Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

Küme tüngün: ¿chumngechi nieafuiñ tüfa?

Küme tüngün: ¿chumngechi nieafuiñ tüfa?

FAMÜLKE mu, fentren che fill rakiduamkülekey ka weda duamkülekey, feymu küdawngeafuy taiñ nieal tüngün, tüfa ñi tüngduamküleal ti che ka kümelkawküleal kakelu engün. Fey tüngduamküleafuiñ kiñeke mu, welu pürüm femngechi duamkülewetulayafuiñ. Feymu, ¿chem feypi Biblia taiñ kelluaetew ñi nieal rüf afkenochi tüngün? ¿Chumngechi kelluafuiñ ta kakelu ñi ka femngechi duamküleal?

¿CHEM DUAMFALI TAIÑ NIEAL RÜF TÜNGÜN?

Taiñ nieal rüf tüngün, müna falin-ngey taiñ küme duamküleal ka pellkeyawnoal. Kafey duamnieiñ kümeke weni, welu doyelchi may, duamnieiñ taiñ fülmayafiel ta Jewba. Fey, ¿chumngechi femafuiñ tüfa?

Jewba ñi wülkeelchi ley ka tañi ngülam kümelkakeeiñmew. Fey inafiliyiñ, pengelaiñ taiñ maneluwken Jewba mu ka taiñ küpa kümelkawkülen kidu engu (Jeremías 17:7, 8; Santiaw 2:22, 23). Femngechi femliyiñ, Jewba fülkonay iñchiñ mew ka eluaeiñmew taiñ tüngduamküleal. Isaías 32:17 feypi: “Femngele rüf norngechi dungu, müleay ta tüngün, ka [...] rumel müleay kümelkalen ka küme felen”. Feley llemay, ayüwün mu inafiliyiñ Jewba ñi feypin, rüf tüngduamküleaiñ (Isaías 48:18, 19).

Fill rakiduamküleliyiñ, tüngduamkülelayaiñ.

Jewba küpa kellukeeiñmew taiñ nieal rüf tüngün, feymu elueiñmu kiñe falin yewün: kidu tañi newen (Hecho 9:31).

CHAW DIOS ÑI NEWEN KELLUKEEIÑMU

Ti apostol Pablo feypilu chumngechi chengey “tati llowkelu Ngünechen ñi newen”, fillke dungu feypi, kiñe tüfa ñi nieken küme tüngün (Galata 5:22, 23, TNM). Feymu taiñ nieal rüf tüngün, duamfali llowal Ngünechen ñi newen. Welu, ¿chumngechi femafuiñ tüfa?

Wüne, papeltuafiyiñ Chaw Dios ñi Dungu fill antü (Salmo 1:2, 3). Küme rakiduamliyiñ taiñ papeltuel mew, Ngünechen ñi newen kelluaeiñmu taiñ kimal Jewba ñi ayükeel ka üdekeel. Kiñe dungu taiñ kimafel, fey Jewba ñi femken  tañi kümelkawküleal kakelu engün ka chumngelu ñi fente falintukefiel tüfa. Inafiliyiñ chem taiñ kimeltuetew Biblia, doy nieaiñ tüngün taiñ mongen mew (Proverbios 3:1, 2).

Epu, ngillatuafiyiñ ta Jewba taiñ eluaetew ñi newen (Luka 11:13). Llellipufiliyiñ ta Jewba taiñ kelluaetew, ngüneduamaiñ chem taiñ feypikünuletew Biblia: “Ngünechen tamün eluetewchi küme tüngün yafülnieñmayaeymünmew tamün piwke ka tamün rakiduam, eymün am kiñewkülelu ta Cristo Jesus mew” (Filipense 4:6, 7). Feymu fülmawküleliyiñ Jewba mu ka rumel llellipufiliyiñ taiñ eluaetew ñi newen, kidu eluaeiñmew taiñ rüf tüngduamküleal (Romanu 15:13).

Biblia kellukefi fentren che ñi küme elkünutual tañi mongen, feymu fewla tüngduamküley engün, kümelkawküley Jewba engu ka tati pu che engün. Inaduamaiñ kiñeke che ñi rupan.

KIÑEKE CHE ÑI FEMKEN TAÑI NIEAL RÜF TÜNGÜN

Petu ñi koneltunon Jewba ñi trokiñche mu, kiñeke taiñ pu peñi ka lamngen illkufengefuyngün, ka kewafengefuyngün kütu. Welu newentuyngün ñi küme elkünutual tañi chumngen, feymu fewla fürenechekey, ñochi duampiwkengekey ka kümelkawkülekey kakelu che engün * (inaduamnge ti kimal dungu) (Proverbios 29:22). Inaduamaiñ chumngechi taiñ peñi David ka taiñ lamngen Rachel küme elkünutuyngu ñi chumngen.

Inafiliyiñ Biblia ñi ngülam ka ngillatufiliyiñ ta Jewba taiñ eluaetew ñi newen, nieaiñ rüf tüngün.

Petu ñi kimnofiel ta Jewba, David weda dunguyechekefuy ka yam dungukelafuy tañi pu che. Welu kiñe antü, ngüneduami ñi duamfalngen küme elkünutual tañi chumngen. Fey, ¿chem kellueyew ñi kümelkawküleal kakelu che engün? David feypi: “Eluwün tañi inayal Biblia ñi ngülam tañi mongen mew. Feymu doy yamniewkeiñ tañi pu che iñchiñ”.

