Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

Feyentun Ngünechen mu newentukukeeiñmu

Feyentun Ngünechen mu newentukukeeiñmu

TAIÑ feyentuel Ngünechen mu * müna newentukukeeiñmu. Weküfü ayüfuy taiñ weniyewenoafiel ta Chaw Dios, welu taiñ feyentun Jewba mu montulkeeiñmu taiñ ngünenkanoaetew Weküfü (Efes. 6:⁠16). Kafey chaftuafuiñ fütrake weda dungu, fütrake wingkul reke felelu. Jesus feypifi tañi pu inanieetew kiñe pichi fün mostasa reke feyentufule Chaw Dios mu engün, feypiafuyngün tati wingkul: “Tripatunge ta tüfa mew. Kañpüle amutunge”, fey tati wingkul kañpüle tripayafuy (Mat. 17:⁠20). Feley llemay feyentuliyiñ Chaw Jewba mu, doy küme weniyeafiyiñ. Feymu kümeafuy taiñ ramtuwal: ¿Chumkey pu feyentukelu Ngünechen mu? Taiñ feyentual Chaw Ngünechen mu, ¿chem müley taiñ falintuafiel? ¿Chumafuiñ taiñ doy feyentual Ngünechen mu? Ka ¿chumngelu (chemu) feyentuaiñ Ngünechen mu? (Rom. 4:⁠3).

¿CHUMKEY PU FEYENTUKELU NGÜNECHEN MU?

Pu feyentukelu Ngünechen mu re kimkelay müten ñi rüfngen Biblia ñi feypin, ¿chumngelu feypiafuiñ tüfa? Biblia feypi pu weküfü ka kimniey ñi mülen ta Ngünechen, “fey müllmüllkey fente ñi llükan mew” (Sant. 2:⁠19). ¿Ka chem chumkey pu feyentukelu Ngünechen mu?

Küme kimnieiñ fill antü tañi wünal ka ñi konal ta antü, ka femngechi küme kimnieiñ ñi femtripayal kom ñi feypikünuel Jewba.

Biblia feypi epu dungu ñi femken pu feyentukelu Ngünechen mu. Wünelu mu feypi “pu feyentukelu Ngünechen mu rüf maneluwkey ñi femtripayal tañi üngümnieel” (Eb. 11:⁠1aTNM). Feyentuliyiñ Jewba mu, maneluwaiñ ñi rüfngen kom tañi feypin ka ñi femtripayal. Rakiduamnge ñi feypifiel Jewba tati pu israelche. Kidu feypifi ñi elkünuel antü ka pun, fey iney no rume katrütulayafeyew tañi wünal ka ñi konal ta antü. Ka femngechi iney no rume katrütulayafeyew ñi femürpual tañi feypikünufiel ta David (Jer. 33:⁠20, 21). ¿Chem rakiduamelkeeiñmu tüfa? Iñchiñ turpu rakiduamlayafuiñ: “¿Konpeay may antü fachantü? Wüle, ¿ka wünpeay may?”. Küme kimnieiñ fill antü tañi wünal ka ñi konal ta antü, Chaw Dios elkünufilu kay. Doyelchi may küme kimnieiñ Chaw Dios ñi femtripayal kom ñi feypikünuel (Is. 55:⁠10, 11; Mat. 5:⁠18).

Biblia ka feypi pu feyentukelu Ngünechen mu “küme kimniey chem rüf kimfalkünukey ñi mülen tati pekenoelchi dungu” (Eb. 11:⁠1bTNM). ¿Chumngechi am ta tüfa? Rakiduamaiñ, kiñe pichi wentru ramtueliyiñmu: “¿Chumngelu kimnieymi ñi rüf mülen ta kürüf?”. Tati kürüf ta pengen-ngekelay, welu feypiafuiñ tati pichi wentru chem dungu rüf kimfalkünukey ñi mülen tati kürüf. Feypiafuiñ tati pichi wentru: “Tati kürüf allküngekey ka nengümkakefi tati tapül, feymu rüf kimnieiñ tañi mülen”. Kimün mu ti pichi wentru chem dungu kimfalkünukey ñi mülen tati kürüf, rüf feyenturpuafuy pengenole rume. Ka femngechi ñi rüf feyentual kiñe che, müley ñi küme kimal chem kimfalkünukey ñi feyngen tati dungu (Rom. 1:⁠20).

