Amual ti dungu

Amual tati trokiñ dungu mu

“Inaye ngümakeaymün pu ngümakelu mew”

“Inaye ngümakeaymün pu ngümakelu mew”

“Yafültukuwmün ka welukonke newentuwkülemün” (1 TESALONISENSE 5:11).

ÜLKANTUN: 90 KA 111 *

1, 2. Pu rume weñangkülelu ñi lan mu tañi piwkeyenieelchi che, ¿chumngelu (chemu) falin-ngey taiñ kimal chumngechi yafültukuafiel? (Inaduamnge ti adentun tüfachi pagina mu.)

TAIÑ lamngen Susi feypi: “Lalu tayu püñeñ, rume kutrantupiwkelekefuyu epe kiñe tripantu mew”. Kafey larumelu tañi domo, kiñe peñi feypi: “Feypilayafun tunte ñi allfülefun reke tañi kalül”. Fentren che ka femngechi rupakeyngün. Tati trawünche mu, fentren peñi ka lamngen rakiduamlayngün ñi layafel tañi piwkeyenieelchi che petu ñi akunon ti Armagedon. Feymu weñangkülelmi ñi lan mu tami piwkeyenieelchi che, ¿chumngechi yafüluwafuymi? Ka kiñe che femngechi rupalu, ¿chem chumafuy?

2 Kiñeke che feypikey: “Rupale ta antü, ngüyünentuaymi tami weda rupan”. Welu, ¿rüfngepey may tüfa? Kiñe lantu domo feypi: “Doy kümey ñi feypingeal: ‘Kümeke  dungu femülmi tami mongen mew, fey kümelkaletuaymi’”. Ñi tremoltual kiñe allfen, duamfalngey ñi rupayal ta antü ka ñi dapingeal. Ka femngechi rupakey ñi kümelkaletual kiñe che rume weñangkülelu. Feymu, ¿chumngechi yafültukuafuiñ pu rume weñangkülelu ñi lan mu tañi piwkeyenieelchi che?

JEWBA “TAIÑ YAFÜLKEETEW”

3, 4. Jewba kimniey taiñ chum duamkülen, ¿chumngelu feypiafuiñ tüfa?

3 Taiñ Chaw Jewba, fey taiñ doy küme yafültukukeetew (papeltunge 2 Korintio 1:3, 4). Iney no rume doy küme kimlay Jewba mu ñi chum duamkülen pu che. Feymu feypikünueiñmew: “Iñche tami yafültukukeetew” (Isaías 51:12; Salmo 119:50, 52, 76).

Jewba rume duamniey ti antü tañi wiñomongeltuafiel ñi pu nor piwkeyeetew

4 Abraam, Isaak, Jakob, Moyse, ti longko ülmen David ka kakelu che Jewba ñi piwkeyefiel ka layngün (Números 12:6-8; Matew 22:31, 32; Hecho 13:22). Welu fey ka müten no, kafey Jewba langümüñmangey “ñi sakin Fotüm”, tañi rume piwkeyeniefiel (Matew 3:17). Feymu rakiduamfalngelay tunte ñi weda duamün Jewba, tañi Fotüm ñi weda langümngen mu (Juan 5:20; 10:17). Biblia feypi Jewba ñi rume duamnieel ti antü tañi wiñomongeltuafiel ñi pu nor piwkeyeetew (Job 14:14, 15). Feychi antü mew ayüwküleayngün ka kutranwelayayngün.

5, 6. Jewba, ¿chumngechi yafültukukeeiñmew?

5 Rüf maneluwafuiñ taiñ kelluaetew Jewba. Feymu eluwküleaiñ ñi llellipuafiel ka nütramkalelafiel tunte taiñ kutrantupiwkelen. Jewba kimniey taiñ chum duamkülen ka yafülduamkeeiñmew, ¡kimal tüfa müna newentukeeiñmew! Welu, ¿chumngechi yafültukukeeiñmew Jewba?

6 Fillke dungu mu, kiñe tüfa fey tañi newen mu (Hecho 9:31). Jesus feypikünuy tañi Chaw ñi eluafiel tañi newen kom pu che ñi ngillatukeetew (Luka 11:13). Susi ka feypi: “Fentren rupa lukutunagiyu ka llellipufiyu ta Jewba tayu kelluaetew. Fey Ngünechen elueyumu tañi tüngün, tüfa rumel yafülmaeyumew tayu piwke ka rakiduam” (papeltunge Filipense 4:6, 7).

JESUS KIMNIEY TAIÑ CHUM DUAMKÜLEN

7, 8. ¿Chumngelu maneluwafuiñ taiñ yafüduamelaetew Jesus?

