Amual ti dungu

Amual tati trokiñ dungu mu

Pu Dungukelu Iney Ngen Jewba

Dullial kewün dungu mapudungun

 KIÑE GOBIERNO KÜME ELKÜNUTUAFI TI MAPU

“Aflayay tañi küme felen”

“Aflayay tañi küme felen”

Tati trokiñche Naciones Unidas pingelu yafültukukefi itrokom pu che ñi welukonke kelluwal, yamniewal ka ñi wedalkanoafiel ti Mapu. ¿Chumngelu femngechi femkey? Kiñe wentru küdawkelu Naciones Unidas mu, feypi: “Fente wedalkangey ta Mapu, müley alün trokiñche wedalkachekelu, müley illamkawün, weychan (awkan), fentren che lefmawkey ñi mapu mu, müley trokiñche llükalkachekelu ka müley tul kutran. Kom tüfa ruparupangey wall Mapu mu”.

Kakelu che wüldungukey ñi müleal kiñe gobierno müten Mapu mew. Epu wentru femngechi rakiduamkefuyngu, ti kim wentru Italia mapu tuwlu, Dante pingey (1265-1321), kafey tati cientifico Albert Einstein pingey (1879-1955). Dante feypikefuy kom pu trokiñ mapu kiñewkülele, müleafuy küme felen Mapu mu. Dante femngechi pengelkünuy ñi feypin ta Jesus: “Kom trokiñ mapu püntükawkülele kayñetuwün mew, kom kisutu apümkawafuy engün” (Luka 11:17).

Ti Epungechi Fütra Weychan (Awkan) kom Mapu püle, fentren che lay epu bomba atomica mu. Rupalu tüfa, Albert Einstein wirintukulelfi kiñe karta tati trokiñche Asamblea General de las Naciones Unidas. Kidu feypi: “Tati trokiñche Naciones Unidas pürüm küme elkünutupe ti dungu Mapu mu, femngechi kiñe gobierno müten mülele, kom pu che küme feleay”.

Welu pu ngüneniealu feychi fütra gobierno mu, ¿re nor dungu fempeafuy may? ¿Küme elkünutupeafuy may ti dungu Mapu mu? Kam, ¿inayentuafuyngün müten kakelu che ngünenielu? Tüfachi ramtun rakiduameleiñmu ñi feypin kiñe kim wentru Lord Acton pingelu, “pu che doy awtoridad niele, doy wedake chengeyngün” pi.

Feymu duamfalngey kom pu che ñi kiñewküleal, fey tañi rüf küme feleal. Welu, ¿chumafuiñ taiñ diturpual tüfa? ¿Maneluwafuiñ ñi femngeal? ¡Femafuiñ llemay! Biblia feypi kom pu che kiñewküleay ka küme feleay. ¿Chumngechi femay tüfa? Pu che tañi gobierno ñi duam mu no, welu may Chaw Dios ñi gobierno ñi duam mu llemay. Kidu dewmafi itrofill mülelu, feymu feley ñi ngünenieafiel Mapu. Biblia mu, feychi Gobierno “Ngünechen ñi ngünenieel” pingey (Luka [Küme Dungu] 4:43, Ngünechen ñi Neyüntükumuyümchi Chillka [NCH]).

CHAW DIOS ÑI GOBIERNO KÜPAYAY

Jesus rakiduampelay feychi Gobierno mu kimeltufilu tañi pu disipulu ñi llellipual: “Itrokom che kimpe tami longko ülmenkülen”, fey ñi femngeal Ngünechen ñi ayünieel “tüfachi mapu mew” (Matew 6:9, 10). Feley, feychi Gobierno mu pu wedañmangelu tañi ayünieel femngewelayay, doy may Chaw Dios tañi ayünieel femngeay.

Chaw Dios ñi Gobierno ka feypingey “tati wenu mülechi Ngünenien” (Matew 5:3, Traducción del Nuevo Mundo [TNM]). ¿Chumngelu? Feychi Gobierno müley ta wenu mu, welu ngünenieafi pu che mülelu Mapu mu. ¡Müna küme dungu ta tüfa! Feychi Gobierno duamnielayay chem plata no rume, fey impuestu kulliwelayaiñ rume.

¿Chumngechi adkünungey tüfachi Gobierno? Chaw Dios elfalkünufi ta Jesus ñi ngünenieal. Tüfa ñi feypiel Biblia Jesus mu:

  • “Elfalkünungey longko ülmenküleal. [...] Alün-ngeketuay tañi gobierno ka aflayay tañi küme felen” (Isaías 9:6, 7).

  •   “Kidu elungey ñi ngünenieal, püramyengeal ka longko ülmen ngeal, femngechi itrokom trokiñche, trokiñke mapu, ka pu kewün dungu ñi serfiaetew engün. Tañi ngünenien [...] rupalayay” (Daniel 7:14).

  • “Tüfachi mapu mew ta [Chaw Ngünechen] longko ülmenkületuy ka kisu tañi Cristo” (Apokalipsi 11:15).

Fey, chumngechi ñi kimeltuel Jesus feychi llellipun mu, tüfachi Gobierno femay Chaw Ngünechen ñi ayünieel Mapu mew. Feychi mu kom pu che kimelelngeay chumngechi kuydayafiel ti Mapu ñi kümeletual.

Doy may, tüfachi Gobierno kimeltuafi itrokom che Chaw Dios ñi ngülam. Tati pu che wichuke püntüwlayay ka kayñetuwlayay. Kafey Biblia feypi: “Wedalkalayayngün, ka chem weda dungu no rume femlayayngün [...]; rüfkünu llemay, tati Mapu apoleay Jewba ñi kimün mew chumngechi tati ko takukey ti lafken” (Isaías 11:9).

Feychi mu itrokom pu che kiñewküleay ka küme feleay Mapu mu, tüfa ñi femkenon tati trokiñche Naciones Unidas. Feley llemay, itrokom pu che “rüf ayüwküleayngün ñi mülen fentren tüngün” (Salmo 37:11). Amulechi antü mu, iney no rume akordalayay ñi mülekefel langümchen, weychan (awkan) ka filla, kafey iney no rume “wedalkaley taiñ Mapu” piwelayay. Welu tüfa, ¿chumül rupayalu? Chaw Dios ñi Gobierno, ¿chumül ngünenieafi Mapu? ¿Chumngechi femay tüfa? ¿Chumafuiñ taiñ kümelkayaetew? Fewla inaduamaiñ.