Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 TROKIÑ 8

Pu israelche koningün Kanaan mapu mew

Pu israelche koningün Kanaan mapu mew

Josue ngüyülfi pu israelche ñi nürpual Kanaan mapu. Jewba üytufi pu kues ñi montulafiel tañi pu che ñi pu kayñe mu

PATAKAKECHI tripantu mu petu kon-nolu pu israelche Kanaan mapu mew, Jewba feypikünufi ta Abraam ñi eluafiel kiñe mapu ñi pu yomelche (küpalelu). Fewla, Josue ngüyülfi tati pu israelche ñi nürpual ti Feypikünuelchi Mapu.

Ngünechen feypikünuy ñi apümngeal kom pu kanaanche, rume kewafengelu ka podümngechi dungu femkelu engün. Feyta feypikünuy pu israelche ñi apümafiel kom Kanaan ñi waria.

Petu ñi konpunon mapu mew, Josue werküy epu lloftumapufe. Tüfa engu koningu Jeriko waria mew, ka umatuyngu (umañi engu) Raab ñi ruka mu. Kidu kimnielu kay pu israelche ngen, welu eluñmay ñi ellkawal fey mew. ¿Chumngelu (chemu)? Kidu allküfuy Jewba ñi afmatun dungu femlu ñi montulafiel tañi pu che, feymu lle mupiltuy kidu mu. Raab feypikünufi tati epu lloftumapufe ñi montulaetew ka tañi pu che.

Fey wüla, pu israelche koningün Kanaan mew, ka kewafingün ta Jeriko waria mu. Fey Jewba rüngümfi ñi wallmalechi küra malal, fey pu weychafe teyfüfi engün chi waria, welu Raab ka ñi pu reñma montuyngün. Ka femngechi nürpuyngün ti mapu kayu tripantu mew, fey Josue ka ñi pu weychafe ngünenierpuyngün epe kom Feypikünuelchi Mapu. Feymu, wüdatuyngün chi wewelchi mapu kom pu israel trokiñ che mu.

Kiñe antü mu, epe aflu Josue ñi longkolen, trawüli kom tati pu trokiñche. Tukulpafi chumngechi ñi küme femlu Ngünechen ñi pu kuyfike che em, ka yafültukufi ñi püntütripanoal. Welu lalu ta Josue ka ñi pu kompañ engün, fey wüla pu israelche püntüyngün ñi poyeal ta Jewba, ka püramfingün koylake dio. Rupalechi küla pataka tripantu mu, feyentulayngün Ngünechen ñi Ley dungu fentren rupa mu. Feymew Jewba wülfi pu filisteoche mew ka kake kayñe ñi kastigangeal. Welu ngillatulu engün, fey Jewba üytufi kiñe montulchefe. Ka mülekefuyngün mari epu montulchefe, kues pingelu.

Tati lifru nielu tüfachi nütram llituy (ellaka) ti Kues Otniel pingelu ka wechürpuy kiñe wentru doy newen-ngelu: Kues Sanson pingekefuy. Kom tüfachi dungu wirintukulelu chi lifru Jueces pingelu elukeeiñmew kiñe falin-ngechi (manelbalchi) kimeltun: feyentufiliyiñ ta Jewba ayüwün-ngechi mongen nieayiñ; welu femnoliyiñ weda weñangkün dungu rupayafuyiñ.

(Tuwlu Josué, Jueces ka Levítico 18:24, 25.)