Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 TROKIÑ 7

Ngünechen montulfi tati pu israelche

Ngünechen montulfi tati pu israelche

Jewba wüli wedake dungu tati Egipto mapu mu, ka Moyse entufi pu israelche. Moyse mew, Ngünechen elufi ti Ley dungu

FENTREN tripantu mu tati pu israelche mülekefuy Egipto mapu mu, ka amuy ñi tremün ka küme felerpuyngün. Feymew kiñe we faraon longko ülmen-ngetuy, welu rume (mütre) weda piwkengefuy kimnofilu ta Jose. Pefilu pu israelche ñi rume alün-ngen llükay, feymew ‘kona ngeayngün’ pi, ka feypi ñi ürfingeal pu we wentru püñeñ Nilo pingechi lewfü mu. Fey kiñe israel domo llükangenolu tukuy ñi we püñeñ kiñe küllko mu, fey ellkalfi rangi rümentu mew. Faraon ñi ñawe pefi, fey üytukulfi Moyse ka tremümfi pu ülmenche mew.

Moyse nielu meli mari tripantu, koni wedake dungu mew ingkafilu ti israelche ñi wedalkamekeetew kiñe elfalchepelu Egipto mapu mu, feymew müley ñi lefmawal kamapu. Ka nielu pura mari tripantu, Ngünechen feypifi ñi wiñotual Egipto mu ka feypiafiel ti faraon ñi neykümafiel tati pu israelche.

Faraon pilay ñi neykümafiel tati pu israelche, feymew Ngünechen kastigafi (kutrankabi) pu egiptoche mari wedake dungu mew. Welu Moyse wüne ngüfetufi (eypibi) ta faraon, ñi montual ti weda dungu mu. Welu feyta rume (mütre) mallmangefuy, ka wentruwkefuy Moyse ka Jewba mu. Petu rupalu chi mari weda dungu, Ngünechen werküfi kiñe küme werken püllü ñi langümal kom pu wünen yall Egipto mu. Welu chi werken püllü wallkünuy (rupay) pu israelche ñi ruka mu feyentulu Ngünechen mew. Ka tukulelfingün kiñe korderu ñi mollfüñ wallon ñi wülngiñ ruka mew. Feymu ñi tukulpayal feychi afmatufalchi dungu, tati pu israelche eluwingün ñi femael fill tripantu ti Paskua kawiñ.

Fey dew lalu ñi wünen fotüm, ti faraon wemüfi Moyse ka tati pu israelche Egipto mapu mew. Pürüm (pür) müten adkünuwi ñi tripayal engün. Welu ti faraon wiñorakiduami feymu amuy ñi inantukuafiel ñi weychafe ka awkan kareta engün. Ka tati pu israelche akulu inaltu Kelü lafken mew, ngelay chew ñi lefmawal. Welu Jewba nülay chi lafken, fey pu israelche nome rupayngün kiñe angkülechi mapu mu. Inantukuyawlu pu egiptoche, Ngünechen elutuy ti ko ñi wiñotual, feymew takuñmafi ka ürfingün ta faraon ka ñi pu weychafe.

Rupalu chi antü pu israelche umarpuyngün (umañpoy) inaltu Sinay wingkul, feymew Jewba femi kiñe eldungu kidu engün. Rangiñelwe künungey ta Moyse ka Ngünechen elufi ti ley dungu ñi ngüyülngeal ka ingkangeal fill mongen. Püntütripanofule ka feyentufule engün inafülküleafuy Ngünechen mew, ka duamnieafuy ñi kümelkayafiel kake trokiñche.

Welu, epe kom che maneluwlayngün kidu mu. Feymew Ngünechen werküfi ñi ñampiawal meli mari tripantu ti üwe mapu mew. Feymu, Moyse üytufi ti norngechi wentru Josue pingelu ñi longkongerpual. Fey wüla, akuy chi antü pu israelche ñi konal kiñe küme mapu mew feypikünufilu kuyfi ta Abraam.

(Tuwlu Éxodo, Levítico, Números, Deuteronomio, Salmo 136:10-15 ka Hecho 7:17-36.)