Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 TROKIÑ ÑI CHILLKATUNGEAL 15

Inayentuafiyiñ ta Jesus taiñ tüngduamküleal

Inayentuafiyiñ ta Jesus taiñ tüngduamküleal

“Ngünechen eluaeymünmew kisu tañi küme tüngün, fey tüfachi fütra küme tüngün ta doy kümey che ta pepil-layafuy ñi nieael ta küme tüngün” (FILIP. 4:7).

113 ÜLKANTUN Ti küme felen taiñ nieel

¿CHEM KIMAIÑ? *

1, 2. Jesus, ¿chumngelu rume rakiduamkülefuy?

FEYCHI antü epe puwlu ñi layal ta Jesus rume rakiduamkülefuy. ¿Chumngelu? Kidu awükayaeyew ka langümaeyew wedake wentru. Welu rakiduamkülelay ñi langümngeal müten, ka dungu rume rakiduameleyew. Küpa ayüwülfi tañi Chaw fente ñi piwkeyeniefiel. Jesus fentepuwle ñi mongen püntütripanole Jewba mu, kellukonafuy ñi liftuñmangeal Chaw Dios tañi üy ka kom pu che rumel mongeleafuy. Feymu Jesus fente ñi piwkeyeniefiel tañi Chaw ka tati pu che eluwkülefuy ñi femal Jewba ñi ayükeel.

2 Weda dungu rupalu rume, Jesus tüngduamkülefuy. Kidu feypifi tañi pu apostol: “Eleluwayiñ iñche ñi küme tüngün” (Juan 14:27). Kidu küme weniyefi ta Ngünechen, fey ‘Ngünechen ñi eluetewchi küme tüngün’ yafültukueyew ta Jesus, feymu tüngduamkülefuy ñi rakiduam ka tañi piwke (Filip. 4:6, 7).

3. Tüfachi chillkatun mu, ¿chem ngüneduamaiñ?

3 Jesus reke, femngechi rupalayaiñ chi, welu rupayaiñ wedake dungu mu (Mat. 16:24, 25; Juan 15:20). Jesus reke, kiñeke mu rume rakiduamküleafuiñ. Feymu wedake dungu rupaliyiñ, ¿chumafuiñ taiñ müte rakiduamkülenoal? Ngüneduamaiñ küla dungu ñi chumün ta Jesus amuldungupalu Mapu mu ka chumngechi inayentuafuiñ rupaliyiñ wedake dungu mu.

 JESUS MÜCHAYKE NGILLATUKEFI TA JEWBA

Ngillatuliyiñ, tüngduamküleafuiñ. (Inaduamnge parrafo 4-7).

4. 1) Jesus miyawpalu Mapu mew fentren rupa ngillatuy, ¿chem dungu mew pengeli tüfa? 2) Rupalu chi tripantu, tati pu wünenke kristiano ¿chem dungu feypilelngey 1 Tesalonisense 5:17 mew?

4 (Papeltunge 1 Tesalonisense 5:17). Feychi antü petu ñi lanon ta Jesus fentren rupa ngillatuy. Petu ñi elkünunon ti trawün ñi akordangeal tañi lan, ngillatufi ta Jewba (1 Kor. 11:23-25). Kafey petu ñi amunon chew ñi femngeel ti Paskua, kidu ka tañi pu disipulu trür ngillatuyngün (Juan 17:1-26). Pun mew, puwingün Getsemani pingechi lelfün mu, fey Jesus müchayke ngillatuy (Mat. 26:36-39, 42, 44). Kafey epe puwlu ñi layal, kidu ngillatufi tañi Chaw (Luka 23:46). Feymu llemay Jesus ngillatufi ta Jewba kom ñi rupan feychi antü.

5. Pu apostol, ¿chumngelu llükayngün?

5 Feymu, ¿chem kellueyew ta Jesus ñi püntütripanoal Jewba mu? Ti ngillatun. Rumel ngillatukefi tañi Chaw, femngechi pengelkünuy ñi maneluwkülen kidu mu. Welu feychi pun, pu apostol fentekünuyngün ñi ngillatukefiel ta Jewba. Feymu rupalu kiñe weda dungu, llükayngün (Mat. 26:40, 41, 43, 45, 56). Rupaliyiñ wedake dungu mu, inayentuafiyiñ ñi femün ta Jesus, fey ngillatuafiyiñ ta Chaw Ngünechen femngechi taiñ püntütripanoal kidu mu. Welu, ¿chem dungu mu ngillatuafuiñ?

