Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

Rumel mongeleafuymi Mapu mew

Rumel mongeleafuymi Mapu mew

¡MÜNA KÜME DUNGU TATI! Taiñ Fütra Chaw feypikünuy taiñ eluaetew rumel mongen faw Mapu mu. Welu fentren che müte feyentukelay tüfa, doy may “femngechi feley müten, mongeleiñ ka lakeiñ”, pikeyngün. Kakelu che feyentukelay taiñ rumel mongeleal Mapu mu, doy may “laliyiñ rumel mongen nieaiñ wenu mew”, pikeyngün. Eymi kay, ¿chem piafuymi?

Ngüneduamnge chem ñi kimeltukeel Biblia tüfachi ramtun: Pu che, ¿elkünungepey may tañi afnoachi mongen nieal? ¿Chem pengelkey tañi chumngechi dewmangeel? Chaw Dios dewmafilu pu che ka ti Mapu, ¿chumngechi ayüniefuy ñi chumleal? ¿Chumngelu (chemu) lakey kom pu che?

¿CHUMNGELU DOYKÜLEY PU CHE?

Chaw Ngünechen dewmay itrofill mongen mülelu Mapu mu, welu ¿chumngelu am doyküley pu che? Biblia feypi Ngünechen dewmafi pu che kidu ñi adentun mu (Génesis 1:26, 27). Feymu pu che elungey ñi inayentuafiel ñi chumngen ta Chaw Ngünechen, fey kidu reke piwkeyecheafuy ka üdeafuyngün norngenochi dungu.

Kom pu che elungey tañi rakiduamal ka kimal chem ñi kümen ka chem ñi kümenon. Kafey kom che kimürpuafuy ka weniyerpuafuy ta Chaw Ngünechen. Feymu adkintufiel mu iñchiñ kom ñi dewman ta Chaw Ngünechen kallfü wenu ka nag Mapu mu afmatulewekeiñ, ka müna ayüwülkeeiñmu ngürekayal, ülkantual, dungulafiel trutruka, trompe, pifüllka ka itrofillem. Feymu pu che trürngelay ta kakelu mongen mülelu Mapu mu, pu che müten elungelu kay ñi poyeafiel ta Chaw Dios.

Rakiduamnge chumngechi Chaw Dios ñi dewmafiel pu che, kidu elufi ñi adümuwal fillke dungu, ñi amulerpual tañi kimün ka ñi doy küme chengerpual kake antü mu, fey ¿femkünupey may pu che ñi mongeleal 70 kam 80 tripantu müten? ¡Femlay tati! Chaw Dios femngechi dewmakünufi pu che ñi ayüwküleal ka rumel mongeleal Mapu mew.

¿CHEM AYÜNIEFUY CHAW DIOS?

Kiñeke che feypikey Chaw Dios ayükelafuy taiñ rumel mongeleal Mapu mu. Feypikey ti Mapu dewmangey pichiñma mu ñi müleal pu che, femngechi ñi dullingeal (ngümintungeal) iney ñi mülepual wenu mapu mu ka rumel mongeleal Ngünechen engu. Welu femngechi rakiduamkelu engün, ¿feypintukukelay am Chaw Ngünechen ñi duam mu müley wedake dungu Mapu mu? Feley, welu femngechi femngelay taiñ Wenu Chaw. Doy may Biblia feypi ñi chumngen ta Chaw Ngünechen:  “Nor dungu mu amukelu am kom tañi rüpü. Ngünechen ta manelfalngey, norngenochi dungu femkelay; nor piwkengey ka wedañmawkelay” (Deuteronomio 32:4).

Biblia küme kimfalkünukey chumngechi ayüniey Chaw Dios ñi chumleal ta Mapu. Tüfa feypi: “Tati wenu mapu, ngen-ngey Jewba, welu tati Mapu elufi ta wentru ñi pu yall” (Salmo 115:16). Felerkey may, Chaw Dios müna küme dewmafi ti Mapu tañi rumel müleal kom pu che ka elkünuy kom ñi duamnieel engün tañi ayüwküleal ka rumel mongeleal (Génesis 2:8, 9).