Rachel feypi: “Pichikalu iñche afkentu yafkawkefuy tañi pu che. Feymu petu yafüluwken ñi illkufemnoal”. Feley, ñi femngechi tremümngen mu, küdawtukey ñi kümelkawtual kakelu che engu. Welu, ¿chem kellukeeyew? Rachel feypi: “Ngillatulekefiñ ta Jewba tañi kelluaetew”.

David ka Rachel epu che müten ñi rupan tati,  welu küme pengelkey tüfa: inafiliyiñ Biblia ñi ngülam ka ngillatufiliyiñ ta Jewba taiñ eluaetew ñi newen taiñ kelluaetew, femngechi müten tüngduamküleaiñ ka kümelkawküleaiñ kakelu che iñchiñ. Illkulekelu rume epe kom pu che, iñchiñ tüngduamküleafuiñ. Tüfa kelluaeiñmew taiñ kümelkawküleal taiñ pu che iñchiñ ka taiñ pu peñi ka lamngen ti trawünche mu. Welu kafey, Jewba feypieiñmew: “Yafüluwmün tamün kümelkawküleael itrokom che eymün” (Romanu 12:18). ¿Chumngechi femafuiñ tüfa? Ka, ¿chumngelu duamfali taiñ femngechi chengeal?

CHEM FEMAFUIÑ TAIÑ KÜMELKAWKÜLEAL KAKELU IÑCHIÑ

Taiñ amuldunguken mu Chaw Ngünechen ñi Ngünenien, kellukefiyiñ pu che ñi nieal tüngün (Isaías 9:6, 7; Matew 24:14). Fentren che llowkelu taiñ amuldungun, fill rakiduamwekelay ka lladküfemkelay fill wedake dungu ñi ruparupangen. Fewla maneluwkeyngün ñi küme feleal küpalechi antü mew, feymu inakeyngün tüfachi ngülam: “Kintunge tati tüngün” (Salmo 34:14).

Welu kom pu che küme llowfemkelay taiñ amuldungun (Juan 3:19). Femngelu rume, Chaw Dios ñi newen kellukeeiñmew taiñ tüngduamküleal ka yam dunguafiel itrokom che, küme llownoeliyiñmew rume. Femngechi inakefiyiñ Jesus ñi ngülam: “Konpulmün tati ruka mew, chalipuafimün kom che mülelu feychi ruka mew. Küme llowelmünmew tati pu che, tañi ayütunieelchi küme tüngün kom feleay, welu küme llownoelmünmew engün, fey felelayay tañi ayütuniefelchi küme tüngün” (Matew 10:11-13). Inafiliyiñ tüfa, nieafuiñ tüngün chem feypingeliyiñ kam femngeliyiñ rume. Kafey maneluwaiñ taiñ allkütuaetew pu che küpalechi antü mew.

Kafey taiñ kümelkawküleal kakelu iñchiñ, yamün mew dunguafiyiñ pu che awtoridadkülelu, katrütueliyiñmu rume taiñ amuldungun küdaw. Femngechi rupay kiñe trokiñ mapu Africa mu. Ti gobierno eluñmakelaeiñmew ñi dewmayal Trawünwe Ruka. Ñi küme elkünutual ti dungu, elfalngey kiñe peñi ñi dunguafiel kiñe falin wentru küdawkülelu gobierno mew, tüfa mülekefuy Londres mu (Inglaterra). Kuyfi tüfachi peñi amuldunguy feychi trokiñ mapu Africa mu. Fey nütramkalelfi ti wentru ñi femken pu Dungukelu Iney Ngen Jewba tañi kümelkawküleal kom che engün.

Ñi nütramkawal feychi wentru engu, taiñ peñi wüne mülefuy ñi nütramkayafiel kiñe domo llowchekelu. Feychi domo tukutuwkülefuy kiñe africa trokiñche reke. Taiñ peñi kimürpuy feychi trokiñche ñi kewün. Kidu feypi: “Chalifiñ ti domo kidu ñi kewün mew. Tüfa afmatulewey ka ramtuenew: ‘¿Chem duamimi?’. Fentren yamün mew feypifiñ tañi küpa nütramkayal ti falin wentru engu küdawkülelu gobierno mew. Ti domo telefono mu mütrümfi, fey ti wentru tripay tañi nütramkayaetew ka chalienew kidu ñi kewün mew. Fey, küme allkütuenew tañi feypilelfiel ñi femken pu Dungukelu Iney Ngen Jewba tañi kümelkawküleal kom che engün”.

Ti falin wentru küdawkülelu gobierno mew allkütuy chem ñi feypietew taiñ peñi, fey küme kimürpuy chem taiñ femken ka fente weda rakiduamwelay iñchiñ mew. Rupalu chi antü, ti gobierno elueiñmu taiñ dewmayal Trawünwe Ruka feychi trokiñ mapu mew. ¡Müna ayüwingün pu peñi ka lamngen! Feley llemay, yamfiliyiñ ta kakelu, tüfa kelluaeiñmew taiñ kümelkawküleal itrokom che mew.

NIEAIÑ RÜF AFKENOCHI TÜNGÜN

Famülke mu iñchiñ, Jewba ñi pu chengen, kom kümelkawküleiñ. Feley llemay, niekeiñ rüf tüngün. Ñi amuleal taiñ femngechi felen, kiduke iñchiñ yafüluwaiñ taiñ tüngduamküleal ka kümelkawküleal kakelu che iñchiñ. Femngechi ayüwülafiyiñ ta Jewba, fey kidu eluaeiñmu rüf afkenochi tüngün ti we Mapu mew (2 Pedro 3:13, 14).

^ parr. 13 Aylla trokiñ mu ngüneduamaiñ ñi chumngen pu llowkelu Ngünechen ñi newen, feymu kangelu trokiñ mu inaduamaiñ ti fürenechen.