Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

¡Chaw Dios duamnieeiñmu llemay!

¡Chaw Dios duamnieeiñmu llemay!

Afmatufali Chaw Dios chumngechi ñi dewmafiel taiñ kuerpu kidutu kümelkawtukelu am. Fey kiñe trokiñ taiñ kuerpu mu allfülngele, kawlitungele kam katarumengele, “fillke dungu ruparupangeay ponwitu taiñ kuerpu mu, fey kidutu ñi kümelkawtual alükonfule rume ti allfen” (Johns Hopkins Medicine). Taiñ kuerpu matu katrümollfüñkey, fey ñi tremoltuafiel taiñ allfen ka trawa.

NGÜNEDUAMNGE: Chaw Dios dewmay taiñ kuerpu ñi kidutu kümelkawtual, feymu maneluwafuiñ kidu mu taiñ kelluaetew ñi kutrantupiwkewenoal. Biblia feypi “[Jewba] tremolmekefi tati pu kutrantupiwkelelu, impolmamekefi tañi allfen” (Salmo 147:3). Welu weda duamelelmu fill wedake dungu tami rupan, ¿feyentuafuymi Chaw Dios tami kelluaetew eymi tami kutrantupiwkewenoal famülke mu ka küpalechi antü mew?

BIBLIA ÑI FEYPIN CHAW DIOS TAÑI PIWKEYECHEKEN MU

Chaw Dios feypikünuy: “Llükakilnge, iñche am eymi mu mülen. Fill rakiduamkülekilnge, iñche am eymi tami Ngünechen. Iñche ta yafülaeyu, may, iñche ta kelluaeyu” (Isaías 41:10). Fey feyentuliyiñ Chaw Ngünechen taiñ kuydanieetew, küme duamküleaiñ ka chaftuafiyiñ fill wedake dungu. Apostol Pablo nütramkalu tüfachi felen taiñ nieafel, feypi: “Ngünechen eluaeymünmew kisu tañi küme tüngün [küme felen], fey tüfachi fütra küme tüngün ta doy kümey che ta pepil-layafuy ñi nieael ta küme tüngün”. Pablo ka feypi: “Femngechi tañi pengelelael tüfachi fütra pepiluwün ñi tripanon ta iñchiñ mew, welu may ñi küpan ta Ngünechen mew” (Filipense 4:4-7, 9; 2 Korintio 4:7).

Biblia kellukeeiñmu taiñ feyentual Chaw Jewba tañi feypikünuel pu che ñi küme feleal. Fey Apokalipsi 21:4, 5 feypi chem chumay Chaw Dios ka chumngelu maneluwafuiñ kidu mu ñi femürpual tüfa:

  • Kom pu che “angkümüñmangetuay engün tañi külleñu”. Chaw Jewba apümkayafi taiñ kutrankawkülen ka itrokom dungu taiñ rakiduamelkeetew kake kiñeke iñchiñ, feychi dungu kütu ñi falintunofiel kakelu che.

  • Chaw Ngünechen “fey tati anülelu ti ülmen wangku mew”. Fente tañi newen-ngen, kidu apümkayafi fill dungu taiñ wedalkayafetew ka eluaeiñmu taiñ duamnieelchi kellu.

  • Chaw Dios feypi: “Fey tüfa ta rüfngechi dungu ka feley tañi manelngeael”. Fey koylatukenolu am Chaw Dios, maneluwafuiñ kidu ñi femürpual kom tañi feypikünuel.

“Angkümüñmangetuay engün tañi külleñu, fey ngewelayay ta lan, ngüman no rume, eyütun no rume, kutrantun no rume. Itrokom tati mülekefulu am ta kuyfi dew ta mülewetunolu. Fey tati anülelu ti ülmen wangku mew feypi: ‘Iñche ta itrokom mülelu wekünutuafiñ’. Fey wüla ka femngechi feypi: ‘Wirintukufinge tañi feypiaelchi dungu, fey tüfa ta rüfngechi dungu ka feley tañi manelngeael’” (Apokalipsi 21:4, 5).

Taiñ Wenu Chaw ñi dewmael ka tati Biblia pengeli kidu ñi küme chumngen. Fey ngüneduamfiliyiñ ñi dewmael, tüfa kelluaeiñmu taiñ küme weniyeafiel. Welu doy kelluaeiñmu ngüneduamal Biblia ñi feypin: “Fülkonmün ta Ngünechen mew, fey kisu fülkonay ta eymün mew” (Santiaw 4:8). Hecho 17:27 feypi: “Ngünechen ñi alü kamapulenon kake kiñeke iñchiñ mew”.

Fey eluwülmi tami doy kimafiel ta Chaw Dios, doy feyentuaymi kidu tami “piwkeyenieetew” (1 Pedro 5:7). Femngechi feyentulmi, ¿chumngechi kelluafeymu?

Ngüneduamnge Katsuo ñi rupan. Kidu tremümngey Japon mapu mu, ka kristiana ngefulu rume tañi ñuke, Katsuo koni kiñe trokiñche mu müna wedalkachekelu. Feymu feypi: “Chaw Dios üdeetew trokiwfun, ka lalu kiñeke tañi pu che ka tañi pu weni, ‘kastigaenew Ngünechen’ pikefun, doy may lalu kiñe che tañi piwkeyefiel”. Fente ñi wedañmangen pu che tañi wallmanieetew, Katsuo feypi: “Küme piwkengelafun”. Nütramkalu tañi küpa femürpun, kidu feypi: “Langümfili kiñe che doy wedañmangelu iñche mu trokingelu, fey yamfalngeafun, wechengen lafuli rume”.

 Welu Katsuo ka tañi domo eluwingu ñi kimeltulelngeal Biblia. Tüfa kellueyew ñi küme elkünutual tañi mongen ka doy küme chengerpual. Tañi domo feypi: “Ngüneduamün tañi wentru ñi we küme mongen nietun”. Fewla Katsuo feypi: “Küme feyentuken Chaw Dios ñi duamniefiel kake kiñeke iñchiñ, ka ñi ayükenon pu che ñi layal. Kidu eluwkey ñi wiñoduamtuafiel pu rüf wiñorakiduamtulu tañi welulkan mu. Feyentuken Chaw Dios ñi küme allkütukeel taiñ nütramkalelfiel, pu che adümnole rume chem taiñ rakiduamkeel. Pichilewey Jewba ñi apümkayafiel fill kutrankawün, ka chem rume taiñ kutrantupiwkeleletew. Famülke mu kütu, Jewba femafuy tunte iñchiñ rakiduam mu üngümkülenoel rume. Ka kutrantupiwkeleliyiñ, kidu kuydayaeiñmew ka kelluaeiñmew” (Salmo 136:23).

Katsuo ñi rupan kimeltukeeiñmew ñi falin-ngen maneluwal Chaw Dios mu. Fey pichilewey kidu tañi apümkayafiel taiñ kutrankawkülen ka tañi angkümüñmatuafiel taiñ külleñu, tüfa küme duamelkeeiñmu famülke mu, ka elukeeiñmu maneluwün taiñ doy küme feleal. Feyngey llemay, ruparupangelu rume wedake dungu Mapu mew, müna kümelkakeeiñmu Chaw Dios taiñ piwkeyenieetew.