Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 TROKIÑ ÑI CHILLKATUNGEAL 41

Püntütripalayaiñ Jewba mu ti fütra kutrankawün mew

Püntütripalayaiñ Jewba mu ti fütra kutrankawün mew

“¡Piwkeyefimün ta Jewba!, kom eymün pu püntütripakenolu kidu mu. Jewba kuñiwtukukefi pu nor piwkengelu” (SAL. 31:⁠23).

129 ÜLKANTUN ¡Afkilpe taiñ newentuleal!

¿CHEM KIMAIÑ? *

1, 2. 1) ¿Chem fülkülepay ñi feypial Mapu mew müleyechi pu longkolelu? 2) ¿Chem ramtun ngüneduamaiñ?

RAKIDUAMNGE chem ñi rupayal küpalechi antü mu. Mapu mew müleyechi pu longkolelu feypiay: “Kom kümelkaley. Ngelay chem dungu rume”. Kidu engün mallmawün mu feypiayngün chi ñi tüngkülen kom che Mapu mu, “chumkawnorume femngechi küme felekelafuy ta che” piayngün. Ka küpa rakiduamelaeiñmu ñi pepikawkülen apümafiel kom wedake dungu. Welu ngünenierpulayayngün chem ñi kontuaetew engün. ¿Chumngelu (chemu)? Biblia feypi: “Küparumeay kidu engün mew tati apümkangen” (1 Tes. 5:⁠3).

2 Feymu müley taiñ ngüneduamal kiñeke ramtun: ¿Chem rupayay ti “fütra kutrankawün” mu? Akule feychi antü, ¿chem ayüniey Jewba taiñ femal? Taiñ püntütripanoal Jewba mu ti fütra kutrankawün mew, ¿chem müley taiñ femal famülke mu? (Mat. 24:⁠21).

¿CHEM RUPAYAY TI “FÜTRA KUTRANKAWÜN” MU?

3. Apokalipsi 17:⁠5, 15-18 ñi feypin, ¿chumngechi apümkayafi Ngünechen “tati Babilonia fütra waria”?

3 (Papeltunge Apokalipsi 17:⁠5, 15-18). Chumngechi ngüneduamiyiñ, pu longkolelu Mapu mu puwlayayngün feychi dungu ñi rupayal feychi antü mu. ¿Chumngelu? ‘Ngünechen am eluaetew ñi piwke mew ñi femael engün kidu tañi ayüelchi dungu’. ¿Chem ayüelchi dungu? Chaw Ngünechen ayüniey ñi apümafiel pu cristianofaluwkelu * ka kom pu koylake religion. Feymu rakiduamelafi ti “mari müta” ñi nieel  ti “kelü fütra kulliñ” ñi apümafiel kom pu koylake religion. Femngechi apümkangeay “tati Babilonia fütra waria”. Feychi “kelü fütra kulliñ” adentuley tati trokiñche Naciones Unidas pingelu, fey tati “mari müta” adentuley fillke gobierno kellukefilu feychi trokiñche (Apok. 17:⁠3, 11-13; 18:⁠8). Tüfachi gobierno lefkontufile tati koylake religion, pengelay ñi akun tati fütra kutrankawün. Tüfachi dungu felen akuay kom wall Mapu püle ka rume llükafalngeay.

4. 1) ¿Chem dungu feypiayngün tati pu gobierno ñi apümkayafiel tati koylake religion? 2) Pu koneltulelu ti koylake religion mu, ¿chumayngün chi?

4 Kimlaiñ ñi chem feypial pu gobierno küpa apümkafile tati koylake religion. Feypiafuyngün chi tati religion ñi duam küme yewkelay tati pu che ka tañi reyükonkülen politico dungu mu. Kafey feypiayngün chi tati koylake religion ñi ülmenkawün ka ñi trapümel fentren falinke fillem (Apok. 18:⁠3, 7). Welu pu gobierno apümkalayafi peno kom pu koneltulelu ti pu koylake religion mu, doy may apümkayafingün pu religion. Rupale tüfa, pu koneltulelu ti koylake religion mu kimtukuayngün pu longkolechi religioso ñi femürpunon tañi ayükeel, fey feypiayngün chi: “Iñche chumkonlan rume tati religion mu”.

