በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ንቁ!  |  መጋቢት 2013

 የሽፋኑ ርዕሰ ጉዳይ

ጥሩ አባት መሆን የሚቻለው እንዴት ነው?

ጥሩ አባት መሆን የሚቻለው እንዴት ነው?

በደቡብ አፍሪካ የሚኖረው ማይክል * “የተሳሳትኩት ነገር ምንድን ነው?” የሚለው ጥያቄ እረፍት ይነሳዋል። ጥሩ አባት ለመሆን ብዙ ቢያደርግም ዓመፀኛ ስለሆነው የ19 ዓመት ልጁ ባሰበ ቁጥር የተሻለ አባት መሆን ይችል እንደነበረ ይሰማዋል።

በተቃራኒው በስፔን የሚኖረው ቴሪ ደግሞ የአባትነት ኃላፊነቱን በመወጣት ረገድ የተሳካለት ይመስላል። ልጁ አንድሩ እንዲህ ብሏል፦ “ስለ አባቴ ያለኝ የልጅነት ትዝታ ደስ የሚል ነው፤ ሲያነብልኝ፣ ሲያጫውተኝ እንዲሁም ለብቻችን ጊዜ ለማሳለፍ እንድንችል ወደተለያዩ ቦታዎች ሲወስደኝ ትዝ ይለኛል። በጨዋታ መልክ ያስተምረኝ ነበር።”

ጥሩ አባት መሆን ቀላል ነገር እንዳልሆነ አይካድም። ይሁን እንጂ መጽሐፍ ቅዱስ በዚህ ረገድ ሊረዷችሁ የሚችሉ ምክሮችን ይዟል። ብዙ አባቶች እነሱም ሆኑ ቤተሰቦቻቸው በመጽሐፍ ቅዱስ ውስጥ የሚገኘውን ጥበብ የተንጸባረቀበት ምክር ሥራ ላይ ሲያውሉ እንደሚጠቀሙ አስተውለዋል። እስቲ አባቶችን ሊያግዙ የሚችሉ አንዳንድ ተግባራዊ ሊሆኑ የሚችሉ የመጽሐፍ ቅዱስ ምክሮችን እንመልከት።

 1. ለቤተሰባችሁ ጊዜ ስጡ

አባት እንደመሆናችሁ መጠን ልጆቻችሁ በእናንተ ዘንድ ትልቅ ቦታ እንዳላቸው ማሳየት የምትችሉት እንዴት ነው? ለልጆቻችሁ ምግብና መጠለያ ለማቅረብ የምትከፍሉትን መሥዋዕትነት ጨምሮ በርካታ ነገሮች እንደምታደርጉላቸው የታወቀ ነው። ልጆቻችሁ በእናንተ ዘንድ ትልቅ ቦታ ባይኖራቸው ኖሮ እነዚህን ነገሮች አታደርጉም ነበር። ይሁን እንጂ ከልጆቻችሁ ጋር በቂ ጊዜ የማታሳልፉ ከሆነ ከእነሱ ይልቅ ለሥራችሁ፣ ለጓደኞቻችሁ፣ በትርፍ ጊዜ ለምትሠሯቸው ነገሮችና ለመሳሰሉት ትልቅ ቦታ እንደምትሰጡ ሊያስቡ ይችላሉ።

አንድ አባት ከልጆቹ ጋር ጊዜ ማሳለፍ መጀመር የሚኖርበት መቼ ነው? እናት ከልጇ ጋር ትስስር መፍጠር የምትጀምረው ልጁ ገና ማህፀን ውስጥ እያለ ነው። አንድ ጽንስ በ16 ሳምንታት ውስጥ መስማት ይጀምራል። በዚህ ጊዜ ውስጥ አባትም ቢሆን ካልተወለደው ልጁ ጋር ልዩ የሆነ ዝምድና መመሥረት ይችላል። በዚህ ወቅት አባትየው የልጁን የልብ ትርታ ሊያዳምጥ፣ ልጁ ሲንፈራገጥ ሊሰማው፣ ሊያወራለትና ሊዘምርለት ይችላል።