Biblia ka küme pengelkey chumngechi ayüniey Chaw Dios ñi chumleal pu che. Kidu feypifi tati wünen kurewen mülelu Mapu mu: “Nieaymu rume fentren püñeñ. Apolfimün ta mapu ka kisu ngünetunieafimün ka ngenngeaymün [...] itrokom ti pu kulliñ winolkiyawkelu mapu mew” (Génesis 1:28). ¡Müna küme küdaw elungerkeyngu tati! Elfalkünungey ñi ngüneytuafiel ti küme mülewe chew ñi mülekefel ka puwülafiel kom Mapu mu. Rüfkünu may, Adan engu Eva ka ñi pu küpanche rumel mongelerkeafulu engün Mapu mu, dewmangerkelay ñi mülepual wenu mu.

¿CHUMNGELU AM LAKEIÑ?

Biblia feypi kiñe küme püllüfel ñi dewmael ta Chaw Ngünechen, feyta eluwi ñi kayñetuafiel Chaw Dios ñi ayükeel ellaka mu, fey Weküfü pingetuy. ¿Chumi am?

Weküfü ngüchaltukufi Adan engu Eva ñi kayñetuafiel ta Chaw Ngünechen. Tati Weküfü feypikafi reke: ‘Eymu dulliafuymu chem ñi kümen ka ñi kümenon, Chaw Dios rükükeeymumew reke tüfachi küme dungu’, fey Adan ka Eva kiñewi tati Weküfü engu tañi kayñetuafiel ta Chaw Ngünechen. ¿Chum tripay ñi femün engu? Rupalu chi antü layngu chumngechi ñi feypietew ta Ngünechen. Feymu elungewelay ñi afnoachi mongen nieal kiñe küme mülewe Mapu mu (Génesis 2:17; 3:1-6; 5:5).

Adan ka Eva ñi kayñetufiel ta Ngünechen wedalkakeeiñmu fantepu mu. Biblia feypi: ‘Kiñe wentru [Adan] mew müten müley ta kulpan mapu mew ka femngechi müley ta lan dungu. Fey tati lan dungu müley itrokom che mew, itrokom che kulpafengelu am’ (Romanu 5:12). Pu che feypikey: “Chaw Ngünechen eli taiñ layal, ¡kimfalngelay ñi femün!”, welu rüfngelay ñi feypikeel engün, lakeiñ Adan ka Eva ñi kulpan mu engu.

RUMEL MONGELEAFUYMI MAPU MEW

Pu che ka ti Mapu rüf feletuay chumngechi ayüniey ta Chaw Ngünechen ñi chumleal, kayñetungelu rume Eden lof mew. Chaw Dios tañi piwkeyechen ka ñi nor piwkengen mu adkünuy chumngechi taiñ montulaetew kulpan ka lan dungu mu. Apostol Pablo feypi: ‘Tati kulpan ñi wülkeel re lan dungu müten, welu Ngünechen wülkey tati rumel mongen, Cristo Jesus mew, iñchiñ taiñ Ñidol’ (Romanu 6:23). Fente taiñ piwkeyenieetew ta Chaw Ngünechen “wüli ñi kiñen Fotüm [Jesus] femngechi kom tati feyentulu kisu mew chumkawnorume ñi lanoael, welu may ñi nieael ta rumel mongen” (Juan 3:16). Jesus ayüwün mu lapalu am Mapu mu, wiñoleltufi pu che kom tañi ñamümel Adan. *

Chumül müten femtripayay Chaw Ngünechen tañi feypikünuel, fey kiñe küme mülewe ngetuay ta Mapu. Eymi ka müleafuymi feyti mu, welu kümeafuy kom tami piwke mu inanieal Jesus ñi feypin: “Konpuaymün tati pichi rupachi wülngiñ mew. Alü rupay ka rume feyünngey tati wülngiñ ka tati rüpü yeniefilu ta che welulkawün mew, fey rume fentren che amuley feychi rüpü mew. Welu tati wülngiñ ka ti rüpü yeniefilu ta che rumel mongen mew, pichi rupay ka müna küdawngey ñi inangeael, fey rume pichin che konpukey tüfachi wülngiñ mew” (Matew 7:13, 14). Eymi dulliafuymi ñi chumlerpual tami mongen, fey ¿chumaymi kay?

^ parr. 17 Tami doy kimal chumngechi tami kümelkakeetew Jesus tañi lan, ngüneduamnge 5 chillkatun ti lifru Tati Biblia ñi rüf kimeltukeel ñi entuel pu Dungukelu Iney Ngen Jewba, ka müley internet mu www.jw.org.