5. ¿Chem feypikünuy Jewba tati fütra kutrankawün mu? ¿Chumngelu?

5 Biblia feypilay ñi tunteñmayal ñi apümkangeal tati koylake religion, welu kimnieiñ ñi pichiñmayal (Apok. 18:⁠10, 21). Jewba feypikünuy ñi pichiñmayal tati fütra kutrankawün, fey ñi montual pu dullingelu ka ti rüf religion (Mar. 13:⁠19, 20). Fey akule ti fütra kutrankawün, ¿chem ayüniey Jewba taiñ femal petu akunole ta Armagedon?

FENTEKÜNULAYAIÑ TAIÑ POYEAFIEL TA JEWBA

6. ¿Chem eluwküleaiñ taiñ femal?

6 Chumngechi ngüneduamiyiñ rupachi chillkatun mu, Jewba ayüniey taiñ famtripaleal tati koylake religion mu. Welu ka dungu müley taiñ femal: eluwküleaiñ taiñ rumel poyeafiel ta Jewba. ¿Chumngechi femafuiñ tüfa? Ngüneduamaiñ epu dungu.

Turpu fentekünulayaiñ taiñ trawüluwal, küdawngefule rume. (Inaduamnge parrafo 7). *

7. 1) Inafiliyiñ Ngünechen ñi ngülam taiñ lif mongen yenieal, ¿chumaiñ? 2) Ebrew 10:⁠24, 25 tañi feypilen, ¿chumngelu falin-ngey taiñ trawüluwal, doyelchi may famülke mu?

 7 Wüne, müley taiñ küme inanieafiel Chaw Ngünechen tañi ngülam, fey taiñ lif mongen yenieal. Llowlayafiyiñ tati podngechi mongen ñi yenieel pu che poyekenofilu ta Jewba. Llowlayafiyiñ chem pekan kudumuwün dungu no rume. Feymu kümelu trokilayafiyiñ ñi kureyewün chaf wentru ka chaf domo engu, ka kakelu wimtun dungu ñi nieel engün (Mat. 19:⁠4, 5; Rom. 1:⁠26, 27). Epu dungu, fentekünulayaiñ taiñ kiñentrür poyeafiel ta Jewba taiñ pu peñi ka lamngen iñchiñ. Poyeafiyiñ ta Jewba Trawünwe Ruka mu, welu pepi femngenole, trawüluwaiñ pu peñi ka lamngen ñi ruka mu ka chew rume ñi pepi femngekeel, ellkankechi trawüluwaiñ kütu. Chem dungu rume rupale, fentekünulayaiñ taiñ trawüluwal, doyelchi may kimlu kay iñchiñ ñi “fülpan ta Ñidol ñi wiñometuael” (papeltunge Ebrew 10:⁠24, 25).

8. Akule ti fütra kutrankawün, ¿chem werkün dungu feypiaiñ?

8 Famülke mu, amuldungukeiñ Ngünechen tañi kümeke dungu ka kellukefiyiñ pu che ñi inayafiel ta Jesus. Welu akule ti fütra kutrankawün, rume newen-ngeay tati werkün dungu taiñ feypiafiel tati pu che. Biblia feypi feychi werkün dungu “fütrake trangko pire” (fütrake llay) reke feleay (Apok. 16:⁠21). Feychi antü mu, kimeltucheafuiñ chi ñi rume pichilewen tañi afal kom ñi ngünenieel tati Weküfü. Welu fewla ramtuwafuiñ chi: “¿Amuldungupeaiñ may chumngechi taiñ femken rupayechi pataka tripantu?”. Petu kimlaiñ, küpalechi antü küme kimaiñ chem werkün dungu taiñ feypial ka chumngechi taiñ amuldungual. Welu chumngechi femfule rume, elungepelayaiñ taiñ llükanon mu amuldungucheal Jewba ñi apümafiel kom ñi ngünenieel tati Weküfü. ¡Rume falin küdaw nieaiñ! (Ezeq. 2:⁠3-5).

