Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 TROKIÑ 20

Kristo ñi lan

Kristo ñi lan

Jesu elkünuy kiñe we tukulpangechi trawün; ellka ngünenkangey ka külafantukungey kiñe mamüll mew

JESU küla rangiñ tripantu amuldungumekelu ka kimfuy ñi fülkülepan ñi afael ñi mongen tüfachi Mapu mew. Tati pu judio longkolechi religioso ayüy ñi langümafiel, welu llükaleyngün ñi illkutuaetew (lladkütuetew) tati pu che, fey engün rakiduamkeyngün kiñe pelon wentru trokikefuyngün. Feymew Satana konürkey Juda ñi rakiduam ka ñi piwke mu— feyta kiñe mari epu apostolngelu—ñi fendeafiel tañi kimeltuchefe. Tati pu longkolechi religioso kullifingün ta Juda küla mari moneda plata mu.

Pun konlu chi Paskua, Jesu ka tañi pu apostol trawingün tañi tukulpayal tati Paskua kawiñ. Fey wüla feypifilu ta Juda ñi tripayal, Kristo elkünuy kiñe we tukulpangechi trawün: Feyta Jesu tañi Ella Pun (Trafia) Iyael. Feymew Jesu nüy kiñe triran (wüdkan) kofke ka ngillatuy fey wüla elufi tañi mari kiñe apostol. Fey wüla feypi: “Tüfa ta iñche ñi kuerpu, wültukuael tañi layael eymün tamün fürenengeael. Femkeaymün ta tüfa iñche tamün tukulpamuafiel”. Ka fey wüla rulpay kiñe kopa pulku ka feypi: “Tüfachi kopa ti we eldungu tati, [...] iñche ñi mollfüñ mew” (Luka 22:19, 20).

Feychi pun mu, Jesu kimeltulelfi fentren dungu tañi pu apostol. Ka elufi kiñe we werkün dungu: welukentu ñi piwkeyewael. Ka feypi: “Fey welukonkechi piwkeyewülmün, kom mapu mew mülechi pu che kimayngün iñche tañi disipulungen ta eymün” (Juan 13:34, 35). Ka feypifi ñi weñangkülenoal ñi piwke engün kom dungu kidu ñi rupayael, ka fey wüla ngillatufi ta Ngünechen kom ñi piwke mu kidu engün mew. Af mew, ülkantufingün ta Ngünechen ka amuyngün kiñe pichi tutechi anümkawe mew, Getsemani pingelu.

Üye mu, Jesu lukutuy ka ngillatufi ta Ngünechen kom ñi piwke mu. Welu, akurumeyngün kiñe trokiñ soltaw, pu saserdote ka pu wentru kupalnieyngün wayki ka karoti (mamüll), fey engün ayüy ñi püresuntukuafiel. Feymew Juda trurufi (trepetubi) ta Jesu ñi kimngeal. Tati pu soltaw püresukünufi engün ta Jesu, ka tati pu apostol lefmawingün.

Jesu feypifi tati pu judio mülelu longkolechi tribunal mu, iñche Kristo Ngünechen ñi Fotümngen. Welu tati pu kues rakiduamingün Jesu ñi feypin kiñe fütra koyladungungey, tüfa ñi feypin mu langümngeafuy. Feymew chalintukungepuy ta Pilato mew, ti longkolelu Roma ñi ngünenieel. Tüfachi wentru ngüneduami feyta Jesu kulpangenochi wentru, feymew wülkünufi tati pu che mu, tüfa engün wiraringün ñi langümngeael ta Jesu.

Feymew Kristo yengey kiñe lelfün mew Golgota pingelu, üye mu tati pu soltaw külafantukufi ta Jesu kiñe mamüll mew. Feymu wilüfkülechi (lüboykülechi) pelon antü dumiñrumey. Feychi nag antü, lalu Jesu kiñe fütra nüyün rupay. Feymew Jesu ñi la kuerpu tukukünufi engün kiñe rüngan lolo mew, dewmangechi kura mew. Fey ka antü mu, tati pu saserdote rakümkünungey ti lolo ka werküyngün ñi rume llüwatuniengeael (llobtuniengeal). ¿Rumel may Jesu mülepeay chi rüngan lolo mew? Femlayay tati. Kiñe fütra afmatufalchi dungu mülefuy ñi rupayal.

(Tuwlu kapitulo 26 ka 27 Matew, pu kapitulo 14 ka 15 Marku, pu kapitulo 22 ka 23 Luka ka pu kapitulo 12 ka puwlu 19 Juan ñi lifru.)

^ parr. 15 Tami doy kimal ti doy falin-ngey Jesu ñi chalintukun mu, ti kapitulo 5 chi lifru Tati Biblia ñi rüf kimeltukeel pingelu