DUAMFALI TAIÑ FALINTUAFIEL TI RÜF DUNGU

Chumngechi ngüneduampeiñ, ñi rüf feyentual kiñe che müley ñi küme kimal chem dungu kimfalkünukey ñi feyngen tati dungu. Feymu duamfali taiñ kimürpuafiel “tati rüfngechi dungu” (1 Tim.  2:⁠4). Welu fey müten femlayaiñ. Ti apostol Pablo feypi: “Piwke mew feyentukey ta che” (Rom. 10:⁠10). Re kimlayafiyiñ müten tati rüf dungu, doy may falintuafiyiñ taiñ piwke mew. Femngechi femliyiñ, yenieaiñ taiñ mongen chumngechi ñi ayükeel ta Chaw Ngünechen (Sant. 2:⁠20). Kiñeke che rüf falintukelafi tati rüf dungu, fey pilayafuy ñi nietual kakelu feyentun ka ayüafuy ñi inayal tañi weda illutukeel müten, femngechi famentukefingün ti rüf dungu küme kimfalkülele rume (2 Ped. 3:⁠3, 4; Juda 18). Femngechi dungu rupay fütra kuyfi mu. Fentren che pey afmatun dungu, welu feyenturpulayngün Jewba mu (Núm. 14:⁠11; Juan 12:⁠37). Jewba tañi newen mu kellukefi feychi pu che müten falintukefilu tati rüf dungu, fey ñi feyentuleal kidu mu (Gal. 5:⁠22TNM; 2 Tes. 2:⁠10, 11).

DAVID, ¿CHUMNGECHI FENTE KÜME FEYENTURPUY JEWBA MU?

Kuyfi mu fentren che rume feyentukefuy Chaw Dios mu, kiñe tüfa fey tati longko ülmen David (Eb. 11:⁠32, 33). Welu kom tañi pu che femngechi feyentukelafuy. Longkontukuaiñ ñi femün David tañi wünen peñi, Eliab pingelu. Goliat kintukaduamfi pu israelche, feymu David illkuy. Welu Eliab illkutueyew, femngechi pengeli ñi rüf feyentunon Jewba mu (1 Sam. 17:⁠26-28). Pichilu müten iñchiñ feyentufemkelaiñ Ngünechen mu ka feyentufule rume taiñ pu chaw, iñchiñ ina feyenturpulayafuiñ. Feymu rakiduamlayafuiñ ñi femngechi femün ta David. Doy may küme weniyefi ta Jewba, feymu fente feyenturpuy kidu mu.

David feypi chumngechi fente küme feyenturpuy Jewba mu (Sal. 27:⁠1). David rakiduamkefuy chumngechi ñi montulkeetew Jewba ka ñi chumfiel tañi pu kayñe (Sal. 27:⁠2, 3). Rume falintukefuy tañi piwke mew Jewba tañi ngillatuwe ruka (Sal. 27:⁠4). Üye mu poyemekefuy ta Jewba kakelu israelche engün (Sal. 27:⁠6). Rume ngillatukefuy ta Jewba tañi adnieaetew (Sal. 27:⁠7, 8). Ka ayüniefuy Jewba tañi kimelelaetew tañi rüpü (Sal. 27:⁠11). David rume falintukefuy ñi feyentual Jewba mu, feymu rakiduamkefuy ‘feyentunofuli, mongelelayafun’ (Sal. 27:⁠13).

¿CHUMNGECHI DOY FEYENTUAFUIÑ JEWBA MU?

Inayentufiliyiñ David ñi rakiduam ka ñi femün tañi feypiel ti Salmo 27, fente küme feyentuafuiñ Jewba mu. Chumngechi ngüneduampeiñ, ñi rüf feyentual kiñe che müley ñi küme kimnieal tati rüf dungu. Feymu doy chillkatufiliyiñ tati Biblia ka taiñ fillke papel, Jewba eluaeiñmu tañi newen, fey doy küme feyentuleaiñ kidu mew (Sal. 1:⁠2, 3). Chillkatun mu iñchiñ rakiduamaiñ taiñ papeltukeel mu, femngechi doy mañumküleaiñ Jewba mu. Ka fente mañumkülelu iñchiñ Jewba mu, doy ayünieiñ pengelal taiñ feyentun kidu mew, fey trawüluwaiñ taiñ poyeafiel ka nütramkalelafiyiñ ta che taiñ maneluwün mu (Eb. 10:⁠23-25). Kafey pengelkeiñ taiñ feyentun Jewba mew, fill antü ngillatufiliyiñ ka fentekünunoliyiñ taiñ küdawelkefiel (Luka 18:⁠1-8). Maneluwkeiñ taiñ duamnieetew Jewba, feymu llemay fill antü ngillatunieafiyiñ (1 Tes. 5:⁠17; 1 Ped. 5:⁠7). Feyentuliyiñ Ngünechen mu, kümeke  dungu femaiñ, fey tüfa newentukuaeiñmu taiñ doy küme feyentuleal (Sant. 2:⁠22).

