Amual ti dungu

Pu Dungukelu Iney Ngen Jewba

Dullial kewün dungu mapudungun

ÑI KELLUNGEAL PU FAMILIA

Illkulelmi, ¿chumngechi ngünewafuymi?

Illkulelmi, ¿chumngechi ngünewafuymi?

Rakiduamnge illkulkaelmew kiñe dungu ñi feypiel kam ñi femel tami afkadi. Fey eymi re ellkakünulmi tami illkun, welu tami afkadi ngüneduameymu tami illkulen, feymu eluwkey tami ramtukayaetew: “¿Chem rakiduamküleymi am?”. Tüfa doy lladküleymu, ¿feley no am? Femngechi rupan mu eymi, ¿chumngechi ngüneniewaymi?

 Tami kimafel

  • Eluwülmi tami illkufemal kontupayafeymu kutran. Kiñeke chillka pengeli ngünewnoliyiñ taiñ illkun kontupayafeiñmew presion kutran, piwke kutran, depresion ka pütra kutran. Ka femngechi illkuliyiñ küme umawtuwelayafuiñ, weda duamküleafuiñ, kutran trawaküleafuiñ ka longko kutran nieafuiñ. Feymu llemay, Biblia feypi: “Famentunge ti nüngayüwün, ka elkünunge ti illkun; lladkükilnge ka eluwkilnge tami femal wedake dungu” (Salmo 37:⁠8).

  • Re ellkakünuliyiñ taiñ illkun fey wedalkayafeiñmew. Fentekünunoliyiñ taiñ illkuduamküleal kiñe kutran reke feleafuy, tüfa wedalkayafuy taiñ rakiduam ka piwke. Fey eluwafuiñ chi ñi epurume piwkengeal ka weda dunguyeafiel ta kakelu che. Femngechi femülmi, tami pu che küdawtuafuy kiñentrür müleal eymi mu ka rume wedalkayafuy tami kurewen-ngen.

 Tami femafel

  • Ngüneduamnge tami afkadi tañi küme chumngen. Wirintukuaymi küla kümeke dungu ñi nieel tami afkadi. Fey wiño illkulmi tañi feypietew mu, rakiduamaymi chem tami wirintukuel kidu mu. Tüfa kelluaeymu ngüneniewal tami illkun.

    Biblia ñi feypin: “Feymew mañumtulekeaymün” (Kolosense 3:⁠15).

  •  Wiñoduamtucheaymi. Wünelu mu, rakiduamnge chumngechi ñi pefiel ti dungu tami afkadi. Tüfa kelluaeymu tami kimal tañi chum duamkülen, femngechi Biblia pengelkey tamu ‘piwkeyewal’ (1 Pedro 3:⁠8). Kafey ramtuwaymi: “¿Rüf pepi wiñoduamtulayafun tañi illkutuetew?”.

    Biblia ñi feypin: “Kiñe che [...] rume kümelkakey rulpakünufilu am ñi wedalkangeel” (Proverbios 19:⁠11).

  •  Ayüfal mu feypiaymi tami chum duamkülen. Nütramkalmu kiñe dungu, femngechi feypilayaymi: “Newe duamtuchekelaymi. Feypilaen rume chew tami miyawün”. Welu may, femngechi feypiafuymi chi: “Rume rakiduamkülefun eymi mu dew punlu ka kimnolu am tami chumleken”. Femngechi entulmi tami feypin, ngüneniewaymi tami illkulenoal.

    Biblia ñi feypin: “Ka femngechi tamün nütramyekeelchi dungu ñi ayüfal nütramngeael ka ñi falin kümeke dunguael” (Kolosense 4:⁠6).

  •  Yamün mu allkütuaymi. Dew feypilelfilmi tami dungu, elufinge tami wiñoldunguaetew tami afkadi ka katrütudungulayafimi. Dewle ñi nütram, wiño feypiafimi kiñeke dungu tami feypipeetew tami afkadi, femngechi pengeleaymi tami küme allkütufiel. Eluwülmi tami allkütual, kelluafeymu tami illkuwenoal.

    Biblia ñi feypin: “Müley tamün wüne allkütuael, welu müley tamün pürümkawnoael tamün dunguael” (Santiaw 1:⁠19).