Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

Kiñeke tami pu che lale

Kiñeke tami pu che lale

Tüfa ñi feypiel Vanessa, Australia mapu mu mülelu: “Tañi wentru lamngen larumey, fey rume lladkün. Müfüke küyen rupalu rume, müna weda duamkülekefun, tañi lan chüngartukupiwkenew reke. Kiñeke mu illkuken, fey ‘¿chumngelu am (chemu) lay tañi lamngen?’ pikefun. Ka kulpantukuwkefun, fey ‘müna weda ñi doy rupanon tañi lamngen iñchiw’ pikefun”.

EYMI kay, ¿weñangküleymi chi ñi lan mu kiñe tami piwkeyenieelchi che? Femngechi rupalmi, kiñeke mu rume lladküpelaymi kam kidulelu trokiwpelaymi. Ka illkupelaymi, kulpantukuwpelaymi ka llükapelaymi. Fey fente tami weda duamkülen, “ngünam mongelen” pipelaymi kütu.

Welu alüñmale rume tami weñangkütufiel tami la, ¡weda duamkülekilnge! Fente piwkeyeniefimi, feymu fente weñangkütufimi. Welu, ¿chem kelluafeymu tami doy küme duamküleal?

¿CHUMAFUYMI TAMI DOY KÜME DUAMKÜLEAL?

Afnoalu tami weñangkün trokiwafuymi, welu allkütufilmi tüfachi ngülam, doy küme duamküleaymi llemay.

ENTUNGE TAMI WEÑANGKÜN

Kakerumey pu che ñi chum duamkülen. Kafey kiñeke che rume weñangkülekey pichiñma mu kakelu che alüñma mu. Welu, ¿chem kelluafeyew kom pu che ñi doy küme duamküleal? Ngümayal kelluafeyew llemay. Tüfa ñi feypiel Vanessa: “Ngümangümakefun. Femngechi doy küme duamkülefun”. Ka ngüneduamnge Sofia ñi rupan. Kidu tañi lamngen larumey, feymu feypi: “Müna kutrankawün anay. Layeluwün trürümfalngeafuy kiñe che allfülelu. Entuñmangele tañi trarkülechi allfeñ, doy küme duamtuafuy ti che, kutrantufule rume. Welu femngechi müten tremoleay tañi allfeñ. Ka femngechi rupakeiñ lale kiñe che taiñ piwkeyeniefiel”.

 ENTUNGE TAMI CHUM DUAMKÜLEN

Kiñeke mu duamafuymi tami kiduleal. Welu tami doy küme duamküleal ka duamnieymi tami kellungeal. Rakiduamnge ñi feypiel kiñe weche wentru Jared pingelu. Lalu tañi chaw, ¿chumi am? Kidu feypi: “Nütramkalelfiñ ta kakelu che tañi chum duamkülen, duamfalngenolu trokifili rume. Welu entulu tañi nütram doy küme duamün”. Dew ngüneduampeiñ Janice ñi rupan, kidu ka feypi: “Nütramkalelfiel ta kakelu che tañi chum duamkülen pañushpiwkelenew. Iñche kimüñmangelu tañi chumlen, fey kidulelu trokiw-welan”.

ELUWNGE TAMI KELLUNGEAL

Kiñe doctor feypi: “Pu che layeluwlu ka eluwlu tañi kellungeal, ñochikechi yafüluwkey ka weñangkülewelay”. Feymu, eluwnge tami kelluaetew tami pu che ka tami pu weni. Tüfa engün küpa kellueymu, feymu kelluen piafimi. Femngechi müten kimay engün chem tami duamnieel (Proverbios 17:17).

FÜLKONAYMI TAMI WENU CHAW MU

Tüfa feypi kiñe domo Tina pingelu: “Tañi wentru kontueyew cancer, fey larumey. Niewetunolu kay tañi wentru, pepi nütramkalafiñ tañi chum duamkülen. Feymu eluwün tañi kom nütramkalelafiel ta Chaw Dios. Puliwentu ‘kelluen fachantü’ pikefiñ fill antü. Kidu müna kelluenew, femngechi rakiduamlafun rume”. Kiñe domo, Tarsha pingelu, 22 tripantu niefuy lalu tañi ñuke. Kidu feypi: “Papeltufiel mu Biblia küme rakiduameltuenew ka doy küme duamelenew fill antü”.

¡MANELUWNGE ÑI WIÑOMONGETUAL TAMI LA!

Tina ka feypi: “Lalu tañi wentru newe kellulaenew maneluwal tañi wiñomongetual kidu, iñche ka tañi küla wentru püñeñ müna duamniefilu kay. Welu fewla, dew rupalu 4 tripantu, ¡kom piwke mu maneluwken ñi wiñomongetual tañi wentru! Müna kelluenew tüfa. Peyeniekefiñ reke feychi antü, ¡petuafiñ may tañi wentru! Tüfa tüngduamelkeenew ka ayüwülmapiwkekeenew”.

Pürüm müten küme duamkülelayafuymi chi. Welu ngüneduamnge ñi feypin Vanessa: “Fente weñangküleafuymi, welu ñochikechi doy küme duamküleaymi tati”.

Amulele rume tami weñangkütufiel tami la, Chaw Dios kelluaeymu tami “ngünam mongelen” pinoal. Kidu kutranpiwkeyenieeymu, fey eluaeymu kümeke weni tami nieal ka ayüwkülen mongeleal. Ka, pichiñma mu, taiñ Wenu Chaw wiñomongeltuafi tami pu layelu. Feychi mu pankoafimi, “fütra kuyfi” piafimi. Chaw Dios müna ayüniey ñi akual feychi antü. Feychi mu, ¡weñangküwelayaymi tati!