Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 NÜTRAM 68

Epu pichi wentru wiñomongetuy

Epu pichi wentru wiñomongetuy

EYMI lalmi, ¿chumafuy tami ñuke eymi wiñomongetulmi? ¡Kidu rume ayüwafuy! Welu ¿wiñomongetupeafuy may tati layechi pu che? ¿Rupakepefuy may kuyfi mew?

Adkintufinge tüfachi wentru, ka ti domo ka ti pichi wentru (püchü kampu) mülelu adentun mu. Ti wentru feyta pelon wentru Elia pingey. Chi domo fey kiñe lantu domo tuwlu Sarepta waria mu, ka ti pichi wentru fey ñi püñeñ. Welu kiñe antü ti pichi wentru kutrani. Doy wedalkalerpuy, fey mu lay. Fey mu Elia feypifi ti domo: ‘Eluen ti pichi wentru.’

Elia püramfi ti la pichi wentru feymu elkünufi wente kawitu. Fey llellipuy: ‘Awem Jewba, wiñomongeltufinge tüfachi pichi wentru.’ ¡Ka ti pichi wentru wiño neyütuy! Fey mew Elia nakümpafi ka feypifi ti domo: ‘¡Pepange, tami püñeñ ta mongeley!’ Fey tüfa ti ñuke rume ayüwi.

Kangelu Jewba ñi falin-ngechi pelon wentru, Eliseo pingey. Kidu kellukefilu ta Elia. Welu mülen antü mu, Jewba ka pünefi Eliseo afmatufalchi dungu ñi femal. Kiñe antü amuy Sunem waria mew, kiñe domo rume küme lloweyew. Fey wüla tüfachi domo ka tañi wentru nieyngu kiñe yall (choyün).

Doy tremlu tüfachi pichi (püchü) wentru, kiñe puliwen amuy chew ñi küdawkülen ñi chaw lelfün mu. Wirar-rumey: ‘¡Kutrani tañi longko!’ Yengetulu tañi ruka mu, lay. ¡Müna weñangküy ti ñuke! Pürüm (pür) kintumefi Eliseo.

Akulu Eliseo, konpuy ti katrüntükuwe mu ti la pichi wentru engu. Llellipuy ta Jewba, fey tranakünuwi wente la mu. Pichiñ mu müten eñumi ti pichi wentru, ka echiwi regle rupa. ¡Rume ayüwi tañi ñuke konpulu ka pelu tañi püñeñ ta mongelelu!

Rume fentrenke che layey. Tüfa rume weñangkülkey tañi pu reñma (pu che) ka tañi pu weni. Iñchiñ pepi wiñomongeltukelafiyiñ pu la. Welu Jewba pepili. Fey wüla peayiñ kidu wiñomongeltuay rume fentren che.