Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

¿Chem eluafiyiñ tati Ngen-ngelu itrokom dungu mew?

¿Chem eluafiyiñ tati Ngen-ngelu itrokom dungu mew?

“Awem taiñ Chaw Ngünechen, mañumniewpeiñ ka wenupüramniefiyiñ tami fütra üy” (1 CRÓNICAS 29:13).

ÜLKANTUN: 80 KA 50

1, 2. Jewba, ¿chumngechi fürenekeeiñmew?

TAIÑ Chaw Jewba fürenechekey. Fey kom taiñ nieel kidu mu küpay. Kidu ngen-ngey kom ti falinke dungu ñi wülkeel ti Mapu, ka elukey kom ñi duamfalngeel tañi müleal mongen (Salmo 104:13-15; Ageo 2:8). Ka kiñeke mu Jewba femi afmatun dungu ñi eluafiel tañi pu che ñi duamnieel, femngechi pengeli Biblia.

2 Rakiduamnge tüfa, Jewba elufi mana ka ko tati pu israelche nampiyawlu 40 tripantu (Éxodo 16:35). Feymu niekefuyngün kom ñi duamnieel (Nehemías 9:20, 21). Kafey Jewba elufi newen tati pelon wentru Elisew, feymu femi kiñe afmatun dungu: alürpufi ti pichin aseyte ñi nieel kiñe lantu domo. Fey fendelu ti aseyte, tüfachi manelfal domo kulli tañi defen, ka sofray plata tañi nieal mongelwe kidu ka tañi pu püñeñ (2 Reyes 4:1-7). Chaw Jewba ka elufi newen ta Jesus, fey femi afmatun dungu ñi müleal iyael  ka plata duamfalngelu (Matew 15:35-38; 17:27).

3. ¿Chem inaduamaiñ fewla?

3 Jewba chem rume femafuy ñi kelluafiel ti mongeleyelu Mapu mew, welu mangelkeeiñmew ñi wülal taiñ nieel, femngechi kelluntukual kidu tañi trokiñche (Éxodo 36:3-7). Biblia feypi: “Püramyeafimi ta Jewba tami falinke chemkün mew ka tami wünen wefpachi fün ketran mew” (Proverbios 3:9). Welu Jewba mu küpalu am kom taiñ nieel, ¿chumngelu (chemu) ayükey taiñ eluafiel falinke fillem? Jewba ñi pu che kuyfi mu, ¿chumngechi kelluntukuy ti küdaw ñi femngeal? Ka famülke mu Jewba ñi trokiñche, ¿chumkey tati wülngekeelchi plata mu? Fewla inaduamaiñ tüfa.

¿CHUMNGELU WÜLAFUIÑ TAIÑ NIEEL JEWBA MU?

4. ¿Chumngelu wülkeiñ taiñ nieel Jewba mu?

4 ¿Chumngelu elukefiyiñ ta Jewba taiñ nieelchi fillem? Müna piwkeyefilu kay iñchiñ ka mañumküleiñ kom ñi femkeel iñchiñ mu. Rakiduamfiel tüfa pürapapiwkekeiñ. Femngechi femi ti longko ülmen David feypilu chem ñi duamfalngeel tañi dewmangeal ti ngillatuwe ruka. Biblia feypi: “Awem Jewba, eymi ngen-ngeymi küme üytun, newen, küme adelkalen, püramyen ka afmatufalngen, kom tati mülelu wenu mapu ka nag mapu mu eymi am ta ngen-ngelu. Eymi ngen-ngeymi ti ngünenien mu, awem Jewba. Eymi tati pengelkelu tami longkolen kom tati müleyelu mew. Eymi mew küpay falinke fillem ka püramyen, ka eymi ngüneniekeymi itrokom, ka tami kuwü mu müley newen ka pepiluwün, tami kuwü mu müley pepiluwün ñi püramyeafiel ka newentukuafiel itrokom. Feymu fewla, awem taiñ Chaw Ngünechen, mañumniewpeiñ ka wenupüramniefiyiñ tami fütra üy. Welu, ¿iney am ta iñche ka tañi pu che taiñ eluwküleal ñi wülal taiñ yewün ayüwün mu? Itrokom am ta eymi mu küpalu, fey tami wülkeel, iñchiñ ta wiño eluwtuiñ” (1 Crónicas 29:11-14).