9. 1) Pu gobierno allkütule taiñ chem pial, ¿chumayngün chi? 2) ¿Chem dungu rüf kimnieiñ?

9 Pu gobierno ayülayay peno taiñ chem pial ti fütra kutrankawün mu, feymu lefkontuaeiñmu chi taiñ chumkawnorume amuldunguwenoal. Welu maneluwaiñ Jewba taiñ kelluaetew taiñ amuldungual, chumngechi taiñ femken famülke mew. Rüf kimnieiñ may Jewba taiñ newentukuaetew, fey taiñ femal kidu tañi ayükeel (Miq. 3:⁠8).

PEPIKAWKÜLEAIÑ LEFKONTUNGELE JEWBA TAÑI PU CHE

10. Luka 21:⁠25-28 tañi feypilen, ¿chumay pu che pefile kom ñi rupayal ti fütra kutrankawün mew?

10 (Papeltunge Luka 21:⁠25-28). Ti fütra kutrankawün mu, Chaw Dios eluway ñi apümafiel ti politico dungu, ti negosian dungu ka kom kakelu dungu ñi ngünenieel tati Weküfü. Pu che afkentu maneluwkey tüfachi dungu mu, feymu pefile ñi apümkangen, rume llükaleayngün. Feychi antü mu, fentren wedake dungu müleay turpu ñi femngechi mülekenoel, feymu tati pu che pellkeleayngün tañi langümngeal (Sof. 1:⁠14, 15). Fey rume küdawngepetulayay kom pu che tañi mongen. Iñchiñ taiñ mongen ka femngechi küdawngetuay. Taiñ koneltulenon tüfachi Mapu tuwün pu che mew, rupayafuiñ wedake dungu mu. Kiñeke mu, nielayafuiñ kom taiñ duamnieelchi fillem.

11. 1) ¿Chumngelu puwkintunieaeiñmu reke pu che ka pu gobierno? 2) ¿Chumngelu ngelay taiñ llükayafiel ti fütra kutrankawün?

11 Feychi pu che pefilu ñi apümngen tañi religion, pofo illkuayngün ngüneduamle taiñ petu poyeniefiel ta Jewba. Feymu fill püle feypiyawayngün tañi illkulen, internet mu ka  kakelu dungu mew peno. Feychi antü mew taiñ religion müten mülekayay, feymu pu gobierno ka tati Weküfü illkutuaeiñmu. Kidu engün kimtukuayngün ñi pepi apümnofiel kom pu mülechi religion chumngechi tañi ayükefel. Feymu pu che ka pu gobierno puwkintunieaeiñmu reke. Feychi antü mu, pu gobierno Gog tuwlu Magog mapu mu femkünuwtuayngün. * Fey trawüluwayngün ñi lefkontuafiel Jewba tañi pu che kom tañi newen mew (Ezeq. 38:⁠2, 14-16). Iñchiñ küme kimlaiñ chumngechi tañi rupayal kom tüfachi dungu ti fütra kutrankawün mew, feymu rume rakiduamküleafuiñ. Welu küme kimnieiñ Jewba taiñ feypiaetew chumngechi taiñ montual, feymu ngelay taiñ llükayal (Sal. 34:⁠19). Doy may yafüluwküleaiñ ka newenküleaiñ, kimnielu kay iñchiñ taiñ montulngeal. *

12. “Ti kim manelfal kona”, ¿chumngechi pepikakeeiñmu küpalechi antü mu?

