Amual ti dungu

Amual tati trokiñ dungu mu

Chaw Jewba ñi elkünuel taiñ montulaetew: kiñe küme yewün reke feley

Chaw Jewba ñi elkünuel taiñ montulaetew: kiñe küme yewün reke feley

“Kom tati kümelu ka norngechi dungu küpakey ta Ngünechen mew” (SANTIAW 1:17).

ÜLKANTUN: 148 KA 99

1. Jewba ñi elkünuel taiñ montulaetew, ¿chem kümeke dungu nierpuafuiñ?

CHAW NGÜNECHEN elkünuy taiñ montulaetew Jesus ñi lan mu, feymu nieafuiñ fentren kümeke dungu: küpalechi antü mu Chaw Dios yallyeafi Adan tañi pu yall piwkeyekefilu ti nor dungu. Kafey afnoachi mongen nieafuiñ ayüwün mu. Welu chumngechi taiñ montulaetew Jewba, nüwküley kakelu dungu mu rume falin-ngelu kom tati mongelelu mew wenu mapu ka nag Mapu mew (Ebrew 1:8, 9).

2. 1) ¿Chem falinke dungu wenu mapu ka nag Mapu mu feypi Jesus tañi ngillatun mu? (Inaduamnge ti adentun tüfachi pagina mu.) 2) ¿Chem inaduamaiñ tüfachi chillkatun mu?

2 Epe epu tripantu puwlu tañi layal, Jesus kimeltufi tañi pu inanieetew chumngechi ñi ngillatual, feypi: “Taiñ Chaw Ngünechen wenu mapu mülelu, yamniengepe tami üy. Küpape tami Ngünenien. Femngepe tami feypin Mapu mu, chumngechi ñi femngeken wenu mapu mu” (Matew 6:9, 10, Traducción del Nuevo Mundo [TNM]). Fewla inaduamaiñ Jewba ñi elkünuelchi montulchen chumngechi nüwküley ñi yamniengeal tañi üy, Ngünechen ñi Ngünenien ka ñi femngeal kidu ñi feypin.

 “YAMNIENGEPE TAMI ÜY”

3. 1) Jewba ñi üy, ¿chem pengelkey? 2) Weküfü, ¿chumngechi weda dunguyefi Jewba ñi üy?

3 Wünen, Jesus ngillatuy ñi yamniengeal ka liftuñmangeal Jewba ñi üy. Jewba ñi üy pengelkey chumngey tañi femngen. Kidu ti doy pepiluwün-ngelu ka norngelu. Biblia ta feypiley: “Lif mongenngey, Lif mongenngey, Lif mongenngey ta Ñidol, Ngünechen kom pepiluwün nielu” (Apokalipsi 4:8). Jewba lifngey ka yamfalngey, ka femngechi kom ñi femkeel ka tañi ley. Welu Eden mu, Weküfü ngünenkan mu feypikay reke: ‘Jewba ngen-ngelay ñi feypiafiel pu che chem chumal’. Koylatuy Jewba mew ka weda dunguyefi ñi üy (Génesis 3:1-5).

4. Jesus, ¿chumngechi kelluy ñi yamniengeal Jewba ñi üy?

4 Jesus, rüf piwkeyefi Jewba tañi üy, feymu kellukefuy ñi yamniengeal (Juan 17:25, 26). ¿Chumngechi? Tañi femken ka kimeltukeel mew, kellufi tati pu che ñi inaduamal fente ñi norngen Jewba tañi ngülam ka taiñ kümelkakeetew ñi feypiel taiñ chumal (Salmo 40:8-10). Weküfü kutrankafi ta Jesus ka adkünuy ñi langümngeal awükangen mu, welu Jesus püntütripalay Jewba mu. Femngechi pengeli kiñe kulpafengenochi wentru ñi pepi inaniefiel Jewba ñi feypiel.

5. ¿Chumngechi kelluafuiñ ñi yamniengeal Jewba tañi üy?

5 ¿Chumngechi pengelafuiñ taiñ piwkeyeniefiel Jewba ñi üy? Taiñ femken mew. Jewba feypikeeiñmew taiñ lif chengeal (papeltunge 1 Pedro 1:15, 16). Feymu müley taiñ piwkeyeafiel kidu müten ka kom piwke mu inanieal ñi feypin. Kayñetungeliyiñ rume, inanieafiyiñ Jewba ñi kimeltun. Femliyiñ tüfa, kelluaiñ ñi püramyengeal tañi üy (Matew 5:14-16). Femngechi pengelaiñ ñi norngen Jewba tañi ley ka tati Weküfü ñi koylatufengen. Taiñ kulpafengen mu welulkawafuiñ, welu femliyiñ rume, wiñorakiduamtuaiñ ka eluwaiñ ñi femwenoal, ñi weda dunguyengenoal ta Jewba (Salmo 79:9).