5. Biblia mew, ¿chumngechi pengelngekey ñi falin-ngen wülal taiñ nieel, femngechi taiñ poyeafiel ta Jewba?

5 Kafey wülkeiñ taiñ nieel, femngechi taiñ poyeafiel ta Jewba. Ti apostol Juan allküy ñi feypin pu poyekefilu ta Jewba wenu mapu mew: “¡Eymi mew llemay, Ñidol ka iñchiñ taiñ Ngünechen, feley tami llowael kom küme püramyen, kom yamün ka pepiluwün eymi am dewmafilu ta kom tati mülelu! ¡Eymi tami pin mew dewmangeyey ka müleyey engün!” (Apokalipsi 4:11). ¡Rüfngey llemay! Jewba feley ñi püramyengeal, feymu elukefiyiñ ti doy kümengelu taiñ nieel. Jewba werküfi pu israelche ñi trawüluwal küla rupa ti tripantu mew. Ñi poyeafiel ta Jewba feychi trawün mu, müna falin-ngefuy wülal tañi nieelchi fillem. Feymu feypingeyngün ñi yelelafiel yewün ta Jewba (Deuteronomio 16:16). Famülke mu taiñ poyeafiel ta Chaw Jewba, ka falin-ngey wülal taiñ nieel, welu wiñolelngetuaiñ trokiwkelaiñ. Femngechi pengelkeiñ taiñ falintukefiel ka mañumkefiel ñi femken Jewba tañi trokiñche.

6. ¿Chumngelu fente kümey wülal taiñ nieel? (Inaduamnge ti adentun ellaka mu mülelu).

6 Kümey taiñ wülken taiñ nieelchi fillem, feymu re llowlayaiñ müten. Biblia  feypi: “Kiñe kona petu wechengelu elungele kom ñi ayünieel, fey wüla mañumfengerpulayay” (Proverbios 29:21). Rakiduamnge tüfa, pu chaw fill küyen elufile plata tañi pichi malen, fey tüfa ngillaelieyew kiñe yewün feychi plata mew, ¿ayüwkülenoafulu kay tati pu chaw? Kafey kiñe weche wünelekelu amuldungun mew petu mülele tañi pu chaw ñi ruka mew, eluafuy pichin plata ñi kelluntukuafiel. Pu chaw üngümlayafuyngu chi tati weche ñi eluetew, welu llowmalelfingu, kimlu am chumngelu kümey tati weche ñi wülün tañi nieel, femngechi pengelkey ñi mañumkülen. Chaw Jewba ka kimniey ñi fente kümen wülkefiel taiñ nieel.

CHAW DIOS ÑI PU CHE KUYFI WÜLKEFUY TAÑI NIEEL

7, 8. Biblia, ¿chumngechi pengeli pu poyekefilu ta Jewba ñi wülkeel tañi nieel 1) femngealu kiñeke küdaw? 2) ñi poyengeal ta Ngünechen?

7 Biblia pengeli pu poyekefilu ta Jewba ñi wülkeel tañi nieel. Kiñeke mu, kelluntukuyngün femngealu kiñeke küdaw. Moyse yafültukufi pu israelche ñi wülal tañi nieel, fey ñi dewmangeal ti fütra tolto ruka chew ñi poyengeal ta Jewba. Ka femngechi femi David ñi dewmangeal ti ngillatuwe ruka (Éxodo 35:5; 1 Crónicas 29:5-9). Ngünenielu Jehoas, pu che wüli plata, feymu pu saserdote küme elkünutuyngün ti ngillatuwe ruka (2 Reyes 12:4, 5). Wünen siglo mew, pu kristiano kimürpuyngün ñi rupan kiñe fütra filla Judea mu. Feymu wülingün tunte ñi pepilnieel kake kiñeke engün ñi kelluafiel pu peñi ka lamngen üye mew (Hecho 11:27-30).

8 Jewba ñi pu che ka kelluntukufi pu adkünukelu ñi poyengeal ta Jewba. Ti Ley ñi elungeel ta Moyse feypi pu Levi tuwün-ngelu ñi llownoal mapu kakelu pu israelche reke. Feymu pu che wülkefuy ñi nieel, fey pu Levi tuwün-ngelu eluwkefuy ñi küdawal ti tolto ruka mew müten (Números 18:21). Kafey kümeke domo wülkefuy ñi nieel tañi kelluafiel ta Jesus ka pu apostol (Luka 8:1-3).

