4 Chaw Jewba feypikünufi ta Abakuk ñi küme elkünutual ti dungu (Habacuc 2:⁠2, 3). Iñchiñ kutranpiwkeyechekeiñ mülen mu kutrankawün, welu Chaw Jewba doy kutranpiwkeyechekey (Isaías 55:⁠8, 9). Kidu rume duamnieeiñmew. Feymu Biblia feypi: ‘Kidu ta piwkeyenieetew ta eymün’ (1 Pedro 5:⁠7). Welu, ¿chumngelu fente kutrankawkey che? Inaduamaiñ.

¿CHUMNGELU FENTE KUTRANKAWKEIÑ?

5. 1) Pu longkolechi religioso, ¿chem feypikey kutrankawün mu che? 2) Welu, ¿chem kimeltukey Biblia?

5 Pu longkolechi religioso feypikeyngün: “Chaw Dios  ñi pin mu kutrankawkey che”. Kiñeke ka feypikey: “Chaw Dios femkünuy chem taiñ rupayal, kümeke dungu ka wedake dungu”. Ka feypikeyngün adümfal-lay chumngelu kutrankawkeiñ. Kafey kiñeke religioso feypikey lan mu kiñe che mülepuketuy Ngünechen engu. Ka lan mu pichikeche, feypikeyngün: “Chaw Dios duamniefuy kiñeke küme püllü wenu mapu mu, feymu yeketufi tüfachi pichikeche”. Welu kom tüfa rüfngelay. Chaw Jewba femkünukelay ñi rupayal wedake dungu. Feymu Biblia feypiley: “¡Rakiduamfalngelay Chaw Ngünechen ñi femal wedake dungu, ka ñi wedalkayal tati Kom Pepiluwün-nielu!” (Job 34:⁠10).

6. Mülen mu wedake dungu, ¿chumngelu fentren che kulpatukefi ta Chaw Dios?

6 Fentren che rakiduamkey Chaw Ngünechen ngüneniefi ti Mapu, feymu kulpatukefi ta Chaw Dios mülen mu wedake dungu. Welu ti 3 chillkatun mu inaduamiyiñ iney longkoley Mapu mu: Weküfü tati.

7. ¿Chumngelu fente müley kutrankawün?

7 Biblia feypiley ti Mapu “ñi ngünenieetew tati weküfü” (1 Juan 5:⁠19). Weküfü longkoley Mapu mu, kidu weda piwkengey ka kutrankachekey. Kidu ‘ngünenkakefi kom Mapu mew mülechi pu che’ (Apokalipsi 12:⁠9). Fentren che inayentufi Weküfü ñi chumngen. Feymu pu che koylatukey, weda piwkengey ka üdechekey.

8. ¿Ka chem dungu mew kutrankawkeiñ?

8 ¿Ka chem dungu mew kutrankawkeiñ? Kakelu epu dungu mew. 1) Adan engu Eva chaftufi ka kayñetutufi ta Jewba, fey rulpaleleiñmu ñi kulpan. Feymu kulpafe chengen mu, kiñeke che kutrankakefi ta kakelu che. Küpa doyküleyngün kakelu che mu. Feymu kewakeyngün, weychakeyngün ka kutrankachekeyngün (Eclesiastés 4:⁠1; 8:⁠9). Ka 2) ruparumekey wedake dungu (Eclesiastés 9:⁠11). Chew ka chumül rume ruparumeafuy weda dungu, ka miyawliyiñ feyti mu, üllüfafuiñ.

9. Chaw Ngünechen petu katrütukelafi ñi müleal kutrankawün, welu kidu refalta femkelay tüfachi dungu. ¿Chumngechi kimnieiñ tüfa?

 9 Famülke mu müley weychan, awkan, femngekey wedake dungu ka wedalkangekey che. Welu tüfa rupakelay Chaw Dios ñi pin mu, Jewba femkünukelay taiñ kutrankawal. Kafey femkünukelay ñi rupayal fütrake kürüftuku, nüyün ka mangin ko. Welu iney no rume doy nielay newen Jewba mu, feymu “¿chumngelu katrütukelay ñi rupayal wedake dungu?”, ramtuwafuymi. Chaw Ngünechen petu katrütulafi ñi müleal kutrankawün, welu kidu refalta femkelay tüfachi dungu. ¿Chumngechi kimnieiñ tüfa? Fente taiñ piwkeyeetew kidu (1 Juan 4:⁠8).