12 “Ti kim manelfal kona” pepikakeeiñmu taiñ püntütripanoal Jewba mu ti fütra kutrankawün mew (Mat. 24:⁠45, TNM). ¿Chumngechi? Fillke dungu mew kellukeeiñmu, welu rakiduamaiñ chem taiñ kimeltuetew ti fütrake trawün mu küla antü ngelu 2016, 2017 ka 2018 tripantu mu. Tüfachi fütrake trawün mu kimürpuiñ chem dungu müley taiñ doy küme femal fülkülepale Jewba ñi antü. Pichi ngüneduamaiñ tüfa.

AMULEPE TAIÑ NOR PIWKENGEAL, NEWENKÜLEAL KA FÜTRA PIWKENGEAL

Pepikawaiñ famülke mu taiñ montual ti fütra kutrankawün mew. (Inaduamnge parrafo 13-16). *

13. 1) ¿Chumafuiñ taiñ doy nor piwkengeal? 2) ¿Chumngelu fente falin-ngey taiñ femngechi femal famülke mu?

13 Nor piwkengeaiñ. Ti fütra trawün 2016 tripantu mu feypiley “¡Nor piwkeyeafiyiñ ta Jewba!”. Tüfa kimeltueiñmu ñi duamfalngen küme weniyeafiel ta Jewba, fey taiñ nor piwkengeal. Ka feypingeiñ taiñ ngillatuafiel ta Jewba rüf piwke mu ka chillkatuafiel ta Biblia, femngechi doy fülkonafuiñ Chaw Ngünechen mu. Fülkonküleliyiñ Jewba mu, küme chaftuafuiñ chem weda dungu rume. Doy fülkülepale ti fütra kutrankawün, doy kintukaduamngeaiñ taiñ famentuafiel ta Jewba ka tañi Ngünenien. Kafey taiñ koneltunon mu Weküfü ñi ngünenieel mew, pu che amulepelayay taiñ ayentuaetew (2 Ped. 3:⁠3, 4). Doy eluwaiñ taiñ nor piwkengeal famülke mu, fey taiñ nor piwkengeal ti fütra kutrankawün mu.

14. 1) Ti fütra kutrankawün mu, ¿chem rupayay Jewba tañi trokiñche mew? 2) ¿Chumngelu duamfalngeay taiñ nor piwkeyeafiel ta Jewba feychi antü mu?

14 Ti fütra kutrankawün mu elkünungetuay kakelu pu peñi ñi adnieafiel Jewba tañi trokiñche. Feychi antü mu, kom pu dullin cristiano petu mülewelu Mapu mu müleputuayngün wenu mu, fey ñi weychayal Armagedon mu (Mat. 24:⁠31; Apok. 2:⁠26, 27). Feymu ngewetulayay Mapu mu pu peñi adniekefilu Ngünechen ñi trokiñche famülke mu, tüfa engün Kiñewkülechi Ngünenielu pingey. Femngele rume, ka müleay adümuwkülechi pu peñi ñi adnieafiel Ngünechen tañi pu che, welu tüfa engün koneltuleay ti kakelu ufisa mu. Jewba adnieafi feychi pu peñi, feymu müley taiñ kelluntukuafiel ka inayafiel taiñ chem feypiaetew, femngechi pengelaiñ taiñ nor piwkeyefiel ta Jewba. Duamfali taiñ femngechi femal, fey taiñ montual.

15. 1) Taiñ newenküleal, ¿chem duamfali taiñ femal? 2) ¿Chumngelu fente falin-ngey taiñ femngechi femal famülke mu?

 15 Newenküleaiñ. Ti fütra trawün 2017 tripantu mu feypiley “¡Afeluwkilnge!”. Tüfa kellueiñmu taiñ newenküleal rupaliyiñ rume wedake dungu mu. ¿Ka chem kimeltueiñmu ti fütra trawün? Duamfali taiñ maneluwal Jewba mu taiñ newenküleal, doy kümelkaletunole rume taiñ rupameken (Rom. 12:⁠12). Longkontukuaiñ Jesus ñi feypin: “Kom tati newenkülelu Ngünechen ñi dungu mew tuntepule ñi mongen, fey ta montuay” (Mat. 24:⁠13). Jesus ñi feypin kimeltukeeiñmu taiñ newenküleal tunten wedake dungu rupaliyiñ rume. Newenküleliyiñ famülke mu, doy maneluwküleaiñ Jewba mu akule ti fütra kutrankawün.

