Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

Juan tati Fawtisachefe kimeltukeeiñmu taiñ rumel ayüwküleal

Juan tati Fawtisachefe kimeltukeeiñmu taiñ rumel ayüwküleal

¿AYÜKEPEFIMI may kiñe küdaw trawünche mu, welu pepi femkelaymi? ¿Kakelu peñi kam lamngen pemay femkey feychi küdaw tami ayüel? ¿Niekefuymi may kiñe küdaw Jewba ñi trokiñche mu, welu femwetulaymi? Iñchiñ ayükeiñ taiñ küdawelafiel ta Jewba, welu kiñeke mu ta füchan mu, kutran mu ka filla mu pepi femkelaiñ kom taiñ ayükefel. Ka femngechi rupayafuiñ nieliyiñ pichikeche ka duamfalngele taiñ kuydayafiel kiñeke taiñ pu che. Kafey fillke dungu küme elkünungetukey Jewba tañi trokiñche mu, fey duamfalngetuy chi fentekünuafiel kiñe küdaw taiñ femkefel fentren tripantu, feymu elkünutufiyiñ. Femngechi dungu mu rupaliyiñ, ¿chem rakiduamafuiñ? “Iñche ayükefun tañi doy küdawelafiel ta Jewba, welu pepi femkelan” piafuiñ, feymu weda duamafuiñ. ¿Chem femafuiñ taiñ femngechi duamkülenoal? ¿Chem kelluafeiñmu taiñ rumel ayüwküleal?

Ñi femün Juan ti Fawtisachefe kimeltukeeiñmu chumngechi taiñ rumel ayüwküleal. Kidu elungey rume falinke küdaw, welu rakiduamkelafuy rume ñi chumlerputual tañi mongen. Kidu epe kiñe tripantu müten amuldungukefuy Jesus mu, welu doy fentren antü karselkonkülekefuy. Femngelu rume, Juan rumel ayüwküley. ¿Chem kellueyew? Iñchiñ kay, ¿chumngechi ayüwküleafuiñ rupaliyiñ rume weñangkün dungu mu?

JUAN AYÜWÜLEYEW TAÑI KÜDAW

29 tripantu taiñ mülen antü mu, Juan eluwi ñi kimelelafiel pu che, fey ñi llowal engün tati Mesia. Feypikefuy: “¡Wiñorakiduamtumün tamün wiñotuael ta Ngünechen mew, dew fülpalu am ta Ngünechen tañi longko ülmenngeael!” (Mat. 3:⁠2; Luka 1:⁠12-17). Fentren che küme allkütueyew tañi amuldungun. Feymu kamapu küpayngün ñi allkütuafiel, fentren che wiñorakiduamtuy, fey fawtisawingün. Kafey Juan newen piwkekünuwi, fey feypifi pu wedake longkolechi religioso ñi chumlerpual engün küme rakiduamtunole (Mat. 3:⁠5-12). Kayu küyen rupalu, Juan fawtisafi ta Jesus, ¡tüfa tati doy falin dungu ñi femün ta Juan! Amulechi antü mu, feypifi tati pu che ñi inayafiel ta Jesus, ti feypikünuelchi Mesia (Juan 1:⁠32-37).

Juan femürpuy kiñeke küdaw iney no rume ñi femkenoel, feymu Jesus feypi: “Ngelay iney rume trürniefilu ta Juan” (Luka 7:⁠28). Juan rume falintukefuy tañi nieelchi küdaw ka Jewba rume  kümelkaeyew, feymu ayüwkülefuy. Ka femngechi famülke mu, Jewba rume kümelkakeeiñmu küdawelfiliyiñ kom taiñ piwke mu. Ngüneduamnge ñi feypin kiñe peñi, Terry pingelu. Kidu doy 50 tripantu küdawelkefi ta Jewba tañi domo engu. Terry feypi: “Nieken fentren ayüfalchi küdaw Jewba tañi trokiñche mu”. Kidu wünelerpuy amuldungun mu, küdawi Fetel mu, witranmafi fillke trawünche ka kakelu femngechi küdaw femürpuy, fewla wünelekey amuldungun mu 130 ora fill küyen. Feley llemay, nien mu iñchiñ falinke küdaw Jewba ñi trokiñche mu, ayüwkülekeiñ. Welu duamfali taiñ yafüluwal, fey taiñ rumel ayüwküleal kalerumetule taiñ mongen. Juan tañi femün kimeltukeeiñmu tüfa.