6. Maneluwal Jewba mu, ¿chumngelu kellukeeiñmu taiñ tüngduamküleal?

6 ‘Eluen doy maneluwal’ piafuiñ ta Jewba (Luka 17:5; Juan 14:1). Satana weda femkefi pu inaniekefilu ta Jesus, feymu kom iñchiñ  duamnieiñ doy maneluwal Jewba mu (Luka 22:31). Feymu rupaliyiñ wedake dungu mu, maneluwaiñ Jewba mu, tüfa kelluaeiñmu taiñ tüngduamküleal. Iñchiñ femafuiñ kom taiñ pepilnieel taiñ küme chaftuafiel wedake dungu, welu maneluwaiñ Jewba mu. Kidu küme kimniey chumngechi ñi norümal ti weda dungu puwchi antü mew, feymu Jewba müten kelluaeiñmu taiñ rume rakiduamkülenoal. Femngechi taiñ rakiduam ka taiñ piwke tüngduamküleay (1 Ped. 5:6, 7).

7. Ñi feypin ta Robert, ¿chem kimeltueiñmu?

7 Chem weda dungu rupaliyiñ rume, ti ngillatun kelluafeiñmu taiñ tüngduamküleal. Ngüneduamaiñ ñi rupan ta kiñe longkolelu doy pura mari tripantu nielu Robert pingey, kidu feypi: “Ñi feypin Filipense 4:6, 7 müna kelluenew ñi küme chaftuafiel wedake dungu tañi mongen mu. Pichin plata niefun. Kafey longkolewelafun trawünche mu” pi. ¿Chumi ñi tüngduamküleal? Kidu feypi: “Rume rakiduamkülelu iñche, pürüm ngillatukefiñ ta Jewba”. Ka feypi: “Müchayke ngillatufili ta Chaw Jewba, doy tüngduamküleken”.

JESUS DOYÜMFI AMULDUNGUCHEAL

Amuldungucheliyiñ, tüngduamküleafuiñ. (Inaduamnge parrafo 8-10).

8. Chumngechi ñi feypin Juan 8:29, ¿ka chem dungu tüngduamelkefi ta Jesus?

8 (Papeltunge Juan 8:29). Inantukungelu rume, Jesus tüngduamkülefuy. ¿Chumngelu? Kidu kimniefuy ñi ayüwülfiel tañi Chaw. Jesus inakefi kom ñi feypietew ta Jewba, küdawngelu rume ñi femal. Kidu fente piwkeyeniefilu tañi Chaw doyümi ñi küdawelafiel kom ñi mongen mu. Wenu mu kellufi ta Jewba ñi dewmayafiel itrokom mülelu (Prov. 8:30). Ka nagpalu Mapu mu, kidu  wüldunguchekey tañi Chaw mu (Mat. 6:9; Juan 5:17). Tüfa müna ayüwüleyew ta Jesus (Juan 4:34-36).

9. Doy amuldunguliyiñ, ¿chumngelu doy tüngduamküleaiñ?

9 Inayentuafiyiñ ñi femün Jesus, fey doy küme küdawelafiyiñ ta Jewba (1 Kor. 15:58). Doyümliyiñ ti amuldungun küdaw, doy küme rakiduamaiñ rupan mu wedake dungu (Hecho 18:5). Rakiduamnge tüfa: iñchiñ wedake dungu rupakeiñ, welu taiñ lof mu tati pu che taiñ amuldungukefiel doy wedake dungu mu rupakey. Welu kiñeke che piwkeyerpufingün ta Jewba ka inafingün ñi ngülamtuel, feymu doy küme mongen nietuyngün ka ayüwkületuyngün. Ngüneduamliyiñ ñi femngechi rupan ta che “Jewba rüf duamyekeeiñmu” pikeiñ, fey doy tüngduamküleaiñ. Kiñe lamngen ngüneduami ñi rüfngen tüfa. Kidu che trokiwkülewelay ka depresion kutran niey, welu feypi: “Doy amuldunguken, fey doy küme duamküleken ka ayüwküleken”. ¿Chumngelu feypi tüfa? “Amuldungun mu, doy fülkonkülen Jewba mu” pi.

10. Ñi feypin ta Brenda, ¿chem kimeltueiñmu?