16. 1) Taiñ fütra piwkengeal, ¿chem duamfali taiñ femal? 2) ¿Chumafuiñ taiñ doy maneluwal Jewba mu famülke mu?

16 Fütra piwkengeaiñ. Ti fütra trawün 2018 tripantu mu feypiley “¡Fütra piwkekünuwnge!”. Chumngechi ngüneduamiyiñ rupachi parrafo mu, taiñ newenküleal duamfali taiñ maneluwal Jewba mu. Ka femngechi taiñ fütra piwkengeal duamfali taiñ maneluwal Jewba mu, tunte adümuwliyiñ rume. Ti fütra trawün femngelu 2018 tripantu mu kimeltueiñmu feychi dungu. ¿Chumafuiñ taiñ doy maneluwal Jewba mu? Fill antü papeltuafiyiñ ta Biblia ka rakiduamaiñ chumngechi ñi montulfiel Jewba tañi pu che kuyfi mew (Sal. 68:⁠20; 2 Ped. 2:⁠9). Ti fütra kutrankawün mu pu gobierno lefkontuaeiñmu. Rupale tüfa, duamfalngeay taiñ fütra piwkengeal ka rume maneluwal Jewba mu, turpu taiñ femngechi femkenoel (Sal. 112:⁠7, 8; Eb. 13:⁠6). Maneluwliyiñ Jewba mu famülke mu, fütra piwkengeaiñ lefkontueliyiñmu Gog. *

MANELUWKÜLEAIÑ TAIÑ MONTULNGEAL

Jesus ka tañi pu weychafe wenu mu mülelu pichin mu weychayay Armagedon mu, fey ñi apümkayafiel Ngünechen tañi pu kayñe. (Inaduamnge parrafo 17).

17. ¿Chumngelu llükalayafiyiñ Armagedon weychan? (Inaduamnge ti adentun wenulelu).

17 Chumngechi feypiyiñ rupachi chillkatun mu, epe kom iñchiñ kom taiñ mongen mu müleiñ afaelchi antü mew. Ka ayünieiñ taiñ mongetripayal ti fütra kutrankawün mew.  Armagedon weychan mu apümkangeay kom ñi ngünenieel ta Weküfü. Welu iñchiñ llükalayaiñ. ¿Chumngelu? Armagedon fey ta Chaw Jewba ñi weychan, iñchiñ weychalayaiñ rume (Prov. 1:⁠33; Ezeq. 38:⁠18-20; Zac. 14:⁠3). Jewba feypile müten, Jesukristo adnieafi Ngünechen ñi pu weychafe tañi weychayal. Kompañaeyew pu 144.000 cristiano ka fentren kümeke püllü. Kom engün kiñentrür weychayafi ta Satana, tañi pu wedake püllü ka kom tañi pu weychafe mülelu Mapu mew (Dan. 12:⁠1; Apok. 6:⁠2; 17:⁠14).

18. 1) ¿Chem feypikünueiñmu Jewba? 2) Ñi feypilen Apokalipsi 7:⁠9, 13-17, ¿chumngechi kellukeeiñmu taiñ maneluwküleal?

18 Chaw Jewba feypikünueiñmu: “Chumngechi rume weychangelmi, wewngelayaymi” (Is. 54:⁠17). “Fentren pu che” nor piwkeyefilu ta Jewba montutripayay ti fütra kutrankawün mu ka amuleay ñi poyekefiel ta Chaw Ngünechen (papeltunge Apokalipsi 7:⁠9, 13-17). Tati Biblia kellukeeiñmu taiñ maneluwküleal. Rüfkünu llemay, ¡montulngeaiñ küpalechi antü mu! Küme kimnieiñ, “Jewba kuñiwtukukefi pu nor piwkengelu” (Sal. 31:⁠23). Kimfalngeay ñi koylangen kom ñi weda dunguyengeel ta Jewba ka kimfalngeay kidu müten feley tañi püramyengeal. Akule feychi antü, iñchiñ rume ayüwküleaiñ fente taiñ piwkeyefiel ka yamniefiel ta Chaw Jewba (Ezeq. 38:⁠23).

