Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 NÜTRAM 67

Jeosafat maneluwkey Jewba mu

Jeosafat maneluwkey Jewba mu

¿KIMFIMI iney ngen tüfachi pu wentru, ka chummekeyngün? Amuleyngün ti awkan (weychan) mu, ka ti pu wentru wünelelu ülkantulerpuyngün. Ramtuymichi: ‘¿Chumngelu (chemu) ti pu ülkantufe nielayngün fütrake kuchillu ka wayki ñi kewayal?’ Peafiyiñ.

Jeosafat reyngey ti reyno mu nielu epu trokiñ reñma Israel. Ka ti rey mülekefuy ti rey Akab ka Jesabel ñi antü mu, mülelu ti pikungechi reyno nielu mari trokiñ reñma mew. Welu Jeosafat küme reyngey, ka ñi chaw Asa küme reyngefuy ka. Feymu fentren tripantu mu tati pu che tuwlu ti waywen-ngechi (surngechi) reyno nielu epu trokiñ reñma ayüwün-ngechi küme mongen nieyngün.

Welu fewla rupay kiñe dungu llükay ta pu che. Kiñeke werken feypifingün ta Jeosafat: ‘Rume fentren awkafe (weychafe) tuwlu Moab, Amon ka Seir wingkul Mapu mew, küpaley engün tami kewatuaetew.’ Fentren Israel che trawüyngün Jerusalen waria mew, ñi kintuafiel Jewba ñi kelluaetew. Amuyngün ti ngillatuwe ruka mu, ka üye mew Jeosafat ngillatuy: ‘Awemkay Jewba taiñ Ngünechen, kimlayiñ taiñ chem chumafel. Topalayayiñ chem no rume tüfachi rume fentren awkafe mu. Eymi kellumuyiñ.’

Jewba allkütuy, ka werküfi kiñe ñi pu kona ñi feypiafiel ti pu che: ‘Eymün tamün awkan no. Ngünechen tañi awkan tati. Mülelay tamün kewayal. Re adkintuaymün müten, ka peaymün chumngechi Jewba tamün montulaetew.’

Fey mew ka antü puliwentu mu Josafat feypifi tati pu che: ‘¡Maneluwmün Jewba mew!’ Feymew wünentükukünufi tati pu ülkantufe ka ñi pu awkafe inaleyngün, fey petu ñi trekalen engün ülkantulerpuyngün ñi püramyeafiel ta Jewba. ¿Kimimi chem dungu rupay fülpulu engün ñi awkayal (weychayal)? Jewba femi tati pu kayñe welukentu kewatuwingün. ¡Ka akulu pu Israel che, kom pu kayñe larkeyngün!

Jeosafat, ¿kim wentru ngepey may ñi maneluwlu Ngünechen mu? Femngechi femliyiñ, kimche ngeayiñ.