10 Ngüneduamaiñ ñi rupan ta kiñe lamngen, Brenda pingey. Kidu ka tañi domo püñeñ rume kutranküleyngu. Brenda yafüngewelay ka pepi trekawelay, feymu silla de rueda mu miyawkey. Kiñeke mu, amuldungukey fill ruka püle. Welu doy wirintukukey karta, femngechi amuldungukey. Kidu feypi: “Kimnien chem no rume tremoltulayafenew puwle wüla Jewba ñi Gobierno. Feymu eluwün ñi doyümafiel amuldungucheal. Femün mu tüfa, rakiduamwelan ti wedake dungu tañi rupan. Doy may kellukefiñ kom feychi che ñi wirintukulelfiel karta ka tañi amuldungukefiel. Femngechi rakiduamken kom ti kümeke dungu ñi rupayal küpalechi antü mu”.

JESUS ELUWI ÑI KELLUAETEW TAÑI PU WENI

Kümeke weni nieliyiñ, tüngduamküleafuiñ. (Inaduamnge parrafo 11-15).

11, 12. Pu apostol rüf weniyekefingün ta Jesus, ¿chumngechi pengelingün tüfa?

11 Amuldungulu Jesus, pu feyentulechi apostol rüf weniyekefingün. Biblia feypi: ‘Kiñe küme weni, kiñe peñi reke feley’, femngechi weni ngerkefuyngün pu apostol (Prov. 18:24). Jesus falintukefi femngechi weni. Welu mülepalu Mapu mu “kisu ñi pu peñi no rume feyenturkelay ta kisu mew” (Juan 7:3-5). Kafey tañi pu che “weluduam” pieyew engün (Marku 3:21). Feymu feychi pun petu ñi lanon ta kidu, feypifi tañi pu apostol: “Eymün ta kompañkiyawülmuken ta iñche tamün yafülmuafiel ñi kutrankawün mew” (Luka 22:28).

12 Welu kiñeke mu, pu apostol welulkayngün. ¿Chumi Jesus? Rakintukulafi ñi welulkan engün. Doy may ngüneduami ñi küme feyentulen engün (Mat. 26:40; Marku 10:13, 14; Juan 6:66-69). Feychi pun petu ñi lanon, Jesus feypifi feychi pu manelfal wentru: “Iñche ñi pu weni piwayiñ, fey iñche am kimelfilu ta eymün kom ñi chem pietew ta iñche ñi Chaw” (Juan 15:15). Feley llemay, Jesus ñi pu weni müna yafültukueyew. Kidu engün müna kellukefingün ta Jesus ñi amuldungucheal, feymu kidu rume ayüwküley (Luka 10:17, 21).

13. 1) Kakelu che ka rüf weniyekefi ta Jesus, ¿chumngechi pengelingün tüfa? 2) Jesus ñi pu weni, ¿chem duamelfi?

13 Kakelu che ka rüf weniyekefi ta Jesus. Kiñeke wentru ka kiñeke domo kellufingün ñi amuldungucheal kafey kakelu duamfalchi dungu mew. Kiñeke engün llowfi ñi ruka mu ñi imeal (Luka 10:38-42; Juan 12:1, 2). Kakelu che kompañyefi ta Jesus ka wüdamkafi ñi nieelchi chemkün (Luka 8:3).  Jesus küme weni ngefuy, feymu pu che küpa weniyekefeyew. Kidu müna kelluchekey ka rakiduamlay ñi welulkanoal engün. Jesus nielafuy ta kulpan, welu ñi pu weni kulpakey. Kulpanchengelu rume engün, Jesus müna mañumtufi ñi kellukeetew engün. Feley, kidu engün müna kellueyew ta Jesus ñi tüngduamküleal.

14, 15. 1) ¿Chumafuiñ taiñ nieal kümeke weni? 2) ¿Chumngechi kelluafeiñmu engün?

14 Kümeke weni nieliyiñ, tüfa kelluafeiñmu taiñ püntütripanoal Jewba mu. Feymu, ¿chumngechi kümeke weni nieafuiñ? Rüf weniyeafiyiñ ta che, fey kidu engün küpa weniyeaeiñmu (Mat. 7:12). Kiñe dungu, tati Biblia yafültukueiñmu wülal taiñ tiempo, fey taiñ kelluafiel ta pu che, doyelchi may pu “fillaluwkülelu” (Efes. 4:28). Ramtuwafuymi: ¿Kelluafuiñ kiñe peñi kam lamngen trawünche mu? Kiñe peñi kam lamngen pepi tripanole ñi ruka mu, ¿ngillakalelafun chem rume? Kiñe familia pichin plata niele, ¿elelmeafun iyael? Adümfili ti sitio jw.org® ka JW Library®, ¿kelluafun ta kakelu che ñi ka adümafiel? Re rakiduamliyiñ taiñ kelluafiel ta kakelu che, doy ayüwküleafuiñ (Hecho 20:35).

