Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 TI BIBLIA KÜME ELKÜNUTUEYEW ÑI MONGEN

¡Ayülafun ñi layal!

¡Ayülafun ñi layal!
  • TRIPANTU ÑI CHOYÜNGEEL: 1964

  • CHEW ÑI TUWÜN: INGLATERRA

  • ÑI RUPAN: NIEPÜÑEÑI ÜLLCHANGELU, KA WEDWEDKAWI

TAÑI KUYFI MONGEN

Tremün kiñe lof mu chew ñi mülen rume fentren che, Paddington pingelu, Londres waria Inglaterra mapu mu. Mülefun tañi ñuke engu ka küla wünen lamngen. Tañi chaw putufengefuy, feymu alün antü ñamkiyawkefuy.

Pichi malen-ngelu iñche, tañi ñuke kimeltuenew ñi ngillatual fill pun. Niefun kiñe pichi Biblia nielu Salmos pingechi lifru müten, ka ülkantukefun feychi salmo. Kiñe rupa papeltufiñ kiñe lifru mew kiñe dungu tañi rume rakiduamniefiel, feypi: “Ka kiñe antü ngelayay tañi mongeleal”. Tüfa rakiduamelenew küpalechi antü mu, feymu feychi pun nagpalay tañi umaw. Rakiduamkülefun: “¿Kom tüfa müten ti mongen? ¿Chumngelu mülepan Mapu mew?”. ¡Ayülafun ñi layal!

Ayürpufiñ ñi fülkonal pu wedake püllü mu. Küpa dungufiñ pu layelu, tañi pu kompañ kolegio mu amukefuiñ eltun mew, ka pekefuiñ llükafalngechi pelikula. Ayüfalngelu trokikefuiñ ti llükafalngelu.

Nielu 10 tripantu müten wedwedkawün. Eluwün ñi pütremtual ka pürüm wimtun ñi femmekeal. Rupalu chi antü pütremturpun marihuana. 11 tripantu nielu müten eluwün ñi putual. Kümentukelafun, welu küme duamkefun ngolliñ mu. Ka müna ayükefun ti musika ka tañi purual. Chew ñi fiestaken pu che pepi amufuli, amuafun müten. Pun mew ellka tripakefun tañi ruka mu, fey epe wün ellka akutukefun. Rume ürkülewekefun ka antü mu, fey deportekefun kolegio mew. Ka ürkütun mu ti chillkatun kolegio mew, putukefun.

Ti inan tripantu kolegio mew, rume wedake nota nentun. Tañi ñuke lladküy ka illkuy, newe kimnofulu rume fente ñi wedwedkawün iñche. Fütra yafkawiyu, fey lefmawün ñi ruka mew. Pichiñma mu mülefun tañi ayün iñchiw, Toni pingelu, kidu inaniefuy ti rastafari religion. Femkefuy kiñeke dungu ñi eluñmakenon ti ley, negosiakefuy droga, ka kimngekefuy ñi kewafengen. Pichi rupalu niepüñeñün, ka 16 tripantu müten nielu choyüfiñ ñi püñeñ.

 TI BIBLIA KÜME ELKÜNUTUENEW ÑI MONGEN

Tati pu awtoridad eluenew kiñe katrüntuku chew ñi umañpuken pu domo nielu püñen ñi fütangenon mu, üye mu kimfiñ pu Dungukelu Iney Ngen Jewba. Fey epu domo Dungukelu Iney Ngen Jewba pemekefuyngu kiñeke üllcha nielu püñeñ. Kiñe antü konün ñi nütram mu. Iñche küpa pengelfiñ Jewba ñi pu che ñi welulkaken. Welu Biblia mu wiñoldunguenew kom tañi ramtun, küme duam mu ka kimfalngen mew. Rume ayüfiñ ñi piwkeyechefengen ka ñi duamtuchefengen engün. Feymu eluwün ñi kimeltuaetew ti Biblia.