7 Mülepalu Mapu mew, Jesus tañi feypin ka femün mew inayentufi tañi Chaw Jewba ñi küme femngen (Juan 5:19). Chaw Ngünechen werküeyew ta Mapu mew ñi yafültukuafiel pu kutrantupiwkelelu ka “kom tati pu weñangkülelu” (Isaías 61:1, 2; Luka 4:17-21). Jesus kimniefuy pu che ñi chum duamkülen ka küme piwke mu küpa  kellufi, ka tati pu che ngüneduamfingün tüfa (Ebrew 2:17).

8 Jesus wechengelu, ka layeluwi chi. Kidu tañi chaw Mapu mew, Jose pingefulu, lapelay chi petu wechengelu Jesus * (inaduamnge ti kimal dungu). Jesus rume piwkeyechefengefuy, feymu müna weñangkülefuy chi tüfachi dungu mu, ka doy weñangküleyew pefiel tañi pu che ñi kutrankawmeken, tüfa müna küdawngefuy chi Jesus mew.

9. Lalu Lasaru, Jesus ¿chumngechi pengeli tañi kimfiel pu che ñi chum duamkülen?

9 Amuldunguyawlu Jesus, pengeli ñi rüf kimfiel pu che ñi chum duamkülen. Lalu tañi sakin weni Lasaru, Jesus kimniefuy ñi wiñomongeltuafiel tañi weni. Welu pefiel mu ta Maria ka Marta ñi fente kutrankawkülen, kidu kutranpiwkeyefi engu, feymu ngümay (Juan 11:33-36).

10. ¿Chumngelu maneluwküleafuiñ Jesus ñi kutrantupiwken taiñ weñangkün mu?

10 Ngüneduamal Jesus ñi femel kuyfi mu, ¿chumngechi kelluafeiñmew? Biblia kimeltueiñmu Jesus ñi kaletukenon, feymu feypi: “Jesukristo ta wiya reke, fachantü ka rumel mu femngechi feleay” (Ebrew 13:8, TNM). Kafey kidu tañi duam mu iñchiñ nierpuafuiñ afnoachi mongen, feymu Biblia feypi “taiñ eluaetew ta mongen”. Ka femngechi, Jesus rupay kutrankawün mew, feymu pepikawküley “ñi kelluafiel kom ti pu che kintukaduamngelu” (Hecho 3:15; Ebrew 2:10, 18). Feley llemay, rüf maneluwküleafuiñ Jesus ñi kutrantupiwken taiñ weñangkün mu. Kidu kimniey taiñ weda rupan ka yafültukuaeiñmew “chem lelen mew rume duamtuliyiñ taiñ kellungeael” (papeltunge Ebrew 4:15, 16).

YAFÜLTUKUNGEIÑ WIRIN CHILLKA MEW

11. ¿Chem texto doy yafültukukeeymu?

11 Kimnieel Jesus tunte ñi kutrantupiwken Lasaru ñi lan mu yafültukukeeiñmu, welu Biblia mew müley kakelu dungu taiñ yafültukuafetew. Tüfa afmatukelaeiñmew, kimnielu am iñchiñ “kom tati kuyfi wirintukuelchi dungu ta Wirin Chillka mew, wirintukungey iñchiñ taiñ kimeltungeael. Fey ta famngechi taiñ nieael maneluwün Ngünechen mew tati Wirin Chillka ñi duam” (Romanu 15:4). Feymu, rume weñangkülelmi ñi lan mu kiñe tami piwkeyenieelchi che, tüfakechi texto yafültukuafeymu:

  • “Jewba fülmaniekefi kom pu weñangkülelu ñi piwke; ka montulkefi kom pu weda duamkülelu” (Salmo 34:18, 19).

  • “Rume fentrelu iñche mew tañi fill rakiduamkülen, eymi newentuen ka yafüduamelen” (Salmo 94:19).

  • “Fey iñchiñ taiñ Ñidol Jesucristo ka müten ka Ngünechen, iñchiñ  taiñ Chaw, kisu ñi küme piwkeyechen mew piwkeyeeiñmew ka elueiñmew ti rumel yafüluwün ka kiñe küme maneluwün. Yafültukulelaeymünmew tamün piwke ka newen elunieaeymünmew” (2 Tesalonisense 2:16, 17) * (inaduamnge ti kimal dungu).

TATI TRAWÜNCHE MÜNA YAFÜLTUKUAFEIÑMU

12. ¿Chumngechi yafüduamelafuiñ ta kakelu che?

