Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 TROKIÑ 12

Kümeke ngülam taiñ mongen mu

Kümeke ngülam taiñ mongen mu

Tati lifru Proverbios re kümeke ngülam niey küpalu Chaw Ngünechen mew, epe kom wirintukuy ta Salomon

¿KÜMEPEAFUY may taiñ ngünenieetew Jewba? Taiñ kimafiel, müley taiñ ngüneduamal tati ngülam elueiñmew ñi Dungu. ¿Rüf kümepey may? ¿Kelluafeiñmew taiñ yenieal kiñe doy küme mongen? Ti kim longko ülmen Salomon wirintukuy patakakechi kümeke ngülam, mülelu chi lifru Proverbios mu, ka nütramyey epe kom dungu rupalu mongen mu. Peafiyiñ kiñeke.

Duamtunieyiñ taiñ maneluwafiel Ngünechen. Taiñ küme tutewküleal Ngünechen iñchiñ, müley taiñ maneluwafiel kidu mu. Salomon feypi: “Manelfinge ta Jewba kom tami piwke mu, ka reküluwkilnge eymi tami kimün mew. Tukulpafinge kom tami mongen mu, ka kidu norümüñmayaeymu chew tami miawken” (Proverbios 3:5, 6). Maneluwliyiñ ta Ngünechen, kintuafiyiñ ñi ngülam ka feyentuafiyiñ (müngeltuabiyiñ) ñi feypin. Femngechi femliyiñ, diturpuayiñ kümeke dungu taiñ mongen mu: ayüwelafiel taiñ wenu Chaw ñi piwke, ka pengelal chi Weküfü ñi koylangen (Proverbios 27:11).

Tati pu reñma, ka tati pu weni. Famülke mew tati pu reñma (pu che) rume duamtunieyngün Ngünechen ñi ngülam. Ngünechen ngülamtufi tati pu füta: “Ayüwküleaymi tami domo emu tami nieel wechengelu eymi” (Proverbios 5:18-20). Ti kapitulo 31 chi lifru Proverbios mu, wülkey tati pu fütangechi domo kiñe tutengechi inayentu dungu, pengeli chumngechi tañi füta, ka tañi pu püñeñ ñi yamnieaetew ka ñi afmatuaetew. Ka femngechi yafültukufi tati pu yall ñi feyentuafiel tañi chaw ka tañi ñuke mu (Proverbios 6:20). Tüfachi lifru ka pengeli ti weniyewün rume (mütre) falin-ngey, ka feypieiñmew püntüwtripaliyiñ kakelu che mew, iñchiñ kidu taiñ rakiduam inayaiñ (Proverbios 18:1). Duamfali taiñ nieael kümeke weni, welu müley taiñ küme dulliafiel (ngümintuabiel) taiñ weni famtripanoaetew (Proverbios 13:20; 17:17).

Kidutu tañi mongen. Proverbios niey fentren kümeke ngülam taiñ kümelkaleal, ka kellukeeiñmew taiñ famentuafiel wedake rakiduam, kiñepülekünual ngollikawün dungu, taiñ nieal küme rakiduam, ka doy küme küdawfengeal (Proverbios 6:6; 14:30; 20:1). Ka feypikeeiñmew inafiliyiñ wentru ñi rakiduam famentukelu Ngünechen ñi ngülam, wedake dungu rupafuyiñ (Proverbios 14:12). Müley taiñ kuñiwtukual taiñ piwke chem weda dungu rume ñi kon-noal, “feymu tuwlu am kom chi mongen” (Proverbios 4:23).

Tüfachi kümeke ngülam rume (mütre) kümelkafi fentren che ñi mongen engün, feymew rüf kimnieyngün doy kümey ñi ngünenieaetew Jewba.

(Tuwlu chi lifru Proverbios mu.)