¿CHUMNGELU CHAW NGÜNECHEN PETU KATRÜTULAFI ÑI MÜLEAL KUTRANKAWÜN?

10. Weküfü, ¿chumngechi witrameldungufi ta Chaw Dios?

10 Eden lof mu, Weküfü welulkafi ta Adan engu Eva. Kidu witrameldungufi ta Chaw Dios, ‘küme ngüneniekelay’ pi. Ka feypi Chaw Dios küpa elukelafi kümeke dungu ta Adan engu Eva. Satana ayülefuy ñi famngechi rakiduamal Adan engu Eva: ‘Doy küme ngünenieafeiñmew Weküfü, ka duamlaiñ Chaw Dios taiñ feypiaetew chem femal’ (Génesis 3:⁠2-5; inaduamnge kimelün dungu 25).

11. ¿Chem ramtun mülewey?

11 Adan engu Eva allkütuwetulafi ka kayñetutufi ta Chaw Jewba. ‘Iñchiw kidu dulliafuyu chem ñi kümen ka kümenon’, femngechi rakiduamingu. Welu Chaw Jewba müten kimniey chem taiñ rüf kümelkayaetew. Welulkalefuy Adan engu Eva. Feymu, ¿chumafuy Jewba ñi pengelal tüfa?

12. Chaw Jewba, ¿chumngelu apümfemlafi ta Adan engu Eva?

12 Jewba ayülefuy ti Mapu ñi küme mülewe ngeal, ka  wall püle ñi müleal che Adan engu Eva mu küpalu. Femtripayay Jewba ñi ayünieel, Weküfü pepi katrütulayaeyew (Génesis 1:⁠28; Isaías 55:⁠10, 11). Feymu Chaw Jewba apümfemlafi ta Adan engu Eva, welu may elufi ñi nieal fotüm ka ñawe. Femngechi kidu engün dulliafuy iney ñi ngünenieaetew: Jewba kam Weküfü.

13. Jewba eli Weküfü ñi ngünenieal ti Mapu ka tati pu che tañi nieal kiduke ñi gobierno. ¿Chumngelu duamfali ñi femal kom tüfa?

13 Weküfü witrameldungufi ta Jewba, fentren kümeke püllü peeyew (Job 38:⁠7; Apokalipsi 5:⁠11). Feymu Jewba eli Weküfü ñi ngünenieal ti Mapu. Kafey eli tati pu che tañi nieal kiduke ñi gobierno, Weküfü ñi adkünun mu. ¿Chumngelu duamfali ñi femal kom tüfa? Femngechi Weküfü pengelafuy rüfngepen may tañi feypin. Kafey pengelngeafuy ñi chum tripayal pu che nienole Jewba ñi kellun.

14. Fentren warangka tripantu ñi rupan mu, ¿chem kimfalküley?

14 Fentren warangka tripantu mu, mülekey fillke gobierno, welu kiñe no rume küme tripalay ñi duam. Feymu, ¿chem kimfalküley? Weküfü koylatufengey, ka ti pu che duamniey ñi kelluaetew Chaw Ngünechen. Feymu kiñe küme wentru poyekefilu ta Jewba, feypi: “Iñche küme kimnien, awem Jewba, tati pu che ngen-ngelay ñi rüpü. Tati pu che trekalelu, ngen-ngelay ñi adkünual kidu tañi trekan no rume engün” (Jeremías 10:⁠23).

¿CHUMNGELU FENTREÑMA RUPAY?

15, 16. 1) Dew fentren tripantu rupalu, ¿chumngelu Chaw Jewba petu apümlafi ti kutrankawün? 2) Chaw Ngünechen, ¿chumngelu katrütukelafi wedake dungu ruparupangelu Weküfü ñi duam mu?

15 Dew rupay fentren tripantu, feymu ¿chumngelu Chaw Jewba petu apümlafi ti kutrankawün? ¿Chumngelu  petu katrütulafi wedake dungu ruparupangelu? Duamniengefuy fentren tripantu ñi kimfalngeal tüfa: Weküfü küme ngüneniechekelay. Pu che fillke gobierno niekeyngün, welu kom weda tripay ñi duam. Famülke mu doy pepilngekey ciencia ka teknologia, welu doyelküley ti weychan, filla, norngenochi dungu ka fill wedake dungu. Feley, duamnieiñ taiñ ngünenieaetew Chaw Jewba.