የመጽሐፍ ቅዱስ ምክር፦ በመጽሐፍ ቅዱስ ዘመን አባቶች ልጆቻቸውን ያስተምሩ ነበር። በዘዳግም 6:6, 7 ላይ ከሚገኘው የመጽሐፍ ቅዱስ ሐሳብ መረዳት እንደሚቻለው አባቶች ከልጆቻቸው ጋር አዘውትረው ጊዜ እንዲያሳልፉ ይጠበቅባቸው ነበር፤ ጥቅሱ እንዲህ ይላል፦ “ዛሬ የምሰጥህን እነዚህን ትእዛዛት በልብህ ያዝ። ለልጆችህም አስጠናቸው፤ በቤትህ ስትቀመጥ፣ በመንገድም ስትሄድ፣ ስትተኛና ስትነሣም ስለ እነርሱ ተናገር።”

2. ጥሩ አባቶች ጥሩ አዳማጮች ናቸው

ልጃችሁ ላይ ሳትፈርዱ በእርጋታ አዳምጡ

ከልጆቻችሁ ጋር ጥሩ የሐሳብ ልውውጥ ለማድረግ ጥሩ አድማጭ መሆን ያስፈልጋችኋል። ሳትደናገጡ ወይም ሳትቆጡ ማዳመጥ መቻል ይኖርባችኋል።

በቁጣ ቶሎ የምትገነፍሉ ከሆነ አሊያም በልጆቻችሁ ላይ የመፍረድ አዝማሚያ ካላችሁ የውስጣቸውን አውጥተው ለእናንተ የመናገር ፍላጎት አይኖራቸውም። በእርጋታ የምታዳምጧቸው ከሆነ ግን ከልብ እንደምታስቡላቸው ማየት ይችላሉ። ይህ ደግሞ የውስጣቸውን አውጥተው እንዲናገሩ ያነሳሳቸዋል።

የመጽሐፍ ቅዱስ ምክር፦ በመጽሐፍ ቅዱስ ውስጥ የሚገኘው ጥበብ የተንጸባረቀበት ምክር በብዙ የሕይወት ዘርፎች ጠቃሚ ሆኖ ተገኝቷል። ለምሳሌ መጽሐፍ ቅዱስ “ሰው ሁሉ ለመስማት የፈጠነ፣ ለመናገር የዘገየና ለቁጣ የዘገየ መሆን አለበት” ይላል። (ያዕቆብ 1:19) ይህን የመጽሐፍ ቅዱስ ምክር ሥራ ላይ የሚያውሉ አባቶች ከልጆቻቸው ጋር በደንብ መግባባት ይችላሉ።

 3. ፍቅራዊ ተግሣጽ ስጧቸው እንዲሁም አመስግኗቸው

በምታዝኑበት ወይም በምትቆጡበት ጊዜ እንኳ የምትሰጡት ተግሣጽ ለልጃችሁ ዘላቂ ጥቅም እንደምታስቡ የሚያሳይ መሆን አለበት። ተግሣጽ ሲባል ምክርን፣ እርማትንና ትምህርትን አስፈላጊ ሲሆን ደግሞ ቅጣትን ያካትታል።

በሌላ በኩል ደግሞ ተግሣጽ ይበልጥ ውጤታማ የሚሆነው አባት ልጆቹን አዘውትሮ የሚያመሰግን ከሆነ ነው። በጥንት ጊዜ የተነገረ አንድ ምሳሌ “ባግባቡ የተነገረ ቃል፣ በብር መደብ ላይ እንደ ተቀረጸ የወርቅ እንኮይ ነው” ይላል። (ምሳሌ 25:11) ምስጋና አንድ ልጅ ጥሩ ባሕርያትን እንዲያፈራ ያደርገዋል። ልጆች በራስ የመተማመን መንፈስ እንዲኖራቸው እውቅና ሊሰጣቸው አልፎ ተርፎም አድናቆት ሊቸራቸው ይገባል። ልጆቹን ለማመስገን አጋጣሚዎችን በንቃት የሚከታተል አባት ልጆቹ በራስ የመተማመን መንፈስ እንዲያዳብሩና ትክክል የሆነውን ነገር ከማድረግ ወደኋላ እንዳይሉ ይረዳቸዋል።

