Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 NÜTRAM 69

Kiñe malen kellufi ülmen-ngechi wentru

Kiñe malen kellufi ülmen-ngechi wentru

TÜFACHI pichi (püchü) malen, ¿kimimi chem feypimekey? Dungufi ti domo Jewba ñi nien kiñe pelon wentru Eliseo pingelu, ka ti afman-ngechi dungu Jewba ñi kellukeetew ñi femkeen. Ti domo kimlafi Jewba, Israel che am no. Feymu peafiyiñ chumngelu (chemu) ti pichi malen müley ti domo ñi ruka mew.

Siria mu tuwi ti domo. Ñi füta Naaman pingey, longkolelu pu awkafe Siria mu. Pu Siria che nüfi tüfachi Israel pichi malen, ka fewla konayeyu Naaman ñi domo.

Naaman niey kiñe weda kutran, lepra pingey. Tüfachi kutran tami kiñe trokiñ fün kuerpu trananagafuy. Tüfachi nütramelfilu feypi ti pichi malen: ‘Amufule tañi ngen-ngelu Jewba ñi pelon wentru Israel mew, tremolafeyu ñi lepra kutran.’ Fey wüla tüfachi nütram mu, kimelngey chi domo ñi füta.

Naaman rume ayüy ñi tremoal; feymu lle ‘amuan Israel mu’ pi. Puwlu fey mu, amuy Eliseo ñi ruka mu. Eliseo werküy tañi kona: ‘Tripatufe, ka feypifinge ta Naaman: “Regle rupa müñetunge Jordan lewfü mew”.’ Feymu Naaman rume illkuy (lladküy), ka feypi: ‘¡Tati pu lewfü mülelu ñi mapu mew doy kümey chem lewfü rume mülelu Israel mu!’ Feypilu tüfa, amutuy.

Welu ñi kona feypieyew: ‘Ñidol, feypielmu Eliseo kiñe küdawngechi dungu, femafuymi. Feymu, ¿chumngelu müñetuñmulaymi müten, chumngechi tami feypietew?’ Naaman küme allkütufi ñi kona, ka ngüfoltükuwi ti Jordan lewfü mu regle rupa. ¡Femlu tüfa, ñi fün newen-ngetuy ka tremoletuy (kümeletuy)!

Naaman rume (mütre) ayüwküley. Wiñotuy chew ñi mülen Eliseo ka feypifi: ‘Fewla rüf kimfiñ Israel ñi Ngünechen, feyta kiñen Ngünechen kom Mapu mu. Feymu lle, füreneafen, llownge tüfachi yewün.’ Welu Eliseo feypi: ‘Llowlayafiñ.’ Eliseo kimi kümelayafuy ñi llowafiel ti yewün, Jewba am tremolfilu (mongelfilu) ta Naaman. Welu Geasi, Eliseo ñi kona, ayüy ñi nüafiel ti yewün.

Feymu famngechi femi. Dew amutulu Naaman, Geasi lefi ka dirpufi. ‘Eliseo werküenew tañi feypiafiel eymi: “Duamün kiñe trokiñ tami yewün ñi eluafiel kiñeke pu witran we akulu”’, pi Geasi. Welu tüfa, re koyla tati. Welu Naaman turpu kimlay tüfachi dungu; feymu elufi ta Geasi kiñeke chemkün.

Wiñotulu Geasi, Eliseo kimi ñi femün. Jewba feypieyew. Feymew feypi: ‘Femlu am eymi tüfachi weda dungu, Naaman ñi lepra kutran nietuaymi eymi.’ ¡Müchay müten femngechi rupay!

¿Chem kimeltuafeiñmew kom tüfachi dungu? Wüne, müley taiñ femal chumngechi femi ti pichi malen, ka müley taiñ dungual Jewba mu. Tüfa rume kümelkayafuy. Epu, mülelay taiñ mallmangeal chumngechi Naaman wüne mu femfuy, welu may müley taiñ feyentuafiel Jewba ñi pu kona. Ka küla, mülelay taiñ koylatual Geasi reke. ¿Rüf doy kimafuyiñ chillkatufiliyiñ chi Biblia?