9. Kuyfi mu pu che, ¿chew entuy ñi wülal?

9 Feychi pu che, ¿chew entuy ñi wülal? Pu israelche wülingün falinke dungu Egipto mew peno ñi küpalfiel, fey ñi dewmangeal ti tolto ruka (Éxodo 3:21, 22; 35:22-24). Kafey wünen siglo mu kiñeke kristiano fendey ñi mapu, ñi ruka ka kakelu dungu ñi nieel, fey elufingün ti plata tati pu apostol. Femngechi pu peñi ka lamngen elungey ñi duamnieel (Hecho 4:34, 35). Kakelu kristiano wichukünukefuyngün plata, femngechi ñi kelluntukual ti küdaw ñi femngeal (1 Korintio 16:2). Feymu kom che elukefuy ñi pepilnieel, riku kam pofrengelu rume (Luka 21:1-4).

CHUMNGECHI KELLUNTUKUKEIÑ FAMÜLKE MU

10, 11. 1) ¿Chumngechi inayentuafuiñ pu poyekefilu ta Jewba kuyfi? 2) Tami kelluntukufiel ti küdaw ñi femken Jewba ñi trokiñche, ¿chum duamnagkeymi?

10 Famülke mu, ka kelluntukuafuiñ taiñ wülkeelchi plata mu ñi femngeal kiñeke küdaw. Tüfa duamfalngeafuy dewmangele kiñe we Trawünwe Ruka chew taiñ mülen kam küme elkünungetule. Ka femngechi kelluafuiñ ñi küme elkünungetual taiñ ngünenieelchi ruka. Kam wülafuiñ plata ñi dewmangeal taiñ fütrake trawün, ka ñi kellungeal pu peñi ka  lamngen rupale kiñe nüyün, kürüftuku mawün, ka kakelu wedake dungu. Kafey taiñ wülkeelchi plata mu kellungekey pu werküngelu ka mapu ñi amuldungual, pu wünelekelu amuldungun mu 130 ora fill küyen, pu witran-ngepakechi longkolelu ka pu küdawkelu Fetel mu ka fillke Ruka Chew ñi Rulpadungungekem wall Mapu mülelu. Kafey taiñ trawünche kelluafuy fill küyen werküle plata tañi dewmangeal Trawünwe Ruka, femngechi ñi kelluafiel fentren peñi ka lamngen wall Mapu mu.

11 Kom iñchiñ kelluafuiñ ti küdaw ñi femken Jewba ñi trokiñche, epe puwkülelu am ñi afal ta antü. Kimfalngelay epe kom pu che ñi wülkeel. Feymu wül-liyiñ plata Trawünwe Ruka mu kam jw.org mew, feypilayafiyiñ ta kakelu tunte taiñ wülün. Kiñeke mu rakiduamafuymi chi ñi rume pichin tami wülün. Welu longkontukunge tüfa: feypilayafuiñ kiñe mufün che müten ñi wülün fentren plata, doy may fentren che wülkey pichin plata, femngechi trapümngekey ñi duamniengeel. Fentren peñi ka lamngen pichin plata nielu inayentukefingün pu kristiano mülelu Masedonia wünen siglo mew. Kidu “tunte pofrengefuyngün rume”, llellipufingün pu apostol ‘elumuiñ taiñ wülal ñi duamfalngeel’, fey ayüwünkechi wülingün tañi nieel (2 Korintio 8:1-4).