Pichi üllchangelu müten llükakefun ñi layal. Welu fewla Biblia mew kimürpun Jesus ñi kimeltuel ñi wiñomongetual pu layelu, ¡tüfa küme elkünutuenew tañi mongen! (Juan 5:28, 29.) Ka kimürpun ñi rume piwkeyeetew Chaw Ngünechen (1 Pedro 5:7). Nengümuwi ñi piwke papeltufiel mu Jeremías 29:11, tüfa feypi: “Iñche am küme kimnien tañi rakiduamkülen eymün mu pi Jewba, nien tüngkülechi rakiduam, ka weda rakiduam nielan, tañi eluafiel ta eymün küme felen ka kiñe maneluwün”. Fey maneluwürpun tañi nieal afnoachi mongen ti Mapu mew kiñe küme mülewe ngetule (Salmo 37:29).

Pu Dungukelu Iney Ngen Jewba pengelkeyngün tañi piwkeyeetew. We amulu ñi trawün mu, küme duamün ka welukentu piwkeyewkeyngün. ¡Kom weniyefalngeyngün! (Juan 13:34, 35.) Femngechi femngelan tañi waria ñi iglesia mu. Pu Dungukelu Iney Ngen Jewba che trokienew, chem mongen rume ñi nieel iñche. Kompañenew, ngüneytuenew ka inaduamenew engün, ka rume kelluenew. Mülen kiñe fütra reñma mu, rume piwkeyewkelu trokiwün.

Chillkatufiel mu ti Biblia, ngüneduamün ñi küme elkünutual ñi mongen tañi inayal Chaw Ngünechen ñi ngülam tañi lif mongen nieal. Küdawngefuy ñi pütremtuwenoal. Kafey allkütulu kiñeke musika, doy illutufiñ ñi pütremtual marihuana, feymu allkütuwelafiñ. Küpa ngollikalan, fey amuwelan chew ñi fiestaken pu che, femngechi illutunoal ñi rume putual. Kafey weniyefiñ kümeke che ñi kelluaetew tañi we mongen mu (Proverbios 13:20).

Petu rupalu tüfa, pu Dungukelu Iney Ngen Jewba ka kimeltueyew ti Biblia ta Toni. Biblia mu wiñoldungueyew engün kom tañi ramtun, feymu kimürpuy ñi rüfngen tüfa. Küme elkünutuy tañi mongen: kiñe pülekünufi tañi wedake weni kewafengelu, femwelay wedake dungu ñi eluñmakenon ti ley, ka pütremtuwelay marihuana. Kafey duamfalngefuy elkünual tayu weda mongen ka küme tremümafiel tayu pichiche, femngechi ayüwülafiel ta Jewba. Feymu niewiyu 1982 tripantu mu.

“Fewla küme umawtun, rakiduamelkelaenew ti küpalechi antü kam ti lan dungu”

Iñche küpa küme elkünutun ñi mongen, feymu tati chillka Ti Werken ka ¡Despertad! * mu kintufiñ fillke nütram pengelkelu che ñi rupan iñche reke. ¡Tüfa rume yafültukuenew tañi newentuleal ka afeluwnoal! Ngillatukefiñ ta Jewba tañi famentunoaetew. Toni iñchiw fawtisawiyu julio küyen 1982 tripantu mu tayu Dungukelu Iney Ngen Jewba ngeal.

CHEM KÜMELKAN LLOWÜN

Weniyefiel ta Chaw Ngünechen Jewba, tüfa montulenew ñi mongen. Wedake dungu rupalu, Toni iñchiw ngüneduamfiyu chumngechi tayu kelluetew Jewba. Kimürpuyu tayu maneluwal Jewba mew rupalu wedake dungu mu, ka ngüneduamfiyu ñi rume kellukefiel ka yafültukufiel tayu pu che (Salmo 55:22).

Müna ayüwülenew kellufiel tañi epu püñen ñi kimürpuafiel ta Jewba, iñche reke. Ka femngechi fewla müna ayüwülenew pefiel tañi pichike chuchu ka kuku ñi tremkülen Chaw Ngünechen ñi rüpü mew.

Fewla küme umawtun, rakiduamelkelaenew ti küpalechi antü kam ti lan dungu. Toni iñchiw fill semana mu witrañmakefiyiñ tati pu Dungukelu Iney Ngen Jewba ñi trawünche ñi yafültukuafiel engün. Trür kimeltulelkefiyiñ kakelu che ñi feyentual Jesus mu, femngechi ñi afnoachi mongen nierpual engün.

^ parr. 19 Ñi entuel pu Dungukelu Iney Ngen Jewba.