Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 NÜTRAM 75

Meli wecheke wentru babilonia mu

Meli wecheke wentru babilonia mu

TATI rey Nafukodonosor yefi ta Babilonia mew doy kimün-ngechi pu Israel che. Fey, dulli (ngümintuy) doy küme ad-ngechi wentru ka doy kimün-ngelu. Faw pefinge meli wecheke wentru fey engün. Kiñe feyta Daniel pingey, kakelu küla weche wentru tati pu Babilonia che üytükufingün Sadrak, Mesak ka Abednego.

Nafukodonosor ayüy ñi kimeltuafiel engün ñi serfial ñi ülmen ruka mu. Rupale küla tripantu kimeltun mu, dulliay (ngümintuay) doy kimchengelu müten ñi kelluaetew norümam wedake dungu. Kidu ayüy tati pu wecheke wentru ñi doy newen-ngeal engün, feymew werküfi ñi pu kona ñi elungeal trür iyal ka pulku kidu ka tañi reñma (pu che) llowkelu.

Adkintufinge ti weche wentru Daniel. ¿Kimimi chem ñi feypimekefiel ta Aspena, Nafukodonosor ñi longko kona? Feypifi ayülay ñi podümüwal ñi iyafiel ti kümeke iyael (yagel) mülelu rey ñi mesa mu. Welu Aspena weda duamküley. ‘Tati rey elduami chem müley tamün iyafel ka putuafel (pütokoafel),’ pi. ‘Ka pengenolmün doy küme adngen kakelu wecheke wentru reke, langümafenew ti rey.’

Feymu lle Daniel feypifi ta elfalchepelu, ta Aspena elfalkünueyew engün Daniel ka tañi küla weni. ‘Mari antü mu ngüneduamuyiñ,’ pi. ‘Elumuiñ fillke tukukan taiñ iyafiel, ka ko taiñ pütokoal. Feymew trürümuayiñ kakelu pu wecheke wentru imekelu rey ñi iyael, ka adkintunge chuchi am doy küme ad ngey.’

Tati elfalchepelu femngechi femi. Ka aflu ti mari antü, Daniel ka tañi küla weni pengeyngün doy kümelkalen engün ta kom kakelu wecheke wentru mu, ka eluñmay amul engün fillke tukukan, ñi inieafiel (yinieafiel) welukünual ñi eluetew tati rey.

Af rupalu küla tripantu, kom pu wecheke wentru yengey engün ti rey Nafukodonosor. Fey wüla dew ti rey dungufilu kom engün, pefi ta Daniel ka ñi küla weni doy kimche ngen engün. Feymu lle, elkünufi engün ñi kelluaetew ti ülmen ruka mu. Ka ti rey ramtufile chem dungu rume, kam wedake dungu rume Daniel, Sadrak, Mesak ka Abednego, mari rupa doy kimi engün ta kakelu pu saserdote, ka kim wentru nielu tati rey mew.