Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

Kutranpiwkeyeafiyiñ itrokom pu che

Kutranpiwkeyeafiyiñ itrokom pu che

JESUS kimeltulelfi tañi pu inanieetew chumngechi tañi amuldungual engün, welu ka feypifi ñi allkütunoaetew kiñeke che (Luka 10:3, 5, 6). Ka femngechi feley famülke mu. Amuldungulu iñchiñ, kiñeke che illkutuafeiñmu kam aneltuafeiñmu kütu. Femngechi femngeliyiñ, küdawngeafuy taiñ kutranpiwkeyeafiel ta che ka müte eluwkülelayafuiñ chi amuldungulelafiel engün.

Kiñe che kutranpiwkeyechekelu ngüneduamkey chem ñi duamnieel kakelu che, feymu kuñillkefi ka ayüwkey ñi kelluafiel engün. Welu, ¿kutranpiwkeyenofiliyiñ kay pu che amuldungun mu? Eluwkülewelayafuiñ taiñ amuldungulelafiel pu che, fey kellulayafuiñ engün. Rakiduamnge tüfa: ñi küme üyküleal ti kütral duamfalngey taiñ tukulelafiel mamüll, ka femngechi taiñ doy eluwküleal ñi amuldungucheal, duamfalngey kutranpiwkeyecheal (1 Tesalonisense 5:19, TNM).

Welu, ¿chem kelluaeiñmu taiñ doy kutranpiwkeyecheal, küdawngefule rume? Ngüneduamaiñ chumngechi inayentuafuiñ ñi femün ta Jewba, Jesus ka ti apostol Pablo.

INAYENTUAFIYIÑ JEWBA ÑI KUTRANPIWKEYECHEN

Fentren tripantu mu, pu che koyla dunguyekefi ta Jewba. Welu kidu rume küme piwkengey “kom tati mañumkenolu mew ka tati wesa piwkengelu mew” (Luka 6:35). Chaw Jewba, ¿chumngechi am fürenekefi ta che? Ñochi piwkengey itrokom pu che mu, “kisu am ayünielu kom che tañi montuael” (1 Timotew 2:3, 4). Chaw Dios üdekefi kom wedake dungu, welu müna falintuniefi pu che, feymu ‘ayülelay iney no rume ñi layael’ (2 Pedro 3:9).

Chaw Jewba kimniey tati Weküfü ñi welurakiduamelkefiel fentren che koylake dungu mu (2 Korintio 4:3, 4). Pütrün che pichikalu müten, kimeltulelngey koylake dungu Chaw Ngünechen mu. Feymu küdawngeafuy ñi kimürpual engün Chaw Ngünechen tañi rüf dungu. Welu Jewba ayüniey tañi kelluafiel engün, ¿chumngechi kimnieiñ tüfa?

Rakiduamaiñ Jewba ñi chumngentukefiel pu che mülekefulu Ninife waria mew. Feytachi pu che kewatufengefuy, welu Chaw Jewba feypifi ta Jona: “Iñche may doyelchi feley tañi kutranduamyeafiel tati pu che Ninife waria mew mülelu, feyti fütra waria chew tañi mülemüm doy pataka epu mari warangka [pu che kimnolu chem ñi kümen ka ñi kümenon, TNM]” (Jona 4:11). Jewba ngüneduami feychi pu che ñi rüf kimnoetew, feymu rume kutranpiwkeyefi ka elfalkünufi ta Jona ñi ngüfetuafiel engün.

Iñchiñ müna falintuniefiyiñ pu che, Jewba reke. Feymu taiñ inayentuafiel, eluwaiñ ñi kimeltulelafiel kom pu che Ngünechen ñi kümeke dungu, weniyerpunoafilu ta Jewba trokifiliyiñ rume.