FALINTUAFIYIÑ TAIÑ NIEELCHI KÜDAW

Juan rume falintukefuy kom tañi nieelchi küdaw, feymu rumel ayüwkülefuy. Rakiduamnge kiñe dungu ñi rupan. Dew fawtisawlu Jesus, pichin-ngetuy pu che inakefilu ta Juan, welu doy fentren che inaketufi ta Jesus. Feymu Juan tañi pu inanieetew rume rakiduamingün, fey feypifingün ta Juan: “Tüfeychi wentru tami nütramelmufiel nga, fewla mekey ñi fawtisachen, fey kom che küpakey kisu mew” (Juan 3:⁠26). Feymu Juan ta wiñoldungueyew: “Kiñe mafün mew, tati nielu ti nofia fey lle tati nofio. Feychi nofio ñi nieelchi weni, mülelu ti mafün mew allküñmafilu ñi nütramkameken ti nofio, rume ayükey. Fey ta famngechi iñche rüf dungu mew rume ayüwkülen tati nofio reke” (Juan 3:⁠29). Juan pilafuy tañi wünenkawal Jesus mu, ka rakiduamlay rume: ‘Jesus ñi küdaw doy falin-ngey, feymu falilay iñche tañi küdaw’. Doy may Juan falintukefuy ñi weniyefiel tati nofio, feymu amuley tañi ayüwkülen.

Juan tañi küme rakiduam kellueyew ñi ayüwküleal küdawngelu rume femürpual tañi küdaw. Kidu nasareo ngefuy tañi choyüngen mu, feymu putukelafuy chem pulku no rume (Luka 1:⁠15). Juan ülmen-ngenochi mongen yeniefuy, feymu Jesus feypi: “Juan küpay, fey ifengelay ka putufengelay”. Welu Jesus ka tañi pu inanieetew nasareo ngelafuy, feymu femngechi mongen yenielafuyngün (Mat. 11:⁠18, 19). Kafey Juan femlay kiñe afmatun dungu no rume, welu kidu kimniefuy Jesus tañi pu inanieetew ñi femken may afmatun dungu. Kiñeke che inaniekefulu ta Juan, ka femürpuyngün afmatun dungu inanierpufilu kay ta Jesus (Mat. 10:⁠1; Juan 10:⁠41). Welu Juan rakiduamkelafuy ñi femken tañi pu inanieetew ka ñi femken Jesus tañi pu inanieetew, doy may kidu rakiduamkülefuy chumngechi ñi femürpual ti küdaw Jewba tañi eluetew.

Ka femngechi iñchiñ falintuafiyiñ ti küdaw taiñ eluetew Jewba, fey taiñ rumel ayüwküleal. Taiñ peñi Terry, taiñ dew nütramkapeel, feypi: “Rakiduamkefun chumngechi femürpual kiduke ti küdaw tañi elungeel. Fillke dungu femün tañi küdawelafiel ta Jewba fill antü, fey tüfa rume ayüwülkeenew. Re kümeke dungu piwkentukunien”.

¿Chumngelu fente falin-ngey chem küdaw rume taiñ nieel Jewba ñi trokiñche mu? Feytachi küdaw mu iñchiñ “chaf küdawkeiñ Chaw Ngünechen engu”. Rakiduamniefiliyiñ tüfa, rumel ayüwküleaiñ (1 Kor. 3:⁠9TNM). Rakiduamnge tüfachi pengelün dungu: nieliyiñ kiñe kuyfi llangkatu ka falintufiliyiñ, küme liftuafiyiñ, femngechi amuleay tañi wilüfkülen. Ka femngechi iñchiñ falintufiliyiñ taiñ poyefiel ta Jewba ka müna küme dungu trokifiliyiñ, amuleay taiñ ayüwkülen. Kafey trürümuwlayaiñ kakelu peñi ka lamngen mu, ka rakiduamlayaiñ kidu engün ñi küdaw doy falin-ngey iñchiñ taiñ nieelchi küdaw mu (Gal. 6:⁠4).