6. Kulpafengeliyiñ rume, ¿chumngelu Jewba kulpafengenolu reke trokiafeiñmew?

6 Maneluwliyiñ rume ñi mongeleal wenu mapu kam nag Mapu mu, Jewba wiñoduamatuaeiñmew taiñ kulpan mu, mupiltuliyiñ kidu ñi elkünuel taiñ montulaetew. Jewba llowüñmakefi ñi poyefiel tati pu wül-lu ñi mongen kidu mew. Kulpafengenolu reke trokikefi tati pu dullingelu ñi yallyeafiel ka tati kakelu ufisa ñi weniyeafiel (Juan 10:16; Romanu 5:1, 2; Santiaw 2:21-25). Feymu famülke mu, ti montulchen mu ka weniyeafuiñ ta Jewba ka kelluafuiñ ñi yamniengeal tañi üy.

“KÜPAPE TAMI NGÜNENIEN”

7. Jewba ñi elkünuel taiñ montulaetew, ¿chem kümeke dungu küpalyeay?

7 Jesus kimeltulu chumngechi ngillatual, feypi: “Küpape tami Ngünenien”. Jewba ñi elkünuel taiñ montulaetew, ¿chumngechi nüwküley Ngünechen ñi Ngünenien mu? Chaw Ngünechen ñi Ngünenien mu koneltuley ta Jesus ka 144.000 dullingechi che. Jesus ñi lan mew, tüfachi pu che wiñomongetuay ñi amual wenu mapu mew (Apokalipsi 5:9, 10; 14:1). Tüfa engün longko ülmenküleayngün ka saserdotengeayngün, fey ngünenieafingün ti Mapu Jesus engün warangka tripantu mu. Chaw Ngünechen ñi Ngünenien mew, ti Mapu kiñe küme  mülewe elkünungetuay ka kellungeaiñ ñi niewenoal kulpan. Femngechi Jewba ñi pu che wenu mapu ka nag Mapu mu kiñe reñmayewayngün (Apokalipsi 5:13; 20:6). Jesus apümkayafi tati Weküfü ka kom ti wedake dungu ñi elkünuel (Génesis 3:15).

8. 1) Jesus, ¿chumngechi kellufi tañi pu inanieetew ñi kimal tunte falin-ngen Chaw Ngünechen ñi Ngünenien? 2) ¿Chumngechi pengelkeiñ taiñ nor piwkeyeniefiel Jewba ñi Ngünenien?

8 Jesus kellufi tañi pu inanieetew ñi kimal fente falin-ngen Chaw Ngünechen ñi Ngünenien. ¿Chumngechi? We fawtisawlu müten eluwi ñi kimeltual chew rume ñi amuken “ñi fülkülepan Ngünechen ñi longko ülmenngeael” (Matew 4:23). Ka feypifi tañi pu inanieetew ñi kimeltual kidu ñi dungu “tuntepu ñi mülen ta mapu” (Hecho 1:6-8). Famülke mew ñi amuldungungen mu Chaw Ngünechen ñi Ngünenien, tati pu che kimafuy Jewba ñi elkünuel taiñ montulaetew ka maneluwafuyngün ñi kümelkayaetew ti Ngünenien. Kellufiliyiñ pu dullingelu ñi amuldungual wall Mapu püle, pengelaiñ taiñ nor piwkeyeniefiel Jewba ñi Ngünenien (Matew 24:14; 25:40).

“FEMNGEPE TAMI FEYPIN”

9. ¿Chumngelu maneluwafuiñ Jewba ñi femal tañi ayükeel kom pu che mu?

9 Jesus feypilu: “Femngepe tami feypin”, ¿chem küpa kimeltuy? Jewba feypilu kiñe dungu ñi rupayal, rupakey llemay (Isaías 55:11). Jewba ayüniefuy Adan ka Eva tañi pu yall kulpafengenolu ñi apolafiel ta Mapu, welu Weküfü kayñetufilu ta Jewba, pepi katrütulafi ñi femürpual tüfa (Génesis 1:28). Adan ka Eva nienofule yall petu ñi lanon, fey femtripalayafuy Jewba ñi ayünieel. Feymu Jewba eluñmafi ñi nieal pichikeche. Welu Jewba elkünuy taiñ montulngeal, feymu kom tati pu che mupiltule, niewelayafuy kulpan ka afnoachi mongen nieafuy. Kidu piwkeyeniefi tati pu che ka ayüy taiñ nieal ti afmatufalchi mongen ñi feypiel ellaka mu.

