በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጠበቂያ ግንብ  |  ጥቅምት 2015

 የሽፋኑ ርዕሰ ጉዳይ | መጸለይ የሚያስገኘው ጥቅም አለ?

ጸሎቴን የሚሰማ አለ?

ጸሎቴን የሚሰማ አለ?

አንዳንድ ሰዎች ጸሎታቸውን የሚሰማ ስለሌለ መጸለይ ጊዜ ማባከን እንደሆነ ያስባሉ። ሌሎች ደግሞ የሚጸልዩ ቢሆንም ምንም መልስ እንዳላገኙ ይሰማቸዋል። ለምሳሌ በአምላክ የማያምን አንድ ሰው፣ አምላክ እንዲህ ይመስላል ብሎ አንድ አካል በምናቡ ከፈጠረ በኋላ “እስቲ በሹክሹክታ እንኳ አናግረኝ” ብሎ ጸለየ። ከዚያ በኋላ ግን ከአምላክ “ምንም መልስ እንዳላገኘ” ተናግሯል።

ይሁንና መጽሐፍ ቅዱስ ጸሎት የሚሰማ አንድ አምላክ መኖሩን በማያሻማ መንገድ ይናገራል። መጽሐፍ ቅዱስ በጥንት ዘመን ለኖረ ሕዝብ የተነገረውን ይህን ሐሳብ ይዟል፦ “እርዳታ ለማግኘት በምትጮኹበት ጊዜ በእርግጥ ሞገስ ያሳያችኋል፤ ጩኸታችሁን እንደሰማም ይመልስላችኋል።” (ኢሳይያስ 30:19) ሌላ የመጽሐፍ ቅዱስ ጥቅስ ደግሞ ‘የቅኖች ጸሎት ደስ ያሰኘዋል’ ይላል።—ምሳሌ 15:8

ኢየሱስ ወደ አባቱ ያቀረበው ጸሎት “ተሰማለት።”—ዕብራውያን 5:7

በተጨማሪም መጽሐፍ ቅዱስ ላቀረቡት ጸሎት መልስ ስላገኙ ሰዎች ይናገራል። አንድ የመጽሐፍ ቅዱስ ጥቅስ ኢየሱስ ‘ከሞት ሊያድነው ለሚችለው ልመና’ እንዳቀረበ ከመግለጹም ሌላ ‘ጸሎቱ እንደተሰማለት’ ይናገራል። (ዕብራውያን 5:7) በዳንኤል 9:21 እና በ2 ዜና መዋዕል 7:1 ላይ ሌሎች ምሳሌዎችን እናገኛለን።

ታዲያ አንዳንድ ሰዎች ጸሎታቸው መልስ እንዳላገኘ የሚሰማቸው ለምንድን ነው? ጸሎታችን እንዲሰማልን ከፈለግን ወደ ማንኛውም አምላክ ወይም ወደ ቅዱሳን ሳይሆን የመጽሐፍ ቅዱስ አምላክ ወደሆነው ወደ ይሖዋ * ብቻ መጸለይ ይኖርብናል። በተጨማሪም አምላክ፣ በእሱ ዘንድ ተቀባይነት ያላቸውን ነገሮች “ከፈቃዱ ጋር በሚስማማ ሁኔታ” እንድንጠይቅ ይፈልጋል። በዚህ መንገድ የምንጸልይ ከሆነ አምላክ ‘እንደሚሰማን’ ተናግሯል። (1 ዮሐንስ 5:14) ስለዚህ ጸሎታችን እንዲሰማልን ከፈለግን መጽሐፍ ቅዱስ ውስጥ የተገለጸውን አምላክ ማወቅና የእሱን ፈቃድ መማር ያስፈልገናል።

ብዙ ሰዎች፣ ጸሎት አንድ ዓይነት ሃይማኖታዊ ሥርዓት ብቻ እንዳልሆነና አምላክ ለእሱ የሚቀርበውን ጸሎት ሰምቶ መልስ እንደሚሰጥ ያምናሉ። በኬንያ የሚኖረው አይሳክ እንዲህ ብሏል፦ “መጽሐፍ ቅዱስ እንዲገባኝ እርዳታ ለማግኘት ጸልዬ ነበር። ከዚያ ብዙም ሳይቆይ አንድ ሰው ወዳለሁበት መጥቶ ስፈልገው የነበረውን እርዳታ ሰጠኝ።” በፊሊፒንስ የምትኖረው ሂልዳ ሲጋራ ማጨስ ለማቆም ትፈልግ ነበር። ብዙ ጊዜ ሊሳካላት ስላልቻለ ባለቤቷ “አምላክ እንዲረዳሽ ለምን አትጸልይም?” የሚል ሐሳብ አቀረበላት። እሷም ምክሩን በሥራ ላይ ካዋለች በኋላ እንዲህ ብላለች፦ “አምላክ ያደረገልኝ እርዳታ በጣም አስገርሞኛል። የማጨስ ፍላጎቴ እየጠፋ መጣ። ከዚያም ሙሉ በሙሉ ማጨስ አቆምኩ።”

አምላክ በግል የሚያሳስቡህ ነገሮች ከፈቃዱ ጋር የሚስማሙ እስከሆኑ ድረስ አንተን የመርዳት ፍላጎት አለው?

^ አን.6 መጽሐፍ ቅዱስ እንደሚናገረው የአምላክ የግል ስም ይሖዋ ነው።