DOYÜMAFIYIÑ NGÜNECHEN TAÑI DUNGU

Juan kimniefuy chi tañi alüñmanoal tañi amuldungun küdaw, welu rakiduamkelafuy chi ñi katrüturumengeal (Juan 3:⁠30). Rupalu kayu küyen peno ñi fawtisawün ta Jesus 30 tripantu mu, tati longko ülmen Erode karseltukufalfi ta Juan. Welu Juan fentekünulay ñi nütramkael Chaw Ngünechen mu (Mar. 6:⁠17-20). ¿Chem kellueyew ñi ayüwküleal kaletulu rume tañi mongen? Kidu doyümkefuy Ngünechen ñi dungu.

Karsel mu, Juan kimelelngey fente ñi küme amulen Jesus tañi amuldungun küdaw (Mat. 11:⁠2; Luka 7:⁠18). Juan maneluwkefuy ñi Mesia ngen ta Jesus, welu ramtuwkefuy chi: “¿Femürpupeay may Jesus kom ñi feypilen ti Wirin Chillka ñi femal tati Mesia?”. Juan kimniefuy tati Mesia ñi  ngünenieal, feymu ramtuwkefuy chi: “¿Fülkülepey may ñi ngünenieal ta Jesus? Iñche, ¿lifrenentungepean may?”. Juan rume ayüniefuy ñi kimal chem ñi femal ta Jesus, feymu ramtufalfi: ‘¿Eymi am tati Cristo küpayalu pinieel kam üngümaiñ ta kangelu?’ (Luka 7:⁠19). Feychi mu Jesus fentren afmatun dungu femmekey, fey feypifalfi ta Juan: “Amutumu ka feypiputuafimu ta Juan tamu peel ka tamu allküel. Nütramelputuafimu tati pu trawma ñi pelotun, ka ti pu küntro ñi trekatun, tati pu che nielu lepra kutran ñi tremotun, ti pu pilungelu ñi allküyetun, feyti pu la ñi wiñomongetun, ka ti pu pofre ñi wewpilelngen ti montuluwün dungu” (Luka 7:⁠20-22). Juan küme allkütupelay ñi chem feypipatuetew tañi pu werken.

Tüfachi kümeke dungu yafültukupelafi ta Juan. Tüfa pengelkefuy Jesus ñi femmeken chem ñi feypiel tati Wirin Chillka ñi femal tati Mesia. Jesus lifrenentulafi ta Juan, welu Juan kimniefuy ñi refalta küdawkenon Ngünechen ñi dungu mu. Feymu weda rupamekefulu rume, ayüwkülefuy.

Ngüneduamaiñ ñi femken taiñ pu peñi ka lamngen wall Mapu püle ñi poyeafiel ta Jewba, femngechi rumel ayüwküleaiñ.

Inayentufiliyiñ ñi femün ta Juan, doyümafiyiñ Ngünechen tañi dungu, femngechi ayüwküleaiñ ka newenküleaiñ (Kol. 1:⁠9-11). ¿Chumafuiñ taiñ newenküleal? Papeltuafiyiñ Biblia ka rakiduamaiñ taiñ papeltukeel mu, fey tüfa rakiduamelaeiñmu taiñ refalta küdawkenon Jewba ñi dungu mew (1 Kor. 15:⁠58). Terry tañi domo, Sandra pingelu, feypi: “Fill antü papeltuken Biblia, tüfa kellukeenew ñi doyümafiel Chaw Dios tañi dungu, iñche tañi dungu no. Ka doy fülmawkülen Jewba mu”. Kafey ngüneduamaiñ ñi femken taiñ pu peñi ka lamngen wall Mapu püle ñi poyeafiel ta Jewba. Tüfa kelluaeiñmu taiñ kidutu duamuwnoal, doy may taiñ longkontukual tañi femmeken ta Jewba. Sandra feypi: “Pen mu iñchiw ti video tripalu fill küyen JW Broadcasting® mu, doy kiñewküleyu Jewba tañi pu che mu ka kellukeeyumu tayu ayüwküleal chew rume poyefilu iñchiw ta Jewba”.

Pichiñmay tañi amuldungun ta Juan, welu amuldungun mu kidu pengelkefuy “chumngechi pepiluwün niefuy tati pelon wentru Elia”. Longkontukuaiñ “Elia ta kiñe wentru iñchiñ reke trürlu”, fey ka femngechi femngefuy ta Juan (Luka 1:⁠17; Sant. 5:⁠17). Kidu reke falintuafiyiñ taiñ nieelchi küdaw ka doyümafiyiñ Chaw Ngünechen tañi dungu, femngechi ayüwküleaiñ chem dungu rume rupafuliyiñ.