12. Ti Kiñewkülechi Ngünenielu, ¿chumkey tañi küme adkünual ti wülngekeelchi plata?

12 Ñi chumken tati Kiñewkülechi Ngünenielu ti wülngekeelchi plata mew pengelkey ñi kimchengen ka manelfalngen (Mateo 24:45, TNM). Kidu engün ngillatukey ka küme adkünukey chem ñi chumngeal ti wülngekeelchi plata (Luka 14:28). Kuyfi elfalkünungekefuy manelfal wentru ñi adkünual ti wülngekeelchi fillem. Tüfa engün eluñmakefuy ñi amultukungeal tañi poyengeal ta Jewba. Kiñe rupa Persia ñi longko ülmen eluyefi ta Esdra milla, plata ka fentren falinke fillem, kom tüfa famülke mu epe 70.000 millon peso chileno fali (doy 100 millon dolar). Feychi yewün, Jewba ñi ngen-ngeel trokifi Esdra. Feymu küme adkünufi chumngechi ñi yengeal ti falinke fillem, kuñiwün-ngefulu am ñi puwal ta Jerusalen (Esdras 8:24-34). Rupalu fentren tripantu, Pablo trapümfi ti plata ñi wülngekeel, fey tañi kellungeal pu kristiano Judea mew. Kidu feypifi pu adkünufilu ti plata tañi eluafiel tüfa “küme kuñiwtun mew”, ‘fey tañi tuteafiel ta Ngünechen ka femngechi tañi pu peñi ka lamngen’ (papeltunge 2 Korintio 8:18-21). Famülke mew, Jewba ñi trokiñche inayentuñmaniefi Esdra ka Pablo ñi femün, fey küme kuñiwtun mew adkünukey ti wülngekeelchi plata.

13. Jewba ñi trokiñche, ¿chumngelu fewla doy küme adkünukey ñi chumken?

13 Kiñeke reñmawen doy küme adkünukey ñi chumken engün ti plata mew, femngechi ñi amultukunoafiel doy plata tañi wewel mew. Ka rakiduamkey chumngechi yenieal tañi mongen ñi doy küdawülafiel ta Jewba. Ka femngechi femkey Jewba ñi trokiñche. Newe kuyfi dewmangey kiñeke fütrake küdaw, welu kiñeke mu amultukungey doy plata ñi llowel mew. Feymu kiñe reñmawen reke, Jewba ñi trokiñche ngüneduamkey chumngechi ñi ngünamkanoal plata ka doy küme adkünuyngün chumngechi ñi  femngeal ti küdaw. Femngechi ñi doy küme amultukual ti plata taiñ wülkeel.

CHUMNGECHI KÜMELKAKEEIÑMU TAIÑ WÜLKEELCHI PLATA

Taiñ wülkeelchi plata mu, kelluntukukeiñ ti küdaw ñi femken Jewba ñi trokiñche. (Inaduamnge parrafo 14-16).

14, 15. Jewba ñi trokiñche, ¿chumkey taiñ wülkeelchi plata mu?

14 Fentren poyekefilu ta Jewba alün tripantu mu, feypikey Jewba tañi trokiñche ñi doy elukeetew yewün famülke mu. Fewla müley jw.org ka JW Broadcasting. Kafey ti Traducción del Nuevo Mundo de las Santas Escrituras müley fentren kewün dungu mew. Ka 2014 ka 2015 mu femngey ti fütrake trawün “Doyümnieafiyiñ Ngünechen tañi Ngünenien”. Tüfa femngey kiñeke doy fütrake estadio ñi mülen 14 waria fillke trokiñ mapu mew, ka küpay fentren che fillke mapu tuwlu. ¡Kom pu trawüluwlu müna ayüwingün!

15 Fentren pu peñi ka lamngen mañumkeyngün tüfachi kümeke yewün ñi wülkeel Jewba ñi trokiñche. Kiñe kurewen werküngelu ñi amuldungual kiñe pichi waria Asia mapu mew feypi: “Kiñeke mu kidulelu trokiwkeyu ka ngoymarumekeyu ñi fente küme tripan Jewba tañi küdaw. Welu adkintulu iñchiw JW Broadcasting, fey longkontukukeyu tayu nieel fentren peñi ka lamngen wall Mapu mu. Faw pu peñi ka lamngen müna ayüwülkeeyew JW Broadcasting. Feypikeyngün dew adkintulu ti video ñi tripaken fill küyen, doy fülkonkülelu ti Kiñewkülechi Ngünenielu mu trokiwkeyngün. Fewla doy ayüwküleyngün ñi koneltulen Jewba tañi trokiñche mew”.

16. 1) ¿Ka chem chumkey Jewba ñi trokiñche taiñ wülkeelchi plata mu? 2) Eymi kay, ¿chumngechi kellukeeymu fillke yewün ñi wülkeel Jewba tañi trokiñche?