12 Lale kiñe tami piwkeyenieelchi che, peafuymi yafüluwün tati trawünche mew (papeltunge 1 Tesalonisense 5:11). Feymu iñchiñ, ¿chumngechi newentuafuiñ ka yafüduamelafuiñ pu “weda duamkülechi piwke”? (Proverbios 17:22.) Longkontukuaiñ ñi mülen “kiñe antü ñi ñüküfküleal ka kiñe antü ñi dungual” (Eclesiastés 3:7). Inaduamafiyiñ ñi feypiel epu lamngen. Kiñe lantu domo, Dalene pingelu, feypi: “Pu weñangkülelu duamnieyngün ñi feypial tañi rakiduamkeel ka tañi chum duamkülen. Feymu müley taiñ allkütuafiel ñüküfkülen mu, tüfa tati doy küme dungu taiñ femafel”. Junia ñi lamngen langümuwi, fey kidu feypi: “Iñchiñ newe kimlayafuiñ tunte ñi weñangkülen kiñe che, welu yafüluwliyiñ taiñ kimal, tüfa falintufali tati”.

13. ¿Chem akordayafiyiñ?

13 Akordayafiyiñ tüfa: lale kiñe taiñ piwkeyenieelchi che, taiñ chum duamkülen ka chumngechi pengelkeiñ taiñ weñangkülen kakerumeafuy kakelu che mu. Kiñeke mu, müna küdawngeafuy feypial tunte taiñ weñangkülen. Feymu Biblia feypi: “Tati piwke kimniey tunte ñi weñangküduamkülen, ka iney no rume koneltulayafuy kidu ñi ayüwün mu” (Proverbios 14:10). Ka kiñeke mu, feypifuliyiñ rume taiñ chum duamkülen, tati pu che newe adümlayafuyngün taiñ küpa feypiel.

Fentren rupa mu, doy kümeafuy inayal tüfachi ngülam: “Inaye ngümakeaymün tati pu ngümakelu mew”

14. ¿Chem femafuiñ ñi yafültukuafiel pu weñangkülelu?

14 Küdawngeafuy kimal chem feypilelafiel pu weñangkülelu. Welu Biblia feypi: “Tati kimche ñi feypiel yafülduamelkey” (Proverbios 12:18). Ñi kimal chem feypial tañi yafültukuafiel, fentren peñi ka lamngen ngüneduamfingün ti papil Cuando muere un ser querido * (inaduamnge ti kimal dungu). Welu fentren rupa mu, doy kümeafuy inayal tüfachi ngülam: “Inaye ngümakeaymün tati pu ngümakelu mew” (Romanu 12:15). Kiñe lantu domo, Gaby pingelu, feypi: “Iñche tañi ngümaken mew pengelken tañi chum  duamkülen. Feymu tañi pu weni ñi inaye ngümaken iñche mu, müna yafültukukeenew. Femngechi, feychi mew kidulelu trokiwkelan”.

15. Küdawtulmi tami yafültukuafiel pu che tami feypin mu, ¿chem chumafuymi? (Inaduamnge ti wichulechi dungu “ Chem feypiafuiñ taiñ yafültukuafiel pu weñangkülelu”).

15 Küdawtulmi tami yafültukuafiel pu che tami feypin mu, doy kümeafuy tami wirintukulelafiel kiñe texto Biblia mu ñi yafültukuaetew, wirintukuafuymi kiñe küme dungu ti la mew, kam kiñe küme rupan tami akordafiel kidu mew. Femafuymi tüfa kiñe tarjeta kam carta mu, kafey werkülelafuymi kiñe wirin dungu internet kam celular mew. Junia feypi: “Wirintukulelngekelu kiñe dungu tañi yafültukuaetew, kam mangeletew mu kiñe lamngen tayu mür rupaleal, feypilayafun tunte ñi kellukeetew tüfa. Feychi dungu pengelenew ñi mülen che ñi piwkeyeetew ka dapikeetew”.

16. ¿Ka chem femafuymi ñi yafültukuafiel ta kakelu?

16 Ngillatuafuiñ tati pu kutrankawkelu ñi duam mu, kam kiñentrür llellipuafuiñ. Müna küdawngeafuy femal tüfa, rakiduamafuymi chi: “Femli tüfa, ngümayan kam ngellu dunguan”. Welu kom piwke mu llellipulmi, müna yafültukuafuymi tati weñangkülelu. Dalene feypi: “Tañi llidmepaetew pu lamngen, kiñeke mu ramtulelkefiñ ta kiñe lamngen: ‘¿Llellipuafuymi?’. Fey ella konlu tañi llellipun, ngellu tripakey ñi dungun. Welu ñochikechi, doy küme dungurpukeyngün, ka ngillatukeyngün  kom ñi piwke mu. Kidu engün tañi maneluwken Jewba mu, ñi piwkeyen ka chumngechi ñi dapikeetew, rume yafültukuñmaenew tañi mupiltun”.