19. ¿Chem küme mongen pichilewey taiñ nieal?

19 Biblia mu, 2 Timotew 3:⁠2-5 feypi ñi chumngen tati pu che famülke mu, welu rakiduamnge ñi chem piafel feypifule ñi chumngeal pu che ti we Mapu mu ngüneniewenole tati Weküfü (inaduamnge ti wichulechi dungu “ Ñi chumngeal pu che küpalechi antü mu”). Taiñ peñi George Gangas, * koneltulefuy ti Kiñewkülechi Ngünenielu mu, feypi: “Kom pu che poyefile ta Jewba, rume ayüwün mongen müleay. Pichilewey tamün rumel mongeleal tüfachi Mapu ngünenietule Chaw Ngünechen. Alün mongen nieaymün Chaw Jewba reke. Rumel mongeleaiñ”. ¡Rume küme maneluwün nieiñ tati!

122 ÜLKANTUN ¡Amulepe taiñ newentuleal!

^ parr. 5 Kimnieiñ pichiñma mu ñi küpayal kiñe “fütra kutrankawün”. Chaw Ngünechen tañi pu che, ¿chem dungu mew rupayayngün? Akule feychi antü, ¿chem ayüniey Jewba taiñ femal? Taiñ püntütripanoal Jewba mu ti fütra kutrankawün mew, ¿chem müley taiñ femal famülke mu? Tüfachi chillkatun mew ngüneduamaiñ feychi falinke ramtun.

^ parr. 3 FALIN DUNGU: ¿Iney am pu cristianofaluwkelu? Fey tati pu che feypikelu ñi inaniekefiel ta Kristo, welu poyekelafingün ta Jewba chumngechi ñi ayükeel ta kidu.

^ parr. 11 FALIN DUNGU: Gog tuwlu Magog mapu mu, fey ta kiñe trokiñke gobierno kiñewkülealu ñi lefkontuafiel Ngünechen tañi pu che ti fütra kutrankawün mew. Kiñeke mu, Gog pingekey müten.

^ parr. 11 Tami doy kimal chem ñi rupayal epe puwle Armagedon weychan (awkan), inaduamnge 21 chillkatun mülelu ti lifru El Reino de Dios ya está gobernando ka ti trokiñ “¿Cuándo serán estas cosas?” tripalu ti chillka La Atalaya 15 julio 2013 tripantu. Ka tami doy kimal ñi chem chumal Gog tuwlu Magog mapu mu ka chumngechi tañi montulngeal Jewba tañi pu che Armagedon mu, inaduamnge ti trokiñ “Su liberación se acerca” tripalu ti chillka La Atalaya 15 julio 2015 tripantu.

^ parr. 16 Ti fütra trawün 2019 tripantu mu feypiley “¡Tati piwkeyechen aflayay!”, tüfa feypieiñmu taiñ rumel ingkañpeaetew Jewba piwkeyen mu (1 Kor. 13:⁠8).

^ parr. 19 Inaduamnge ti trokiñ “Sus obras lo siguen” tripalu ti chillka La Atalaya 1 diciembre 1994 tripantu.

^ parr. 65 ¿CHEM PENGELI TI ADENTUN? Ti fütra kutrankawün mu, kiñeke peñi ka lamngen fütra piwkengelu trawüluwküley kiñe mawidantu mu.

^ parr. 67 ¿CHEM PENGELI TI ADENTUN? Fentren pu che nor piwkeyefilu ta Jewba montutripayay ti fütra kutrankawün mu, fey ayüwküleayngün.