16 Wall Mapu mu petu dewmangey ka küme elkünungetuy epe 2.500 Trawünwe Ruka. Pu koneltulelu kiñe trawünche Honduras mu, feypingün ñi pewmantukukefiel tañi nieal kiñe Trawünwe Ruka. Fey puwi llemay ti antü ñi femtripayal tañi ayünieel, feymu feypi engün:  “Rumeñma ayüwküleiñ nielu kay iñchiñ fentren kümeke peñi ka lamngen wall Mapu mu, ka koneltulelu am Jewba ñi reñma mülelu wenu mapu ka nag Mapu mew”. Ka femngechi küme duamkeyngün fentren peñi ka lamngen llowlu ti Biblia ka fillke papil kidu ñi kewün mu. Ka femkeyngün pu kellungelu rupalu fütra wedake dungu ka pu ngüneduamlu ñi fente küme tripan ti amuldungun chew ñi rupaken fentren che ka fütrake waria mew.

17. ¿Chumngelu feypiafuiñ Jewba ñi kellukefiel tañi trokiñche famülke mu?

17 Femkeiñ kom tüfa ti plata ñi wülkeel ti che kidu ñi pin mu, feymu afmatukey pu poyekenofilu ta Jewba. Kiñe wentru küdawkelu kiñe fütra empresa mew amuy chew nentuwirikeiñ fillke papil. Kidu afmatulewey ngüneduamlu ti küdaw ñi femken che kullingekenolu ka pefilu taiñ femkeel kom tüfa ti wülngekeelchi plata mew ka ngillatuplatakelaiñ fütrake kawiñ mu. Kidu pepilfalnolu trokifi tüfa. ¡Iñchiñ kafey! Pepil-layafuiñ nienofuliyiñ Jewba ñi kellu (Job 42:2).

WÜL-LIYIÑ JEWBA MEW KIDU TAIÑ ELUETEW, LLOWAIÑ KÜMELKAN

18. 1) Eluwliyiñ ñi wülal taiñ nieel, ¿chem kümelkan llowaiñ? 2) ¿Chumngechi kimeltuafuymi tami pu yall ka pu we konlu Jewba ñi trokiñche mu tañi wülal ñi nieel?

18 Jewba elueiñmew taiñ kelluntukual ñi femken kidu tañi trokiñche, tüfa sakikeeiñmew. Femliyiñ tüfa, Jewba feypikünuy taiñ kümelkayaetew (Malaquías 3:10). Ka feypikünuy taiñ küme tripayal fürenechefengeliyiñ. Biblia feypi: “Tati eluwlu ñi wülal tañi nieelchi fillem, fey wüla doy nierpuay; welu tati pinolu ñi wülal tañi eluafel, tüfa ta fillaleay. Tati eluwlu ñi wülal tañi nieel, küme feleay; ka tati füshküduamelkefilu ta kakelu, ka füshküduamelngeay” (Proverbios 11:24, 25). Kafey wül-liyiñ taiñ nieel, ayüwküleaiñ llemay, Biblia feypilu am: “Doy ayüwün-ngey wülün llowün mew” (Hecho [Femyefel] 20:35, Ngünechen ñi Neyüntükumuyümchi Chillka [NCH]). Taiñ feypin ka femün mu, kimeltuafuiñ taiñ pu yall ka pu we konlu Jewba ñi trokiñche mew tañi wülal ñi nieelchi fillem, fey tañi llowal fentren kümelkan.

19. ¿Chumngechi kellueymu tüfachi chillkatun?

19 Kom taiñ nieel Jewba mew kupay. Feymu wül-liyiñ taiñ nieel kidu mew, pengelaiñ tunte taiñ piwkeyekefiel ka mañumkefiel ñi femün iñchiñ mu (1 Crónicas 29:17). Dewmangelu ti ngillatuwe ruka, pu israelche “kidu ñi pin mu wül-lu am tañi nieelchi fillem, fey eluwingün ñi ayüwküleal, kom piwke mu am wül-lu tañi nieelchi fillem Jewba mew” (1 Crónicas 29:9). Ka femaiñ iñchiñ, eluwaiñ taiñ wülal Jewba mu kidu taiñ eluetew, femngechi ayüwküleaiñ.