AMULEPE TAIÑ YAFÜLTUKUCHEKEN

17-19. ¿Chumngelu fentekünulayaiñ taiñ yafültukukefiel taiñ pu peñi ka lamngen?

17 Kakerumey taiñ femngen, feymu kimlayafuiñ tunteñma mu kiñe che weñangküleafuy ñi lan mu tañi piwkeyenieelchi che. Ellaka mew, tati ngen la ñi pu che ka weni llidmepaeyew. Welu rupalu ta antü, amutuy ta che, ka ti ngen la petu duamniey ñi yafültukungeal, petu weñangkülelu am. Feymu müley taiñ eluwküleal ñi kelluafiel. Biblia feypi: “Kiñe rüfngechi weni rumel piwkeyechekey, ka kiñe peñi reke feley ñi mülen mu weñangkün” (Proverbios 17:17). Feley llemay, tati weñangkülelu petu duamniele taiñ kellu, iñchiñ eluwküleaiñ taiñ yafültukuafiel (papeltunge 1 Tesalonisense 3:7).

18 Kiñe che fillke dungu mew wiño weñangkürumeafuy. Kiñe ülkantun, foto, kam kiñe nümün rakiduamelafeyew tañi lachi che mu, ka femngechi rume weñangkülafeyew kiñe dungu ñi femel, allkütuel, kiñe küyen kam fülkülele ñi akordangeal ti antü ñi niewün kam ti antü ñi lan. Lale kiñe che ñi afkadi, müna küdawtuafuy ti wünen rupa ñi kidu amual kiñe fütra trawün mew kam ti Trawün Jesus tañi lan ñi akordangeal. Kiñe lantu peñi feypi: “Kidulewetulu iñche, rakiduamün ñi rume weñangkülaetew tañi akordayal ti antü niewlu tañi afkadi engu. Küdawngefuy llemay feychi antü. Welu fentren peñi ka lamngen adkünuyngün kiñe trawün tañi sakinke weni mu, femngechi ñi kidulenoal feychi antü mu”.

19 Rakiduamtukuaymi tüfa, ngelay taiñ yafültukuafiel pu weñangkülelu kiñeke sakinke antü müten. Junia feypi: “Müna kelluenew tañi yafültukungen ka llidmengen fülkülenolu rume kiñe sakin antü ñi akordangeal. Iñche rume falintukefiñ feychi rupan, ka müna yafültukuenew”. Feymu, kellunofiliyiñ rume tati weñangkülelu ñi kutrantupiwkewenoal, fillke dungu femafuiñ ñi yafültukuafiel (1 Juan 3:18). Gaby feypi: “Müna mañumkülen ta Jewba mu, pu longkolelu am piwkeyen mu kelluenew, ka kidukünukelaenew rupalu küdawngechi dungu mu. Kidu engün tañi kellun mew, iñche trokifiñ ta Chaw Jewba tañi pangkoetew reke kom tañi wedake dungu mew”.

20. Jewba ñi femal küpalechi antü mew, ¿chumngelu yafültukukeeiñmew?

20 Chaw Jewba, taiñ yafültukukeetew, wiñomongeltufile pu layelu, ti lan dungu weñangkülwelayaeiñmew, ¡kimnieel tüfa müna yafültukukeeiñmew! (Juan 5:28, 29.) Biblia feypikünuy: “Tati Ñidol Ngünechen Jewba lümüafi [apümkayafi] tati lan dungu, ka liftuñmayafi engün tañi külleñu ñi ange mew” (Isaías 25:8). Akule feychi antü, duamfalngelayay ñi ‘inaye ngümayal tati pu ngümakelu mew’. Welu may, kom pu che mülealu Mapu mew ‘inaye ayüwkeayngün tati ayüwkülelu mew’ (Romanu 12:15).

^ parr. 3 Tüfachi chillkatun mu ka kom ti küpayelelu, ülkantuaiñ ti lifru Ayüwün mu ülkantulelafiyiñ ta Jewba.

^ parr. 8 Biblia feypi Jose ñi mongelefel Jesus 12 tripantu niefulu. Welu Jesus femlu tañi wünen afmatun dungu ñi pulkukünuafiel ti ko, üytungelay ta Jose ka dew rupalu tüfa feypingelay chem no rume kidu mu. Tüfa rakiduameleiñmew Jose ñi dew lawyen. Ka femngechi Jesus külafantukungelu ti orkon mamüll mu, feypifi tati apostol Juan ñi dapiafiel ta Maria, Jesus tañi ñuke, welu mongelefule Jose feychi antü mu, Jesus feypilayafuy tüfa (Juan 19:26, 27).

^ parr. 14 Kafey inaduamnge ti trokiñ “Jesús supo consolar a sus amigos” mülelu La Atalaya 1 noviembre 2010 mu.