16 Kafey, Chaw Ngünechen katrütukelafi wedake dungu ruparupangelu Weküfü ñi duam mu. ¿Chumngelu? Femfule, kelluafuy ñi küme tripayal Weküfü ñi ngünenien, welu Chaw Jewba femlayafuy tüfa. Kafey pu che rakiduamafuy ñi küme tripameken tañi kidu ngüneniewün. Welu tüfa rüfngelay, kidu iñchiñ pepi ngüneniewkelaiñ. Jewba kimniey tüfa. Feymu chumlayafuy rume pu che ñi feyentual feychi koyla dungu (Ebrew 6:⁠18).

17, 18. Chaw Dios, ¿chumngechi küme elkünutuafi ti wedake dungu?

17 Weküfü ka pu che kayñetuniefi ta Chaw Dios, feymu rupakey wedake dungu. Welu, ¿küme elkünutuafuy Chaw Dios kom tüfachi dungu? ¡May! Kidu niey kom pepiluwün. Femay tüfa puwchi antü mu, dew küme kimfalngele ñi rüfngenon kom ñi koylatuel Weküfü. Fey taiñ Fütra Chaw küme mülewe künutuafi ti Mapu, chumngechi ayükefuy ellaka mu. Kafey wiñomongetuay pu layelu (1 Korintio 15:⁠22). Pu che kutranwelayay ka lawelayay. Jewba elfalkünuafi ta Jesus, fey küme elkünutuafi Weküfü ñi wedalkakünuel. ‘Apümkañmayafi [...] tañi pepikaelchi dungu’ (1 Juan 3:⁠8). Welu petu rupanolu tüfa, müna mañumniefiyiñ ta Jewba. Kidu ñochi duamngey. Feymu elueiñmu taiñ kimafiel, ka dulliafuiñ taiñ ngünenieaetew Kidu (papeltunge 2 Pedro  3:⁠9). Ka kutrankawliyiñ rume, kidu kellukeeiñmu taiñ newentuleal (papeltunge 2 Tesalonisense 3:⁠3).

18 Iñchiñ eluwküleiñ taiñ ngünenieaetew Jewba, welu kidu dikümtukukelaeiñmu (altrontukukelaeiñmu). Doy may, elueiñmu taiñ kidu dullial chem femal, tüfa kiñe falin yewün (regalo). ¿Chumafuiñ iñchiñ tüfachi yewün mu? Inaduamaiñ.

KIDU DULLIAFUYMI TAMI CHUMAL, FEY ¿CHUMAYMI KAY?

19. 1) ¿Chem yewün elueiñmu Chaw Dios? 2) ¿Chumngelu mañumfali tüfachi yewün?

19 Jewba elueiñmu kidu dullial taiñ chumal. Nieiñ tüfachi falin yewün, feymu dulliafuiñ chem femal taiñ mongen mu, taiñ poyeafiel kam poyenoafiel ta Jewba. Felelaiñ pu kulliñ reke. Pu kulliñ pepi dullikelay chem ñi kümen ka kümenon ka duamniey ñi adniengeal kom ñi chumal (Proverbios 30:⁠24-28). Jewba ayükey iñchiñ taiñ ayüwküleal. Feymu elueiñmu taiñ dullial. Dulliafuiñ chem chengeal, iney weniyeafiyiñ ka chumngechi yenieafuiñ taiñ mongen.

20, 21. ¿Chem doy küme dungu dulliaymi?

20 Kiñe fotüm, piwkeyen mu feypifile tañi chaw “rume piwkeyeeyu”, tañi chaw rume ayüwafuy. Ka femngechi femkey taiñ Wenu Chaw Jewba, ayükey taiñ piwkeyeafiel (Matew 22:⁠37, 38). Elueiñmu taiñ dullial, poyeafiel kam poyenoafiel. Weküfü, Adan ka Eva dullingün ñi famentuafiel ta Jewba. Eymi kay, ¿chem dulliaymi?

21 Dullinge serfiafiel ta Jewba. Fentren che dulliwyey poyeafiel ta Chaw Ngünechen, ka famentukefingün Weküfü (Proverbios 27:⁠11). Chumngechi ngüneduamiyiñ, Jewba apümafi kutrankawün, fey küme mülewe künutuafi ti Mapu. Welu, ¿chumafuymi tami mongeleal fey mu? Küpalechi chillkatun mu inaduamaiñ tüfa.