FEYENTUAIÑ JESUS MU

Feychi pun petu ñi lanon Jesus, feypifi tañi pu inanieetew: “Feley tamün maneluwael ta Ngünechen mew ka tamün maneluwael ta iñche mew” (Juan 14:⁠1). Feymu re feyentulayaiñ Jewba mu, kafey maneluwaiñ ka feyentuaiñ Jesus mu. ¿Chumngechi femürpuafuiñ tüfa? Ngüneduamaiñ küla dungu.

¿Chumkey pu feyentukelu Jesus mu?

Wüne, rakiduamaiñ Jewba ñi werküfiel ta Jesus ñi lapayal kake kiñeke iñchiñ mu. Ti apostol Pablo feypi: ‘Fey tüfachi mongen tañi nieel ta iñche, mongeletun tañi feyentun mew Ngünechen tañi Fotüm mew tañi piwkeyeetew, ka chalintukuwlu ñi langümngeael iñche ñi duam’ (Gal. 2:⁠20). Feyentuliyiñ Jesus mu, küme kimnieaiñ ñi lapan kake kiñeke iñchiñ mu. Fey Jesus tañi femün mew Ngünechen wiñoduamtukeeiñmu taiñ kulpan, maneluwküleiñ taiñ rumel mongeleal ka müna küme pengelkeeiñmu Ngünechen taiñ piwkeyenieetew (Rom. 8:⁠32, 38, 39; Efes. 1:⁠7). Rüf feyentulmi Jesus ñi lapan eymi tami duam mu, küme duamaymi ka küme rakiduamaymi (2 Tes. 2:⁠16, 17).

Epu, rumel ngillatuafiyiñ ta Jewba. Jesus ñi lapan iñchiñ mu, kom piwke mu ngillatuafuiñ ta Jewba, ‘femngechi ta kisu taiñ kutranpiwkeyeaetew ta iñchiñ ka taiñ füreneaetew chem antü mew rume duamtuliyiñ taiñ kellungeael’ (Eb. 4:⁠15, 16; 10:⁠19-22). Kafey ngillatuafiel ta Jewba kellukeeiñmu taiñ kulpanoal (Luka 22:⁠40).

Küla, allkütuafiyiñ ta Jesus. Tati apostol Juan feypi: “Pu feyentukelu Ngünechen ñi Fotüm mew rumel mongeleayngün. Welu pu allkütukenofilu tati Fotüm rumel mongen nielayay, doy may Chaw Ngünechen rumel illkutunieaeyew engün” (Juan 3:⁠36TNM). Juan trürümfi taiñ feyentun Jesus mu taiñ allkütukefiel mu, femngechi kimeltuy allkütufiliyiñ ta Jesus, pengelafuiñ taiñ feyentun kidu mew. ¿Chumngechi allkütuafuiñ? Inayaiñ “Kristo tañi ley dungu”, fey tüfa kom tañi kimeltuel ka tañi werküel ta Jesus (Gal. 6:⁠2TNM). Kafey inayaiñ kom taiñ feypikeetew ti “kim manelfal kona” (Mat. 24:⁠45TNM). Allkütufiliyiñ ta Jesus, newentuleaiñ fey taiñ chaftuafiel chem wedake dungu rume fütrake kürüf reke felelu (Mat. 7:⁠24, 25).

DOY FEYENTULEAIÑ JEWBA MU

Kuyfi mu kiñe wentru feypifi ta Jesus: “Iñche ta feyentun. ¡Kelluen tañi doy feyentuael!” (Mar. 9:⁠24). Tüfachi wentru feyentukefuy Jewba mu, welu kimtukuy ñi duamfalngen tañi doy feyentual. Ka femngechi kiñeke mu kom iñchiñ duamnieiñ doy feyentual Chaw Dios mu. Feymu petu taiñ rupanon wedake dungu, eluwaiñ taiñ doy feyentual Jewba mu. ¿Chumngechi femürpuafuiñ tüfa? Chillkatuafiyiñ Biblia ka rakiduamaiñ taiñ papeltukeel mu, femngechi doy mañumküleaiñ Chaw Jewba mu. Kafey poyeafiyiñ ta Jewba kiñentrür taiñ pu peñi ka lamngen iñchiñ, nütramkalelafiyiñ kakelu che Ngünechen tañi dungu ka rumel ngillatuafiyiñ ta Chaw Jewba. Femngechi femliyiñ, doy feyentuleaiñ Jewba mu. Fey rumel müleaiñ Ngünechen tañi piwkeyechen mew, tüfa tati doy falin dungu taiñ nierpuafel (Juda 20, 21).

^ parr. 2 Tati Biblia Ngünechen ñi Küme Dungu kiñeke mu feypi “mupiltun”, welu tüfachi trokiñ mew feypingeay “feyentun” ka “feyentun Ngünechen mu”.