10. Jewba ñi elkünuel taiñ montulaetew, ¿chumngechi kümelkayafi tati pu layelu?

10 Welu, ¿kom feychi pu che kay lalu ñi kimnofiel ta Jewba? Jewba wülfi tañi Fotüm ñi montulcheal, feymu pu layelu wiñomongetuayngün. Femngechi kimafingün ta Jewba ka afnoachi mongen nieafuyngün (Hecho 24:15). Chaw Ngünechen ayüley kom pu che ñi mongeleal, kidu mu am küpalu ti mongen. Feymu wiñomongeltufile pu layelu, tüfa engün chawyeaeyew (Hecho 17:24, 25). Jesus kimeltufilu chumngechi ñi ngillatual, feypi Jewba mu, “taiñ Chaw Ngünechen wenu mapu mülelu” (Matew 6:9). Jewba elfalkünufi ta Jesus ñi wiñomongeltuafiel pu layelu. Feymu Jesus feypi: “Iñche mew müley ta wiñomongetun ka tati mongen” (Juan 6:40, 44; 11:25).

11. Chaw Ngünechen, ¿chem ayüniey ñi rupayal “fentren pu che”?

11 Kafey Jesus feypi: “Iney rume ta küdawyefile Ngünechen tañi ayükeelchi dungu, fey iñche tañi peñi, ñi lamngen ka tañi ñuke” (Marku 3:35). Jewba ayükey ñi poyeaetew pu che fillke tuwün ka kewün nielu, ka fillke lof mu küpalu. Tüfachi “fentren pu che [...] iney no rume ta pepi rakilaeyew”. Tüfa engün allkütukefingün ta Jewba ka maneluwkeyngün ñi elkünuel tañi montulcheal.  Püramyekefingün ta Chaw Ngünechen feypilen mu: “¡Iñchiñ taiñ Ngünechen [...], ka femngechi tati Korderu montuleiñmew!” (Apokalipsi 7:9, 10).

12. Jesus tañi ngillatun, ¿chem kimeltuy Jewba tañi ayünieel kom pu che mu?

12 Ngüneduamfiel ti ngillatun ñi elkünuel Jesus, fentren dungu kimürpuiñ Jewba mew ka ñi ayünieel pu che mu. Kiñe, müley taiñ yafüluwküleal ñi püramyeafiel Jewba ñi üy ka kellual ñi yamniengeal (Isaías 8:13). Jesus ñi lan mu, iñchiñ montulngeafuiñ, tüfa ka püramyekefi Chaw Ngünechen ñi üy. Feymu Jesus ñi üy, tüfa ñi feypin ürke: “Jewba mew müley ta montun”. Epu, Jewba tañi Ngünenien mu llowaiñ tati kümeke dungu ñi wülkeel Jesus ñi lan. Ka küla, maneluwkeiñ Jewba mu chem no rume ñi katrütukenoetew chem tañi ayünieel (Salmo 135:6; Isaías 46:9, 10).

PENGELAFIYIÑ TA JEWBA TAIÑ MAÑUMKÜLEN

13. ¿Chumngelu fawtisawiyiñ?

13 Jewba elkünuy taiñ montulaetew, feymu rume mañumküleiñ. Ñi pengelal tüfa, falin-ngey wülal taiñ mongen Jewba mu ka fawtisawal. Femngechi kimfalngeay taiñ mupiltulen ti montulchen mu ka ‘Jewba ñi ngen-ngeel ta iñchiñ mew’ (Romanu 14:8, TNM). Taiñ fawtisawün mu, llellipufiyiñ ta Jewba taiñ eluaetew “we küme rakiduam” (1 Pedro 3:21). Feymu Jewba kümelkakeeiñmew ti montulchen mu, femngechi wiñoldungueiñmew. Ka iñchiñ küme kimnieiñ taiñ eluaetew kom ñi feypikünuel (Romanu 8:32).

¿Chumngechi pengelafuiñ taiñ mañumniefiel Jewba ñi elkünuel taiñ montulaetew? (Inaduamnge parrafo 13 ka 14).