የመጽሐፍ ቅዱስ ምክር፦ “አባቶች ሆይ፣ ቅስማቸው እንዳይሰበር ልጆቻችሁን አታበሳጯቸው።”ቆላስይስ 3:21

4. ለትዳር ጓደኛችሁ ፍቅርና አክብሮት ይኑራችሁ

አንድ አባት ሚስቱን የሚይዝበት መንገድ ልጆቹ ላይ ተጽዕኖ ማሳደሩ አይቀርም። ስለ ልጆች አስተዳደግ የሚያጠና አንድ የባለሙያዎች ቡድን እንዲህ ብሏል፦ “አንድ አባት ለልጆቹ ሊያደርግ ከሚችላቸው ጥሩ ነገሮች አንዱ እናታቸውን ማክበር ነው። . . . እርስ በርሳቸው የሚከባበሩና ለልጆቻቸው ይህን የሚያሳዩ ወላጆች ልጆቻቸው ደስተኛ እንዲሆኑ እንዲሁም እንደሚወደዱ እንዲሰማቸው ያደርጋሉ።”—ዚ ኢምፖርታንስ ኦቭ ፋዘርስ ኢን ዘ ሄልዚ ዴቨሎፕመንት ኦቭ ችልድረን *

የመጽሐፍ ቅዱስ ምክር፦ “ባሎች ሆይ፣ . . . ሚስቶቻችሁን መውደዳችሁን ቀጥሉ፤ . . . ከእናንተ እያንዳንዱ ራሱን እንደሚወድ ሁሉ ሚስቱንም ይውደድ።”ኤፌሶን 5:25, 33

 5. የአምላክን ጥበብ ሥራ ላይ አውሉ

ለአምላክ ልባዊ ፍቅር ያላቸው አባቶች ለልጆቻቸው ውድ የሆነ ቅርስ ማውረስ ይችላሉ፤ ይኸውም ከሰማዩ አባታቸው ጋር የተቀራረበ ዝምድና እንዲመሠርቱ ሊረዷቸው ይችላሉ።

ለበርካታ አሥርተ ዓመታት ስድስት ልጆቹን ለማሳደግ ሲደክም የኖረውና ከይሖዋ ምሥክሮች አንዱ የሆነው አንቶንዮ ከሴት ልጁ የሚከተለው መልእክት ደርሶት ነበር፦ “ውድ አባቴ፣ ይሖዋ አምላክን፣ ጎረቤቶቼንና ራሴን እንድወድ በአጠቃላይ ሚዛናዊ ሰው እንድሆን ስለረዳኸኝ አመሰግንሃለሁ። ይሖዋን እንደምትወድና ለእኔም በግል እንደምታስብልኝ ማየት ችያለሁ። አባዬ፣ በሕይወትህ ይሖዋን ስላስቀደምክና ልጆችህን ከአምላክ እንደተገኙ ስጦታዎች አድርገህ ስለያዝከን አመሰግንሃለሁ!”

የመጽሐፍ ቅዱስ ምክር፦ “አምላክህን እግዚአብሔርን በፍጹም ልብህ፣ በፍጹም ነፍስህ፣ በፍጹም ኀይልህ ውደድ። ዛሬ የምሰጥህን እነዚህን ትእዛዛት በልብህ ያዝ።”ዘዳግም 6:5, 6

አባትነት ከእነዚህ አምስት ነጥቦች በተጨማሪ ሌሎች ብዙ ነገሮችን እንደሚያጠቃልል ግልጽ ነው፤ ጥሩ አባት ለመሆን የተቻላችሁን ያህል ጥረት ብታደርጉም ፍጹም አባት ልትሆኑ እንደማትችሉ የታወቀ ነው። ይሁን እንጂ እነዚህን ነጥቦች ሚዛናዊና ፍቅራዊ በሆነ መንገድ ሥራ ላይ ለማዋል ከጣራችሁ ጥሩ አባት መሆን ትችላላችሁ። *

^ စာပိုဒ်၊ 3 በዚህ ርዕስ ውስጥ የተጠቀሱት አንዳንዶቹ ስሞች ተቀይረዋል።

^ စာပိုဒ်၊ 19 አባት ከልጆቹ እናት ጋር የተፋታ ቢሆንም እንኳ አክብሮት የሚያሳያት ከሆነ ልጆች ከእናታቸው ጋር ጥሩ ዝምድና ሊኖራቸው ይችላል።

^ စာပိုဒ်၊ 25 በቤተሰብ ሕይወት ረገድ ተጨማሪ መመሪያ ማግኘት ከፈለጋችሁ የቤተሰብ ደስታ ቁልፉ ምንድን ነው? የተባለውን መጽሐፍ ተመልከቱ፤ ይህን መጽሐፍ www.jw.org በተባለው ድረ ገጽ ላይ ማግኘት ይቻላል።