Amual ti dungu

Pu Dungukelu Iney Ngen Jewba

Dullial kewün dungu mapudungun

Jesus, ¿chumngechi wüli ñi mongen “ñi lifrenentuafiel ta kom che”?

Jesus, ¿chumngechi wüli ñi mongen “ñi lifrenentuafiel ta kom che”?

Biblia ñi kimeltukeel

Jesus tañi lan mu, Jewba montulfi itrokom che ti kulpan ka lan mu. Biblia feypi ta Jesus tañi lan mu kulli reke taiñ montulaetew (Efesio 1:⁠7; 1 Pedro 1:⁠18, 19). Feymu Jesus feypi ñi küpan “ñi wültukuael tañi mongen femngechi ñi lifrenentuafiel ta kom che” (Matew 20:⁠28).

¿Chumngelu duamniengefuy “ñi lifrenentuafiel ta kom che”?

Ti wünen wentru Adan, we dewmangelu kulpakelafuy. Doy may Adan rumel mongen nieafuy, welu allkütunofilu am ta Ngünechen ñi feypin, fey ñamümi tüfa (Génesis 3:⁠17-19). Fey rulpalelfi ñi kulpan tañi pu yall (Romanu 5:⁠12). Feymu lle tati Biblia feypi Adan fendewi ka iñchiñ fendekünueiñmu, feymu “püresukona reke” feletuiñ tati kulpan ka lan mew (Romanu 7:⁠14). Kulpanchengelu am iñchiñ, wiño nietulayafuiñ Adan tañi ñamümel (Salmo 49:⁠7, 8).

Adan ñi pu küpanche nielafuyngün maneluwün, feymu Chaw Dios kutrantupiwkeyeeyew engün (Juan 3:⁠16). Welu Ngünechen norngey, feymu pekan ngoymafemtulay pu che ñi kulpan (Salmo 89:⁠14; Romanu 3:⁠23-26). Kidu piwkeyefilu am kom pu che, adkünuy chem ñi duamnieel tañi wiñoduamtuafiel ka apümkayafiel ti kulpan dungu (Romanu 5:⁠6-8). Feymu llemay, Chaw Ngünechen adkünuy tati montulchen.

¿Chem am tati montulchen?

Biblia mu ti dungun “montulchen” pengelkey küla dungu:

  1. Kullingekey ñi falin (Números 3:⁠46, 47).

  2. Kellukey ñi neykümafiel kam montulafiel (Éxodo 21:⁠30).

  3. Ñi falin trürngey tunte kullingekey. *

Ngüneduamaiñ chumngechi nüwküley feychi küla dungu ka Jesus tañi lan mu.

  1. Kullingekey ñi falin. Biblia feypi pu kristiano ‘ngillangeyngün’ reke (1 Korintio 6:⁠20; 7:⁠23). Jesus tañi lan mu kulli, fey ngillafi reke “itrokom kakerume trokiñche, dungun, waria ka trokiñche mülelu ta mapu mew” (Apokalipsi 5:⁠8, 9).

  2. Ñi montulafiel. Jesus lay ‘taiñ montulngeael ta kulpan mew’ (1 Korintio 1:⁠30; Kolosense 1:⁠14; Ebrew 9:⁠15).

  3. Ñi falin trürngey. Jesus kulpalay Adan reke ellaka mu, feymu feychi mongen ñi wültukuel trüri tati mongen ñi ñamümel ta Adan (1 Korintio 15:⁠21, 22, 45, 46). Biblia feypi: ‘Kiñe wentru Adan tañi feyentunon mew, fentren che kulpafengetuy, welu ka femngechi, kiñe wentru Jesucristo tañi feyentun mew, fentren che ta lifrengetuy ta kulpan mew’ (Romanu 5:⁠19). Tüfa küme kimfalkünuy chumngechi kiñe wentru ñi lan müten montulkefi ta fentren che kulpafengelu. Feymu Jesus tañi lan mu ‘montulkefi ta itrokom che’ newentukelu ñi füreneaetew (1 Timotew 2:⁠5, 6).

^ parr. 11 Kuyfike kewün Biblia mu rulpadungungelu, ti dungun “montulchen” küpa feypi kiñe kullitun kam tunte ñi falin kiñe dungu wülngelu ta kangelu mew. Kiñe pengelün dungu, ti griego dungun kafár feypi “küme elkünutual”. Feychi dungun feypingekey ñi küme elkünutual taiñ kulpan (Salmo 65:⁠3). Ti feypin kófer pengeli chem kullingekey ñi montulafiel kiñe dungu (Éxodo 21:⁠30). Ka femngechi ti griego dungun lýtron rulpadungungelu “montulchen” ka rulpadungungeafuy “kullitun ñi montulngeal” (Matew 20:⁠28). Pu wirintukulu griego feypikefuyngün feychi dungun ñi pengelal kiñe püresulelu kam kiñe kona ñi montulngeal.