15 Rupaliyiñ wedake dungu mu, taiñ pu weni kelluafeiñmu taiñ tüngduamküleal. Kiñe wentru Eliu pingey, allkütufi ta Job nütramkalu ñi weda rupan. Ka femngechi kellukeeiñmu taiñ pu weni. Nütramelfiliyiñ taiñ chum duamkülen, kidu engün ñochi piwke mu allkütuaeiñmu (Job 32:4). Üngümlayaiñ taiñ feypiaetew chem taiñ femal, welu may ngülamtueliyiñmu  Biblia mu allkütuafiyiñ llemay (Prov. 15:22). Tati longko ülmen David mallmawlay, doy may eluwi ñi kelluaetew tañi pu weni. Iñchiñ ka femngechi femaiñ. Rupaliyiñ wedake dungu mew, eluwaiñ taiñ kelluaetew taiñ pu weni (2 Sam. 17:27-29). Feley llemay, pu kümeke weni fey ta kiñe regalo reke küpay Ngünechen mu (Sant. 1:17).

CHUMNGECHI TÜNGDUAMKÜLEAFUIÑ

16. Chumngechi ñi feypin Filipense 4:6, 7, ¿chem dungu mew müten elungeafuiñ küme tüngün?

16 (Papeltunge Filipense 4:6, 7). “Cristo Jesus mew” müten Jewba eluafeiñmu kidu ñi küme tüngün, ¿chumngelu? Kimtukuliyiñ kom ñi femken Jesus ñi küme tripayal Jewba ñi ayükeel ka maneluwliyiñ tüfa mu, rüf tüngduamküleafuy taiñ piwke ka taiñ rakiduam. Rakiduamnge tüfa: Jesus tañi lan mu, iñchiñ perdonayafeiñmu Jewba (1 Juan 2:12). ¡Müna yafülduamelkeeiñmu tüfa! Jesus longko ülmenkülele Jewba ñi Gobierno mu, küme elkünutuay kom taiñ weda femetew Satana, femngechi akordawelayafiyiñ taiñ weda rupan (Is. 65:17; 1 Juan 3:8; Apok. 21:3, 4). ¡Kom piwke mu ayünieiñ ñi femtripayal tüfa! Jesus elfalkünueiñmu taiñ amuldungual, küdawngey tüfa. Welu kidu kelluntukukeeiñmu, rumel müleay iñchiñ mew puwle wüla afaelchi antü (Mat. 28:19, 20). ¡Newentukukeeiñmu tüfa! Fey llemay, duamnieiñ yafülduamküleal, kom piwke mu maneluwal ñi femtripayal kümeke dungu ka newenküleal, femngechi rüf tüngduamküleaiñ tati.

17. 1) Kiñe kristiano, ¿chem küla dungu femafuy ñi tüngduamküleal? 2) Ñi feypikünuel ta Juan 16:33, ¿chem pepi femafuiñ?

17 Fillke wedake dungu kontuelmu, ¿chumafuymi tami tüngduamküleal? Inayentuafuymi ñi femel ta Jesus. Küla dungu femafuymi: kiñe, müchayke ngillatukeaymi. Epu, inayafimi tami chem feypietew Jewba ka fente küme amuldungucheaymi, küdawngele rume. Ka küla, eluwaymi tami kelluaetew tami pu weni. Femngechi femülmi, Ngünechen ñi küme tüngün yafülnieñmayaeymu tami piwke ka tami rakiduam. Fey küme chaftuafimi chem weda dungu rume, chumngechi ñi femken ta Jesus (papeltunge Juan 16:33).

41 ÜLKANTUN Allkütuñmayafen tañi ngillatun

^ parr. 5 Kom iñchiñ rupakeiñ wedake dungu mu, feymu tüngduamkülelayafuiñ. Peaiñ küla dungu ñi femün ta Jesus ka chumngechi tüngduamküleafuiñ wedake dungu rupaliyiñ rume.