INAYENTUAFIYIÑ JESUS ÑI KUTRANPIWKEYECHEN

Jesus tañi Chaw mu yepay, feymu “pefilu tati pu che, kutranpiwkeyefi kisulelu engün am kiñe kechan ufisa reke nienolu tañi kamañnieaetew” (Matew 9:36). Jesus kimniefuy chumngelu (chemu) ñi femngechilen feychi pu che: pu longkolechi religioso weda duamelkefuy pu che ka kimeltulelkefuy koylake dungu. Feymu Jesus eluwi ñi kimeltulelafiel ta che falinke dungu, kimniefulu rume ñi inanierpunoaetew kom engün (Marku 4:1-9).

Ellaka mu küme allkütunoelmu ta che, weda duamkülekilnge.

Kalerumetule kiñe che ñi mongen, eluwküleafuy tañi doy küme allkütual.

Ka femngechi iñchiñ rakiduamafuiñ chumngelu kiñeke che küpa allkütukelay chem taiñ  amuldungukeel. Kidu engün ngüneduamkefuy chi ñi weda femkeel pu kristianofaluwkelu, feymu müte duamkelafi ta Biblia ka pu kristiano. Kakelu che allkütukefuy chi koylake dungu taiñ feyentukeel. Kafey kiñeke che llükakey ñi ayentuaetew tañi pu che kam tañi pu weni, nütramkale iñchiñ engu.

Chew taiñ amuldungukeel, kiñeke che rume weda duamelkeeyew chi tañi rupan kuyfi. Kiñe lamngen werküngelu ka mapu ñi amuldungual, feypi: “Chew taiñ amuldungukeel, pu che ñamümi kom tañi niekefel mülefulu am weychan (awkan). Fey ‘kümelkalewetulayay’ trokikeyngün, doy may rume weda duamnagkey ka maneluwkelafi iney mu no rume. Tüfachi lof mu fentren pu che kayñetukeeiñmew taiñ amuldunguwenoal. Kiñe rupa petu amuldunguyawlu wülelngerumen nga”.

Welu, ¿chem kellueyew ñi kutranpiwkeyecheal? Kidu feypi: “Weda femngen mu iñche, yafüluwken ñi longkontukual Proverbios 19:11, feypilu: ‘Kiñe che kim ngüneduamlu ngüneniewkey tañi illkufemnoal’. Rakiduamken tati pu che ñi weda rupan tañi lof mu, tüfa kellukeenew tañi kutranpiwkeyeafiel engün. Kafey kom pu che kayñetukelay taiñ amuldungukeel, doy may wiñopemetukefiyiñ kiñeke che ayülu ñi doy kimal”.

Ramtuwaymi: “Iñche kimnofuli ta Jewba, ¿chem piafun amuldungupaelimu pu Dungukelu Iney Ngen Jewba?”. Rakiduamnge koylatungelmi Jewba tañi pu che mu, ¿chumafuymi kay? Eymi ka küpa allkütulayafuymi chi ka duamnieafuymi kutranpiwkeyengeal. Longkontukuaiñ, Jesus feypi taiñ femafiel kakelu che chumngechi ta ayükeiñ taiñ küme trokituaetew iñchiñ. Feymu llemay, yafüluwaiñ pepilafiel ñi chem duamkülen kakelu che ka ñochi duamyeafiyiñ engün, küdawngele rume (Matew 7:12).

INAYENTUAFIYIÑ PABLO ÑI KUTRANPIWKEYECHEN

Ti apostol Pablo tañi amuldungun mew kayñetueyew pu che ka kewatueyew, welu kidu eluwi ñi kutranpiwkeyecheal. ¿Chumngelu am? Pablo longkontukukefuy ñi chumkefel kuyfi. Kidu feypi: “Tunte kuyfi mew iñche rume wesa kayñetukefuiñ ta Cristo ñi küme dungu, inantukukayñetukefuiñ ka wesa lukatukefuiñ. Welu Ngünechen ta kutranpiwkeyeenew, iñche am petu feyentukenofulu ta Cristo mew ka kimkelafun rume tañi wesa femkefel” (1 Timotew 1:13). Pablo kimniefuy fente ñi kutranpiwkeyeetew Jewba ka Jesus. Kafey kidu kayñetukefilu kay pu kristiano, pepilniekefuy tañi chem rakiduamkeel pu che tañi kayñetuetew.