14. Jewba, ¿chumngelu feypikeeiñmew taiñ piwkeyeafiel ta kakelu?

14 Piwkeyewün mu kom femkey Jewba. Kidu ayükey taiñ inayentuafiel ka welukentu piwkeyewal (1 Juan 4:8-11). Piwkeyefiliyiñ tati pu che, pengelaiñ taiñ küpa chawyeafiel ta Jewba (Matew 5:43-48). Tati epu doy falin werkün dungu fey ta tüfa: piwkeyeafiel ta Jewba ka tati pu che (Matew 22:37-40). Amuldungufiliyiñ tati pu che Chaw Ngünechen ñi Ngünenien mu, pengelaiñ taiñ piwkeyefiel pu che. Inafiliyiñ Jewba taiñ feypietew ñi piwkeyeafiel pu che, doyelchi may taiñ pu peñi ka lamngen, “rüfngeay” taiñ piwkeyefiel ta kidu (1 Juan 4:12, 20).

 JEWBA ÑI ELKÜNUEL TAIÑ MONTULAETEW WÜLKEY KÜMELKAN

15. 1) ¿Chem kümelkan elueiñmew Jewba famülke mu? 2) ¿Chem kümelkan llowaiñ küpalechi antü mu?

15 Mupiltuliyiñ Jewba ñi elkünuel taiñ montulaetew, Jewba wiñoduamatuaeiñmew ka liftuñmayafeiñmew taiñ kulpan (papeltunge Hecho 3:19-21). Chumngechi inaduampeiñ, Jesus ñi lan mu Jewba yallyeafi kiñeke che amualu wenu mapu mew. Tüfa tati pu dullingelu (Romanu 8:15-17). Ka mangelkefi tati pu “kakelu ufisa” tañi yall ngerpual ka koneltual tañi trokiñche Mapu mu. Dew niewenole ta kulpan, ka kiñe rupa kintukaduamngeayngün. Fey püntütripanole Jewba mu, kidu yallyeafi engün (Romanu 8:20, 21; Apokalipsi 20:7-9). Jewba rumel mu piwkeyenieafi tañi pu yall ka ñi elkünuel mu taiñ montulaetew rumel mu llowaiñ kümelkan (Ebrew 9:12). Tüfa kiñe falin yewün Jewba mu küpalu, iney no rume müntuñmalayafeiñmew.

16. Jewba ñi elkünuel taiñ montulaetew, ¿chumngechi lifrekünuaeiñmew?

16 Wiñorakiduamtuliyiñ taiñ kulpan mu, tati Weküfü katrütulayafeiñmew konal Jewba ñi trokiñche mu taiñ yallyeaetew küpalechi antü mu. Jesus lay “kiñe rupa müten, fey rumel ñi femwenoael”. Jewba elkünuy taiñ montulngeal rumel mu (Ebrew 9:24-26). Adan elueiñmew lan, welu Jesus ñi lan eluaeiñmew afnoachi mongen, ka lifrekünuaeiñmew Weküfü ñi ngünenieel mu ka llükawelayaiñ lan dungu mu (Ebrew 2:14, 15).

17. Tami ngüneduamfiel Jewba ñi piwkeyechen, ¿chum duamkeymi?

17 Chaw Dios ñi feypikünuel rumel femtriparpukey. Jewba ñi ley adkünufilu chumngechi ñi amuken kom tati müleyelu welulkakelay, ka femngechi taiñ Chaw Jewba welulkakelay. Kidu turpu weda duamel-layaeiñmew (Malaquías 3:6). Taiñ Chaw Jewba elueiñmew mongen kiñe yewün reke, welu ka elueiñmew tañi piwkeyen. “Kimfiyiñ ka feyentuiñ taiñ piwkeyenieetew ta Ngünechen: Ngünechen ta piwkeyechenngey” (1 Juan 4:16). Fülkülepay kiñe we Mapu adkülealu. Fey kom pu mongelelu inayentuafingün ta Jewba ka welukentu piwkeyewayngün. Fey kom pu poyekefilu ta Jewba wenu mapu ka nag Mapu mew feypiayngün: “Tati püramyen, tati fütra pepiluwün, tati kimün, tati mañumtun, ka ti yamniengen, tati newen ka ti awtoridad chalintukunielngepe taiñ Ngünechen fewla ka rumel rupaleachi tripantu mew. ¡Felepe May!” (Apokalipsi 7:12).