Kiñeke mu, Pablo ka nütramkalelkefuy kiñeke che rume feyentukefulu koylake kimeltun. ¿Chum duameleyew tüfa? Hecho 17:16 feypi petu mülelu Pablo Atenas waria mew, ‘rume wesa duameleyew  ñi pefiel mew tati trokiñche rumeñma ñi püramyeniefiel engün tati pu dewman pichike adentun’. Welu ngüneduami chem tañi püramyekefiel engün, femngechi ñi amuldungulelafiel ti rüf dungu (Hecho 17:22, 23). Pablo amuldungulelkefuy kakerume tuwün pu che, feymu küme rakiduamkefuy chem ñi duamnieel kake kiduke engün, femngechi “ñi pepi montulafiel müten ta ineyngeay rume” (1 Korintio 9:20-23).

Famülke mu, ka amuldungulelkefiyiñ ta che feyentukelu koylake kimeltun ka kiñeke küme llowkelaeiñmu rume. Feymu inayentuafiyiñ Pablo ñi femün, rakiduamaiñ taiñ kimüñmafiel pu che, femngechi taiñ nütramkalafiel “Ngünechen ñi küme dungu” (Luka 4:43). Kiñe lamngen Dorothy pingelu feypi: “Taiñ lof mu, fentren che kimeltulelngekey Ngünechen ñi mollkenofiel pu che tañi weda femün. ‘Kümey tami feyentukeel Ngünechen mu’ pikefiñ engün, ka nütramkalelkefiñ Biblia ñi feypin fente ñi küme piwkengen ta Jewba ka chem ñi chumal kidu küpalechi antü mu”.

‘WEWAFIYIÑ KÜME FEMÜN MEW TATI WESA FEMÜN’

Doy fülkülepale ñi afal wedake dungu, kimnieiñ pu che ñi chumken amuleay tañi doy wedalkalerpun engün (2 Timotew 3:1, 13). Welu chumle rume ta che, fentekünulayaiñ ñi kutranpiwkeyecheal ka taiñ ayüwülaetew amuldungucheal. Jewba llemay eluaeiñmu newen taiñ wewafiel “küme femün mew tati wesa femün” (Romanu 12:21). Kiñe lamngen wünelekelu amuldungun mew, Jessica pingey, kidu feypi: “Amuldungun mu tripakey che mallma piwkengelu, fey ayentukeeiñmu taiñ nütramkakeel mu. Tüfa lladkün-ngey. We nütramkafilu kiñe che ñüküfkülen ngillatukefiñ ta Jewba, ka ‘kelluen ñi duamtunieafiel ta che eymi reke’ pikefiñ. Tüfa kellukeenew ñi kidutu doyümuwnoal, doy may rakiduamal chumngechi ñi kelluafiel ta che”.

Af kintukelafiyiñ pu ayünielu kimafiel ta Ngünechen.

Rupale chi antü, kiñeke che eluway tañi kimeltungeal, fey kimürpuafi ta Jewba.

Kafey yafültukuafiyiñ taiñ pu peñi ka lamngen petu taiñ amuldunguyawün. Jessica feypi: “Weda llowngele kiñe lamngen amuldungun mew, eluwken tañi müte rakiduamtukunoal tüfa. Doy may, nütramkaken kümeke dungu, feymu rakiduamelkefiñ fente ñi küme tripaken taiñ amuldungun, weda lloweliyiñmu rume kiñeke che”.

Jewba kimniey fente küdawün-ngen taiñ amuldungual kiñeke mu. Feymu inayentufiliyiñ tañi kutranpiwkeyechen, ¡müna ayüwkey llemay! (Luka 6:36). Welu Jewba yochi küme apümafi itrokom wedake dungu, feychi mu kutranpiwkeyelayafi pu wedake che. Fey petu ñi akunon Jewba ñi antü, rume duamfalngey taiñ amuldungulelafiel ta che (2 Timotew 4:2). Feymu llemay, kom piwke mu eluwküleaiñ amuldungulelafiel ka kutranpiwkeyeafiel itrokom pu che.